• ISUA AKAMANADE: 1954

  • EBIET OTODE: Philippines

  • SE ENYE EKEDIDE: Ikoyomke ndida enyịn n̄kụt ete esie emi ekesifiomode mmọ

NTE UWEM MI EKETIEDE

Enyene ebiet emi mmọn̄ esiwọrọde ke itiat ke n̄kpere obio Pagsanjan ke Philippines. Itie oro ọwọrọ etop etieti, ediwak owo ẹsinyụn̄ ẹka ẹkese. Do ke Nardo Leron ete mi ọkọkọri. Mmọ ẹkedi ubuene. Esịt ama ayat enye ndisikụt mbon ukara, mme bodisi, ye mbon itieutom mmọ ẹdiade inọ.

Ete ye eka mi ẹma ẹsinam utom ọkpọsọn̄ man ẹbọk nnyịn owo mbitiaita. Mmọ ẹma ẹsiwak ndikpọn̄ ufọk ke anyan ini ẹkese ẹban̄a in̄wan̄ mme owo. Ediwak ini, ami ye Rodelio akpaneka mi ikesise iban̄a idem nnyịn, biọn̄ ikesidịghe ekpri. Nnyịn ikenyeneke ukpọk ini ndibre mbre nte nditọwọn̄ ẹsibrede. Ekedi owo nnyịn ekededi ama esesịm isua itiaba, ana enye ọkọtọn̄ọ ukpekpe utom ke in̄wan̄, obiom ndodobi ekpat isịp mbakara ọdọk ikpọ obot. Edieke nnyịn mîkemeke ndimenede, ẹma ẹsinyịk nnyịn ẹte idodụri.

Ete mi ama esitịm nnyịn ata idiọk idiọk, edi enye emi ekesibiakde nnyịn akan ekedi ndisikụt enye etịmde eka mi. Ima isidomo ndinam enye etre, edi nnyịn ikekemeke. Ami ye Rodelio ima idịbe idiomi ndiwot ete mi ima ifiak ikpon ekpri. Ama esidọn̄ mi ndinyene ete emi amade nnyịn!

Afai ete mi ama anam enyịn anan mi onyụn̄ anam esịt ayat mi, ntre mma n̄kpọn̄ ufọk ini n̄kedide isua 14. Ke nsonso oro, n̄kesiyo ke efak, mma nnyụn̄ ntọn̄ọ ndin̄wọn̄ ikọn̄ekpo. Nte ini akakade, mma ntọn̄ọ ndisiwat mme owo ke ubom n̄ka ẹkese itie emi mmọn̄ esiwọrọde ke itiat do.

Ke isua ifan̄ ebede, mma ntọn̄ọ univesiti ke Manila. Edi n̄kenen̄ekede nnyene ini ndikpep n̄kpọ sia mma nsinyọn̄ Pagsanjan ke utịturua n̄kanam utom. Uwem mi ama awak afan̄ inyụn̄ iwọrọke n̄kpọ. Sia ikọn̄ekpo mîkanamke mfre uwa aba, mma ntọn̄ọ ndida n̄kpọsọn̄ ibọk emi ẹsinamde idem ada owo urua urua, nda cocaine, ye heroin. N̄kpọsọn̄ ibọk ama esinam nnam oburobụt ido. Ubuene, ufịk, ye ufen ẹkekakan mi ẹkụk. Mma nsua ukara, n̄konyụn̄ n̄kere ke mmọ ẹnam mi nnam ndiọi n̄kpọ. Mma mbụp Abasi nte: “Nso inam uwem etie ntem?” Edi n̄kekwe ibọrọ ke nsio nsio ido ukpono oro n̄kekerede ke nyokụt. Ntre mma ndọdiọn̄ nda n̄kpọsọn̄ ibọk man owo idifiọk nnanenyịn mi.

Ke 1972, nditọ ufọkn̄wed ke Philippines ẹma ẹsịn editịm ye ukara. Mma ntiene mmọ ini kiet, ndien ima isịn ntịme. Ukara ẹma ẹmụm ediwak owo, ndien ke ọfiọn̄ ifan̄ ebede, ukara ẹma ẹnam mbonekọn̄ ẹkpeme ofụri idụt nnyịn.

Mma mfiak nsan̄a nyo ke efak, edi isan̄ emi n̄kefehe mbak mme bodisi ẹdimụm mi ke ntak ntịme oro n̄ketienede nsịn do. Mma ntọn̄ọ ndiyịp n̄kpọ man nnyene okụk ndep n̄kpọsọn̄ ibọk, ndien ke akpatre mma nsinam oburobụt ido ye imọ owo ye mbon emi ẹketode idụt en̄wen ẹdi. Ikebeheke mi m̀mê mmọn̄ n̄kpa m̀mê ndikpaha.

Kpa ke ufan̄ ini oro, eka mi ye ekpri eyeneka mi erenowo ẹma ẹtọn̄ọ ndikpep Bible ye Mme Ntiense Jehovah. N̄kpọ oro ama ayat ete mi tutu enye ọfọp mme n̄wed Ikọ Abasi mmọ. Edi mmọ ẹma ẹka iso ẹkpep Bible tutu ẹna baptism ẹnyụn̄ ẹdi Mme Ntiense Jehovah.

Usen kiet, Ntiense Jehovah kiet ama owụt ete mi ke Bible ke Abasi ọn̄wọn̄ọ ndinam ufịk etre ke ofụri isọn̄ ke ini iso. (Psalm 72:​12-​14) Un̄wọn̄ọ oro ama enem ete mi tutu enye oyom ndidụn̄ọde mfiọk ke idemesie. Enye ama okụt ke Bible ke Abasi ọn̄wọn̄ọ ndida eti ukara ndi, onyụn̄ okụt nte Abasi oyomde mme ebe ye mme ete ẹsinam n̄kpọ. (Ephesus 5:​28; 6:⁠4) Ke ekpri ini ebede, enye ye kpukpru nditọeka mi eken ẹma ẹkabade Mme Ntiense Jehovah. N̄kọdiọn̄ọke kpukpru oro sia n̄kodụhe n̄kpere ufọk.

NTE BIBLE OKOKPỤHỌREDE UWEM MI

Mma n̄wọrọ n̄kodụn̄ ke Australia ke 1978. Edi n̄kosụk n̄kopke inemesịt kpa ye oro ntịme mîkponke ke idụt oro, okụk onyụn̄ odude. N̄kosụk nsin̄wọn̄wọn̄ ọkpọsọn̄ mmịn nnyụn̄ nda n̄kpọsọn̄ ibọk. Mme Ntiense Jehovah ẹma ẹdi ufọk mi kpa isua oro. Mma mma se mmọ ẹkewụtde mi ke Bible ẹban̄a nte emem edidude ke isọn̄, edi n̄kamaha ndidian idem ye mmọ, n̄kanam n̄kpọ ye mmọ ke ifiọk.

Esisịt ini ke oro ebede, mma n̄kodu urua ifan̄ ke Philippines. Nditọeka mi ẹma ẹdọhọ mi ke ete mi enen̄ede esịn ukeme okpụhọde, edi esịt ama ayat mi tutu nyomke ndikokụt enye ke enyịn.

Ekpri eyeneka mi an̄wan ama owụt mi ke Bible se inamde ufen ye ufịk okpon ntem ke ererimbot. Idem ama akpa mi nte utọ ekpri eyen oro mîkwe n̄kpọ ndomokiet kan̄a ke uwem ekemede ndibọrọ mbụme mi. Mbemiso nnyọn̄de, ete mi ama ọnọ mi n̄wed Afo Emekeme Ndidu Uwem ke Nsinsi ke Paradise ke Isọn̄. * Enye ama ọdọhọ mi ete: “Kûyo aba. N̄wed emi ayan̄wam fi okụt se oyomde.” Enye ama ọdọhọ n̄koyom Mme Ntiense Jehovah n̄kụt mma nsịm Australia.

Mma nnam se ete mi ọkọdọhọde. Mma n̄kokụt Ufọkmbono Obio Ubọn̄ emi ekekperede ufọk mi ke Brisbane. Mma nnyụn̄ nnyịme ẹkpep mi Bible. Un̄wọn̄ọ Abasi, utọ nte eke Daniel ibuot 7 ye Isaiah ibuot 9, ama anam n̄kụt ke Obio Ubọn̄ Abasi ayakara ofụri isọn̄ ke ini iso, ndien ke n̄kpọ ayasan̄a ọfọn ke ukara enye oro. Mma n̄kpep ke uwem eyenem nnyịn ini ofụri isọn̄ edidide Paradise. Mma nyom Abasi ama mi, edi mma mfiọk ke ana ntre ndisisọp iyatesịt, ndikpa mmịn ye ndida n̄kpọsọn̄ ibọk, nnyụn̄ ntre oburobụt uwem. Ami ye eyenan̄wan emi okodụn̄de ye ami ima idian̄ade, mma nnyụn̄ ntre ndida n̄kpọsọn̄ ibọk ye ndikpa mmịn. Nte n̄kọdiọn̄de-diọn̄ mbuọt idem ye Jehovah, mma mbọn̄ akam mben̄e enye an̄wam mi n̄kpụhọde.

Sụn̄sụn̄ sụn̄sụn̄, ama edin̄wan̄a mi ke se n̄kpepde ekeme ndinam owo okpụhọde. Bible ọdọhọ ke edieke isịnde ukeme, ke imekeme ndidu eti uwem. (Colossae 3:​9, 10) Nte n̄kosụk ndomode ndinam oro, mma ndikụt ke ekeme ndidi ete mi okpụhọde nte nditọeka mi ẹketịn̄de. Utu ke ndiyat esịt nnyụn̄ nsua enye, mma nyom ndinam emem ye enye. Mma mfen nnọ ete mi ke akpatre nnyụn̄ ntre usua oro n̄kasuade enye toto ke edet iba.

UFỌN ORO MBỌDE

Ini n̄kedide akparawa, mma nsitiene mme owo nnam n̄kpọ emi ekemede ndibiat owo idem m̀mê emi ekemede ndida owo ibuot. Se Bible etịn̄de ama osu mi ke idem​​—idiọk nsan̄a ẹma ẹtụn mi usụn̄. (1 Corinth 15:33) Edi mmenyene mme ufan emi n̄kemede ndiberi edem ke otu Mme Ntiense Jehovah, mmọ ẹnyụn̄ ẹn̄wam mi ndi eti owo. Kpa ke otu mmọ ke n̄kokụt edima an̄wan mi, Loretta. Ami ye enye imesikpep mme owo nte Bible ekemede ndin̄wam mmọ.

Ke ndia udia ye n̄wan mi ye mme ufan mi

Bible ama an̄wam ete mi akabade edi utọ owo emi n̄kekerede ke enye ikemeke-keme ndidi. Enye ama akabade eti ebe ọnọ eka mi onyụn̄ edi Christian emi osụhọrede idem onyụn̄ etiede emem emem. Ete mi ama afat mi ini ikosobode ke 1987 ke mma n̄kana baptism nnyụn̄ n̄kabade ndi Ntiense Jehovah. Ata akpa ini emi ete mi akafatde mi ekedi oro tọn̄ọ n̄kamamana!

Ke se ibede isua 35, ete mi ye eka mi ẹma ẹsisan̄a ntre ẹkpep mme owo se Bible ọn̄wọn̄ọde. Ete mi ama esitịn̄ enyịn anam n̄kpọ onyụn̄ ekerede aban̄a mme owo tutu ẹdiọn̄ọ enye nte owo emi esin̄wamde owo. Mma n̄kpep ndikpono enye nnyụn̄ mma enye. Ama enem mi ndinam mme owo ẹfiọk ke ndi eyen esie! Enye ama akpa ke 2016, edi esinem mi tutu mma nti enye sia mmọfiọk ke nnyịn mbiba ndikanam se ikekpepde ke Bible ama enen̄ede an̄wam nnyịn ikpụhọde. Kpukpru usua oro n̄kasuade ete mi ama okụre. Mmonyụn̄ nnen̄ede n̄kọm Ete mi eke heaven, Jehovah Abasi. Enye ọn̄wọn̄ọ nditre kpukpru se inamde mfịna odu ke ubon ke ofụri ererimbot.

^ ikp. 20 Mme Ntiense Jehovah ẹkesio, edi owo imịn̄ke aba.