Be ka se isịnede

Ndi Bible Ọdọhọ ke Isọn̄ Emi Edi Mbatmbat?

Ndi Bible Ọdọhọ ke Isọn̄ Emi Edi Mbatmbat?

Se Bible ọdọhọde

Bible idọhọke ke isọn̄ emi edi mbatmbat mbatmbat. * Bible idịghe n̄wed ifiọk ntaifiọk. Edi se Bible etịn̄de aban̄a ifiọk ntaifiọk edi ukem ye akpanikọ emi ntaifiọk ẹdụn̄ọrede ẹkụt. Kpukpru se Bible etịn̄de edi akpanikọ, idinyụn̄ itreke-tre ndidi akpanikọ.—Psalm 111:8.

 Nso ke ikọ Bible oro “utịt isọn̄ mbinan̄” ọwọrọ?

Ikọ oro “utịt isọn̄ mbinan̄” ye “utịt isọn̄” ke Bible ada aban̄a n̄kpọ. Ntre owo ikpadaha nte ke ikọ oro ọwọrọ ke isọn̄ emi etie nte ekebe, m̀mê ke enye enyene utịt mbinan̄. (Isaiah 11:12; Job 37:3) Ikọ mbiba oro ẹtie nte ndamban̄a ikọ, emi adade aban̄a ofụri isọn̄. Bible esinyụn̄ ada “edem usiahautịn ye edem usoputịn, ye edem edere ye edem usụk” etịn̄ aban̄a ofụri isọn̄.—Luke 13:29.

Ikọ Hebrew oro ẹkabarede “utịt” etie nte ebetọ ikọ emi ẹdade ẹto ikọ oro “mba.” N̄wed emi ẹkotde, The International Standard Bible Encyclopedia, ọdọhọ ke “sia eka inuen esitatde mba esie ofụk nditọ esie, [ke ikọ Hebrew oro ẹkabarede ‘utịt’] ada aban̄a utịt n̄kpọ ekededi emi atarade.” N̄wed oro ọdọhọ n̄ko ke ikọ Hebrew oro ke Job 37:3 ye ke Isaiah 11:12, “ọwọrọ mbenesụk, adan̄a, m̀mê ebiet emi isọn̄ adian̄arede ye mmọn̄.” *

 Nso kaban̄a idomo emi Devil okodomode Jesus?

Bible ọdọhọ ke Devil ama ada [Jesus] “ọdọk ata edikon̄ obot, onyụn̄ owụt enye kpukpru mme obio ubọn̄ ererimbot ye ubọn̄ mmọ,” man odomo enye. (Matthew 4:8) Ndusụk owo ẹdọhọ ke itie Bible emi owụt ke owo ekeme ndida ke ebiet kiet n̄kụt ofụri ererimbot, ke oro owụt ke ererimbot edi mbatmbat. Edi, etie nte ikọ oro “ata edikon̄ obot” aban̄a n̄kpọ en̄wen idịghe akpan ebiet ndomokiet. Se ntak ifan̄ emi anamde idọhọ ntre mi:

  • Idụhe ebiet ndomokiet ke ererimbot emi owo ekemede ndida n̄kụt kpukpru obio ke ererimbot emi.

  • Devil ikowụtke Jesus kpukpru mme obio ubọn̄ ererimbot kpọt, edi ama ọwụt enye mme “ubọn̄ mmọ” n̄ko. Idụhe ebiet kiet emi owo ekemede ndida n̄kụt kpukpru ubọn̄ ererimbot emi. Ntre etie nte Devil okowụt Jesus mme n̄kpọ emi ke n̄kukụt. Emi onyụn̄ etie nte owo ndida fon n̄wụt owo ndise nsio nsio itie ke isọn̄.

  • Luke 4:5 etịn̄ se iketịbede n̄ko. Itie oro ọdọhọ ke Devil okowụt Jesus “kpukpru mme obio ubọn̄ isọn̄ ke idaha kiet.” Idụhe nte owo ekemede ndikụt kpukpru oro ini kiet. Ntre anaedi enyene usụn̄ en̄wen emi Devil akadade owụt Jesus mme n̄kpọ emi, edi idighe ke usụn̄ emi nnyịn mme owo ikemede ndida enyịn nnyịn n̄kụt.

^ ikp. 3 Bible ọdọhọ ke Abasi odụn̄ ke “enyọn̄ ekara isọn̄.” (Isaiah 40:22) Ndusụk ntaifiọk ẹdọhọ ke ikọ oro “ekara” ke itie Bible emi, ekeme ndiwọrọ n̄kpọ emi etiede iboro iboro nte sokoro, edi ndusụk mmọ inyịmeke. M̀mê mmọ ẹnyịme m̀mê inyịmeke, se idiọn̄ọde edi ke Bible idọhọke ke isọn̄ emi edi mbatmbat.

^ ikp. 8 Odu ke page 4 ke Ọyọhọ Eboho 2, emi ẹkefiakde ẹsio.