Be ka se isịnede

NDI ẸKEBOBOT?

Afia Ọfọn̄ekpo Emi Esinịmde Mba Nte Abisi Emi Ẹkotde V

Afia Ọfọn̄ekpo Emi Esinịmde Mba Nte Abisi Emi Ẹkotde V

Ana ufiop eyo anam esịp emi ọfọn̄ekpo esidade efe ofiop mbemiso ọfọn̄ekpo ekemede ndife. Edi ke usen emi enyọn̄ mîn̄wan̄ake, esịp afia ọfọn̄ekpo emi ẹkotde cabbage white butterfly esisọp ofiop akan eke mme ọfọn̄ekpo eken, enye esinyụn̄ ebem mmọ iso efe. Nso isin̄wam enye?

Kere ise: Ediwak uduot ọfọn̄ekpo ẹsifofụt mba mmọ mîdịghe ẹtat ẹnịm mbatmbat mbatmbat ẹwebe eyo mbemiso ẹfede. Edi afia ọfọn̄ekpo emi ẹkotde cabbage white butterfly esitat mba esiemmọ yak etie nte abisi emi ẹkotde V. Ndụn̄ọde emi ẹnamde owụt ke ana ọfọn̄ekpo emi atat mba esie ekpri ekpri ntre man ufiop utịn ekeme ndinen̄ede ndụk enye idem ọfọn. Enye nditat mba esie ntre esinam ufiop utịn ebe nnennen nnennen esịm ikpanesịt esie okotụk esịp emi enye esidade efe, onyụn̄ anam esịp oro ofiop man enye ekeme ndife.

Mme anam-ndụn̄ọde ke University of Exeter ke England ẹma ẹse m̀mê imekeme ndinam n̄kpọ emi ẹsidade ẹbọ ufiop utịn (solar panel) ọfọn akan nte etiede idahaemi edieke mmimọ inamde enye etie nte mba afia ọfọn̄ekpo oro esitiede ini enye oyomde ndibọ ufiop utịn. Ke mmọ ẹma ẹkedomo ẹse, mmọ ẹma ẹkụt ke ufiop utịn emi n̄kpọ oro ọbọde ekpere ndikpon mbahade iba n̄kan akpa.

Mme anam-ndụn̄ọde oro ẹma ẹkụt n̄ko ke iso mba ọfọn̄ekpo emi esem etieti. Mmọ ndinam n̄kpọ solar etie nte V onyụn̄ esem nte mba afia ọfọn̄ekpo oro anam enye efere akan akpa onyụn̄ ọbọ ufiop akan akpa. Emi akanam Prọfesọ Richard ffrench-Constant emi eketienede anam ndụn̄ọde oro ọdọhọ ke idụhe kan̄a n̄kpọ ndomokiet emi ekemede ndibọ ufiop utịn nte afia ọfọn̄ekpo oro.

Afo ekere didie? Ndi nte afia ọfọn̄ekpo emi esisan̄ade enịm mba esie nte V okofoforo? Mîdịghe ndi ẹkebobot?