• ISUA AKAMANADE: 1962

  • EBIET OTODE: Canada

  • SE ENYE EKEDIDE: Ekesidu oburobụt uwem

NTE UWEM MI EKETIEDE

N̄kamana ke Montreal emi edide n̄kponn̄kan obio ke Quebec ke Canada. Ete ye eka mi ẹkebọk mi ye nditọeka mi ita eken ke ediye ebiet emi ẹkotde Rosemont. Ete ye eka mi ẹma ẹma nnyịn etieti, ifụre ama odu ke ubon nnyịn, uwem ama onyụn̄ enem kpukpru nnyịn.

Mma mma Bible ini ndide eyenọwọn̄. Mmeti nte n̄kokotde mbụk uwem Jesus ke Obufa Testament ini n̄kedide isua 12. Se n̄kokotde oro ama enem mi tutu. Mma nnen̄ede mma nte Jesus akamade mme owo esinyụn̄ atuade owo mbọm; n̄koyom nditie nte enye. Edi ikọdọn̄ke mi aba nditie nte enye ini n̄kọtọn̄ọde ndidian idem ye ndiọi ufan.

Ete mi ekesibre saxophone, ama onyụn̄ ọnọ mi saxophone esie. Edi idịghe oro kpọt, enye ama ekpep mi ndima ikwọ etieti, tutu ndida ikwọ nte ubọkọkọ. Mma mma ikwọ etieti, ndien ikebịghike mma n̄kpep ndibre kita. Nte ini akakade mma nda ufan mi ifan̄ ntọn̄ọ n̄ka emi ẹsibrede ikwọ emi n̄kukwak esinen̄erede ọsọn̄ uyo. Ima isibre ke itie kọnsat. Ndusụk mme enyene kọmpeni emi ẹsisiode ikwọ ẹnyụn̄ ẹwọrọde etop etieti ẹma ẹkụt se isinamde ẹnyụn̄ ẹdidọhọ mi ke ikpama ndinam ikwọ mi enen̄ede ọwọrọ etop. Mma nsịn ubọk ke n̄wed nnyịme ndisikwọ ikwọ nnọ akamba kọmpeni ikwọ kiet. Ikwọ mi ama edinen̄ede ọwọrọ etop tutu ẹsibre mmọ ediwak ini ke radio ke Quebec.

Eketie nte mma nnyene kpukpru se n̄kpoyoyom. N̄kedi ọwọrọetop akparawa. Mma mma ikwọ nnyụn̄ nda enye n̄n̄wana ata ediwak okụk. Amaedi uwemeyo, n̄kesisịn̄ede idem, nnam n̄kpọ ke TV, ẹsinam ndụn̄ọde ye ami, mme owo ẹma ẹsinyụn̄ ẹmen n̄wed mmọ ẹsọk mi n-sign nnọ mmọ. Ndien okoneyo, mbre ikwọ nnyụn̄ n̄ka usọrọ.Mma ntọn̄ọ ndin̄wọn̄ ọkpọsọn̄ mmịn ini nsụk ndide uyen mbak ndịk otuowo idinam mi, ndien nte ini akade ntọn̄ọ ndida n̄kpọsọn̄ ibọk. Mma nsinam n̄kpọ emi ekemede ndinọ owo unan nnyụn̄ ndu oburobụt uwem.

Ndusụk owo ẹkeyom nditie nte ami sia eketie nte mmokop inemesịt. Edi ke esịt mi, mma nsikop ndobo akpan akpan ini ndude ikpọn̄. Mma nsifụhọ etieti, esịt onyụn̄ etịmede mi. N̄kpọ mmọn̄eyet ama etịbe ini n̄kenen̄erede n̄wọrọ etop. AIDS ama owot owo iba ke otu mbon kọmpeni emi n̄kesikwọde ikwọ nnọ. N̄kpa mmọ ama otụk mi etieti! Kpa ye oro n̄kamade ikwọ, oburobụt uwem emi mme ọkwọ ikwọ ẹsidude ama etek mi esịt.

NTE BIBLE OKOKPỤHỌREDE UWEM MI

Kpa ye oro n̄kọwọrọde etop nnyụn̄ nnyenede okụk, mma ndiọn̄ọ ke ererimbot emi itiehe nte akpanade etie. Mma n̄kere m̀mê nso inam ukwan̄ikpe awak ntem, m̀mê nso inam Abasi ododop ese. Mma mbọn̄ akam ediwak ini mben̄e Abasi ọbọrọ mi mbụme oro. Isan̄ kiet emi n̄kodude ke nduọkodudu, mma nda ufan̄ n̄kenyenede ntọn̄ọ ndifiak n̄kot Bible. Okposụkedi emi ata ediwak se n̄kokotde mîkenen̄ekede in̄wan̄a mi, mma nnịm ke anaedi utịt ererimbot emi ekpere.

Nte n̄kosụk n̄kotde Bible, mma n̄kụt ke enyene ini emi Jesus eketiede utreudia ke desat usen 40. (Matthew 4:1, 2) Mma n̄kere ke n̄kpanam ntre ke Abasi ekeme ndiyarade idemesie nnọ mi. Ntre mma nnịm usen emi nditọn̄ọde. Urua iba mbemiso usen oro, Mme Ntiense Jehovah iba ẹma ẹkọn̄ usụn̄ ufọk mi. Mma mberede usụn̄ nnọ mmọ nte ẹdọhọ ke n̄ketetie mbet mmọ. Mma nsak enyịn nse owo mmọ kiet emi ekekerede Jacques mbụp enye nte: “Idisan̄a didie idiọn̄ọ ke idu ke mme akpatre usen ererimbot emi?” Enye ama okụbọde Bible esie okot 2 Timothy 3:1-5. Mma mbụp mmọ mbiba ediwak mbụme efen efen. Ama enem mi nte mmọ ẹkedade Bible ẹbọrọ mi mme mbụme oro ke usụn̄ oro an̄wan̄ade owo. Ke mmọ ẹma ẹkefiak ẹdi ikafan̄, mma ndikụt ke ufọn idụhe nditie utreudia.

Mma ntọn̄ọ ndikpep Bible ye Mme Ntiense Jehovah kpukpru ini. Ekem mma nsịbe anyan idet mi nnyụn̄ ntọn̄ọ ndidụk kpukpru mbono esop ke Ufọkmbono Obio Ubọn̄. Nte ẹkedarade mi ke mbono esop ama etiene anam nnen̄ede mfiọk ke mmokụt akpanikọ.

Akana n̄kpụhọde ndusụk n̄kpọ ke uwem mi man n̄keme ndinam se n̄kekpepde ke Bible. Akana ntre ndisida n̄kpọsọn̄ ibọk nnyụn̄ ntre oburobụt uwem. Akana nnyụn̄ ntre ndisikere mban̄a idemmi kpọt, edi nsikere mban̄a mbon en̄wen n̄ko. N̄kọbọk nditọ mi mbiba ikpọn̄, ntre akana n̄kpep ndima mmọ nnyụn̄ n̄n̄wam mmọ ẹdiọn̄ọ Abasi. Oro ama anam nsion̄o idem n̄kpọn̄ mbubehe ikwọ nnyụn̄ n̄kanam utom ke factory, edi okụk ẹkekpede ikekemke n̄kpọ.

Kpukpru oro ikememke. Nte n̄kosụk ndomode nditre n̄kpọsọn̄ ibọk, mma nnyene mme mfịna emi mme owo ẹsinyenede ẹma ẹtre n̄kpọsọn̄ ibọk. Mma mfiak nda n̄kpọsọn̄ ibọk ikafan̄ ke mma n̄ketre. (Rome 7:19, 21-24) Nditre oburobụt uwem ọkọsọn̄ mi akan. Obufa utom mi ama esikak mi ke idem, ekpri okụk ẹkesikpede ama onyụn̄ anam odorode mi. Akada mi ofụri ọfiọn̄ ita ndin̄wana okụk emi n̄kesidade hour iba kpọt nnyene ini n̄kesikwọde ikwọ.

Akam ama an̄wam mi n̄kpụhọde kpa ye oro mîkememke. N̄kpọ en̄wen emi akan̄wamde mi ekedi ndikot Bible kpukpru ini. Enyene mme akpan itie Bible emi ẹkenen̄erede ẹsọn̄ọ mi idem. Kiet ekedi 2 Corinth 7:1 emi ọdọhọde mme Christian ‘ẹyet kpukpru se isabarede obụkidem ye spirit ẹfep ke idemmọ.’ Itie Bible en̄wen emi akanamde nnịm ke mmekeme nditre ndiọi uwem ekedi Philippi 4:13. Itie oro ọdọhọ ete: “Mmenyene ukeme ndinam kpukpru n̄kpọ ebe ke enye emi ọnọde mi odudu.” Jehovah Abasi ama ọbọrọ akam mi onyụn̄ anam akpanikọ emi n̄kekpepde ke Bible an̄wan̄a mi nnyụn̄ nnanam se n̄kpepde. Emi ama anam nyak uwem mi nnọ enye. (1 Peter 4:1, 2) Ke 1997, mma nna baptism nnyụn̄ ndidi Ntiense Jehovah.

UFỌN ORO MBỌDE

Mmenịm ke n̄kpakpa idahaemi ekpedi nsụk ndu uwem nte n̄kesidude. Idahaemi mmenen̄ede n̄kop inemesịt! Elvie edima an̄wan mi edi ata edidiọn̄ ọnọ mi. Enem nnyịn mbiba ndisisan̄a ntre n̄kpep mme owo Bible kpukpru ini. Emi anam nnen̄ede n̄kop idatesịt, onyụn̄ anam esịt ana mi sụn̄. Mmọkọm Jehovah etieti nte enye okodụride mi adian idem.—John 6:44.