Be ka se isịnede

Mmanie Ẹdika Heaven?

Mmanie Ẹdika Heaven?

Se Bible ọdọhọde

Abasi emek ndusụk Christian emi ẹsọn̄ọde ẹda ye enye man anam mmọ ẹset ẹkedu uwem ke heaven. (1 Peter 1:3, 4) Ẹma ẹmek mmọ, ana mmọ ẹka iso ẹsọn̄ọ ẹda ye Abasi ẹnyụn̄ ẹdu uwem nte Abasi ọdọhọde man mmọ ẹka iso ẹdot ndika heaven.—Ephesus 5:5; Philippi 3:12-14.

Nso ididi utom mbon oro ẹdikade heaven?

Mmọ ẹyetiene Jesus ẹkara nte ndidem ye mme oku ke isua 1,000. (Ediyarade 5:9, 10; 20:6) Mmọ ke ẹdida itọn̄ọ “mbufa enyọn̄,” m̀mê ukara heaven, emi edikarade “obufa isọn̄,” m̀mê mme owo ke isọn̄. Mbon oro ẹdikarade ke heaven ẹyetiene ẹnam mme owo ẹfọn ẹma nte Abasi akaduakde ke editọn̄ọ.—Isaiah 65:17; 2 Peter 3:13.

Owo ifan̄ ke ẹdinam ẹset ẹka heaven?

Bible owụt ke owo 144,000 ke ẹdinam ẹset ẹkedu uwem ke heaven. (Ediyarade 7:4) Ke Ediyarade 14:1-3, apostle John ama okụt ‘Eyenerọn̄ adade ke Obot Zion, owo tọsịn ikie ye aba ye inan̄ ẹnyụn̄ ẹda ye enye.’ Ke n̄kukụt oro, “Eyenerọn̄” ada aban̄a Jesus ini enye esetde aka heaven. (John 1:29; 1 Peter 1:19) “Obot Zion” ada aban̄a ubọn̄ oro ẹnọde Jesus ye owo 144,000 emi ẹditienede ikara ke heaven.—Psalm 2:6; Mme Hebrew 12:22.

“Mbon oro ẹkotde ẹnyụn̄ ẹmekde” man ẹtiene Christ ẹkara ke Obio Ubọn̄ Abasi ke ẹkot “ekpri otuerọn̄.” (Ediyarade 17:14; Luke 12:32) Emi owụt ke mmọ inen̄ekede iwak edieke ẹmende mmọ ẹdomo ye ofụri otuerọn̄ Jesus.—John 10:16.

Se mme owo ẹsitịn̄de ẹban̄a mbon emi ẹdikade Heaven

Se mme owo ẹsitịn̄de: Kpukpru nti owo ẹyeka heaven.

Akpanikọ: Abasi ọn̄wọn̄ọ ndinam ediwak nti owo ẹdu uwem ke isọn̄ emi ke nsinsi.—Psalm 37:11, 29, 34.

  • Jesus ọkọdọhọ ete: “Baba owo kiet ikọdọkke ikodụk ke heaven.” (John 3:13) Emi owụt ke nti owo emi ẹkekpade mbemiso Jesus, utọ owo nte Abraham, Moses, Job, ye David ikodụke heaven. (Utom 2:29, 34) Mmọ ẹkekam enyene idotenyịn ndiset ndidu uwem ke isọn̄.—Job 14:13-15.

  • Ediset ke n̄kpa emi ẹdinamde mme owo ẹset ẹka heaven ke ẹkot “akpa ediset ke n̄kpa.” (Ediyarade 20:6) Emi owụt ke ediset ke n̄kpa en̄wen do. Enye oro edidi enye emi ẹnamde mme owo ẹset ke isọn̄.

  • Bible ekpep ke Obio Ubọn̄ Abasi, ‘n̄kpa ididụhe aba.’ (Ediyarade 21:3, 4) Un̄wọn̄ọ Abasi emi aban̄a isọn̄ emi, sia akanam owo ikpaha ke heaven.

Se mme owo ẹsitịn̄de: Enyene idem esimek m̀mê enye edika heaven m̀mê edidu ke isọn̄.

Akpanikọ: Abasi esibiere m̀mê anie ye anie ke otu nti Christian edibọ “utịp ikot eke heaven.” (Philippi 3:14) Abasi isimekke owo itiene se owo oyomde m̀mê se owo akpamade ndidi.—Matthew 20:20-23.

Se mme owo ẹsitịn̄de: Ẹdinam mbon oro mînen̄ekede idot ndika heaven ẹdu uwem nsinsi ke isọn̄.

Akpanikọ: Abasi okot mbon emi ẹdidude nsinsi uwem ke isọn̄ “ikọt mi,” “ndimek ikọt mi,” ye “ubon eke Jehovah ọdiọn̄de.” (Isaiah 65:21-23) Mmọ ke Abasi edida inam se enye aduakde—ndidu uwem ke paradise ke isọn̄ ke nsinsi.—Genesis 1:28; Psalm 115:16; Isaiah 45:18.

Se mme owo ẹsitịn̄de: Owo 144,000 oro ẹsiakde ke n̄wed Ediyarade ada aban̄a n̄kpọ, idịghe ata ibat mme owo.

Akpanikọ: Ndusụk nọmba ke n̄wed Ediyarade esida aban̄a n̄kpọ edi idịghe kpukpru. Ke uwụtn̄kpọ, n̄wed Ediyarade etịn̄ aban̄a “enyịn̄ mme apostle Eyenerọn̄ duopeba.” (Ediyarade 21:14) Se ntak idọhọde ke 144,000 oro ẹsiakde do idaha iban̄a n̄kpọ.

Ediyarade 7:4 etịn̄ “ibat mmọ eke ẹfịkde idiọn̄ọ, [m̀mê mbon emi ẹdikade heaven], owo tọsịn ikie ye aba ye inan̄.” Ndien ke ufan̄ikọ oro etienede, enye asiak mbon en̄wen: “akwa otuowo, emi baba owo kiet mîkemeke ndibat.” Mbon emi ẹkotde “akwa otuowo” ẹtiene ẹbọ edinyan̄a ẹto Abasi. (Ediyarade 7:9, 10) Ekpedi 144,000 akada aban̄a n̄kpọ,—otu owo emi mînyeneke ibat, ọwọrọ ufọn ikpodụhe enye ndiwụt ke mmọ ẹkpụhọde ye akwa otuowo. *

N̄kpọ en̄wen edi, ke owo 144,000 oro ẹtịn̄de ẹban̄a do, “ẹkedep mmọ ẹsio ke otu ubonowo nte akpa mbun̄wụm.” (Ediyarade 14:4) Ikọ oro “akpa mbun̄wụm” owụt ke edi ekpri n̄kpọ emi ẹsatde esio ke otu mbon eken. Emi anam an̄wan̄a nnyịn ke mbon emi ẹmekde ndika n̄kakara ke heaven ye Christ, ẹdikara ata ediwak mbon emi ẹdude ke isọn̄.—Ediyarade 5:10.

^ ikp. 16 Prọfesọ Robert L. Thomas ama ewet n̄kpọ n̄ko aban̄a 144,000 oro ẹsiakde ke n̄wed Ediyarade 7:4 ete: “ata nọmba ke edi emi ẹdade ẹwụt ke mmọ ẹkpụhọde ye anana ibat mme owo ke Ediyarade 7:9. Edieke ẹdọhọde ke nọmba oro ada aban̄a n̄kpọ, ọwọrọ kpukpru nọmba ke n̄wed Ediyarade ada aban̄a n̄kpọ.”—Ediyarade 1-7: An Exegetical Commentary, page 474.