Be ka se isịnede

Be ka udiana n̄kpọ

Be ka se isịnede

Mme Ntiense Jehovah

Efịk

Nso ke Bible Ekpep Nnyịn?

 IBUOT ITA

Nso ke Abasi Aduak Ndinam Nnọ Mme Owo?

Nso ke Abasi Aduak Ndinam Nnọ Mme Owo?

1. Nso ke Abasi aduak ndinam nnọ mme owo?

ABASI aduak ndinam ediwak nti n̄kpọ nnọ mme owo. Enye okobot akpa erenowo ye n̄wan, Adam ye Eve, esịn ke ediye In̄wan̄ Eden. Enye okoyom mmọ ẹnyene nditọ, ẹnam ofụri isọn̄ akabade Paradise, ẹnyụn̄ ẹse ẹban̄a mme unam.—Genesis 1:28; 2:8, 9, 15; se Se Ẹwetde Ẹdian 6.

2. (a) Inam didie idiọn̄ọ ke Abasi ayanam se enye aduakde? (b) Mmanie ke Abasi oyom ẹdụn̄ ke isọn̄, enye onyụn̄ oyom mmọ ẹdụn̄ ẹbịghi didie?

2 Ndi emekere ke enyene ini emi nnyịn ididụn̄de ke utọ Paradise oro? Jehovah ọdọhọ ete: “Ami mmobot enye, nyonyụn̄ nnam enye.” (Isaiah 46:9-11; 55:11) Jehovah ayanam se enye aduakde, ndien owo m̀mê n̄kpọ ndomokiet ikemeke ndikpan enye. Jehovah ọdọhọ ke enyene ntak emi imọ ikobotde isọn̄, ke imọ ‘ikobotke isọn̄ ke ikpîkpu.’ (Isaiah 45:18) Enye oyom mme owo ẹdụn̄ ke ofụri isọn̄. Mmanie ke Abasi oyom ẹdụn̄ ke isọn̄, enye onyụn̄ oyom mmọ ẹdụn̄ ẹbịghi didie? Bible ọdọhọ ke “ndinen owo [m̀mê mbon emi ẹkopde uyo Abasi] ẹyeda isọn̄ ẹnyene, ẹnyụn̄ ẹdụn̄ ke esịt ke nsinsi.”Psalm 37:29; Ediyarade 21:3, 4.

3. Afo ndikụt nte mme owo ẹdọn̄ọde ẹnyụn̄ ẹkpade ekeme ndinam fi obụp nso?

3 Edi mme owo ke ẹdọn̄ọ, ke ẹkpan̄a. Ke ediwak itie, mme owo ke ẹn̄wana ẹnyụn̄ ẹwot kiet eken. Imenịm ke idịghe se Abasi akaduakde edi emi. Edi nso inam  n̄kpọ etie ntem? Bible ikpọn̄ ekeme ndibọrọ mbụme emi.

ASUA ABASI

4, 5. (a) Anie akada urụkikọt etịn̄ ikọ ye Eve ke In̄wan̄ Eden? (b) Eti owo esisan̄a didie akabade inọ?

4 Enyene angel kiet emi Bible ọdọhọde ke edi asua Abasi; ẹkot enye “Devil ye Satan.” Satan akada urụkikọt etịn̄ ikọ ye Eve ke In̄wan̄ Eden. (Ediyarade 12:9; Genesis 3:1) Enye akanam etie nte ke urụkikọt oro etịn̄ ikọ.—Se Se Ẹwetde Ẹdian 7.

5 Ndi Abasi okobot Satan kpa Devil? Ihih-o! Angel kiet emi okodude ke heaven okụt ini emi Abasi anamde isọn̄ eye man Adam ye Eve ẹdụn̄ ama ọtọn̄ọ ndidiọk onyụn̄ akabade edi Devil. (Job 38:4, 7) Utọ n̄kpọ oro akasan̄a didie etịbe? Afo ekere ke eti owo esisan̄a didie akabade inọ? Eka esie ikamanke inọ, edi akaman ekpri ediye eyen. Edieke enye oyomde n̄kpọ emi mîdịghe enye enyene, onyụn̄ akade iso ekere n̄kpọ oro tutu enen̄ede ọdọn̄ enye ndinyene n̄kpọ oro, enye eyeyịp n̄kpọ oro edieke okụtde ufan̄. Nte eti owo esisan̄ade akabade inọ edi oro.—Kot James 1:13-15; se Se Ẹwetde Ẹdian 8.

6. Didie ke angel kiet akakabade asua Abasi?

6 Se iketịbede inọ angel oro edi oro. Ke Jehovah ama okobot Adam ye Eve, enye ama ọdọhọ mmọ ẹnyene nditọ ẹnyụn̄ “ẹyọhọ ke isọn̄.” (Genesis 1:27, 28) Ekeme ndidi angel oro ama ekere ke kpukpru owo ẹkpekpono imọ utu ke ndikpono Jehovah. Nte enye akakade iso ekere n̄kpọ emi, ntre ke ekenen̄ede ọdọn̄ enye. Enye okoyom mme owo ẹtuak ibuot ẹnọ imọ, ntre enye ama osu nsu ọnọ Eve onyụn̄ anam enye ọsọn̄ ibuot ye Abasi.  (Kot Genesis 3:1-5.) Se angel oro akanamde oro akanam enye akabade asua Abasi onyụn̄ edi Satan kpa Devil.

7. (a) Nso ikanam Adam ye Eve ẹkpa? (b) Ntak emi nnyịn n̄ko isisọn̄de inyụn̄ ikpa?

7 Adam ye Eve ẹma ẹsọn̄ ibuot ye Abasi ẹnyụn̄ ẹdia mfri eto oro. (Genesis 2:17; 3:6) Mmọ ẹma ẹdue Jehovah, ndien ke akpatre, mmọ ẹma ẹkpa nte Jehovah ọkọdọhọde. (Genesis 3:17-19) Nditọ Adam ye Eve ẹma ẹtiene ẹkpa sia mmọ ẹkedi mme anamidiọk. (Kot Rome 5:12.) Yak ida uwụtn̄kpọ emi inam an̄wan̄a ntak emi idọhọde ke nditọ Adam ye Eve n̄ko ẹkedi mme anamidiọk. Yak idọhọ ke ada iko mmọn̄eba emi en̄wịnede etem maimai. Maimai emi afo edision̄ode ke iko oro editie nte iko oro. Ke ini Adam ọkọsọn̄de ibuot ye Abasi, enye ama akabade edi anamidiọk. Kpukpru nnyịn idi nditọ Adam, itie nte enye, oro anam nnyịn n̄ko idi mme anamidiọk. Emi n̄ko anam nnyịn isisọn̄ inyụn̄ ikpa.—Rome 3:23; se Se Ẹwetde Ẹdian 9.

8, 9. (a) Nso ke Satan okoyom Adam ye Eve ẹkere? (b) Ntak emi Jehovah mîkowotke mmọ mbita ke ebe oro?

8 Satan ọkọtọn̄ọ ndinam mme owo ẹsọn̄ ibuot ye Abasi ke ini enye akanamde Adam ye Eve ẹbiat ibet Jehovah. Enye okoyom Adam ye Eve ẹkere ke Jehovah edi osu nsu ye idiọk andikara emi mîyomke n̄kpọ ọfọn ye mmọ. Ikọ Satan ọkọwọrọ ke Adam ye Eve ẹdibiere ke idemmọ se ifọnde ye se idiọkde, ke idịghe Abasi eteteme owo n̄kpọ, enye ọdiọn̄ọ se akpanamde. Nso ke Jehovah akpakanam aban̄a mfịna emi? Enye ekpekekeme ndiwot Satan ye Adam ye Eve nnyụn̄ ntre nsọn̄ibuot oro mmọ ẹketọn̄ọde. Edi ndi Abasi ndiwot mmọ okpokowụt ke Satan okosu nsu? Ihih, ikpokowụtke.

9 Emi akanam Jehovah okûwot mmọ mbita ke ebe  oro. Utu ke oro, enye ama ayak mme owo ẹkara idemmọ. Emi ke ẹdida idiọn̄ọ ke se Satan eketịn̄de ekedi nsu, ke Jehovah ọdiọn̄ọ se idifọnde ye mme owo. Iyenen̄ede ineme iban̄a emi ke Ibuot 11. Edi ndi emekere ke se Adam ye Eve ẹkebierede ndinam oro ama ọfọn? Ndi ama ọfọn nte mmọ ẹkenịmde ikọ Satan ẹnyụn̄ ẹsọn̄de  ibuot ye Abasi? Jehovah ọkọnọ Adam ye Eve kpukpru se mmọ ẹkenyenede. Enye ama anam mmọ ẹfọn ẹma, ọnọ mmọ ata ediye itie ẹdụn̄, onyụn̄ ọnọ mmọ utom emi enemde mmọ. Edi akananam Satan inamke n̄kpọ ndomokiet inọ mmọ. Edieke afo okpokodude do, nso ke akpakanam?

10. Nso ke ana owo kiet kiet ebiere?

10 Ana owo kiet kiet ebiere m̀mê imọ idikop uyo Abasi m̀mê eke Satan. Ndien emi edibiere m̀mê iyenyene nsinsi uwem m̀mê idinyeneke. Imekeme ndibiere ndikop uyo Jehovah, ida enye nte andikara nnyịn, inyụn̄ iwụt ke Satan edi osu nsu. Mîdịghe nnyịn ikop uyo Satan inyụn̄ iwụt ke enye akara nnyịn. (Psalm 73:28; kot Mme N̄ke 27:11.) Mfịn, mbon emi ẹkopde uyo Abasi iwakke, inyụn̄ idịghe Abasi akara ererimbot emi. Anie ndien akara ererimbot emi edieke mîdịghe Abasi akara?

ANIE AKARA ERERIMBOT?

Ndi Satan ọkpọkọnọ Jesus kpukpru obio ubọn̄ ererimbot ekpedi idịghe enye enyene?

11, 12. (a) Satan ndikọn̄wọn̄ọ ndinọ Jesus obio ubọn̄ ererimbot ekpep nnyịn nso? (b) Mme itie N̄wed Abasi ewe iwụt ke Satan akara ererimbot?

11 Jesus ama ọdiọn̄ọ owo emi akarade ererimbot. Satan ama “owụt [Jesus] kpukpru mme obio ubọn̄ ererimbot ye ubọn̄ mmọ” onyụn̄ ọdọhọ enye ete: “Nyọnọ fi kpukpru n̄kpọ emi edieke afo ọduọde ke isọn̄ atuak ibuot ọnọ mi.” (Matthew 4:8, 9; Luke 4:5, 6) Kere ise, ‘Ndi Satan ọkpọnọ Jesus kpukpru obio ubọn̄ ererimbot ekpedi idịghe enye enyene?’ Ikpọnọhọ. Kpukpru ukara ererimbot emi ẹsịne Satan ke ubọk.

12 Emekeme ndikere n̄ko ete: ‘Satan asan̄a didie akara ererimbot? N̄kọ Jehovah emi edide Ata Ọkpọsọn̄ Abasi okobot enyọn̄ ye isọn̄?’ (Ediyarade 4:11) Ih, enye okobot, edi Jesus ọkọdọhọ ke Satan edi “andikara  ererimbot emi.” (John 12:31; 14:30; 16:11) Apostle Paul okokot Satan “abasi editịm n̄kpọ emi.” (2 Corinth 4:3, 4) Apostle John n̄ko ama ewet ete ke “ofụri ererimbot esịne ke idak odudu andidiọk.”—1 John 5:19.

DIDIE KE ẸDISOBO ERERIMBOT SATAN?

13. Ntak emi iyomde obufa ererimbot?

13 Edi eyo esiere, ererimbot emi ọdiọk akan nte ekedide. Ekọn̄, udia-inọ, n̄wo, mbubịk, ye afai ẹdu ke kpukpru ebiet. Ọkpọkọm mme owo ẹtịme nte ẹtetịme, mmọ idikemeke ndinam mme n̄kpọ emi ẹtre. Edi ibịghike, Abasi ayada ekọn̄ Armageddon osobo idiọk ererimbot emi, onyụn̄ ọtọn̄ọ obufa ererimbot emi nti owo ẹdiyọhọde.—Ediyarade 16:14-16; se Se Ẹwetde Ẹdian 10.

14. Anie ke Abasi emek ete edi Edidem Obio Ubọn̄ Esie? Nso ke Bible eketịn̄ aban̄a Jesus?

14 Jehovah emek Jesus Christ ete edi Edidem Obio Ubọn̄ imọ emi odude ke heaven. Ediwak tọsịn isua ko ke edem, Bible ama etetịn̄ ke Jesus edikara nte “Ọbọn̄ Emem,” ke ukara esie idinyụn̄ ikụreke tutu amama. (Isaiah 9:6, 7) Jesus ama ekpep mbet esie ẹbọn̄ akam ẹte ukara emi edi. Enye ọkọdọhọ mmọ ẹben̄e Abasi ẹte: “Yak obio ubọn̄ fo edi. Yak uduak fo ada itie, nte edide ke heaven, yak edi ke isọn̄ kpasụk ntre.” (Matthew 6:10) Ke Ibuot 8, iyekpep nte Obio Ubọn̄ Abasi m̀mê Ukara Abasi edidade itie ukara ererimbot emi. (Kot Daniel 2:44.) Ekem Ukara Abasi ayanam isọn̄ emi akabade Paradise.—Se Se Ẹwetde Ẹdian 11.

OBUFA ERERIMBOT EKPERE!

15. Nso idi “obufa isọn̄”?

15 Bible ọn̄wọn̄ọ ete: “Nnyịn itie ibet mbufa enyọn̄ ye obufa isọn̄,” ndien “edi do ke edinen ido edidụn̄.”  (2 Peter 3:13; Isaiah 65:17) Ndusụk ini ke Bible, ikọ oro “isọn̄” esida aban̄a mme owo. (Genesis 11:1) Ntre “obufa isọn̄” emi ẹtịn̄de ẹban̄a do ada aban̄a kpukpru mbon emi ẹkopde uyo Abasi, emi enye onyụn̄ ọdiọn̄de.

16. Nso eti n̄kpọ ke Abasi edinọ mbon emi ẹdidude uwem ke obufa ererimbot, ndien nso ke ana inam man itiene ibọ enọ emi?

16 Jesus ama ọdọhọ ke mbon emi ẹdidude uwem ke obufa ererimbot ẹyenyene “nsinsi uwem.” (Mark 10:30) Nso ke ana inam man inyene nsinsi uwem emi? Mbọk kot John 3:16 ye 17:3 man okụt ibọrọ. Idahaemi yak ise se Bible etịn̄de aban̄a uwem ke Paradise ke isọn̄.

17, 18. Inam didie idiọn̄ọ ke emem oyodu ke ofụri ererimbot, ke ndịk idinamke nnyịn?

17 Ibak, ekọn̄, ubiatibet, ye afai ididụhe aba. Mbon ibak ididụhe aba ke isọn̄. (Psalm 37:10, 11) Abasi “[ayanam] ekọn̄ etre tutu esịm utịt isọn̄.” (Psalm 46:9; Isaiah 2:4) Mbon emi ẹmade Abasi ẹnyụn̄ ẹkopde uyo esie ẹdiyọhọ ererimbot emi. Emem oyodu ke isọn̄ ke nsinsi.—Psalm 72:7.

18 Ndịk idinamke ikọt Jehovah aba. Ke ini nditọ Israel ẹkekopde uyo Abasi, ndịk ikanamke mmọ sia Jehovah ama esikpeme mmọ. (Leviticus 25:18, 19) Ke Paradise, nnyịn idifeheke owo m̀mê n̄kpọ ndomokiet. Ndịk idinamke nnyịn aba!—Kot Isaiah 32:18; Micah 4:4.

19. Nso iwụt ke udia idinanake ke obufa ererimbot Abasi?

19 Ediwak udia oyodu. “Uwak n̄kpasịp ẹyedu ke isọn̄; ọyọyọhọ ọduọhọ ke mme enyọn̄ obot.” (Psalm 72:16) Jehovah ‘Abasi nnyịn ọyọdiọn̄ nnyịn,’ ndien “isọn̄ oyon̄wụm mbun̄wụm esie.”—Psalm 67:6.

20. Inam didie idiọn̄ọ ke isọn̄ ayakabade edi Paradise?

20 Ofụri isọn̄ ayakabade edi Paradise. Mme owo ẹyenyene ndiye ufọk ye ndiye in̄wan̄esa. (Kot Isaiah 65: 21-24; Ediyarade 11:18.) Ofụri isọn̄ eyeye nte In̄wan̄ Eden ekeyede. Jehovah ọyọnọ nnyịn kpukpru se iyomde. Bible ọdọhọ ete: “Afo amatat ubọk fo onyụn̄ oyụhọ udọn̄ kpukpru mme odu-uwem n̄kpọ.”—Psalm 145:16.

21. Nso iwụt ke owo ye unam ẹyedu ke emem?

21 Owo ye unam ẹyedu ke emem. Unam idinamke owo ndomokiet ibak. N̄kpri nditọ idikopke ndịk ndibre mbre ye unam, idem ye mme unam oro ifehede-fehe mfịn.—Kot Isaiah 11:6-9; 65:25.

22. Nso ke Jesus edinam inọ mbon udọn̄ọ?

22 Owo ndomokiet ididọn̄ọke. Ke ini Jesus okodude ke isọn̄, enye ama anam udọn̄ọ okụre ediwak owo. (Matthew 9:35; Mark 1:40-42; John 5:5-9) Edi ke ini Jesus edikarade isọn̄ emi, enye ayanam udọn̄ọ okụre kpukpru owo. Tutu amama, owo ndomokiet ididọhọke ite: “Ndọdọn̄ọ.”—Isaiah 33:24; 35:5, 6.

23. Nso ke Abasi edinam inọ mbon emi ẹkekpade?

23 Mme akpan̄kpa ẹyeset. Abasi ọn̄wọn̄ọ ke imọ iyanam ediwak miliọn mbon emi ẹkekpade ẹset. Bible ọdọhọ ke “ndinen owo ye mme anam ukwan̄n̄kpọ ẹyeset ke n̄kpa.”—Kot John 5:28, 29; Utom 24:15.

24. Ke ama okokop nte uwem editiede ke Paradise, etie fi didie ke idem?

24 Kpukpru nnyịn imekeme ndimek ndikpep n̄kpọ mban̄a Jehovah nnyụn̄ nnam n̄kpọ esie, mîdịghe imek ndinam se imade. Edieke imekde ndinam n̄kpọ Jehovah, n̄kpọ ọyọfọn ye nnyịn ke ini iso. Ete kiet emi ẹkekọn̄de ke eto ẹkpere Jesus ama ọdọhọ Jesus ete eti imọ ima ikpa, ndien Jesus ama ọdọhọ enye ete: “Afo oyodu ye ami ke Paradise.” (Luke 23:43) Yak ikpep n̄kpọ iban̄a Jesus Christ ye se enye edinamde man kpukpru se Abasi ọn̄wọn̄ọde ọnọ nnyịn osu.

Kpep N̄kpọ En̄wen

ENYỌN̄-UKPEME (EKE UKPEPNKPỌ)

Se Obio Ubọn̄ Abasi Edinamde

Abasi ke ọnọ mme owo ikot ke kpukpru ebiet ete ẹdikpep ẹban̄a se Obio Ubọn̄ imọ edinamde ọnọ isọn̄ ye ubon owo ke n̄kpet n̄kpet ini iso.