Be ka se isịnede

Nso Ikedi Akpa Idiọkn̄kpọ?

Nso Ikedi Akpa Idiọkn̄kpọ?

Se Bible ọdọhọde

Adam ye Eve ẹkedi akpa mme owo emi ẹkenamde idiọkn̄kpọ. Mmọ ẹma ẹnam se ediwak owo ẹkotde akpa idiọkn̄kpọ * ini mmọ ẹkediade mfri “eto ifiọk eti ye idiọk” emi Abasi ọkọdọhọde mmọ ẹkûdia. (Genesis 2:16, 17; 3:6; Rome 5:19) Abasi ikenyịmeke Adam ye Eve ẹdia mfri eto oro sia eto oro akada aban̄a odudu m̀mê unen emi Abasi enyenede ndibiere se ifọnde ye se idiọkde nnọ mme owo. Adam ye Eve ẹma ẹnam se mmọ mîkenyeneke unen ndinam ini mmọ ẹkediade mfri eto oro. Mmọ ẹma ẹmek ndibiere se ifọnde ye se idiọkde nnọ idemmọ. Se mmọ ẹkenamde oro okowụt ke mmọ inyịmeke Abasi ebiere nte mmọ ẹkpedude uwem.

 Nso mfịna ke “akpa idiọkn̄kpọ” akada ọsọk Adam ye Eve?

Idiọkn̄kpọ oro ama anam Adam ye Eve ẹsọn̄, ekem ẹkpan̄a. Mmọ ikedịghe ufan Abasi aba ikonyụn̄ ikemeke ndidu uwem ke nsinsi, idọn̄ọke.—Genesis 3:19.

 Nso mfịna ke “akpa idiọkn̄kpọ” ada ọsọk nnyịn?

Adam ye Eve ẹma ẹyak idiọkn̄kpọ ẹnọ kpukpru nditọ mmọ ukem nte ete ye eka ẹsiyakde udọn̄ọ emi esịnede mmọ ke iyịp ẹnọ nditọ mmọ. (Rome 5:12) Ntre, kpukpru owo ẹdada “idiọkn̄kpọ” * ẹmana. Emi ọwọrọ ke toto ke emana ke nnyịn ifọnke ima, ke esinyụn̄ emem nnyịn utom ndinam se idiọkde.—Psalm 51:5; Ephesus 2:3.

Idiọkn̄kpọ emi ikadade-da imana m̀mê nte nnyịn mîfọnke ima esinam nnyịn idọn̄ọ, isọn̄, inyụn̄ ikpa. (Rome 6:23) Imesinyụn̄ ibọ ufen ndudue nnyịn ye eke mbon en̄wen n̄ko.—Ecclesiastes 8:9; James 3:2.

 Ndi ẹkeme ndisio nnyịn ke mfịna emi “akpa idiọkn̄kpọ” adade ọsọk nnyịn?

Ih. Bible ọdọhọ ke Jesus akakpa “nte uwa usio-isop kaban̄a mme idiọkn̄kpọ nnyịn.” (1 John 4:10) N̄kpa emi Jesus akakpade afak nnyịn ekeme ndinam ibọhọ mfịna oro idiọkn̄kpọ emi ikadade imana esịnde nnyịn, onyụn̄ anam inyene se Adam ye Eve ẹkeduọkde, oro edi, idotenyịn ndidu uwem ke nsinsi, idọn̄ọke.—John 3:16. *

 Se mme owo ẹnịmde ẹban̄a “akpa idiọkn̄kpọ” emi mînenke

Nsu: Ke ntak akpa idiọkn̄kpọ, nnyịn ikemeke ndidi ufan Abasi tutu amama.

Akpanikọ: Abasi iduọhọke nnyịn ke se Adam ye Eve ẹkenamde. Enye ọfiọk ke nnyịn ifọnke ima, inyụn̄ iyomke inam n̄kpọ emi enye ọdiọn̄ọde ke nnyịn idikemeke. (Psalm 103:14) Kpa ye emi idiọkn̄kpọ emi ikadade-da imana esinamde nnyịn ibọ ufen, imenyene ifet ndidi ufan Abasi nnyụn̄ nnen̄ede n̄kpere enye.—Mme N̄ke 3:32.

Nsu: Baptism anam owo ọbọhọ akpa idiọkn̄kpọ, ntre oyom ẹnịm nseknditọ baptism.

Akpanikọ: Kpa ye emi baptism edide akpan n̄kpọ kiet emi edinamde ẹnyan̄a owo, n̄kukụre se idinamde owo asana ọbọhọ idiọkn̄kpọ edi enye ndibuọt idem ke n̄kpa emi Jesus akakpade afak nnyịn. (1 Peter 3:21; 1 John 1:7) Sia edide se owo ọdiọn̄ọde esinam enye enyene ata mbuọtidem, nseknditọ ikemeke ndinyene mbuọtidem. Ntre Bible inyịmeke ẹnịm nseknditọ baptism. Se mme Christian eyo mme apostle ẹkenamde ọsọn̄ọ emi. Mmọ ikenịmke nseknditọ baptism, ẹkenịm “iren ye iban” emi ẹkenịmde se ẹkekwọrọde ẹnọ mmọ ẹnyụn̄ ẹbuọtde idem ke Ikọ Abasi.—Utom 2:41; 8:12.

Nsu: Abasi ama osụn̄i iban sia Eve ekebem iso adia mfri eto oro ẹkekpande.

Akpanikọ: Abasi ikosụn̄ike iban, akakam osụn̄i “akani urụkikọt, enye emi ẹkotde Devil ye Satan,” emi akabian̄ade Eve yak akanam idiọkn̄kpọ. (Ediyarade 12:9; Genesis 3:14) Ti n̄ko ke Abasi ekenen̄ede ọduọhọ Adam, idịghe n̄wan esie.—Rome 5:12.

Nso ikanam Abasi ọdọhọ ke Adam ayakara n̄wan esie? (Genesis 3:16) Oro ikọwọrọke ke enye enyịme irenowo ẹsifiomo iban. Enye eketịn̄ aban̄a nte idiọkn̄kpọ edinamde irenowo ẹnam n̄kpọ ye iban. Abasi oyom erenowo ama onyụn̄ okpono n̄wan esie onyụn̄ enen̄ede okpono kpukpru iban.—Ephesus 5:25; 1 Peter 3:7.

Nsu: Akpa idiọkn̄kpọ oro ekedi idan̄.

Akpanikọ: Akpa idiọkn̄kpọ ikedịghe idan̄. Kop ntak mi:

  • Adam ikenyeneke n̄wan ini Abasi ọkọdọhọde enye okûdia mfri eto ifiọk eti ye idiọk.—Genesis 2:17, 18.

  • Abasi ama ọdọhọ Adam ye Eve “ẹtọt ẹnyụn̄ ẹwak,” oro edi, yak mmọ ẹnyene nditọ. (Genesis 1:28) Ọkpọwọrọ ke Abasi edi ibak enye ọkpọnọ mmọ ufen ke ntak emi mmọ ẹnamde se enye ọkọdọhọde mmọ ẹnam.

  • Adam ye Eve ikanamke idiọkn̄kpọ ke ukem ini. Eve ekebem iso anam idiọkn̄kpọ oro, ekem ebe esie edinam.—Genesis 3:6.

  • Bible enyịme ebe adan̄ ye n̄wan esie.—Mme N̄ke 5:18, 19; 1 Corinth 7:3.

^ ikp. 1 Ikọ emi “akpa idiọkn̄kpọ” isịneke ke Bible. Abian̄a emi Satan akabian̄ade Eve ye anafai nsu emi enye okosude ọnọ Eve edi ata akpa idiọkn̄kpọ emi ẹwetde ke Bible. (Genesis 3:4, 5; John 8:44) Edi ke ibuotikọ emi, idiọkn̄kpọ Adam ye Eve ke iyom ndikot “akpa idiọkn̄kpọ.”

^ ikp. 3 Ke Bible, ikọ oro “idiọkn̄kpọ” idaha iban̄a ndiọi edinam kpọt, edi ada n̄ko aban̄a nte nnyịn mîfọnke ima m̀mê idiọkn̄kpọ emi esịnede-sịne nnyịn ke idem.

^ ikp. 5 Se ibuotikọ emi “Didie ke Jesus Anyan̄a Ubonowo?” man ekpep mme n̄kpọ efen aban̄a nte Jesus akakpade afak nnyịn ye ufọn emi ikemede ndibọ nto oro.