Nte oyomde okụbọde

Mek usem

Be ka udiana n̄kpọ

Be ka se isịnede

Mme Ntiense Jehovah

Efịk

Nso Idi Akwa Babylon?

Nso Idi Akwa Babylon?

Se Bible ọdọhọde

Akwa Babylon emi ẹtịn̄de ẹban̄a ke n̄wed Ediyarade, edi kpukpru nsunsu ido ukpono emi Abasi asuade ke ofụri ererimbot. * (Ediyarade 14:8; 17:5; 18:21) Kpa ye oro mmọ ẹsikpepde ẹnyụn̄ ẹnamde n̄kpọ ke nsio nsio usụn̄, mmọ ndomokiet isikpepke mme owo ndinam n̄kpọ nnọ ata Abasi, Jehovah.Deuteronomy 4:35.

Se idin̄wamde nnyịn idiọn̄ọ Akwa Babylon

  1. Akwa Babylon edi ndamban̄a n̄kpọ. Bible ọdọhọ ke enye edi “n̄wan” ye “akwa akpara,” emi enyịn̄ esie edide “ndiben̄kpọ” kpa “Akwa Babylon.” (Ediyarade 17:1, 3, 5) Ẹkeda “mme idiọn̄ọ” ẹwet se idude ke n̄wed Ediyarade, ntre ẹkeme ndidọhọ ke Akwa Babylon idịghe ata ata an̄wan, edi ke ada aban̄a n̄kpọ. (Ediyarade 1:1) N̄ko, Ikọ Abasi ọdọhọ ke enye ‘etie ke enyọn̄ ediwak mmọn̄,’ emi adade aban̄a “mme owo ye otuowo ye mme idụt ye mme usem.” (Ediyarade 17:1, 15) Ata ata an̄wan ikemeke ndinam utọ n̄kpọ emi.

  2. Akwa Babylon odu ke ofụri ererimbot. Ẹkot enye “akwa obio oro enyenede obio ubọn̄ emi akarade ndidem isọn̄.” (Ediyarade 17:18) Ntre, odudu esie esịm ofụri ererimbot.

  3. Akwa Babylon idaha iban̄a ukara, idaha iban̄a mbonurua, edi ada aban̄a nsunsu ido ukpono. Mme owo ẹma ẹsikpono nsio nsio abasi ke Babylon ke eset, ẹkọk “nduọhọ” ẹnyụn̄ ẹbre “idiọn̄.” (Isaiah 47:1, 12, 13; Jeremiah 50:1, 2, 38) Ẹma ẹsikpono ndem etieti ke obio oro, ndien emi ikenemke Jehovah esịt. (Genesis 10:8, 9; 11:2-4, 8) Mme andikara Babylon ẹma ẹsitan̄ idem etieti ẹnam nte imokpon ikan ata Abasi inyụn̄ ituakke ibuot inọ enye. (Isaiah 14:4, 13, 14; Daniel 5:2-4, 23) N̄ko, Akwa Babylon enen̄ede ama “ubụpekpo.” Emi owụt ke enye enyene n̄kpọ ndinam ye ido ukpono.Ediyarade 18:23.

    Akwa Babylon ikemeke ndida mban̄a ukara koro “ndidem isọn̄” ẹyetuan̄a ke ini ẹsobode enye. (Ediyarade 17:1, 2; 18:9) Enye inyụn̄ idaha iban̄a mbonurua koro Ikọ Abasi owụt ke enye ọkpụhọde ye “mbonurua isọn̄.”Ediyarade 18:11, 15.

  4. Itiat ndise Nabonidus Edidem Babylon ye idiọn̄ọ abasi ita Sin, Ishtar, ye Shamash

    Odot nte ẹkotde nsunsu ido ukpono Akwa Babylon. Utu ke ndikpep mme owo ndinam ufan ye ata Abasi emi edide Jehovah, nsunsu ido ukpono akam anam mmọ ẹkpono nsunsu abasi. Bible ada edinam emi nte ndisan̄a akpara. (Leviticus 20:6; Exodus 34:15, 16) Mbon Babylon ke eset ẹma ẹsikpep ke Abasi edi ita-ke-kiet, ẹkpep ke ukpọn̄ ikpaha ke nsinsi, ẹnyụn̄ ẹsituak ibuot ẹnọ ndisọi mbiet, ndien mme utọ ukpepn̄kpọ ye edinam emi ke ẹka iso ke nsunsu ido ukpono mfịn. Mmọ ẹdọhọ ke ikpono Abasi edi ke ẹma se idude ke ererimbot. Bible owụt ke utọ mbon emi ẹtie nte iban emi ẹkpọn̄de ebe mmọ ẹsan̄a ẹdu oburobut uwem.James 4:4.

    Nsunsu ido ukpono ẹnyene inyene mfịn ẹnyụn̄ ẹda inyene emi ẹwụt idem. Oro anam Ikọ Abasi ọdọhọ ke Akwa Babylon, “esịne ọfọn̄ uduot mmọn̄ibọn̄ ye ididuot ọfọn̄,” ẹnyụn̄ “ẹbana enye idem ke gold ye ọsọn̄urua itiat ye pearl.” (Ediyarade 17:4) “Mbubiam n̄kpọ eke ẹdude ke isọn̄,” m̀mê mme ukpepn̄kpọ ye edinam oro ẹsuenede Jehovah ẹto Akwa Babylon. (Ediyarade 17:5) Mbon oro ẹsikade nsunsu ido ukpono ẹdi “mme owo ye otuowo ye mme idụt ye mme usem” emi ẹsin̄wamde Akwa Babylon.Ediyarade 17:15.

Akwa Babylon edi ntak n̄kpa “kpukpru mbon oro ẹkewotde ke isọn̄.” (Ediyarade 18:24) Toto ke eset, nsunsu ido ukpono ẹsitọn̄ọ ekọn̄, mmọ ẹsinyene ubọk ke ediwak edinam oyomonsia, ẹnyụn̄ ẹsịn ndikpep mme owo akpanikọ mban̄a Jehovah emi edide Abasi ima. (1 John 4:8) Se mmọ ẹnamde emi anam ẹwot ata ediwak owo. Ntak edi oro anade kpukpru mbon oro ẹyomde ndinem Abasi esịt “ẹwọn̄ọ ke esịt esie” ẹnyụn̄ ẹdian̄ade ẹkpọn̄ nsunsu ido ukpono.Ediyarade 18:4; 2 Corinth 6:14-17.

^ ikp. 3 Se ibuotikọ oro “Didie ke N̄keme Ndidiọn̄ọ Ido Ukpono Akpanikọ?”

Kpep N̄kpọ En̄wen

Ndinam Didie Ndiọn̄ọ Mbon Oro Ẹkponode Ata Abasi?

Ndi ufọkabasi enye emi ke n̄kpaka?

Nso ke Oyom Inam Man Bible An̄wan̄a Nnyịn?

Inamke n̄kpọ m̀mê nso utọ owo ke afo edi, afo emekeme ndifiọk etop Abasi emi odude ke Edisana N̄wed Abasi.