Be ka se isịnede

Didie ke Jesus Anyan̄a Ubonowo?

Didie ke Jesus Anyan̄a Ubonowo?

Se Bible ọdọhọde

Jesus ama anyan̄a mbon emi ẹsọn̄ọde ẹda ye Abasi ini enye akakpade nte uwa ufak. (Matthew 20:28) Oro anam Bible okot Jesus “Andinyan̄a ererimbot.” (1 John 4:14) Bible ọdọhọ n̄ko ke “edinyan̄a itoho owo efen ekededi, koro enyịn̄ baba kiet efen idụhe ke idak enyọn̄ eke ẹnọde owo, emi ẹkpedade ẹnyan̄a nnyịn.”—Utom 4:12.

Jesus ama ‘atabi n̄kpa ke ibuot kpukpru mbon’ emi ẹbuọtde idem ye enye. (Mme Hebrew 2:9; John 3:16) Ekem “Abasi ama anam enye eset ke n̄kpa” afiak ọnyọn̄ heaven; enye edi spirit. (Utom 3:15) Mme Hebrew 7:25 etịn̄ se enye anamde do ke heaven ete: “Amaedi mbon oro ẹsan̄ade ke enye ẹkpere Abasi, enye n̄ko ekeme ndinyan̄a mmọ ọyọhọ ọyọhọ, koro enye odude uwem kpukpru ini ndinam n̄kpeubọk nnọ mmọ.”

Ntak emi iyomde Jesus ekpe Abasi ubọk ọnọ nnyịn?

Kpukpru nnyịn idi mme anam idiọkn̄kpọ. (Rome 3:23) Idiọkn̄kpọ adian̄ade nnyịn ọkpọn̄ Abasi, esinyụn̄ anam ikpa. (Rome 6:23) Edi Jesus edi “andin̄wam” mbon emi ẹbuọtde idem ke n̄kpa emi enye akakpade afak ubonowo. (1 John 2:⁠1) Enye ekpe Abasi ubọk ọnọ mmọ, eben̄e Abasi okop akam mmọ onyụn̄ ada n̄kpa imọ efen mme idiọkn̄kpọ mmọ. (Matthew 1:21; Rome 8:34) Abasi esikop n̄kpeubọk oro sia ekem ye uduak esie. Abasi ọkọnọ Jesus edi isọn̄ “man okpoto ke enye ẹnyan̄a ererimbot.”—John 3:⁠17.

Ndi owo ndinịm Jesus ke akpanikọ edi n̄kukụre se idinamde ẹnyan̄a enye?

Ihih. Kpa ye emi anade inịm Jesus ke akpanikọ man ẹnyan̄a nnyịn, idịghe n̄kukụre se anade inam edi oro. (Utom 16:30, 31) Bible ọdọhọ ete: “Kpa nte idem eke mînyeneke spirit akpade, ntre n̄ko ke mbuọtidem eke mîsan̄ake ye utom akpa.” (James 2:26) Man ẹnyan̄a nnyịn:

  • Ana ikpep iban̄a Jesus ye Jehovah Ete esie.—John 17:⁠3.

  • Ana ibuọt idem ye mmọ.—John 12:44; 14:⁠1.

  • Ana ikop uyo mmọ man iwụt ke imọbuọt idem ye mmọ. (Luke 6:46; 1 John 2:17) Jesus ama ekpep ke idịghe kpukpru mbon emi ẹkotde imọ “Ọbọn̄” ke ẹdinyan̄a, edi ke mbon emi ‘ẹnamde uduak Ete imọ emi odude ke heaven’ kpọt ke ẹdinyan̄a.—Matthew 7:21.

  • Ana ika iso isọn̄ọ ida ye Abasi kpa ye emi n̄kpọ ọsọn̄de ye nnyịn. Jesus ama anam emi an̄wan̄a ini enye ọkọdọhọde ete: “Ẹyenyan̄a owo eke ediyọde tutu esịm utịt.”—Matthew 24:⁠13.