Be ka se isịnede

N̄KPARAWA OWO ẸBỤP

Ntak Emi N̄kpọbọn̄de Akam?

Ndụn̄ọde kiet okowụt ke ekpere ndidi kpukpru uyen ke America ẹsibọn̄ akam, edi ke mbahade iba kpọt ke otu mmọ ẹsibọn̄ kpukpru usen. Anaedi ndusụk mmọ ẹsikere: ‘Ndi akam osụk enyene ufọn, okûdi onyụn̄ edi n̄kpọ emi owo anamde man esịt enem enye?’

 Nso idi akam?

Ke ini ẹdọhọde ke owo ọbọn̄ akam, ọwọrọ ke enye etịn̄ ikọ ọnọ Andibot ofụri ekondo. Idịghe ekpri ifet edi oro-o! Jehovah enen̄ede okon̄ akan kpukpru nnyịn, edi kpa ye oro enye ‘iyomke usụn̄ ikpọn̄ nnyịn owo kiet kiet.’ (Utom 17:27) Bible ọdọhọ kpukpru nnyịn ete: “Ẹsan̄a ẹkpere Abasi, ndien enye ayasan̄a ekpere mbufo.”—James 4:8.

Nso ke akpanam man ekpere Abasi?

  • N̄kpọ kiet emi edinamde fi ekpere Abasi edi akam—afo esitịn̄ ikọ ọnọ Abasi ke ini ọbọn̄de akam.

  • N̄kpọ en̄wen emi edinamde fi ekpere Abasi edi ndikpep Bible—ini ekededi emi afo ekpepde Bible, Abasi “etịn̄ ikọ” ọnọ fi oro.

Edieke amade ndinam n̄kpọ mbiba emi—esimade ndibọn̄ onyụn̄ esimade ndikpep Bible—afo eyenen̄ede ekpere Abasi.

“Inyeneke n̄kpọ emi ọnọde owo ukpono nte Jehovah—emi edide Akakan Abasi—ndiyak nnyịn itịn̄ ikọ inọ enye.”—Jeremy.

“Nditịn̄ se isịnede mi ke esịt nnọ Jehovah esinam etie nte nnyịn mbiba idu itie kiet.”—Miranda.

 Ndi Abasi esikop akam?

Idem mbon emi ẹnịmde ke Abasi odu—emi ẹsinyụn̄ ẹbọn̄de akam—ẹsikere m̀mê enye esisụk okop akam mmimọ. Edi ti ke Bible okot Jehovah “Andikop akam.” (Psalm 65:2) Bible ọdọhọ kpukpru owo ẹtop “kpukpru editịmede esịt” mmọ ẹdori enye ke idem “koro enye ekerede aban̄a mbufo.”1 Peter 5:7.

Kere ise: Ndi emesima ndineme nneme ye mme ata ufan fo? Emekeme ndineme nneme ntre n̄ko ye Abasi. Sima ndibọn̄ akam nnọ enye, sinyụn̄ kot enyịn̄ esie, Jehovah, ke akam fo. (Psalm 86:5-7; 88:9) Bible ọdọhọ ete: “Ẹkûdop ndibọn̄ akam.”—1 Thessalonica 5:17.

“Ke ini mbọn̄de akam, nsitịn̄ ikọ nnọ Ete mi eke heaven, nsidịpke enye n̄kpọ ndomokiet.”—Moises.

“Nsisosio kpukpru se isịnede mi ke esịt ntịn̄ nnọ Jehovah ini mbọn̄de akam, kpa nte nsinamde mma nneme nneme ye eka mi m̀mê ye akpan ufan mi.”—Karen.

 Nso ke n̄kpesịn ke akam?

Bible ọdọhọ ete: “Ke kpukpru n̄kpọ ẹda akam ye n̄kpeubọk ọkọrọ ye ekọm ẹben̄e Abasi se mbufo ẹyomde.”—Philippi 4:6.

Ndi oro ọwọrọ ke emekeme nditịn̄ mfịna fo nnọ Abasi? Ih, emekeme! Bible ọdọhọ ete: “Top mbiomo fo nọ Jehovah, ndien enye ọyọsọn̄ọ fi idem.”—Psalm 55:22.

Emi iwọrọke ke ana afo esitịn̄ mfịna mfịna kpọt ke akam ọnọ Abasi. Eyenan̄wan emi ekerede Chantelle ọkọdọhọ ete: “Ekpenyene nte etiede edieke ufan mi ye Jehovah edide sụk eben̄e eben̄e kpukpru ini.” “N̄kere ke n̄kpesikam mbemiso n̄kọm enye kan̄a ke nsio nsio n̄kpọ.”

Kere ise: Nso ke enen̄ede ama ke uwem emi? Ndi emenyene n̄kpọ ita emi ọkpọkọmde Abasi aban̄a mfịn emi?

“Emekeme ndikọm Jehovah ke ata n̄kpri n̄kpri n̄kpọ, utọ nte ke ndiye flawa emi enye okobotde ọnọ nnyịn.”—Anita.

“Kere ban̄a n̄kpọ emi enen̄erede ama ke isọn̄ emi m̀mê itie Bible emi enen̄erede ama, nyụn̄ da oro bọn̄ akam kọm Jehovah.”—Brian.