Be ka se isịnede

N̄KPARAWA OWO ẸBỤP

Ntak Emi N̄kpodụkde Ikọ Abasi ke Ufọkmbono Obio Ubọn̄?

Mme Ntiense Jehovah ẹsisop idem ẹkpono Abasi. Ẹkot ufọk emi mmọ ẹsisopde idem Ufọkmbono Obio Ubọn̄. Nso ke ẹsinam do? Nso ufọn ke edidia akpaka do?

 Nso ke ẹsinam ke Ufọkmbono Obio Ubọn̄?

Ufọkmbono Obio Ubọn̄ edi ebiet emi ẹsikpepde mme owo Bible. Se ẹsinamde do ekeme ndin̄wam fi:

  • enen̄ede ọdiọn̄ọ Abasi.

  • ọdiọn̄ọ se inamde ererimbot emi etie ntem.

  • edi eti owo.

  •  enyene nti ufan.

Ndi ama ọdiọn̄ọ? Ekot ufọk emi Mme Ntiense Jehovah ẹsisopde idem ẹkpono Abasi Ufọkmbono Obio Ubọn̄ sia ẹsinen̄ede ẹneme n̄kpọ Obio Ubọn̄ Abasi do.—Matthew 6:9, 10; 24:14; Luke 4:43.

 Ntak ọfọnde etiene aka?

Se edikopde do ayan̄wam fi. Ẹsineme nte ikpadade se Bible etịn̄de idu uwem, ndien emi ekeme ndin̄wam fi ‘enyene ọniọn̄.’ (Mme N̄ke 4:5) Oro ọwọrọ ke Bible ekeme ndin̄wam fi ọfiọk nnennen n̄kpọ emi akpanamde ke uwem fo. Bible onyụn̄ ekeme ndibọrọ mbụme emi ediwak owo ẹsibụpde, utọ nte:

Ndusụk ibuotikọ ikọ Abasi oro ẹsinemede ke utịturua edi emi:

  • Ntak Emi Ayakde Bible Ada Fi Usụn̄-ọ?

  • M̀mọ̀n̄ ke Afo Ekeme Ndinyene Un̄wam ke Mme Ini Afanikọn̄?

  • Se Obio Ubọn̄ Abasi Anamde Ọnọ Nnyịn Idahaemi.

“Eyen klas nnyịn ama etiene edi ikọ Abasi nnyịn usen kiet. Enye eketie ye ubon nnyịn. Ntre ima inam enye etiene ese se ẹnemede ke n̄wed nnyịn. Ke ẹma ẹkesuana, enye ama ọdọhọ ke ikpehe emi edide nneme otuowo ama enem imọ tutu. Enye ama onyụn̄ ọdọhọ ke ufọkabasi mmimọ inyeneke n̄wed emi esin̄wamde owo ọdiọn̄ọ Bible.”—Brenda.

Ndi ama ọdiọn̄ọ? Owo esitie ke itie eke enye amama ke Ufọkmbono Obio Ubọn̄, owo isinyụn̄ ibọhọ offering m̀mê collection.

Mbon ẹdikụtde do ẹyenam esịt enem fi. Bible ọdọhọ ke ntak kiet oro anade mme Christian ẹsisop idem ke mboho ikọ Abasi edi man ẹsọn̄ọ mbon en̄wen idem. (Mme Hebrew 10:24, 25) Ndidu ke otu mbon emi ẹmade Abasi ye mbon en̄wen ẹkan idemmọ, ayanam esịt enen̄ede enem fi ke ererimbot emi ima ananade mi.

“Ediwak n̄kpọ nsinamde ke usen esinam idem emem mi mbubreyo. Edi nte ẹsinamde n̄kpọ mma n̄ka Ufọkmbono Obio Ubọn, esinam kpukpru ẹkaha oro ọnyọn̄. Esịt esinen̄ede enem mi, idem onyụn̄ efere mi, mma nnyọn̄ ikọ Abasi ke Ufọkmbono Obio Ubọn.”—Elisa.

Ndi ama ọdiọn̄ọ? Ẹbahade Mme Ntiense Jehovah ke ofụri ererimbot ẹdọn̄ ke nsio nsio esop emi ebede 120,000; itie emi mmọ ẹsinịmde ikọ Abasi mmọ onyụn̄ ebe 60,000. Kpukpru isua ẹsibọp n̄kpọ nte Ufọkmbono Obio Ubọn̄ 1,500 sia ata ediwak owo ke ẹkabade ẹdi Mme Ntiense Jehovah. *

^ ikp. 20 Okpoyom ndikụt mme itie ẹsinịmde ikọ Abasi mmọ, kọkụbọde “Mbono Esop Mme Ntiense Jehovah” nyụn̄ fịk “Yom Ebiet Emi Ekperede Fi.”