Ẹkenam Kpan̄ Utọn̄ Nọ Abasi man ẹsida ndise oro odude ke n̄wed oro ẹkpep mbon emi mîkemeke ndikot n̄wed mme akpan n̄kpọ emi ẹdude ke Bible. Ukpepn̄kpọ kiet kiet enyene page iba onyụn̄ enyene ediwak ndise, ndien ẹsịn idiọn̄ọ oro owụtde nte ẹdinemede mme ndise emi ke adiana ke adiana.

Kpan̄ Utọn̄ Nọ Abasi Nyụn̄ Du Uwem ke Nsinsi ye Kpan̄ Utọn̄ Nọ Abasi ẹnyene ukem ndise, edi ẹwet n̄kpọ awak ke Kpan̄ Utọn̄ Nọ Abasi Nyụn̄ Du Uwem ke Nsinsi. Ẹkeme ndikama enye n̄kpep Bible ye owo emi ekemede ndikot n̄wed esisịt. Mme asuanetop ẹsima ndikama enye emi ke ini ẹkpepde owo n̄kpọ ke n̄wed Kpan̄ Utọn̄ Nọ Abasi. Ekebe odu ke utịt ediwak page, emi ẹwetde ndusụk akpan n̄kpọ efen ye mme itie N̄wed Abasi oro ẹkemede ndineme, edieke emi edin̄wamde eyen ukpepn̄kpọ.

Ẹkeme ndinọ owo ndiye n̄kpri n̄wed emi ini ekededi, ọkpọkọm idịghe mmọ ke ẹdọhọ ẹnọ ọfiọn̄ oro. Ke ini adade n̄wed emi ekpep owo n̄kpọ, da mme ndise emi ẹdude ke n̄wed oro nnam se Bible etịn̄de an̄wan̄a enye. Bụp enye mbụme man enye etiene esịn uyo. Emi ayanam ọfiọk m̀mê se ekpepde an̄wan̄a enye. Kot nyụn̄ neme mme itie N̄wed Abasi emi ẹdude ke utịt page kiet kiet. Ke ini ẹkpepde ediye ekpri n̄wed emi ẹkụre, ẹtọn̄ọ ndikpep n̄wed Nso ke Bible Ekpep Nnyịn? man an̄wam enye odot ndina baptism.