ITIE BIBLE ẸNAMDE AN̄WAN̄A
Psalm 37:4—“Dat Esịt ke ỌBỌN̄”
“Nen̄ede dat esịt ke Jehovah, ndien enye ọyọnọ fi se esịt fo oyomde.”—Psalm 37:4, Edikabade Eke Obufa Ererimbot.
“Dat esịt ke ỌBỌN̄, ndien enye ọyọnọ fi se esịt fo oyomde.”—Psalm 37:4, English Standard Version.
Se Psalm 37:4 Ọwọrọde
Andiwet Psalm emi okoyom kpukpru mbon oro ẹkponode Abasi ẹkop inemesịt ndidi ufan Abasi. Ana kpukpru mbon oro ẹdide ufan Jehovah a Abasi ẹnịm ke enye ọyọnọ mmọ se esịt mmọ enen̄erede oyom.
“Nen̄ede dat esịt ke Jehovah.” Ẹkeme n̄ko ndikabade ikọ emi nte “kop ata idatesịt ke Jehovah,” “kop idatesịt ndinam n̄kpọ nnọ OBỌN̄,” m̀mê “kop idatesịt ke se ỌBỌN̄ ọn̄wọn̄ọde ndinam nnọ fi.” Se emi ọwọrọde edi ke ana nnyịn “inen̄ede ikop ata idatesịt” ndikpono ata Abasi. (Psalm 37:4) Ntak idọhọde ntre?
Mbon emi ẹkponode Jehovah ẹsida n̄kpọ nte Jehovah adade. Mmọ idiọn̄ọke-diọn̄ọ Abasi kpọt , edi mmọ ẹdiọn̄ọ ke ọfọn ikop uyo esie. Oro esinam esịt ifịnake mmọ onyụn̄ anam mmọ inamke se idisịnde mmọ ke fehesan̄. (Mme N̄ke 3:5, 6) Ke uwụtn̄kpọ, ke ini mbon ibụk ye mbon oro mîsinamke akpanikọ ẹforode, ikọt Abasi isiyakke iyatesịt m̀mê ufụp anam mmọ ẹtre ndidu ke emem. (Psalm 37:1, 7-9) Esịt enem ikọt Abasi sia mmọ ẹdiọn̄ọ ke idibịghike Abasi eyetre kpukpru ukwan̄ikpe onyụn̄ ọdiọn̄ mmọ ke ntak emi mmọ ẹsọn̄ọde ẹda ye enye. (Psalm 37:34) Esịt esinyụn̄ enem mmọ sia mmọ ẹdiọn̄ọ ke edima Ete mmọ ke heaven enyịme kpukpru se mmimọ inamde inọ enye.—Psalm 5:12; Mme N̄ke 27:11.
“Enye ọyọnọ fi se esịt fo oyomde.” Ẹkeme n̄ko ndikabade ikọ emi nte “enye ọyọbọrọ akam fo” m̀mê “enye ọyọnọ fi se esịt fo enen̄erede oyom.” Edi imọdiọn̄ọ ke idighe kpukpru se iben̄ede Jehovah ke enye edinam inọ nnyịn. Ukem nte eti ete m̀mê eka, Jehovah ọdiọn̄ọ se nditọ esie ẹyomde. Se idude edi ke ana se iben̄ede enye ye nte idude uwem ekem ye nte enye ọdọhọde idu uwem onyụn̄ ekem ye uduak esie. (Mme N̄ke 28:9; James 4:3; 1 John 5:14) Edieke inamde emi, iyekeme ndibọn̄ akam nnọ “Andikop akam” inyụn̄ inịm ke enye oyokop akam nnyịn.—Psalm 65:2; Matthew 21:22.
Se Iban̄ade Psalm 37:4
Edidem David emi ekesikarade Israel ekewet Psalm 37. Enye ekewet psalm emi ke adiana ke adiana ẹtiene abisi usem Hebrew. b
Ẹma ẹsiwak ndinam n̄kpọ ye David ke idiọk usụn̄. Edidem Saul ye mbon eken emi ẹkeyomde David n̄kpa ẹma ẹsibịne enye man ẹwot. (2 Samuel 22:1) Kpa ye oro, David okosụk ọbuọt idem ye Jehovah ke ofụri esịt. David ama ọdiọn̄ọ ke usen kiet usen kiet ke Jehovah ọyọnọ mme idiọkowo utịp. (Psalm 37:10, 11) Ekpededi mmọ ẹsehe nte “nsehe awawa mbiet” mmọ ẹyeyemede usen kiet usen kiet.—Psalm 37:2, 20, 35, 36.
Psalm 37 etịn̄ aban̄a se iditịbede inọ mbon oro ẹdude uwem nte Jehovah ọdọhọde ye se idinyụn̄ itịbede inọ mbon oro mîdụhe uwem nte enye ọdọhọde. (Psalm 37:16, 17, 21, 22, 27, 28) Psalm emi an̄wam nnyịn idiọn̄ọ se Abasi oyomde inyụn̄ idu utọ uwem emi Abasi amade.
Se ekpri vidio emi man ọdiọn̄ọ se idude ke n̄wed Psalm.
a Jehovah edi enyịn̄ Ikọmbakara emi ẹsikotde Abasi ke usem Hebrew. Edieke oyomde ndidiọn̄ọ ntak emi ediwak Bible ẹsịnde udori enyịn̄ oro Ọbọn̄ utu ke ata enyịn̄ Abasi, kot ibuotikọ emi “Anie Edi Jehovah?”
b Nte ẹkewetde Psalm emi edi, ke ẹma enyene mme ufan̄ikọ emi ekesitọn̄ọde ye akpa abisi usem Hebrew, ekem ẹtọn̄ọ mme ufan̄ikọ en̄wen ye ọyọhọ abisi iba ke abisi usem Hebrew, ntre ntre tutu ẹwet ẹma. Se ikanamde ẹsiwet enye ntre edi man mme owo ẹsisọp eti.
Ekeme Ndidi Ayama Mmọ Emi N̄ko
ENYỌN̄-UKPEME
Ndi Abasi Esikop Akam Nnyịn?
Bible ọdọhọ ke Abasi esikpan̄ utọn̄ edieke ibọn̄de akam inọ enye ke nnennen usụn̄.
MME IBUOTIKỌ EN̄WEN
Idotenyịn Do ke Ini Iso Ọyọfọn
Ntak emi mme un̄wọn̄ọ Bible mîdịghe ukem ye enye oro mme owo ẹsin̄wọn̄ọde m̀mê ẹtịn̄de?
SE BIBLE EKPEPDE EMI ANADE OWO ỌDIỌN̄Ọ
Ndi Owo Ekeme Ndidi Ufan Abasi?
Ke ata ediwak isua idahaemi, ediwak owo eyom ndidiọn̄ọ andikobot mmọ. Bible ekeme ndin̄wam nnyịn idi ufan Abasi. Akpa n̄kpọ anade anam edi ndidiọn̄ọ enyịn̄ Abasi.
