Be ka se isịnede

Be ka udiana n̄kpọ

Be ka se isịnede

Mme Ntiense Jehovah

Efịk

Nso ke Bible Ekpep Nnyịn?

 IBUOT EFỊT

Nte Ẹkpekponode Abasi

Nte Ẹkpekponode Abasi

1. Anie ekpeteme nnyịn nte ikpokponode Abasi?

EDIWAK ufọkabasi ẹdọhọ ke se mmimọ ikpepde iban̄a Abasi enen. Edi se mmọ ẹtịn̄de idịghe akpanikọ, sia edieke obụpde nsio nsio ufọkabasi m̀mê anie edi Abasi, m̀mê didie ke ikpokpono enye, mmọ iditịn̄ke ukem n̄kpọ. Edi idinam didie idiọn̄ọ nte Abasi oyomde ẹkpono imọ? Abasi kpọt ekeme nditeme nnyịn nte ikpokponode enye.

2. Nso idin̄wam fi ọdiọn̄ọ nte Abasi oyomde ẹkpono imọ?

2 Jehovah ọkọnọ nnyịn Bible man idiọn̄ọ nte ikpokponode enye. Ntre kpep Bible. Jehovah enen̄ede ama fi; enye ayan̄wam fi anam se ekpepde man afo ọbọ ufọn.—Isaiah 48:17.

3. Nso ke Abasi oyom nnyịn inam?

3 Ndusụk owo ẹsidọhọ ke Abasi amama kpukpru ufọkabasi, edi idịghe se Jesus ekekpepde nnyịn edi oro. Enye ọkọdọhọ ete: “Idịghe kpukpru mbon oro ẹkotde mi, ‘Ọbọn̄, Ọbọn̄,’ ẹdidụk obio ubọn̄ heaven, edi edi enye emi anamde uduak Ete mi . . . edidụk.” Emi owụt ke ana idiọn̄ọ se Abasi oyomde inyụn̄ inam mmọ. Ata akpan n̄kpọ edi emi sia Jesus ọkọdọhọ ke mbon emi mînamke se Abasi ọdọhọde ẹdi “mme abiatibet.”—Matthew 7:21-23.

4. Jesus ọkọdọhọ ke n̄kpọ editie didie ye mbon emi ẹyomde ndinam n̄kpọ Abasi?

4 Jesus ama ọdọhọ ke edieke iyomde ndinam se Abasi oyomde, ke idimemke. Enye ọkọdọhọ ete: “Ẹbe ke mfafaha inuaotop ẹdụk; koro usụn̄ emi adade esịm nsobo  atatara onyụn̄ an̄wan̄a, mme andibe ke enye ndụk ẹnyụn̄ ẹwak; edi inuaotop emi adade esịm uwem afafaha usụn̄ onyụn̄ esịre, ndien mme andikụt enye iwakke.” (Matthew 7:13, 14) Ndisan̄a ke mfafaha usụn̄, oro edi, ndikpono Abasi nte enye oyomde edinam owo enyene nsinsi uwem. Ndisan̄a ke ntatara usụn̄, oro edi, ndikpono Abasi ke usụn̄ emi enye mînyịmeke edida owo ika n̄kpa. Edi Jehovah iyomke nnyịn ikpa. Enye enyene ime man kpukpru owo ẹkeme ndikpep n̄kpọ mban̄a enye.—2 Peter 3:9.

NTE ẸKPEKPONODE ABASI

5. Afo edinam didie idiọn̄ọ mbon emi ẹkponode Abasi nte enye oyomde?

5 Jesus ọkọdọhọ ke imekeme ndidiọn̄ọ mbon emi ẹkponode Abasi nte enye oyomde. Edieke idụn̄ọrede ifiọk se mmọ ẹsikpepde inyụn̄ isede nte mmọ ẹsidude uwem, iyada oro idiọn̄ọ mmọ. Enye ọkọdọhọ ke “ẹyeda mfri mmọ ẹfiọk mmọ,” onyụn̄ ọdọhọ ke “kpukpru nti eto ẹn̄wụm nti mfri.” (Matthew 7:16, 17) Ikọ Jesus emi iwọrọke ke mbon emi ẹkponode ata Abasi ẹfọn ẹma. Edi ikọt Abasi ẹsidomo ndinam se inende kpukpru ini. Imọn̄ ineme mme n̄kpọ emi ididade idiọn̄ọ mbon emi ẹkponode Abasi nte enye oyomde.

6, 7. Ntak emi mbon emi ẹkponode ata Abasi ẹsikpepde se isịnede ke Bible? Nso ke ikpep ito Jesus?

6 Ana ikpep se isịnede ke Bible. Bible ọdọhọ ke 2 Timothy 3:16, 17 ete: “Abasi ọkọnọ odudu spirit ẹda ẹwet ofụri N̄wed Abasi, ndien enye ọfọn ndida nnọ ukpep, nsua nnọ owo, nnen̄ede mme n̄kpọ, nnọ ntụnọ ke edinen ido, man owo Abasi etịm odot, eben̄e idem ọyọhọ ọyọhọ ndinam eti utom ekededi.” Apostle Paul ọkọdọhọ mme Christian ete: “Ke ini mbufo ẹkebọde  ikọ Abasi, emi mbufo ẹkekopde ẹto nnyịn, mbufo idaha enye nte ikọ owo, edi, ẹda enye ke se enye ke akpanikọ edide, kpa ikọ Abasi.” (1 Thessalonica 2:13) Mbon emi ẹkponode ata Abasi ẹsikpep se isịnede ke Bible. Mmọ isikpepke se mme owo ẹkerede m̀mê se mbon edem mmọ ẹnịmde.

7 Kpukpru se Jesus ekekpepde okoto N̄wed Abasi. (Kot John 17:17.) Enye ama esiwak ndikot nto se ẹwetde ke Ikọ Abasi. (Matthew 4:4, 7, 10) Se ata ikọt Abasi ẹsinyụn̄ ẹnamde edi oro. Kpukpru se mmọ ẹkpepde oto Bible.

8. Nso ke Jesus akanam emi ekpepde nnyịn nte ikpokponode Abasi?

8 Ana ituak ibuot inọ Jehovah kpọt. Psalm 83:18 ọdọhọ ete: “Afo, emi enyịn̄ fo edide Jehovah, afo ikpọn̄ edi Ata Edikon̄ ke ofụri isọn̄.” Jesus okoyom mme owo ẹdiọn̄ọ owo emi edide ata Abasi. Enye ama ekpep mmọ enyịn̄ Abasi. (Kot John 17:6.) Jesus ọkọdọhọ ete: “Jehovah Abasi fo ke ana afo atuak ibuot ọnọ, onyụn̄ edi enye ikpọn̄ ke ana afo anam edisana utom ọnọ.” (Matthew 4:10) Nnyịn ikọt Abasi inam ukem ukem se Jesus akanamde. Nnyịn ituak ibuot inọ Jehovah kpọt; imesikot enyịn̄ esie, ikpep mme owo enyịn̄ esie, inyụn̄ ikpep mmọ se enye edinamde inọ mme owo.

9, 10. Didie ke isiwụt ke imama kiet eken?

9 Ana inen̄ede ima kiet eken. Jesus ama ekpep mbet esie ete ẹma kiet eken. (Kot John 13:35.) Inamke n̄kpọ m̀mê ito m̀mọ̀n̄, m̀mê ẹnam n̄kpọ didie ke obio nnyịn, m̀mê idi ubuene m̀mê idi imọ, ana iyak ima anam nnyịn idiana kiet ye kpukpru nditọete nnyịn. (Colossae 3:14) Nnyịn isin̄wanake ekọn̄ mbak nnyịn idiwot owo. Bible ọdọhọ ete: “Ẹda emi ẹyarade ẹfiọk nditọ Abasi ye nditọ Devil: Owo ekededi eke mîkaha iso ndinam edinen  ido itoho Abasi, kpasụk ntre ye owo eke mîmaha eyenete esie.” Bible ọdọhọ n̄ko ete “[ima] kiet eken; ikûbiet Cain, emi okotode andidiọk onyụn̄ owotde eyeneka esie.”—1 John 3:10-12; 4:20, 21.

10 Imesida ini nnyịn, odudu nnyịn, ye se ededi emi inyenede in̄wam kiet eken. Imesisọn̄ọ mmọ idem n̄ko. (Mme Hebrew 10:24, 25) Imesinam “se ifọnde inọ kpukpru owo.”—Galatia 6:10.

11. Ntak emi nnyịn inịmde ke Jesus ke Abasi ada anyan̄a nnyịn?

11 Ana ikop uyo inọ Jesus sia enye ke Abasi ada anyan̄a nnyịn. Bible ọdọhọ ete: “Edinyan̄a itoho owo efen ekededi, koro enyịn̄ baba kiet efen idụhe ke idak enyọn̄ eke ẹnọde owo, emi ẹkpedade ẹnyan̄a nnyịn.” (Utom 4:12) Ima ikpekpep ke Ibuot 5 nte ke Jehovah ọkọnọ Jesus edi edikpa man afak mbon emi ẹkopde item. (Matthew 20:28) Jehovah emek Jesus ete akara ofụri isọn̄. Oro anam Bible ọdọhọ ke ana nnyịn inam se Jesus ọdọhọde edieke iyomde ndidu uwem ke nsinsi.—Kot John 3:36.

12. Ntak emi nnyịn mîsisịnke idem ke mbre ukara?

12 Inaha isibre mbre ukara. Jesus ikesịnke idem ke ukara ererimbot. Ke ini ẹkemende enye ẹka ikpe ke iso Pilate, enye ama ọdọhọ ete: “Obio ubọn̄ mi idịghe ubak ererimbot emi.” (Kot John 18:36.) Nnyịn ida inọ ukara Abasi emi odude ke heaven, sia se Jesus akanamde edi oro. Emi esinam nnyịn ikûsịn idem ke mbre ukara ke ebiet ekededi emi idude. Edi kpa ye oro, Bible ọdọhọ isụk ibuot inọ “mme odudu oro ẹkponde ẹkan,” oro edi, mbon emi ẹkamade ukara ye ikpọ itie. (Rome 13:1) Nnyịn imesinịm ibet ukara idụt emi idude. Edi edieke ukara ẹdọhọde inam se Abasi mîmaha, nnyịn imesikpebe mme apostle emi ẹkedọhọde ẹte: “Nnyịn inyene  ndikop uyo Abasi nte andikara utu ke uyo owo.”—Utom 5:29; Mark 12:17.

13. Nso ye nso ke isikwọrọ iban̄a Obio Ubọn̄ Abasi?

13 Nnyịn inịm ke Obio Ubọn̄ Abasi kpọt edikọk mfịna ofụri ererimbot. Jesus ọkọdọhọ ke ẹyekwọrọ “eti mbụk obio ubọn̄” Abasi ke ofụri ererimbot. (Kot Matthew 24:14.) Idụhe ukara owo ndomokiet emi edikemede ndinam se ukara Abasi edinamde inọ nnyịn. (Psalm 146:3) Jesus ama ekpep nnyịn ndibọn̄ akam nyom ukara Abasi. Enye ọkọdọhọ ete: “Yak obio ubọn̄ fo edi. Yak uduak fo ada itie, nte edide ke heaven, yak edi ke isọn̄ kpasụk ntre.” (Matthew 6:10) Bible ọdọhọ ke ukara Abasi oyosobo kpukpru ukara owo, onyụn̄ ada itie mmọ ke nsinsi.—Daniel 2:44.

14. Afo ekere ke mmanie ẹkpono Abasi nte enye oyomde?

14 Ke ama ekekpep se ẹnemede emi ama, bụp idemfo ete: ‘Mmanie isikpep se isịnede ke Bible? Mmanie isikpep mbon en̄wen enyịn̄ Abasi? Mmanie isinen̄ede ima idemmọ, inyụn̄ inịm ke Jesus ke Abasi ada anyan̄a nnyịn? Mmanie mîsisịnke idem ke mbre ukara? Mmanie kpọt ẹsikwọrọ ke ukara Abasi edikọk mfịna nnyịn?’ Mme Ntiense Jehovah kpọt ẹnam kpukpru emi.—Isaiah 43:10-12.

NSO KE AFO EDINAM?

15. Nso ke ana nnyịn inam edieke iyomde Abasi ama se inamde inọ enye?

15 Ndinịm ke Abasi odu idịghe n̄kpọ emi ẹkpetịn̄de-tịn̄ ke inua kpọt. Mme demon ẹnịm ke Abasi odu edi mmọ ikopke uyo inọ enye. (James 2:19) Edieke iyomde Abasi ama se ededi emi inamde inọ enye, ana inịm ke enye odu inyụn̄ inam se enye oyomde.

16. Ntak emi anade iwọrọ ke nsunsu ido ukpono?

 16 Ana ikpọn̄ nsunsu ido ukpono edieke iyomde Abasi ama se inamde inọ enye. Prọfet Isaiah ọkọdọhọ ete: “Ẹwọn̄ọ ke esịt esie, ẹnam idem mbufo asana.” (Isaiah 52:11; 2 Corinth 6:17) Ntak edi oro anade iwọrọ ke nsunsu ido ukpono inyụn̄ itre ndinam se ededi emi mmọ ẹsinamde.

17, 18. Mmanie ke Bible okot “Akwa Babylon,” ndien ntak emi anade owo ọsọsọp ọwọrọ ọkpọn̄ mmọ?

17 Mme nsunsu ido ukpono ẹsikpep mme owo ẹnam mme n̄kpọ emi mîsịneke ke Bible. Mmọ ke Bible okot “Akwa Babylon.” (Ediyarade 17:5) Ntak emi Bible okotde mmọ “Akwa Babylon”? Ata ediwak nsu emi mmọ ẹsikpepde mme owo ọkọtọn̄ọ ke Babylon ke Ukwọ eyo Noah ama ekebe. Nsu emi ama asuana ọyọhọ ererimbot. Ke uwụtn̄kpọ, mbon Babylon ẹkesikpono mme abasi emi ẹkedide ita ita. Ata ediwak ufọkabasi mfịn n̄ko ẹsikpep mme owo nte ke ata Abasi ye Jesus ye edisana spirit ẹdi Abasi kiet. Edi Bible ọdọhọ ke Jehovah kpọt edi ata Abasi, ke Jesus edi Eyen esie. (John 17:3) Mbon Babylon ẹma ẹsinịm n̄ko ẹte ke owo ama akpa, ke enyene n̄kpọ emi esiwọrọde enye ke idem okodu uwem ke ebiet en̄wen, m̀mê ọkọbọ ufen ke ikan̄ hell. Kpukpru emi ẹdi nsu.—Se Se Ẹwetde Ẹdian 14, 17, ye 18.

18 Abasi ọdọhọ ke ibịghike ẹyesobo mme nsunsu ido ukpono ẹfep. (Ediyarade 18:8) Ndi omokụt ndien ntak emi anade ọsọsọp ọwọrọ ke nsunsu ido ukpono? Jehovah Abasi oyom fi ọwọrọ idahaemi mbak udutua n̄kpọfiọk.—Ediyarade 18:4.

Edieke afo etienede mbon emi ẹnamde n̄kpọ Jehovah anam n̄kpọ esie, afo eyenyene mme owo ke ofụri ererimbot

19. Edieke ọtọn̄ọde ndinam n̄kpọ Jehovah, nso ke enye edinam ọnọ fi?

19 Edieke ọkpọn̄de nsunsu ido ukpono edinam n̄kpọ Jehovah, emi idin̄wan̄ake ndusụk ufan fo m̀mê mbon  mbufo, ndien oro ekeme ndinam mmọ ẹyat esịt ye afo ẹnyụn̄ ẹtọn̄ọ ndisọn̄ ido ye afo. Edi Jehovah idikpọn̄ke fi. Ikọt esie emi ẹdude ke ofụri ererimbot, emi ẹnyụn̄ ẹmade kiet eken ẹyedi nditọeka fo ye mme ufan fo; afo oyonyụn̄ odori enyịn ndidu uwem ke nsinsi ke ini Abasi edinamde kpukpru n̄kpọ ẹdi obufa. (Mark 10:28-30) Ndien nte ini akade, ndusụk mme ufan fo ye mbon mbufo emi mîkamaha afo anam n̄kpọ Jehovah ẹkeme n̄ko nditọn̄ọ ndikpep Bible ye ikọt Jehovah.

20. Ntak emi anade ikpono Abasi nte enye oyomde?

20 Ibịghike Abasi ayanam kpukpru idiọkn̄kpọ ẹtre onyụn̄ ọtọn̄ọ ndikara ofụri isọn̄ emi. (2 Peter 3:9, 13) Uwem eyenem etieti! Kpukpru owo ẹyediana kiet ẹkpono Jehovah Abasi nte enye oyomde. Mbọk sọsọp wọrọ kpọn̄ nsunsu ido ukpono nyụn̄ tiene tọn̄ọ ndikpono ata Abasi nte enye oyomde.

Kpep N̄kpọ En̄wen

MMANIE ẸNAM UDUAK JEHOVAH MFỊN?

Ntak Emi Ẹkotde Nnyịn Mme Ntiense Jehovah?

Se n̄kpọ emi ẹkenamde nnyịn ida enyịn̄ emi ikere.