• Nso ke afo akpanam?

  • Ntak ita emi ọfọnde enyịme ndudue fo

  • Nte ekemede ndikpep n̄kpọ nto ndudue fo

Nso ke afo akpanam?

Da nte ke se itịbede inọ Karina emi etịbe ọnọ fi, nso ke akpanam?

N̄kere Karina: “Usen kiet, ke ini n̄kakade ufọkn̄wed, mma n̄wat idiọk uwat, ndien bodisi ama omụm mi onyụn̄ ọbọ mi moto. N̄kpọ oro ama ayat mi etieti, ntre mma ntịn̄ nnọ eka mi, ndien enye ọkọdọhọ n̄ketịn̄ nnọ ete mi, edi n̄koyomke nditịn̄ nnọ enye.”

Nso ke afo akpanam?

  1. Akpa: Ndi okpododop uyo, uyakke ete fo ọdiọn̄ọ se itịbede?

  2. Ọyọhọ iba: Ndi ekpetịn̄ ofụri se itịbede ọnọ ete fo?

Ekeme ndidọn̄ fi ndinam akpa oro sia edikere ke eka fo iditịn̄ke inọ ete fo. Edi ọkpọfọn etieti edieke enyịmede ke amanam ndudue ke ndiwat moto ọsọp akaha m̀mê ke ini anamde n̄kpọ en̄wen oro mîfọnke.

Ntak ita emi ọfọnde enyịme ndudue fo

  1. 1. Edi nnennen n̄kpọ oro akpanamde. Bible ọdọhọ “[inam] akpanikọ ke kpukpru n̄kpọ.”—Mme Hebrew 13:18.

    N̄kere Alexis: “Mmesidomo ndinyịme ndudue mi nnyụn̄ ntịn̄ akpanikọ ini ekededi oro nnamde n̄kpọ ndue.”

  2. 2. Ẹsisọp ndifen nnọ mbon emi ẹnyịmede ndudue mmọ. Bible ọdọhọ ke “owo eke edịpde idiọkn̄kpọ esie idikwe unen, edi owo eke ayararede onyụn̄ ọkpọn̄de mmọ, ẹyetua enye mbọm.”—Mme N̄ke 28:13.

    N̄kere Richard: “Mmọdiọn̄ọ ke isimemke ndinyịme ke imanam ndudue, edi edieke enyịmede ndudue fo, emi ayanam mme owo ẹda fi nte owo akpanikọ.”

  3. 3. Ata akpan ntak edi ke emi esinem Jehovah esịt. Bible ọdọhọ ke ‘owo abian̄a edi mbubiam ke iso Jehovah, edi Jehovah edi ata ufan ye edinen owo.’—Mme N̄ke 3:32.

    N̄kere Rachel: “Ini ekededi oro nnamde ndudue, esịt esimia mi ufen etieti, ndien emi esinam nsọsọp nnyịme ke mmedue. Jehovah esidiọn̄ mi ke ndinam nnennen n̄kpọ.”

Nso ke Karina akanam aban̄a ndudue esie? Enye ama ekpe okụk afahade moto oro, itịn̄ke inọ ete esie. Edi ete esie ama edifiọk ke isua kiet ama ekebe. Karina ọdọhọ ke ima inyene mfịna ye ete imọ, eka imọ n̄ko ikenemke esịt ye imọ ke ntak emi imọ mîketịn̄ke inọ ete imọ.

Nso ke emi ekpep fi? Karina ọdọhọ ete: “Ifọnke owo esidịp idiọkn̄kpọ esie koro ebebịghi awawara, ayayarade.”

Nte ekemede ndikpep n̄kpọ nto ndudue fo

Kpukpru nnyịn idedue ediwak ini. (Rome 3:23; 1 John 1: 8) Nte ima iketetịn̄, edieke enyịmede ndudue fo, oro owụt ke omosụhọde idem. Ntre sinyịme ndudue fo.

N̄kpọ en̄wen emi anade anam edi ndikpep n̄kpọ nto ndudue fo. Edi odu ndusụk owo emi mîsikpepke n̄kpọ ito ndudue mmọ. Esitie mmọ ke idem nte eketiede Priscilla emi ọkọdọhọde ete: “Idem esimem mi ini ekededi oro nnamde ndudue, ndien emi esinam n̄kere ke n̄wọrọke n̄kpo. Ntem ke ini nnamde ekpededi ata ekpri ndudue, esitie mi nte nnam ata akwa idiọkn̄kpọ. Uwem esidorode mi tutu n̄kere ke ufọn mi idụhe.”

Ndi esitie fi ntre ndusuk ini? Edi ntre, ti ke nditie n̄kere ndudue emi akanamde onyun̄ etie nte owo ndiwat moto, edi owụk enyịn ese edem utu ke ndise iso. Ntre, nditie n̄kpa ekikere ke se akanamde edue edinam etie nte uwọrọke n̄kpọ ndomokiet.

Se akpanamde edi emi:

N̄kere Elliot: “Kere ban̄a se ikanamde fi anam ndudue oro nyụn̄ kpep n̄kpọ to enye man udûfiak unam utọ ndudue oro ini en̄wen. Edi kûtie ukere ndudue oro tutu enye anam idem emem fi.”

N̄kere Vera: “Mmesidomo ndikpep n̄kpọ nto ndudue mi, nse ebiet oro n̄kemede ndikpụhọde, ye se n̄kpanamde mbak ndifiak nnam utọ ndudue oro. Mfọnn̄kan n̄kpọ ndinam edi emi, sia emi ayanam ndi ọdiọn̄ọ idem owo.”