Be ka se isịnede

Abasi Enyene Enyịn̄ Ifan̄?

Abasi Enyene Enyịn̄ Ifan̄?

Se Bible ọdọhọde

Abasi enyene ata enyịn̄ kiet. Ẹsiwet enyịn̄ oro nte יהוה ke usem Hebrew. Enyịn̄ oro ke ẹsiwak ndikot “Jehovah” ke Ikọmbakara. * Abasi ama ada prọfet Isaiah ewet ete: “Ami ndi Jehovah. Enyịn̄ mi edi oro.” (Isaiah 42:8) Ata enyịn̄ Abasi emi ama esịne ke Bible ebe itie 7,000 ini ẹkewetde Bible ẹma—enye ama enen̄ede awak ke Bible akan enyịn̄ efen ekededi emi ẹsikotde Abasi m̀mê owo ekededi. *

Ndi enyene enyịn̄ en̄wen emi ẹsikotde Jehovah?

Kpa ye oro Bible ọdọhọde ke Abasi enyene ata enyịn̄ kiet, Bible esikot Abasi nsio nsio enyịn̄ oro owụtde utọ owo emi enye edide. Uwụtn̄kpọ mme enyịn̄ oro edi emi ke idak; kpukpru enyịn̄ emi owụt utọ owo oro Jehovah Abasi edide.

Enyịn̄

Itie Odude

Se Ọwọrọde

Allah

(Idụhe)

“Allah” ọwọrọ “Abasi.” Ẹda enye ẹto ikọ Arabic. Enye idịghe ata enyịn̄. Okpokot Bible usem Arabic ye ndusụk Bible ke nsio nsio usem, “Allah” ke edikụt ke mme itie emi “Abasi” esidude ke Bible.

Ata Ọkpọsọn̄

Genesis 17:1

Inyeneke se isọn̄de ikan enye. Ikọ Hebrew oro ʼEl Shad·daiʹ, m̀mê “Ata Ọkpọsọn̄ Abasi,” odu itie itiaba ke Bible.

Alpha ye Omega

Ediyarade 1:8; 21:6; 22:13

“Akpa ye akpatre,” m̀mê “ntọn̄ọ ye utịt,” ọwọrọ ke idụhe Ata Ọkpọsọn̄ Abasi efen emi okodude mbemiso Jehovah, ke inyụn̄ idụhe efen oro etienede enye edem. (Isaiah 43:10) Alpha ye omega ẹdi akpa ye akpatre abisi usem Greek.

Andisọn̄ọ Usen

Daniel 7:9, 13, 22

Enye inyeneke ntọn̄ọ; enye ama ododu ke nsinsi nsinsi emi ekebede, mbemiso owo ndomokiet m̀mê n̄kpọ ekededi.—Psalm 90:2.

Andibot

Isaiah 40:28

Enye okobot kpukpru n̄kpọ.

Ete

Matthew 6:9

Enye edi Andinọ uwem.

Abasi

Genesis 1:1

Enye enyene odudu; enye ke ẹkpetuak ibuot ẹnọ. Ikọ Hebrew emi ʼElo·himʹ esiwụt ke Jehovah enyene ubọn̄, enyene uku, m̀mê uten̄e.

Abasi mme abasi

Deuteronomy 10:17

Enye edi akakan Abasi; enye itiehe nte mme abasi emi mînyeneke ufọn, emi ndusụk owo ẹkponode.—Isaiah 2:8.

Akwa Anditeme

Isaiah 30:20, 21

Enye esikpep owo se idifọnde ye owo onyụn̄ eteme owo nnennen usụn̄.—Isaiah 48:17, 18.

Akwa Andinam

Psalm 149:2

Enye okobot kpukpru n̄kpọ.—Ediyarade 4:11.

Abasi inemesịt

1 Timothy 1:11

Enye esikop idatesịt kpukpru ini.—Psalm 104:31.

Andikop akam

Psalm 65:2

Enye esikpan̄ utọn̄ okop akam mbon oro ẹbuọtde idem ye enye.

Ami Nyakabade Ndi

Exodus 3:14, King James Version

Jehovah esikabade edi se enye oyomde man uduak esie osu. Ndusụk Bible ẹkabade enyịn̄ emi nte “Ami Nyakabade Ndi Se Mmade” mîdịghe “Ami Nyakabade Ndi Se Ndikabarede Ndi.” (The Emphasised Bible, by J. B. Rotherham; Edikabade Eke Obufa Ererimbot) Se ẹtịn̄de emi anam ẹdiọn̄ọ se ata enyịn̄ esie, Jehovah ọwọrọde, enyịn̄ oro odu ke ufan̄ikọ Bible oro etienede.—Exodus 3:15.

Ufup

Exodus 34:14, Edisana Ŋwed Abasi Ibom

Enye iyomke ituak ibuot inọ abasi en̄wen. Ndusụk Bible ẹkabade ufụp nte “Iyomke owo atuak ibuot ọnọ abasi en̄wen ekededi” ye “oyom san̄asan̄a utuakibuot.”—God’s Word Bible; New World Translation, 2013 edition.

Nsinsi Edidem

Ediyarade 15:3

Ukara esie inyeneke ntọn̄ọ inyụn̄ inyeneke utịt.

Ọbọn̄

Psalm 135:5

Andinyene m̀mê Eteufọk; ke Hebrew ʼA·dhohnʹ ye ʼAdho·nimʹ.

Jehovah mme udim, Ọbọn̄ Sabaoth

Isaiah 1:9, Edisana Ŋwed Abasi Ibom; Rome 9:29, King James Version

Andikara udịmekọn̄ mme angel. “Ọbọn̄ Sabaoth” ekeme ndiwọrọ “Jehovah mme udịm,” onyụn̄ ekeme ndiwọrọ “Ọbọn̄ udịmekọn̄ [heaven].”—Rome 9:29, Edikabade Eke Obufa Ererimbot; NET Bible, footnote.

Ata Edikon̄

Psalm 47:2

Enye edi andikon̄ n̄kan ke ofụri enyọn̄ ye isọn̄.

Ata Edisana

Mme N̄ke 9:10

Enye asana onyụn̄ anana ndo ke kpukpru usụn̄ akan owo efen ekededi.

Oboteso

Isaiah 64:8

Enye enyene unen ndinam se enye amade ye mme owo ye mme idụt, kpa nte oboteso enyenede unen ndinam se enye amade ye mbat ubot eso.—Rome 9:20, 21.

Andifak

Isaiah 41:14

Ada iyịp Jesus Christ afak mîdịghe edep ubonowo osio ke idiọkn̄kpọ ye n̄kpa.—John 3:16.

Akwa itiat

Psalm 18:2, 46

Ọkpọsọn̄ ebiet ubọhọ ye Andinyan̄a.

Andinyan̄a

Isaiah 45:21

Enye esinyan̄a ke ini afanikọn̄ m̀mê nsobo.

Ekpemerọn̄

Psalm 23:1

Enye esise aban̄a ikọt esie.

Akakan Ọbọn̄ Andikara

Genesis 15:2

Enye enyene ofụri odudu ye unen; ke Hebrew ʼAdho·naiʹ.

Andikon̄ N̄kan

Daniel 7:18, 27

Enye edi N̄kon̄n̄kan Andikara enyọn̄ ye isọn̄.

Mme enyịn̄ ebiet ke N̄wed Abasi usem Hebrew

Ẹkot ndusụk itie ke Bible ẹdian Jehovah, edi emi iwọrọke ke oro edi mme enyịn̄ en̄wen oro ẹsikotde Abasi.

Enyịn̄ ebiet

Itie Odude

Se Ọwọrọde

Jehovah-jireh

Genesis 22:13, 14

Jehovah Ọyọnọ.

Jehovah-nissi

Exodus 17:15

“Jehovah Edi Eto Idiọn̄ọ Mi,” m̀mê “Idiọn̄ọ mi.” (Today’s New International Version) Jehovah edi Abasi emi ekemede ndin̄wam ikọt esie nnyụn̄ n̄kpeme ikọt esie kpukpru ini.—Exodus 17:13-16.

Jehovah-shalom

Judges 6:23, 24

Jehovah Edi Emem.

Jehovah-shammah

Ezekiel 48:35, footnote, American Standard Version

“Jehovah Odu Do.”

Ntak anade idiọn̄ọ ata enyịn̄ Abasi isinyụn̄ ikot enye

  • Abasi ada ata enyịn̄ esie, Jehovah, ke akpan n̄kpọ, oro akanam enye ọdọn̄ enyịn̄ oro ke ata ediwak itie ke Bible.—Malachi 1:11.

  • Jesus, emi edide Eyen Abasi ama esima nditịn̄ mban̄a enyịn̄ Abasi. Ke uwụtn̄kpọ, enye ama eben̄e Jehovah ke akam ete: “Yak ẹnam enyịn̄ fo asana.”—Matthew 6:9; John 17:6.

  • Ndidiọn̄ọ enyịn̄ Jehovah nnyụn̄ nsikot enyịn̄ oro esịne ke otu akpa n̄kpọ emi edinamde owo edi ufan Jehovah. (Psalm 9:10; Malachi 3:16) Owo emi edide ufan Abasi ayadia ufọn, sia Abasi ọn̄wọn̄ọ ete: “Koro enye amade mi, ami n̄ko nyọnọ enye edinyan̄a. Ami nyekpeme enye koro enye ọfiọkde enyịn̄ mi.”Psalm 91:14.

  • Bible ọdọhọ ete: “Okposụkedi se ẹkotde ‘abasi’ ẹdude ke heaven ye ke isọn̄, kpa nte ediwak ‘abasi’ ye ediwak ‘mbọn̄’ ẹdude.” (1 Corinth 8:5, 6) Edi Bible etịn̄ ke ata Abasi kiet kpot odu, ke enyịn̄ esie ekere Jehovah.—Psalm 83:18.

^ ikp. 1 Ndusụk mbon Hebrew oro ẹkpepde n̄kpọ ẹban̄a Bible ẹsima ndikot Abasi “Yahweh.”

^ ikp. 1 Ibio ibio usụn̄ emi mme owo ẹsikotde ata enyịn̄ Abasi edi “Jah,” ndien “Jah” odu ke n̄kpọ nte itie 50 ke Bible, edieke abatde enye emi esịnede ke utọ ikọ nte “Hallelujah,” m̀mê “Alleluia,” esịn. “Hallelujah,” m̀mê “Alleluia,” ọwọrọ “ẹtoro Jah!”—Ediyarade 19:1; American Standard Version; Edisana Ŋwed Abasi Ibom.