Be ka se isịnede

NDI ẸKEBOBOT?

Nte Edet Uta-Edem-Ubom Etiede

Nte Edet Uta-Edem-Ubom Etiede

Uta-edem-ubom esidụn̄ ke mmọn̄, onyụn̄ edi ke utọ ke utọ. Enye emi iyoyom ndineme mi enyene ikpọk nte ikoso, edet esie onyụn̄ ọsọn̄ ata etieti. N̄kpọ emi ẹkotde goethite anam edet esie ọsọn̄ ntre. Edi itie emi edet uta-edem-ubom owụhọde ememem.

Kere ise: Uta-edem-ubom emi enyene n̄kpọ emi etiede nte edeme, ndien n̄kọbọ n̄kọbọ edet esie ẹtoro do ke udịm ke udịm. Edet esie iniọn̄ke nte ubara abiabon ukịm ọfọn̄. Edet esie emi ke enye esikama akwat n̄kpọ. Edet esie kiet kiet mînen̄ekede isat ntem, enye idikemeke ndikwat idet ọmọn ndian̄ade ke itiat nta.

Mme anam-ndụn̄ọde ẹma ẹkama ata okop-odudu microscope ẹyom ndise nte n̄kpọ ekemede ndisat n̄ketre mbemiso enye ebek edet uta-edem-ubom ini enye oyomde ndikwat n̄kpọ oro ndian̄ade. Mmọ ẹma ẹkụt ke otu kpukpru mme n̄kpọ emi mmimọ isidụn̄ọrede ise, emi ẹdide ẹkpedụri enye isọpke ibụn̄ọ, mîdịghe isọpke isịbe, ke idụhe emi ọsọn̄de idem nte edet uta-edem-ubom, ke akam ọsọn̄ akan n̄kpan̄utue. Owo emi akadade iso ke ndụn̄ọde oro ọkọdọhọ ke akpana mmimọ ikere ndibot mme n̄kpọ emi ẹdisọn̄de idem nte edet uta-edem-ubom emi.

Mme anam-ndụn̄ọde ẹkere ke mmimọ imekeme ndinam mbiet n̄kpọ emi anamde edet uta-edem-ubom ọsọn̄ do ida ibot moto, ubom, ye ubomofụm; ke imekeme ndikam nda mbot edet nsịn owo.

Afo ekere didie? Ndi edet uta-edem-ubom emi ọsọn̄de idem ntem okofoforo? Mîdịghe ndi ẹkebobot?