Nte oyomde okụbọde

Mek usem

Be ka udiana n̄kpọ

Be ka se isịnede

Be ka se isịnede

Mme Ntiense Jehovah

Efịk

Nso ke Bible Ekpep Nnyịn?

 IBUOT USỤKKIET

Ndi Utịt Ererimbot Ekpere?

Ndi Utịt Ererimbot Ekpere?

1. Nso ikeme ndin̄wam nnyịn idiọn̄ọ se iditịbede ke ini iso?

NDI akanam emese TV m̀mê okop n̄kpọ ke radio emi anamde fi ekere m̀mê nso inam ererimbot emi etie ntem? Afanikọn̄ ye ibak emi ọyọhọde ererimbot idahaemi anam ndusụk owo ẹdọhọ ke etie nte utịt ererimbot ekpere. Ndi se mmọ ẹtịn̄de edi akpanikọ? Ndi odu n̄kpọ emi ekemede ndin̄wam nnyịn idiọn̄ọ se iditịbede ke ini iso? Ih, odu. Kpa ye oro nnyịn mîdiọn̄ọke se iditịbede ke ini iso, Jehovah Abasi ọdiọn̄ọ. Ndien enye etịn̄ ke Bible se enye edinamde inọ nnyịn ye se enye edinamde ke isọn̄ ke ini iso.—Isaiah 46:10; James 4:14.

2, 3. Nso ke mme mbet Jesus ẹkeyom ndidiọn̄ọ, ndien didie ke Jesus ọkọbọrọ mbụme mmọ?

2 Ke ini Bible ọdọhọde ke utịt ererimbot ke edi, emi iwọrọke ke ẹyesobo isọn̄ emi nnyịn idude mi, edi ọwọrọ ke ẹyesobo mme idiọkowo. Jesus ama ekpep mme owo ke Obio Ubọn̄ Abasi ayakara isọn̄. (Luke 4:43) Mbet esie ẹma ẹyom ndidiọn̄ọ ini emi Obio Ubọn̄ Abasi edidide, ntem mmọ ẹma ẹbụp Jesus ẹte: “Ini ewe ke mme n̄kpọ emi ẹditịbe, nso idinyụn̄ idi idiọn̄ọ edidu fo ye eke akpatre ini editịm n̄kpọ emi?” (Matthew 24:3) Jesus ikasiakke usen emi Obio Ubọn̄ Abasi edidide, edi ama etịn̄ mme n̄kpọ oro ẹditịbede mbemiso utịt ererimbot emi edi. Se Jesus eketịn̄de ke etịbe idahaemi.

3 Idahaemi iyom ndineme mme n̄kpọ emi ẹwụtde ke utịt ererimbot enen̄ede ekpere. Akpa kan̄a, yak ineme  iban̄a ekọn̄ emi ẹken̄wanade ke heaven. Emi ayan̄wam nnyịn idiọn̄ọ ntak emi n̄kpọ ọdiọkde ntem ke isọn̄.

EKỌN̄ EMI ẸKEN̄WANADE KE HEAVEN

4, 5. (a) Nso iketịbe ke heaven ke Jesus ama akakabade edi Edidem? (b) Ediyarade 12:12 ọkọdọhọ ke nso iditịbe ke isọn̄ ke ẹma ẹkesio Satan ẹduọk?

4 Ima ikpep ke Ibuot 8 nte ke Jesus akakabade edi Edidem ke heaven ke isua 1914. (Daniel 7:13, 14) N̄wed Ediyarade etịn̄ se iketịbede ete: “Ekọn̄ asiaha ke heaven: Michael [oro edi, Jesus] ye mme angel esie ẹn̄wana ekọn̄ ye dragon [Satan], dragon ye mme angel esie ẹnyụn̄ ẹn̄wana.” * Ẹma ẹkan Satan ye mme demon esie ke ekọn̄ oro, ntre ẹma ẹsion̄o mmọ ẹduọn̄ọ ke isọn̄. Emi ama enem mme angel esịt etieti! Edi nso kaban̄a mme owo mi ke isọn̄? Bible ọdọhọ ke ini oro ke ediwak afanikọn̄ emi akade iso mfịn ke ererimbot ọkọtọn̄ọ. Ntak-a? Koro Satan asan̄a ye akwa iyatesịt “sia enye ọfiọkde ete ini imọ edi ibio.”—Ediyarade 12:7, 9, 12.

5 Andidiọk enen̄ede esịn mfịna ke isọn̄ emi. Esịt enen̄ede ayat enye koro enye ọfiọk ke ini emi osụhọde ọnọ imọ iniọn̄ke aba. Ẹyak ise mme n̄kpọ oro Jesus ọkọdọhọde ke ẹyetịbe ke mme akpatre usen emi.—Se Se Ẹwetde Ẹdian 24.

MME AKPATRE USEN

6, 7. Didie ke se Jesus eketịn̄de aban̄a ekọn̄ ye akan̄ osu mfịn ke ererimbot?

6 Ekọn̄. Jesus ọkọdọhọ ete: “Idụt ayadaha an̄wana ye idụt, obio ubọn̄ kiet oyonyụn̄ adaha an̄wana ye obio  ubọn̄ en̄wen.” (Matthew 24:7) Ediwak owo ẹkpan̄a ke ekọn̄ ke eyo nnyịn ẹkan ini en̄wen ekededi. N̄ka emi ẹsede ẹban̄a se ikade iso ke ererimbot ẹdọhọ ke ọtọn̄ọde ke 1914, ke mbon emi ẹkpan̄ade ke ekọn̄ ẹbe owo miliọn 100. Ibat mbon emi ẹkekpan̄ade ke ekọn̄ ọtọn̄ọde ke isua 1900 edisịm isua 2000 awak ke itie ita akan ofụri ibatowo emi ẹkekpan̄ade ke ekọn̄ ọtọn̄ọde ke eyo Jesus tutu esịm isua 1900. Kere utọ ufen emi ekọn̄ anamde ata ediwak owo ẹbọ!

7 Akan̄. Jesus ama ọdọhọ ke ‘akan̄ oyodu.’ (Matthew 24:7) Okposụkedi emi ata ediwak udia odude idahaemi, udia isụk ikemke ediwak owo. Ntak-a? Koro mmọ inyeneke okụk ndida ndep udia m̀mê ndida ndep isọn̄ ntọ n̄kpọ. Se ibede owo biliọn kiet isinyeneke okụk emi esịmde naira 200 ndida ndep udia ke usen. Esop Emi Esede Aban̄a Nsọn̄idem Ererimbot ọdọhọ ke ediwak miliọn nditọwọn̄ ẹsikpan̄a kpukpru isua ke ntak emi mmọ mîkwe eti udia idia.

8, 9. Nso iwụt ke se Jesus eketịn̄de aban̄a unyekisọn̄ ye udọn̄ọ ke ẹsu?

 8 Unyekisọn̄. Jesus ama ebem iso etịn̄ ete: “Ikpọ unyekisọn̄ ẹyedu.” (Luke 21:11) Ediwak ikpọ unyekisọn̄ ẹtịbe kpukpru isua idahaemi. Ọtọn̄ọde ke isua 1900, se ibede owo miliọn iba ẹkpan̄a ke unyekisọn̄. Kpa ye oro ntaifiọk ẹkemede ndin̄wam mme owo ẹdiọn̄ọ ini ye ebiet emi unyekisọn̄ editịbede, unyekisọn̄ esisụk owowot ediwak owo.

9 Idiọk udọn̄ọ. Jesus ama etetịn̄ ke “ndiọi udọn̄ọ” ẹyedu. Ndiọi udọn̄ọ ẹwak etieti ẹnyụn̄ ẹwot ata ediwak owo. (Luke 21:11) Kpa ye oro mme dọkta ẹdiọn̄ọde mbufa usụn̄ ndida nsọbọ owo idem, nsio nsio udọn̄ọ ẹsụk ẹdodu emi usọbọ mîdụhe. N̄wed ndụn̄ọde kiet ọdọhọ ke kpukpru isua, mme utọ udọn̄ọ nte utoenyịn, akpaikpai ikọn̄, ye utọrọ ẹsiwot ediwak miliọn owo. Edi ikụreke ke oro, ke ufan̄ isua 40 emi ẹbede, mbiausọbọ ẹkụt se ibede mbufa udọn̄ọ 30, ndien ndusụk mmọ inyeneke usọbọ.

 NTE MME OWO ẸDITIEDE KE MME AKPATRE USEN

10. Didie ke 2 Timothy 3:1-5 osu mfịn?

10 Bible ọdọhọ ke 2 Timothy 3:1-5 ete: “Ndiọkeyo emi ọsọn̄de ndiyọ oyodu ke mme akpatre usen.” Apostle Paul ama etịn̄ nte mme owo ẹdidude uwem ke mme akpatre usen emi. Enye ọkọdọhọ ke mme owo

  • ẹdima idem mmọ

  • ẹyema okụk

  • ẹyesọn̄ ibuot ye ete ye eka mmọ

  • idinyeneke nsọn̄ọnda

  • idimaha mbonubon mmọ

  • idinyeneke mfara ke idem

  • ẹyema afai

  • ẹyema mbre ẹkan Abasi

  • ẹyenam nte ke imama Abasi edi ikopke uyo esie

11. Psalm 92:7 ọdọhọ ke nso ke ẹdinam mme idiọkowo?

11 Ndi utọ mme owo emi ẹdu ke obio emi afo odụn̄de? Ediwak owo ẹtie ntre ke ofụri ererimbot. Edi Abasi ayanam n̄kpọ aban̄a emi ke mîbịghike. Enye ọn̄wọn̄ọ ete: “Ke ini mme idiọkowo ẹfiaride nte mbiet kpukpru mbon ibak ẹnyụn̄ ẹsehede,  edi man ẹkpesobo mmọ ẹfep ke nsinsi.”—Psalm 92:7.

ETI MBỤK KE MME AKPATRE USEN

12, 13. Nso ke Jehovah ekpep nnyịn ke mme akpatre usen emi?

12 Bible ama ọdọhọ ke ufen ye n̄kpọ mmọn̄eyet ediyọyọhọ ererimbot ke ini utịt ekperede. Edi enye etịn̄ n̄ko ke nti n̄kpọ ẹyetịbe.

“Ẹyenyụn̄ ẹkwọrọ eti mbụk obio ubọn̄ emi ke ofụri isọn̄.”—Matthew 24:14

13 Ifiọk Abasi oyokpon. Prọfet Daniel ama etịn̄ n̄kpọ aban̄a ini nnyịn emi. Enye ọkọdọhọ ke “ata ifiọk oyokpon.” (Daniel 12:4) Emi ọkọwọrọ ke Abasi ayanam Ikọ esie enen̄ede an̄wan̄a ikọt esie akan nte ekesin̄wan̄ade. Jehovah enen̄ede anam emi toto ke 1914. Ke uwụtn̄kpọ, enye anam nnyịn idiọn̄ọ ke enyịn̄ imọ, se imọ iduakde ndinam ke isọn̄, ye ufak emi ẹkenọde ke ibuot nnyịn ẹnen̄ede ẹdi akpan n̄kpọ. Enye ekpep nnyịn n̄ko se isitịbede inọ owo emi akpade, onyụn̄ ekpep nnyịn aban̄a ediset ke n̄kpa. Ima ikpep ke Obio Ubọn̄ esie ikpọn̄ edikọk ofụri mfịna nnyịn. Imekpep n̄ko se ikpanamde man ikop inemesịt ye se ikpanamde man inem Abasi esịt. Nso ke nnyịn ikpada kpukpru se ikpepde emi inam? Prọfesi en̄wen ke Bible ọbọrọ mbụme oro.—Se Se Ẹwetde Ẹdian 21 ye 25.

14. M̀mọ̀n̄ ke ẹkwọrọ eti mbụk Obio Ubọn̄, ndien mmanie ẹkwọrọ?

14 Ẹyekwọrọ ikọ ke ofụri ererimbot. Ke ini Jesus eketịn̄de aban̄a mme akpatre usen emi, enye ama ọdọhọ ke “ẹyenyụn̄ ẹkwọrọ eti mbụk obio ubọn̄ emi ke ofụri isọn̄.” (Matthew 24:3, 14) Ẹda se ibede usem 700 ẹkwọrọ eti mbụk emi ke se ibede idụt 230. Mme Ntiense Jehovah ke “kpukpru idụt” ke ẹn̄wam mme owo ẹdiọn̄ọ se Obio Ubọn̄ edide ye se enye edinamde inọ mme owo. (Ediyarade 7:9) Mmọ ẹsinam emi ke  mfọn. Kpa ye oro ediwak owo ẹsuade ẹnyụn̄ ẹkọbọde mmọ, idụhe se ikemede ndinam mmọ ẹtre utom ukwọrọikọ oro Jesus ọkọdọhọde ke ẹyenam.—Luke 21:17.

NSO KE AFO EDINAM?

15. (a) Ndi afo emenịm ke nnyịn idu uwem ke mme akpatre usen? Ntak enịmde? (b) Nso iditịbe inọ mbon oro ẹkopde uyo Jehovah ye mbon oro mîkopke?

15 Ndi afo emenịm ke nnyịn idu uwem ke mme akpatre usen? Ediwak n̄kpọ emi Bible eketịn̄de aban̄a mme akpatre usen emi ke ẹsu. Ke mîbịghike Jehovah ọyọdọhọ ẹtre ndikwọrọ ikọ, ndien “utịt” eyedi. (Matthew 24:14) Ini ewe ke utịt edidi? Edidi ke Armageddon, kpa ekọn̄ emi Abasi edidade itre kpukpru idiọkido. Jehovah ọyọdọhọ Jesus ye mme okopodudu angel eken ete ẹsobo owo ekededi emi mîsụkke ibuot inọ imọ ye Jesus. (2 Thessalonica 1:6-9) Ke oro ebede Satan ye mme demon esie idibian̄ake mme owo aba. Ndien kpukpru mbon oro ẹkopde uyo Abasi ẹnyụn̄ ẹdade ẹnọ ukara esie ẹyekụt nte Abasi anamde kpukpru se enye ọkọn̄wọn̄ọde.—Ediyarade 20:1-3; 21:3-5.

16. Sia utịt enen̄erede ekpere, nso ke ana afo anam?

16 Ibịghike ererimbot emi Satan akarade mi ọmọn̄ ebebe efep. Ntem ọfọn owo obụp idemesie ete, ‘Nso ke ana nnam?’ Jehovah oyom fi enen̄ede ekpep Bible. Mbọk da ukpepn̄kpọ emi nte ata akpan n̄kpọ. (John 17:3) Mme Ntiense Jehovah ẹsisop idem ọtọkiet ẹkpep Bible kpukpru urua man ẹn̄wam mme owo ẹnen̄ede ẹdiọn̄ọ Bible. Nam se ekekeme man esitiene odụk kpukpru ini. (Kot Mme Hebrew 10:24, 25.) Edieke okụtde ke oyom anam ndusụk ukpụhọde, mbọk n̄wana nam.  Ama anam oro, Jehovah eyenen̄ede ama fi, afo oyonyụn̄ ama enye n̄ko.—James 4:8.

17. Nso idinam nsobo ererimbot emi ababuat ata ediwak owo?

17 Apostle Paul ama ọdọhọ ke ẹdisobo mme idiọkowo ke ini emi ediwak owo mîdorike enyịn, ke nsobo emi “edidi nte inọ ke okoneyo.” (1 Thessalonica 5:2) Jesus ama etịn̄ ke ediwak owo ididọn̄ke enyịn ke mme n̄kpọ emi ẹwụtde ke utịt enen̄ede ekpere. Enye ọkọdọhọ ete: “Kpa nte mme usen Noah ẹkedide, kpasụk ntre ke edidu Eyen owo [m̀mê, mme akpatre usen] edidi. Koro kpa nte mmọ ẹkedude ke mme usen oro ẹkebemde ukwọ iso, ẹdia ẹnyụn̄ ẹn̄wọn̄, irenowo ẹdọ ndọ ẹnyụn̄ ẹda iban ẹnọ ke ndọ, tutu esịm usen emi Noah odụkde ubom; mmọ inyụn̄ ifiọkke tutu ukwọ edi edikpọri mmọ kpukpru efep, kpasụk ntre ke edidu Eyen owo edidi.”—Matthew 24:37-39.

18. Nso ke Jesus ọkọdọhọ inam?

18 Jesus ama ọdọhọ nnyịn ete ikpeme mbak “udia ye ọkpọsọn̄ un̄wọn̄ mmịn ye editịmede esịt uwem emi” ẹdinam nnyịn ifre ke utịt enen̄ede ekpere. Enye ọkọdọhọ ke nsobo ererimbot emi editie “nte ekpọ,” ke enye edibabuat mme owo. Jesus ama ọdọhọ n̄ko ete ke “enye eyesịm kpukpru mbon oro ẹdụn̄de ke ofụri iso isọn̄.” Ekem enye adian do ete: “Ẹdu ke edidemede, ndien, kpukpru ini ẹnam n̄kpeubọk [oro edi, ẹbọn̄ akam ke ofụri esịt] man mbufo ẹkpekeme ndibọhọ kpukpru n̄kpọ emi ẹditịbede, nnyụn̄ nda ke iso Eyen owo.” (Luke 21:34-36) Ntak emi anade isịn idem inam se Jesus ọdọhọde emi? Sia ibịghike ẹyesobo ererimbot Satan emi. Mbon emi ẹnamde se Jehovah ye Jesus ẹmade kpọt ẹdibọhọ. Ndien mmọ ẹyedu uwem ke nsinsi ke obufa ererimbot.—John 3:16; 2 Peter 3:13.

^ ikp. 4 Michael edi enyịn̄ efen oro ẹnọde Jesus Christ. Edieke oyomde ndifiọk n̄kpọ efen efen mban̄a emi, mbọk se Se Ẹwetde Ẹdian 23.

Kpep N̄kpọ En̄wen

Nso ke Utịt Ọwọrọ?

Ndi ọmọfiọk ke se Bible etịn̄de aban̄a utịt idịghe idiọk mbụk, akam edi eti mbụk?