Nte oyomde okụbọde

Mek usem

Be ka udiana n̄kpọ

Be ka se isịnede

Be ka se isịnede

Mme Ntiense Jehovah

Efịk

Nso ke Bible Ekpep Nnyịn?

 IBUOT EFỊTEBA

Akam Edi Ata Akpan N̄kpọ

Akam Edi Ata Akpan N̄kpọ

“Andinam enyọn̄ ye isọn̄” oyom ndikop akam nnyịn.—Psalm 115:15

1, 2. Nso inam ekere ke akam edi ata akpan n̄kpọ, ndien ntak emi anade idiọn̄ọ se Bible ekpepde aban̄a akam?

ISỌN̄ nnyịn emi enen̄ede ekpri ke ẹmende ẹdomo ye ofụri ekondo. Ke ini Jehovah esede isọn̄, kpukpru owo ke ererimbot ẹtie nte ntọi mmọn̄ emi otode bọket. (Psalm 115:15; Isaiah 40:15) Kpa ye emi nnyịn ikpride ntem, Psalm 145:18, 19 ọdọhọ ete: “Jehovah emekpere kpukpru mbon oro ẹsemede ẹkot enye, emekpere kpukpru mbon oro ẹsemede ẹkot enye ke akpanikọ. Enye ayanam se idọn̄de mbon oro ẹbakde enye, ndien enye oyokop eseme emi mmọ ẹsemede ẹyom un̄wam, onyụn̄ anyan̄a mmọ.” Edi ata n̄kpọ ukpono ndibọn̄ akam nnọ Jehovah! Jehovah Andibot enyọn̄ ye isọn̄ oyom ikpere enye, onyụn̄ oyom ndikop akam nnyịn. Akam edi ata akpan enọ emi Jehovah ọnọde nnyịn owo kiet kiet.

2 Edi Jehovah edikpan̄ utọn̄ inọ nnyịn edieke ibọn̄de akam nte enye oyomde. Idinam didie ibọn̄ akam nte enye oyomde? Yak ise se Bible etịn̄de aban̄a akam.

NTAK EMI IKPỌBỌN̄DE AKAM INỌ JEHOVAH?

3. Ntak emi ọkpọbọn̄de akam ọnọ Jehovah?

3 Jehovah oyom fi ọbọn̄ akam, m̀mê etịn̄ ikọ ọnọ imọ. Inam didie idiọn̄ọ? Mbọk kot Philippi 4:6, 7. Kere ban̄a se ẹdọhọde fi anam ke itie Bible oro. Andibot enyọn̄ ye isọn̄ enen̄ede ama fi. Enye oyom fi etịn̄ se afo ekerede, etịn̄ nte etiede fi ke idem, onyụn̄ etịn̄ mme mfịna fo ọnọ imọ.

4. Nso ke ndibọn̄ akam nnọ Jehovah kpukpru ini edinam inọ fi?

4 Akam esin̄wam nnyịn ikpere Jehovah. Ke ini mme  ufan ẹwakde nditịn̄ se mmọ ẹkerede, se ifịnade mmọ, ye nte etiede mmọ ke idem nnọ kiet eken, mmọ ẹsinen̄ede ẹkpere kiet eken. Se akam onyụn̄ anamde ọnọ nnyịn edi oro, enye anam inen̄ede ikpere Jehovah. Jehovah ada Bible etịn̄ se enye ekerede onyụn̄ amade ọnọ fi, ye se enye edinamde ke ini iso. Afo emekeme nditịn̄ se idude fi ke esịt ọnọ enye ke ini ọbọn̄de akam kpukpru ini. Nte afo esịnde idem ọbọn̄ akam ọnọ Jehovah, ntre ke afo edinen̄ede ama enye, enye onyụn̄ ama fi.—James 4:8.

NSO KE ANA INAM MAN ABASI OKOP AKAM NNYỊN?

5. Nnyịn inam didie ifiọk ke Jehovah isikopke kpukpru akam?

5 Ndi kpukpru akam ke Jehovah esikop? Ihih, idịghe. Ke eyo prọfet Isaiah, Jehovah ama ọdọhọ nditọ Israel ete: “Okposụkedi mbufo ẹbọn̄de ediwak akam, ami n̄kopke; iyịp ọmọyọhọ mbufo ke ubọk.” (Isaiah 1:15) Ntem edieke nnyịn mîkpemeke, imekeme ndinam n̄kpọ emi Jehovah asuade, ndien emi idiyakke enye okop akam nnyịn.

6. Ntak emi anade inyene mbuọtidem? Nso ke afo akpanam man owụt ke emenyene mbuọtidem?

 6 Edieke iyomde Jehovah okop akam nnyịn, ana ibuọt idem ye enye. (Mark 11:24) Apostle Paul ọkọdọhọ ete: “Mbuọtidem mîdụhe owo ikemeke nditịm nnem enye esịt, koro ana owo eke asan̄ade ekpere Abasi enịm ete enye odu ye nte ke enye edi andinọ mbon oro ẹnen̄erede ẹyom enye utịp.” (Mme Hebrew 11:6) Edi ikụreke ke nnyịn ndinyụn̄ ntetịn̄ nte ke imenyene mbuọtidem. Ana ikop uyo Jehovah kpukpru usen man iwụt ke imenyene mbuọtidem.—Kot James 2:26.

7. (a) Ntak emi anade isụhọde idem inyụn̄ iwụt ke imokpono Jehovah ke ini ibọn̄de akam inọ enye? (b) Didie ke ikeme ndiwụt ke akam emi ibọn̄de inọ Abasi oto nnyịn esịt?

7 Ke ini ibọn̄de akam inọ Jehovah, ana isụhọde idem inyụn̄ iwụt ke imokpono enye. Ntak-a? Edieke ikpenyenede ifet nditịn̄ ikọ nnọ edidem m̀mê adaibuot ukara idụt nnyịn, ikpetịn̄ didie? Ikpetịn̄ ukpono ukpono. Jehovah edi Ata Ọkpọsọn̄ Abasi, ntre ke ini ibọn̄de akam, ana inen̄ede isụhọde idem inyụn̄ iwụt ke imokpono enye. (Genesis 17:1; Psalm 138:6) Ana itịn̄ se isịnede nnyịn ke esịt, ibọn̄ akam ke ofụri esịt, utu ke nditịn̄ n̄kpọ kiet mfiak ntịn̄ ediwak ini.—Matthew 6:7, 8.

8. Ke ini ibọn̄de akam iben̄e Jehovah n̄kpọ, nso en̄wen ke ana inam?

8 Ke ini ibọn̄de akam iban̄a n̄kpọ, ana inam kpukpru se ikemede man iwụt ke imenen̄ede iyom se ikeben̄ede oro. Ke uwụtn̄kpọ, edieke ibọn̄de akam inọ Jehovah ite enye ọnọ nnyịn udia usen, inaha ikpakpan̄ ubọk itie ibet Jehovah ọnọ nnyịn kpukpru n̄kpọ ke ini edide imekeme ndinam utom. Ana isịn ifịk inam utom inyụn̄ iben̄e idem ndinam se ededi oro ikemede. (Matthew 6:11; 2 Thessalonica 3:10) Mîdịghe edieke ibọn̄de akam idọhọ Jehovah an̄wam nnyịn itre idiọk ido, ana itre ndika itie ekededi  m̀mê ndinam n̄kpọ ekededi oro edinamde nnyịn inam n̄kpọ oro. (Colossae 3:5) Idahaemi, yak ineme mbụme ifan̄ oro ẹsiwakde ndibụp mban̄a akam.

SE ẸSIWAKDE NDIBỤP MBAN̄A AKAM

9. Anie ke ikpọbọn̄ akam inọ? Nso ke John 14:6 ekpep nnyịn aban̄a akam?

9 Ikpọbọn̄ akam inọ anie? Jesus ekekpep mme mbet esie ndibọn̄ akam nnọ “Ete nnyịn emi odude ke heaven.” (Matthew 6:9) Enye ama ọdọhọ n̄ko ete: “Ami ndi usụn̄ ye akpanikọ ye uwem. Baba owo kiet itieneke Ete ibọhọke ebe ke ami.” (John 14:6) Ntem ana ibọn̄ akam inọ Jehovah ke enyịn̄ Jesus. Ndibọn̄ akam ke enyịn̄ Jesus ọwọrọ nso? Emi ọwọrọ ke imama utom emi Jehovah ọnọde Jesus anam. Ima ikpekpep ke Jesus ekedi isọn̄ man edinyan̄a nnyịn osio ke idiọkn̄kpọ ye n̄kpa. (John 3:16; Rome 5:12) Jehovah ama onyụn̄ emek enye Akwa Oku ye Ebiereikpe.—John 5:22; Mme Hebrew 6:20.

Emekeme ndibọn̄ akam ini ekededi

10. Ndi ana itọtọn̄ọ edọn̄, itetie, m̀mê idada ke ini ibọn̄de akam? Ntak ọbọrọde ntre?

10 Ndi ana itọtọn̄ọ edọn̄, itetie, m̀mê idada ke ini ibọn̄de akam? Ihih, Jehovah idọhọke ke ana inam ekededi ke otu emi ke ini ibọn̄de akam. Bible owụt ke imekeme ndidada, itetie, itọn̄ọ edọn̄, m̀mê ida ke usụn̄ emi owụtde ukpono ọnọ Abasi ke ini ibọn̄de akam. (1 Chronicle 17:16; Nehemiah 8:6; Daniel 6:10; Mark 11:25) Se Jehovah adade nte ata akpan n̄kpọ edi nnyịn nditịn̄ ikọ emi otode nnyịn esịt, idịghe m̀mê idada, m̀mê itetie, m̀mê itọtọn̄ọ edọn̄ ke ini ibọn̄de akam. Imekeme ndibọn̄ akam uyo ọwọrọ mîdịghe ibọn̄ ke esịt nnyịn ke ebiet ekededi ye ini ekededi. Ke ini ibọn̄de akam inọ Jehovah, imọfiọk ke enye oyokop akam nnyịn ọkpọkọm owo ndomokiet ikopke se itịn̄de.—Nehemiah 2:1-6.

11. Nso ye nso ke ikeme ndiben̄e Jehovah ke akam nnyịn?

 11 Nso ke ikpọbọn̄ akam iben̄e? Imekeme ndibọn̄ akam mban̄a n̄kpọ ekededi oro enemde Jehovah esịt. Bible ọdọhọ ete: “Se ededi oro nnyịn iben̄ede nte ekemde ye uduak esie, enye ọbiọn̄ utọn̄ ke eben̄e nnyịn.” (1 John 5:14) Ndi imekeme ndibọn̄ akam mban̄a n̄kpọ idem nnyịn? Ih. Ndibọn̄ akam nnọ Jehovah onyụn̄ etie nte owo ndineme nneme ye ata ufan esie. Imekeme nditịn̄ se ededi oro ikerede ke esịt nnyịn nnọ Jehovah. (Psalm 62:8) Imekeme ndibọn̄ akam mben̄e enye ọnọ nnyịn edisana spirit esie man an̄wam nnyịn inam se inende. (Luke 11:13) Imekeme ndiben̄e Jehovah n̄ko ọnọ nnyịn eti ibuot man inam nti ubiere, imonyụn̄ ikeme ndibọn̄ akam ite enye ọnọ nnyịn odudu ndiyọ mfịna ye afanikọn̄. (James 1:5) Ana ikpe Jehovah ubọk ite efen mme idiọkn̄kpọ nnyịn. (Ephesus 1:3, 7) Ana ibọn̄ akam isịn mbon en̄wen n̄ko, esịnede mme iman nnyịn ye nditọete nnyịn ke esop.—Utom 12:5; Colossae 4:12.

12. Nso ye nso ikpedi ata akpan n̄kpọ ke akam nnyịn?

12 Nso ikpedi ata akpan n̄kpọ ke akam nnyịn? Ekpedi Jehovah ye uduak esie. Ikpenyene ndikọm enye ke ofụri esịt ke kpukpru se enye anamde ọnọ nnyịn. (1 Chronicle 29:10-13) Itịn̄ ntem sia ke ini Jesus okodude ke isọn̄, enye ama ekpep mme mbet esie nte ẹkpebọn̄de akam. (Kot Matthew 6:9-13.) Enye ọkọdọhọ mmọ ẹbem iso ẹbọn̄ akam ẹte yak ẹnam enyịn̄ Abasi asana. Ekem enye etịn̄ ke ana ibọn̄ akam ite yak Obio Ubọn̄ Abasi edi, yak ẹnyụn̄ ẹnam uduak Jehovah ke ofụri isọn̄. Ekedi ke Jesus ama ọkọdọhọ ẹben̄e mme ata akpan n̄kpọ emi, ke enye eketịn̄ aban̄a mme n̄kpọ eken oro iyomde. Ke ini ibemde iso ibọn̄ akam idọhọ ẹnam enyịn̄ Jehovah asana ẹnyụn̄ ẹnam uduak esie, nnyịn  iwụt ke se nnyịn idade ke akpan n̄kpọ ke uwem nnyịn edi oro.

13. Akam nnyịn ọkpọniọn̄ adan̄a didie?

13 Akam nnyịn ọkpọniọn̄ adan̄a didie? Bible itịn̄ke nte akam owo ọkpọniọn̄de eketre. Akam ekeme ndidi ibio ibio, onyụn̄ ekeme ndiniọn̄, etiene se ibọn̄de iban̄a ye ini emi ibọn̄de. Ke uwụtn̄kpọ, imekeme ndibọn̄ ibio ibio akam ke ini iyomde ndidia n̄kpọ edi inam akam nnyịn  ọniọn̄ ke ini ikọmde Jehovah m̀mê ke ini itịn̄de se ifịnade nnyịn inọ enye. (1 Samuel 1:12, 15) Nnyịn ikpọbọn̄ke nnyan akam ida iwụt idem m̀mê man esịt enem mbon en̄wen, nte ndusụk owo ẹkesinamde ke eyo Jesus. (Luke 20:46, 47) Jehovah imaha utọ akam oro. Enye ama nnyịn ibọn̄ akam ke ofụri esịt inọ imọ.

14. Ikpesibọn̄ akam ikafan̄ ke usen, ndien nso ke emi ekpep nnyịn aban̄a Jehovah?

14 Ikpesibọn̄ akam ikafan̄ ke usen? Jehovah ọdọhọ nnyịn ibọn̄ akam inọ imọ kpukpru ini. Bible ọdọhọ nnyịn ete: “Ẹka iso ndibọn̄ akam,” “ẹkọbọ ke akam,” “ẹkûdop ndibọn̄ akam.” (Matthew 26:41; Rome 12:12; 1 Thessalonica 5:17) Jehovah eben̄e idem ndikop akam nnyịn kpukpru ini. Imekeme ndikọm enye kpukpru usen ke ntak emi enye amade nnyịn onyụn̄ ọnọde nnyịn kpukpru  n̄kpọ. Imekeme n̄ko ndidọhọ enye ekpeme nnyịn, ọsọn̄ọ nnyịn idem, onyụn̄ ọdọn̄ nnyịn esịt. Edieke inen̄erede ida ndibọn̄ akam nnọ Jehovah nte ata akpan n̄kpọ, iyọbọn̄ akam kpukpru ini.

15. Ntak emi ikpesịnde “amen” ke utịt akam?

15 Ntak emi ikpesịnde “amen” ke utịt akam? “Amen” ọwọrọ “ih” m̀mê “yak edi ntre.” Nnyịn ndisịn “amen” ọwọrọ ke ida se itịn̄de ke akam nnyịn ke akpan n̄kpọ, oro edi, ke nnyịn ibọn̄ akam oro ke ofụri esịt. (Psalm 41:13) Bible owụt ke ọfọn isịn “amen” ke ini emi ẹbọn̄de akam ke ibuot ofụri owo ẹma. Imekeme ndidọhọ “amen” ke esịt nnyịn mîdịghe itetịn̄ uyo ọwọrọ man iwụt ke imenyịme se ẹketịn̄de ke akam oro.—1 Chronicle 16:36; 1 Corinth 14:16.

NTE ABASI ESIBỌRỌDE AKAM NNYỊN

16. Ndi Jehovah esibọrọ akam nnyịn? Ntak ọbọrọde ntre?

16 Ndi Jehovah esibọrọ akam nnyịn? Ih, esibọrọ. Bible ọdọhọ ke enye edi “Andikop akam.” (Psalm 65:2) Jehovah esikop onyụn̄ ọbọrọ akam ediwak miliọn owo emi ẹbọn̄de ke ofụri esịt, ndien enye esibọrọ akam ke nsio nsio usụn̄.

17. Didie ke Jehovah esida mme angel ye nditọete nnyịn ọbọrọ akam nnyịn?

17 Jehovah esida mme angel ye mme asan̄autom esie mi ke isọn̄ ọbọrọ akam nnyịn. (Mme Hebrew 1:13, 14) Ediwak owo ẹdu oro ẹkebọn̄de akam ẹnọ Jehovah ẹte enye an̄wam mmimọ idiọn̄ọ se isịnede ke Bible, ndien ibịghike-bịghi Ntiense Jehovah ọkwọrọ ikọ ọnọ mmọ. Bible anam nnyịn idiọn̄ọ ke mme angel ẹsitiene ẹn̄wam nnyịn ikwọrọ “eti mbụk” ke ofụri isọn̄. (Kot Ediyarade 14:6.) Ikụreke ke oro, ediwak nnyịn imesibọn̄ akam inọ Jehovah iban̄a n̄kpọ emi afịnade nnyịn m̀mê n̄kpọ  emi iyomde, ndien ibịghike-bịghi eyenete nnyịn an̄wam nnyịn ke n̄kpọ oro.—Mme N̄ke 12:25; James 2:16.

Jehovah ekeme ndida nditọete nnyịn mbọrọ akam nnyịn

18. Didie ke Jehovah esida edisana spirit esie ye Bible ọbọrọ akam nnyịn?

18 Jehovah esida edisana spirit esie ọbọrọ akam nnyịn. Ke ini inyenede mfịna inyụn̄ iben̄ede Jehovah ite an̄wam nnyịn, enye ekeme ndinọ nnyịn edisana spirit esie man idiọn̄ọ se ikpanamde onyụn̄ ọsọn̄ọ nnyịn idem. (2 Corinth 4:7) Jehovah esida Bible n̄ko ọbọrọ akam nnyịn onyụn̄ an̄wam nnyịn inam nnennen n̄kpọ. Ke ini ikotde Bible, imekeme ndikụt itie Bible emi edin̄wamde nnyịn. Jehovah ekeme ndinam owo etịn̄ n̄kpọ emi ekemede ndin̄wam nnyịn ke ini enye ọbọrọde mbụme ke mbono esop m̀mê ndinam ebiowo edi ebịne nnyịn edineme itie Bible emi ekemede ndin̄wam nnyịn.—Galatia 6:1.

19. Nso isinam etie nte ke Jehovah ibọrọke akam nnyịn ndusụk ini?

19 Edi ndusụk ini, ekeme ndidi imesikere se inamde Jehovah okûbọrọ akam nnyịn kan̄a. Kûfre ke enye ọdiọn̄ọ nnennen ini emi enye ọkpọbọrọde akam nnyịn ye nte enye edinamde oro. Enye ọdiọn̄ọ se iyomde. Ndusụk ini, ekeme ndiyom ika iso ibọn̄ akam iban̄a n̄kpọ man iwụt ke imenen̄ede iyom se iben̄ede enye inyụn̄ iwụt ke imọbuọt idem ye enye. (Luke 11:5-10) Ndusụk ini Jehovah esibọrọ akam nnyịn ke usụn̄ oro nnyịn mîkodorike enyịn. Ke uwụtn̄kpọ, imekeme ndibọn̄ akam mban̄a mfịna m̀mê n̄kpọ emi ọwọrọde nnyịn, edi utu ke Jehovah ndimen mfịna oro mfep, enye ọnọ nnyịn odudu man ikeme ndiyọ mfịna oro.—Kot Philippi 4:13.

20. Ntak emi ikpesibọn̄de akam inọ Jehovah kpukpru ini?

20 Ndibọn̄ akam nnọ Jehovah edi ata n̄kpọ ukpono! Imọdiọn̄ọ ke enye ayakpan̄ utọn̄ ọnọ nnyịn. (Psalm 145:18) Adan̄a nte ibọn̄de akam inọ Jehovah ke ofụri esịt, ntre ke iditetịm ikpere enye inyụn̄ idi ufan esie.