Nte oyomde okụbọde

Mek usem

Be ka udiana n̄kpọ

Be ka se isịnede

Be ka se isịnede

Mme Ntiense Jehovah

Efịk

Nso ke Bible Ekpep Nnyịn?

 IBUOT DUOPEBA

Nso ke Akpanam Man Edi Ufan Abasi?

Nso ke Akpanam Man Edi Ufan Abasi?

1, 2. Siak enyịn̄ ndusụk mbon emi ẹkedide ufan Jehovah.

ANIE ke akpama edi ufan fo? Ndi akpama owo emi ọfọnde ido, owo emi afo amade, owo emi mbufo mbiba ẹmehede, onyụn̄ enyenede mme edu emi afo amade?

2 Jehovah Abasi ama emek ndusụk owo mi ke isọn̄ nte mme ufan esie. Ke uwụtn̄kpọ, Abraham ekesịne ke otu mbon emi ẹkedide ufan Jehovah. (Isaiah 41:8; James 2:23) David n̄ko ekedi ufan Jehovah. Jehovah ọkọdọhọ ke David edi ‘owo emi ekemde esịt ye imọ.’ (Utom 13:22) Jehovah ama ama prọfet emi ekekerede Daniel etieti.—Daniel 9:23.

3. Nso ke Abraham, David, ye Daniel ẹkenam man ẹdi ufan Jehovah?

3 Nso ke Abraham, David, ye Daniel ẹkenam man ẹdi ufan Jehovah? Jehovah ọkọdọhọ Abraham ete: “Afo [ama okop] uyo mi.” (Genesis 22:18) Mbon emi ẹsụhọrede idem ẹnyụn̄ ẹkopde uyo Jehovah ẹsidi ufan esie. Ofụri idụt ẹkeme ndidi ufan Abasi. Ke uwụtn̄kpọ, Jehovah ọkọdọhọ ofụri Israel ete: “Ẹkop uyo mi, ndien ami nyedi Abasi mbufo, mbufo ẹyenyụn̄ ẹdi ikọt mi.” (Jeremiah 7:23) Emi ọwọrọ ke ana afo okop uyo Jehovah man ekeme ndidi ufan esie.

JEHOVAH ESIKPEME MME UFAN ESIE

4, 5. Nso ke Jehovah esinam man ekpeme mme ufan esie?

4 Bible ọdọhọ ke Jehovah esise kpukpru ebiet man enye “owụt odudu esie ke ufọn mbon oro ẹnamde n̄kpọ  ẹnọ enye ke ofụri esịt.” (2 Chronicle 16:9) Enyene se Jehovah ọn̄wọn̄ọde ndinam nnọ mme ufan esie ke Psalm 32:8. Enye ọdọhọ ete: “Ami nyanam fi enyene ikike nyonyụn̄ nteme fi usụn̄ eke afo edisan̄ade. Nyetịn̄ fi enyịn ke idem nnyụn̄ nteme fi.”

5 Enyene asua nnyịn emi okopde odudu etieti, emi mîyomke nnyịn idi ufan Abasi. Edi Jehovah eyekpeme nnyịn. (Kot Psalm 55:22.) Nnyịn inam n̄kpọ Jehovah ke ofụri esịt sia idi mme ufan esie. Imesisọn̄ọ ida inam n̄kpọ esie idem ke ini mfịna. Imonyụn̄ inịm ke enye idikpọn̄ke nnyịn nte andiwet psalm ekenịmde. Kop n̄kpọ en̄wen emi enye ekewetde aban̄a Jehovah mi. Enye ọkọdọhọ ete: “Koro enye odude mi ke ubọk nnasia, ami ndisehekede.” (Psalm 16:8; 63:8) Nso ke Satan esinam man nnyịn ikûdi aba ufan Abasi?

NSU EMI SATAN OKOSUDE

6. Nso utọ nsu ke Satan okosu odori mme owo?

6 Ke Ibuot  11, ima ikpep ke Satan ọkọdọhọ ke ukara Jehovah ifọnke, ke Jehovah edi osu nsu, ke enyene eti n̄kpọ emi enye mîyomke mme owo ẹnyene, ke oro anam enye okûyak Adam ye Eve ẹbiere se ifọnde ye se idiọkde ke idemmọ. N̄wed Job anam ifiọk ke Satan ama osu nsu odori kpukpru mbon emi ẹyomde ndidi ufan Abasi. Satan ọkọdọhọ ke mmọ ẹnam n̄kpọ Abasi ke ntak udori oro mmọ ẹdidiade, inamke ke ntak emi ẹmade Abasi. Enye ọkọdọhọ n̄ko ke imọ imekeme ndinam owo ekededi ọkpọn̄ Abasi. Ẹyak ise se ikemede ndikpep nto mbụk Job, inyụn̄ ise nte Jehovah ekekpemede enye.

7, 8. (a) Job ekedi nso utọ owo? (b) Nso ke Satan eketịn̄ aban̄a Job?

7 Job ekedi nso utọ owo? Enye ekedi eti owo, okonyụn̄ odu uwem ke n̄kpọ nte isua 3,600 emi ekebede. Jehovah  ọkọdọhọ ke idụhe owo ndomokiet ke ofụri ererimbot emi ekebietde enye. Enye ama abak Abasi etieti onyụn̄ asua se idiọkde. (Job 1:8) Job ekedi ata ufan Jehovah.

8 Satan ọkọdọhọ ke Job anam n̄kpọ Abasi ke ntak emi Abasi ọdiọn̄de Job. Satan ama ọdọhọ Jehovah ete: “Nte afo usịnke ọkọ ukan enye ye ufọk esie ye kpukpru se enye enyenede ukụk? Afo ọmọdiọn̄ utom ubọk esie, ufene esie ẹmenyụn̄ ẹtọt ẹyọhọ isọn̄. Edi, man ukpụhọde odu, mbọk nyan ubọk fo tụk kpukpru se enye enyenede nyụn̄ se m̀mê enye idisụn̄ike fi ke iso fo.”—Job 1:10, 11.

9. Nso ke Jehovah akayak Satan anam?

9 Satan ọkọdọhọ ke Job anam n̄kpọ Jehovah ke ntak n̄kpọ emi Jehovah anamde ọnọ enye. Enye ama ọdọhọ n̄ko ke imọ imekeme ndinam Job ọkpọn̄ Jehovah. Jehovah ama ọdiọn̄ọ ke Satan ososu, edi enye ama ayak Satan odomo Job man Satan okụt ke Job edi ufan Imọ ke ntak emi amade Imọ.

SATAN ANAM JOB IBAK

10. Nso ibak ke Satan akanam Job, edi Job akanam n̄kpọ didie?

10 Akpa n̄kpọ emi Satan akanamde ekedi ndiwot ndusụk ufene Job nnyụn̄ nnam mme owo ẹyịp mbon eken. Ekem Satan ama owot ediwak asan̄autom Job. Kpukpru se Job ekenyenede ama atak. Ke akpatre, Satan ama anam oyobio owot nditọ Job duop. Edi Job ikọkpọn̄ke Jehovah. Bible ọdọhọ ke ‘kpa ye kpukpru emi, Job ikanamke idiọk ikonyụn̄ itịn̄ke se mîdotke idian Abasi.’—Job 1:12-19, 22.

Jehovah ama ọdiọn̄ Job sia Job mîkọkpọn̄ke enye

11. (a) Nso ke Satan akafiak anam Job? (b) Nso ke Job eketịn̄?

11 Satan ikamaha ndisana Job nyak. Enye ama aka ọkọdọhọ Abasi ete: “Nyan ubọk fo tụk ọkpọ esie ye obụkidem esie nyụn̄ se m̀mê enye idisụn̄ike fi ke iso fo.” Satan ama ọtọ Job ata idiọk udọn̄ọ. (Job 2:5, 7) Edi Job ikosụk imaha  ndikpọn̄ Abasi. Enye ọkọdọhọ ete: “Tutu n̄kpa, ndiduọkke nsọn̄ọnda mi!”—Job 27:5.

12. Didie ke Job okowụt ke Satan edi osu nsu?

12 Job ikọdiọn̄ọke ke Satan ama osu nsu odori imọ, ikonyụn̄ idiọn̄ọke se inamde enye ọbọ utọ idiọk ufen oro. Enye ekekere ke Jehovah amia imọ ufen. (Job 6:4; 16:11-14) Edi kpa ye oro, enye ikọkpọn̄ke Jehovah. Emi ama anam ẹkụt ke Job ikanamke n̄kpọ Abasi ke ntak emi Abasi ọkọdiọn̄de enye, edi ke akanam ke ntak emi enye amade Abasi. Kpukpru se Satan eketịn̄de aban̄a Job ẹkedi nsu!

13. Nso ke Abasi akanam ọnọ Job?

13 Kpa ye emi Job mîkọdiọn̄ọke se ikade iso ke heaven, enye ikọkpọn̄ke Abasi. Enye ama owụt ke Satan edi ata idiọk owo. Jehovah ama ọdiọn̄ Job ke ntak emi Job akakade iso edi ufan esie kpa ye ofụri mfịna emi enye ekenyenede.—Job 42:12-17.

NSU EMI SATAN OSUDE ODORI FI

14, 15. Nso nsu ke Satan osu odori kpukpru owo?

14 Emekeme ndikpep ediwak n̄kpọ nto mbụk Job. Satan ọdọhọ ke nnyịn n̄ko inam n̄kpọ Abasi ke ntak udori emi idiade. Satan ọkọdọhọ ke Job 2:4 ete ke “kpukpru se owo enyenede ke enye edinọ ke ibuot ukpọn̄ esie.” Ikọ esie ọwọrọ ke kpukpru owo ẹnam n̄kpọ Abasi ẹyom ufọn idemmọ, idịghe Job ikpọn̄. Ata ediwak isua ke Job ama akakpa, Satan osụk ososụn̄i Jehovah onyụn̄ osu nsu odori ikọt esie. Ke uwụtn̄kpọ, Mme N̄ke 27:11 ọdọhọ ete: “Eyen mi, nyene ọniọn̄, nyụn̄ dat mi esịt, man n̄kụt se ndibọrọde owo eke osụn̄ide mi,” m̀mê ọsọn̄ọde mi enyịn.

15 Afo edibiere m̀mê imọ iyokop uyo Jehovah, ika iso idi ufan esie, inyụn̄ iwụt ke Satan edi osu nsu. Edieke anade ọkpọn̄ ndusụk n̄kpọ man ekeme ndidi ufan Abasi,  kûkere, koro ata nnennen n̄kpọ emi akpanamde edi oro! Idịghe ekpri n̄kpọ ke itịn̄ emi koro Satan ọdọhọ ke afo ọyọkpọn̄ Abasi ke ini enyenede mfịna. Enye esidomo ndida n̄kari nnam nnyịn ikpọn̄ Abasi. Didie ke enye esinam emi?

16. (a) Mme usụn̄ ewe ke Satan esidomo ndida nnam mme owo ẹtre ndinam n̄kpọ Abasi? (b) Nso ke Devil ekeme ndinam fi ekere man etre ndinam n̄kpọ Abasi?

16 Satan enyene nsio nsio usụn̄ emi enye esidomode ndida nnam nnyịn ikpọn̄ Abasi. Enye esinam n̄kpọ “nte ekpe eke okụnide, oyom owo eke enye editade.” (1 Peter 5:8) Edieke mme ufan fo, mbon mbufo, m̀mê mbon en̄wen ẹdọhọde fi etre ndikpep Bible m̀mê okûnam n̄kpọ emi afo ọdiọn̄ọde ke enen, kûyak idem akpa fi. Ekeme nditie fi nte ke Satan ọdọn̄ mmọ. * (John 15:19, 20) Satan esinam n̄ko nte imọ idi “angel un̄wana.” Enye ekeme ndisio n̄kari ndi man anam nnyịn isọn̄ ibuot ye Jehovah. (2 Corinth 11:14) N̄kpọ en̄wen emi Satan esidomode ndida nnam nnyịn ikpọn̄ Jehovah edi ndinam nnyịn ikere ke utọ owo nte nnyịn ikemeke ndinam n̄kpọ Abasi.—Mme N̄ke 24:10.

NAM SE JEHOVAH ỌDỌHỌDE

17. Ntak emi isikopde uyo Jehovah?

17 Edieke ikopde uyo Jehovah, nnyịn iwụt ke Satan edi osu nsu. Edi nso idin̄wam nnyịn ikop uyo Jehovah? Bible ọdọhọ ete: “Afo enyene ndima Jehovah Abasi fo ke ofụri esịt fo ye ke ofụri ukpọn̄ fo ye ke ofụri odudu fo.”  (Deuteronomy 6:5) Nnyịn isikop uyo Jehovah ke ntak emi imade enye. Nte ikade iso ima Jehovah, ntre ke edinen̄ede ọdọn̄ nnyịn ndinam kpukpru se enye ọdọhọde inam. Apostle John ekewet ete: “Ndima Abasi ọwọrọ ete nnyịn inịm mme ewụhọ esie; ndien mme ewụhọ esie idobike owo mbiomo.”—1 John 5:3.

18, 19. (a) Nso idi ndusụk n̄kpọ emi Jehovah ọdọhọde ke ifọnke? (b) Inam didie ifiọk ke Jehovah isidọhọke nnyịn inam n̄kpọ emi nnyịn mîdikemeke ndinam?

18 Nso idi ndusụk n̄kpọ emi Jehovah ọdọhọde ke ifọnke? Edieke esede ekebe emi, “ Sua Se Jehovah Asuade,” oyokụt mmọ do. Akpa ini emi okụtde ndusụk n̄kpọ do, emekeme ndikere ke mmọ inen̄ekede idiọk. Edi ama okot mme itie Bible oro onyụn̄ etịm ekere se okotde, oyokụt ke ọfọn anam item Jehovah. Emekeme ndikụt n̄ko ke oyom etre ndusụk n̄kpọ emi esinamde. Imọdiọn̄ọ ke idimemke,  edi edieke etrede mme n̄kpọ emi, eyenyene emem, oyonyụn̄ okop inemesịt sia afo edidi ata ufan Abasi. (Isaiah 48:17, 18) Nso inam inịm ke afo emekeme nditre ndiọi n̄kpọ?

19 Jehovah isidọhọke nnyịn inam n̄kpọ emi nnyịn mîdikemeke ndinam. (Deuteronomy 30:11-14) Enye edi ata Ufan nnyịn, enye ọdiọn̄ọ nnyịn akan nte nnyịn idiọn̄ọde idem nnyịn. Enye ọdiọn̄ọ se nnyịn ikemede ndinam ye se nnyịn mîkemeke ndinam. (Psalm 103:14) Apostle Paul ekewet ete: “Abasi edi anam-akpanikọ, idinyụn̄ iyakke ẹdomo mbufo ẹbe se mbufo ẹkemede ndiyọ, edi enye oyosio usụn̄ ubọhọ ọnọ mbufo ke ini idomo man mbufo ẹkeme ndiyọ enye.” (1 Corinth 10:13) Imenịm ke Jehovah iditreke ndin̄wam nnyịn man inam se inende. Enye ọyọnọ fi “odudu eke ebede ukeme owo” man afo ekeme ndiyọ se ededi emi ọwọrọde fi. (2 Corinth 4:7) Jehovah  ama ọnọ Paul utọ odudu emi ke ini enye ekenyenede mfịna, emi akanam Paul ọdọhọ ke imọ ‘imenyene ukeme ndinam kpukpru n̄kpọ ebe ke enye emi ọnọde imọ odudu.’—Philippi 4:13.

MA SE ABASI AMADE

20. Ewe nti edu ke akpana afo enyene, ndien ntak-a?

20 Edieke iyomde ndidi ufan Jehovah, ana itre ndinam se Jehovah ọdọhọde ke ọdiọk. Edi ikụreke ke oro. (Rome 12:9) Mbon emi ẹdide ufan Abasi ẹsima se Abasi amade. Ẹsiak nsio nsio n̄kpọ emi mme ufan Abasi ẹsinamde ke Psalm 15:1-5. (Kot.) Mme ufan Jehovah ẹsikpebe nti edu esie ẹnyụn̄ ẹnyene “ima, idatesịt, emem, anyanime, mfọnido, eti ido, mbuọtidem, ifụre ifụre ido, mfara ke idem.”—Galatia 5:22, 23.

21. Nso idin̄wam fi enyene mme edu emi Abasi amade?

21 Nso idin̄wam fi enyene nti edu emi? Ana okot onyụn̄ ekpep Bible kpukpru ini man ọdiọn̄ọ se Jehovah amade. (Isaiah 30:20, 21) Nte osụk anamde emi, afo eyenen̄ede ama Jehovah. Nte amade Jehovah, ntre ke edidọn̄ fi ndikop uyo esie.

22. Nso iditịbe edieke okopde uyo Jehovah?

22 Afo nditre ndinam se Abasi asuade nnyụn̄ ntọn̄ọ ndinam se enye amade etie nte afo ndision̄o akani ọfọn̄ nduọk, mmen obufa nsịne. Bible ọdọhọ ke ana ‘osio akani owo ọduọk’ onyụn̄ emen “obufa owo” esịne. (Colossae 3:9, 10) Kpa ye oro mîsimemke utom ndinam emi, edieke ikopde uyo Abasi inyụn̄ ikpụhọde uwem nnyịn, enye ọn̄wọn̄ọ ndinen̄ede ndiọn̄ nnyịn. (Psalm 19:11) Mbọk kop uyo Jehovah nyụn̄ wụt ke Satan edi osu nsu. Kûnam n̄kpọ Jehovah ke ntak n̄kpọ emi enye edinamde inọ fi ke ini iso, nam ke ntak emi amade enye. Edieke anamde emi, afo ye Abasi ẹdidi ata ufan!

^ ikp. 16 Emi iwọrọke ke mbon emi ẹdọhọde fi etre ndikpep Bible ẹdi nditọufọk Satan. Edi sia Satan edide “abasi editịm n̄kpọ emi,” ndien ‘ofụri ererimbot onyụn̄ esịnede ke idak odudu esie,’ isikpaha nnyịn idem ke ini ndusụk owo ẹdomode ndinam nnyịn itre ndinam n̄kpọ Jehovah.—2 Corinth 4:4; 1 John 5:19.