Nte oyomde okụbọde

Mek usem

Be ka udiana n̄kpọ

Be ka se isịnede

Be ka se isịnede

Mme Ntiense Jehovah

Efịk

Nso ke Bible Ekpep Nnyịn?

 IBUOT ITIAITA

Nso Idi Obio Ubọn̄ Abasi?

Nso Idi Obio Ubọn̄ Abasi?

1. Ọwọrọetop akam ewe ke idineme idahaemi?

EDIWAK miliọn owo ẹdiọn̄ọ ọwọrọetop akam emi ẹsikotde Akam Ọbọn̄, m̀mê Ete Nnyịn. Jesus akada akam emi ekpep mbet esie nte ẹkpebọn̄de akam. Nso ke enye ekeben̄e ke akam oro? Ndien ntak emi akam oro edide akpan n̄kpọ ọnọ nnyịn mfịn-e?

2. Ewe akpan n̄kpọ ita ke Jesus ekekpep nnyịn ndibọn̄ akam mben̄e?

2 Jesus ọkọdọhọ ete: “Mbufo ẹbọn̄ akam ntem, ndien, ẹte: ‘Ete nnyịn emi odude ke heaven, yak ẹnam enyịn̄ fo asana. Yak obio ubọn̄ fo edi. Yak uduak fo ada itie, nte edide ke heaven, yak edi ke isọn̄ kpasụk ntre.’” (Kot Matthew 6:9-13.) Ntak emi Jesus ekekpepde nnyịn ndibọn̄ akam mben̄e n̄kpọ ita emi?—Se Se Ẹwetde Ẹdian 20.

3. Nso ke ana nnyịn idiọn̄ọ iban̄a Obio Ubọn̄ Abasi?

3 Ima ikpep nte ke Abasi ekere Jehovah. Ima inyụn̄ ineme se Abasi aduakde ndinam nnọ nnyịn nnyụn̄ nnam ke isọn̄ emi. Edi nso ke ikọ Jesus ọkọwọrọ ke ini enye ọkọdọhọde ete: “Yak obio ubọn̄ fo edi”? Imọn̄ ikpep iban̄a se Obio Ubọn̄ m̀mê ukara Abasi edide, se enye edinamde, ye nte enye edinamde enyịn̄ Abasi asana.

NSO IDI OBIO UBỌN̄ ABASI?

4. Nso idi Obio Ubọn̄ Abasi, ndien anie edi Edidem Obio Ubọn̄ oro?

4 Jehovah ama ọtọn̄ọ ukara ke heaven, onyụn̄ emek Jesus nte Edidem. Ukara oro ke Bible okot Obio Ubọn̄ Abasi. Jesus edi “Edidem mbon oro ẹkarade  nte ndidem ye Ọbọn̄ mbon oro ẹkarade nte mbọn̄.” (1 Timothy 6:15) Jesus ekeme ndinam se andikara ndomokiet mîdikemeke ndinam tutu amama, enye onyụn̄ enyene odudu akan kpukpru mme andikara.

5. Obio Ubọn̄ Abasi edidu ke m̀mọ̀n̄ ikara? Enye edikara nso?

5 Usen 40 ke Jesus ama ekeset, enye ama ọnyọn̄ heaven. Nte ini akakade, Jehovah ama emek enye Edidem Obio Ubọn̄ oro. (Utom 2:33) Ukara Abasi edidu ke heaven ikara ofụri isọn̄. (Ediyarade 11:15) Ntak edi oro Bible okotde enye ‘Obio Ubọn̄ eke heaven.’—2 Timothy 4:18.

6, 7. Nso inam Jesus ọfọn akan owo en̄wen ekededi emi akarade?

6 Bible ọdọhọ ke idụhe andikara ndomokiet isọn̄ emi etiede nte Jesus sia ‘Jesus ikpọn̄ mîkemeke ndikpa.’ (1 Timothy 6:16) Kpukpru mbon emi ẹkarade ererimbot emi ẹyekpan̄a, edi Jesus idikpaha tutu amama. Kpukpru nti n̄kpọ emi enye edinamde inọ nnyịn ẹdidu ke nsinsi.

7 Se ẹketịn̄de ẹnịm ke Bible owụt ke Jesus edidi eti Edidem, ke enye oyonyụn̄ atua owo mbọm. Bible ọdọhọ ete: “Spirit Jehovah oyodoro enye ke idem, spirit ọniọn̄ ye asian, spirit item ye odudu, spirit ifiọk ye uten̄e Jehovah; ndien mbak Jehovah eyenem enye esịt. Ndien enye idikpehe ikpe itiene se okụtde ke enyịn, idinyụn̄ inọhọ nsuannọ itiene n̄kpọ emi enye okopde. Enye eyekpe ikpe mme ubuene ke edinen ido.” (Isaiah 11:2-4) Ndi afo ayama utọ edidem emi akara fi?

8. Nnyịn isan̄a didie idiọn̄ọ ke mbon en̄wen ẹyetiene Jesus ẹkara?

8 Abasi ama emek ndusụk owo ete ẹtiene Jesus ẹkara ke heaven. Ke uwụtn̄kpọ, apostle Paul ama ọdọhọ Timothy ete: “Edieke nnyịn ikade iso iyọ, nnyịn  iyakara n̄ko ye enye nte ndidem.” (2 Timothy 2:12) Owo ifan̄ ẹditiene Jesus ikara?

9. Owo ifan̄ ẹditiene Jesus ikara? Ini ewe ke Abasi ọkọtọn̄ọ ndimek mmọ?

9 Nte ikenemede ke Ibuot 7, apostle John ama okụt nte Jesus etiede ke ebekpo ke heaven ye ndidem 144,000. Mmanie ẹdi owo 144,000 emi? John ọkọdọhọ ke ẹwet “enyịn̄ [Jesus] ye enyịn̄ Ete esie ke ọkpọiso mmọ.” Ekem enye adian do ete: “Mmọ emi ẹdi mbon oro ẹtienede Eyenerọn̄ [oro edi, Jesus] ẹka ọtọ eke enye akaka. Ẹkedep mmọ ẹsio ke otu ubonowo.” (Kot Ediyarade 14:1, 4.) Owo 144,000 oro ẹdi mme Christian emi ẹsọn̄ọde ẹda ẹnam n̄kpọ Abasi, emi Abasi emekde ete ẹketiene Jesus ‘ẹkara isọn̄ nte ndidem.’ Ke ini mmọ ẹkpade, ẹsinam mmọ ẹset ẹkedu ke heaven. (Ediyarade 5:10) Toto ke eyo mme apostle ke Jehovah ọkọtọn̄ọ ndimek mme Christian emi ẹdisịnede ke otu ndidem 144,000 oro.

10. Ntak emi Jehovah ndinam Jesus ye owo 144,000 ẹkara nnyịn ọfọnde?

10 Jehovah enen̄ede ama nnyịn, emi anam enye osio mme owo ẹketiene Jesus ẹkara. Jesus edidi eti andikara koro enye enen̄ede ọdiọn̄ọ nnyịn. Enye ọdiọn̄ọ nte esitiede owo ke idem ye nte ufen etiede. Paul ọkọdọhọ ke Jesus ekeme “nditua nnyịn mbọm ke mmemidem nnyịn,” ye nte ke ẹma ẹdomo enye “ẹse ke kpukpru usụn̄ kpa nte nnyịn.” (Mme Hebrew 4:15; 5:8) Owo 144,000 oro n̄ko ẹdiọn̄ọ nte esitiede owo ke idem. Mmọ ẹkedi mme anana-mfọnmma owo nte nnyịn, mmọ ẹma ẹsidọn̄ọ n̄ko. Ntem imọdiọn̄ọ ke Jesus ye owo 144,000 oro ẹdiọn̄ọ nte n̄kpọ etiede ye nnyịn ẹnyụn̄ ẹdiọn̄ọ mme mfịna nnyịn.

 NSO KE OBIO UBỌN̄ ABASI EDINAM?

11. Ndi enyene ini emi ndusụk owo mîkanamke uduak Abasi ke heaven?

11 Ntak emi Jesus ekekpepde mme mbet esie ete ẹsibọn̄ akam ẹte yak ẹnam uduak Abasi, nte edide ke heaven yak edi ke isọn̄ kpasụk ntre? Ima ikpep ke Ibuot 3 nte ke Satan kpa Devil ama ọsọn̄ ibuot ye Jehovah. Ke Satan ama ọkọsọn̄ ibuot, Jehovah ama ayak enye ye mme demon esie ẹka iso ẹdu ke heaven ke ekpri ini. Ntem idịghe kpukpru mme angel ẹkenam uduak Abasi ini oro. Ke Ibuot 10, iyenen̄ede ikpep iban̄a Satan ye mme demon.

12. Ewe akpan n̄kpọntịbe iba ke ẹtịn̄ ẹban̄a ke Ediyarade 12:10?

12 Bible ọdọhọ ke ndondo oro ẹma ẹkenam Jesus Edidem Obio Ubọn̄ Abasi, ke enye ama an̄wana ye Satan. (Kot Ediyarade 12:7-10.) Ediyarade 12:10 etịn̄ akpan n̄kpọntịbe iba. Akpa, Jesus Christ ọtọn̄ọ ndikara nte Edidem ke Obio Ubọn̄ Abasi, ndien ọyọhọ iba, ẹsio Satan ke heaven ẹduọk mi ke isọn̄. Iyokụt ke mme n̄kpọ emi ẹma ẹtetịbe.

13. Nso iketịbe ke heaven ke ẹma ẹkesio Satan ẹduọk ke isọn̄?

13 Bible etịn̄ nte esịt ekenemde nti angel ke heaven, ke ẹma ẹkesio Satan ye mme demon esie ẹduọk ke isọn̄. Enye ọdọhọ ete: “Ẹdara, mbufo mme heaven ye mbufo emi ẹdụn̄de ke esịt!” (Ediyarade 12:12) Emem ye edidianakiet enen̄ede odu ke heaven idahaemi sia kpukpru mme angel ke heaven ẹnam uduak Abasi.

Mme owo ẹbọ ufen etieti tọn̄ọ ẹkesio Satan ye mme demon esie ẹduọn̄ọ ke isọn̄. Edi ufen emi ọmọn̄ etre ke mîbịghike

14. Nso itịbe ke isọn̄ tọn̄ọ ẹkesio Satan ke heaven ẹduọk?

14 Edi n̄kpọ itiehe ntre ke isọn̄. Ediwak n̄kpọ mmọn̄eyet ọwọrọ mme owo “koro Devil omosụhọde” edi, ndien “enye asan̄a ye akwa iyatesịt, sia  enye ọfiọkde ete ini imọ edi ibio.” (Ediyarade 12:12) Esịt ayat Satan etieti. Ẹma ẹsio enye ke heaven ẹtop ẹduọk ke isọn̄, ndien ẹmọn̄ ẹsobo enye ke mîbịghike. Enye ke anam mme owo ẹbọ ufen, ke onyụn̄ esịn ntịme ke ofụri isọn̄.

15. Nso ke Abasi aduak ndinam ke isọn̄?

15 Abasi ikpụhọkede se enye akaduakde ndinam ke isọn̄. Enye ke osụk oyoyom mme owo oro ẹfọnde ẹma ẹdụn̄ ke nsinsi ke Paradise ke isọn̄. (Psalm 37:29) Edi didie ke Obio Ubọn̄ esie edinam emi?

16, 17. Nso ke Daniel 2:44 etịn̄ aban̄a Obio Ubọn̄ Abasi?

16 Ẹma ẹwewet ke Daniel 2:44 ẹte: “Ke eyo ndidem oro, Abasi enyọn̄ oyowụk obio ubọn̄ eke owo mîdisoboke ifep tutu amama. Ndien idikpọn̄ke obio ubọn̄ oro inọ mbio efen. Enye ayanuak onyụn̄ osobo kpukpru mme obio ubọn̄ emi, ndien enye ayada ke nsinsi.” Nso ke prọfesi emi ekpep nnyịn aban̄a Obio Ubọn̄ Abasi?

17 Akpa kan̄a, enye owụt ke Obio Ubọn̄ Abasi editọn̄ọ ndikara “ke eyo ndidem oro.” Emi ọwọrọ ke mme ukara eken ẹdisụk ikakara ke isọn̄ ke ini Obio Ubọn̄ Abasi ọtọn̄ọde ndikara ke heaven. Ọyọhọ iba, enye owụt nnyịn nte ke Obio Ubọn̄ Abasi edidu ke nsinsi, ke idụhe ukara ndomokiet emi edidade itie esie. Ọyọhọ ita, enye owụt ke Obio Ubọn̄ Abasi ayan̄wana ye ukara ererimbot emi. Enye oyosobo ukara ererimbot emi, onyụn̄ edi n̄kukụre ukara ke isọn̄ emi. Ini oro ndien ke mme owo ẹdinyene mfọnn̄kan ukara.

18. Ẹkot didie akpatre ekọn̄ oro ukara ererimbot emi ẹdin̄wanade ye Obio Ubọn̄ Abasi?

18 Nso iditịbe mbemiso ukara ererimbot emi  ẹn̄wanade ye Obio Ubọn̄ Abasi? Ediyarade 16:14, 16 owụt ke mme demon ẹyebian̄a ‘ndidem ofụri isọn̄, man ẹtan̄ mmọ ẹbon ọtọkiet ẹnọ ekọn̄ akwa usen Abasi Ata Ọkpọsọn̄.’ Ẹkot ekọn̄ emi Armageddon, ndien enye edidi akpatre ekọn̄.—Se Se Ẹwetde Ẹdian 10.

19, 20. Ntak emi iyomde Obio Ubọn̄ Abasi edikara isọn̄ emi?

19 Ntak emi iyomde Obio Ubọn̄ Abasi? Yak ineme ntak ita. Akpa, nnyịn idi mme anamidiọk, imesidọn̄ọ inyụn̄ ikpa. Edi Bible ọdọhọ ke nnyịn ididu uwem ke nsinsi ke ukara Abasi. John 3:16 ọdọhọ ete: “Abasi ama enen̄ede ama ererimbot tutu enye ọnọ ikpọn̄-ikpọn̄ edibon Eyen esie, man owo ekededi eke ọbuọtde idem ye enye okûtak edi enyene nsinsi uwem.”

20 Ọyọhọ ntak iba emi iyomde ukara Abasi edi ke mme idiọkowo ẹyọyọhọ ererimbot mfịn. Ediwak owo ẹsisu nsu, ẹyịp inọ, ẹnyụn̄ ẹdu oburobụt uwem. Nnyịn ikemeke ndisobo mmọ mfep, edi Abasi ekeme. Ke Armageddon, ẹyesobo kpukpru mbon oro ẹkade iso ẹnam idiọkn̄kpọ. (Kot Psalm 37:10.) Ọyọhọ ntak ita emi iyomde ukara Abasi edi ke ukara ererimbot ẹbak ibak ẹnyụn̄ ẹdia inọ etieti; mmọ inyụn̄ inyeneke odudu nditre ndiọi n̄kpọ. Mmọ imaha ndin̄wam mme owo ẹkop uyo Abasi. Bible ọdọhọ ke ‘owo akara owo tutu ọnọ enye unan.’—Ecclesiastes 8:9.

21. Didie ke Obio Ubọn̄ Abasi edinam ẹnam uduak Abasi ke isọn̄?

21 Ke ekọn̄ Armageddon okụrede, Obio Ubọn̄ Abasi ayanam ẹnam uduak Abasi ke isọn̄. Ke uwụtn̄kpọ, enye oyosio Satan ye mme demon esie efep.  (Ediyarade 20:1-3) Nte ini akade, owo ndomokiet ididọn̄ọke, owo idinyụn̄ ikpaha aba. Ke ntak ufak oro Jesus ọkọnọde, kpukpru nti owo ẹyedu uwem ke nsinsi ke Paradise. (Ediyarade 22:1-3) Obio Ubọn̄ oro ayanam enyịn̄ Abasi asana. Emi ọwọrọ ke ukara Abasi ayanam kpukpru owo ẹkpono enyịn̄ Jehovah.—Se Se Ẹwetde Ẹdian 21.

INI EWE KE JESUS AKAKABADE EDI EDIDEM?

22. Isan̄a didie idiọn̄ọ ke Jesus ikedịghe Edidem ke ini enye okodude ke isọn̄ ye ke ndondo oro enye ekesetde ọnyọn̄ heaven?

22 Jesus ama ekpep mme mbet esie ẹsibọn̄ akam ẹte: “Yak obio ubọn̄ fo edi.” Emi okowụt ke ukara Abasi ikọtọn̄ọke kan̄a, ke Jehovah edinam eyen esie edi Edidem ke ini iso. Ndi ẹkenam Jesus edi Edidem ndondo oro enye afiakde ọnyọn̄ heaven? Ihih, akana enye ebet kan̄a. Ke Jesus ama ekeset, Peter ye Paul ẹma ẹnam emi an̄wan̄a ke ini mmọ ẹkenamde mme owo ẹfiọk ke prọfesi oro odude ke Psalm 110:1 aban̄a Jesus. Ke prọfesi oro, Jehovah ọkọdọhọ Jesus ete:  “Tie mi ke ubọk nnasia tutu nda mme asua fo nnịm nte udoriukot fo.” (Utom 2:32-35; Mme Hebrew 10:12, 13) Jesus ekebet ebịghi didie mbemiso Jehovah anamde enye Edidem?

Obio Ubọn̄ Abasi ayanam ẹnam uduak Abasi ke isọn̄

23. (a) Isua ewe ke Jesus ọkọtọn̄ọ ndikara nte Edidem Obio Ubọn̄ Abasi? (b) Nso ke idikpep ke Ibuot 9?

23 Ediwak isua mbemiso 1914, mme ata Christian ẹma ẹdiọn̄ọ ke 1914 edidi akpan isua emi prọfesi Bible ẹdisude. Se itịbede ke ererimbot tọn̄ọ ke isua 1914 owụt ke mmọ ẹma ẹnen. Isua oro ke Jesus ọkọtọn̄ọ ndikara nte Edidem. (Psalm 110:2) Ibịghike ke Jesus ama ọkọtọn̄ọ ukara, enye ama osio Satan ke heaven ọduọk ke isọn̄, ndien idahaemi, Satan ọdiọn̄ọ ke “ini imọ edi ibio.” (Ediyarade 12:12) Ke Ibuot 9, iyokụt mme n̄kpọ en̄wen emi anamde nnyịn idiọn̄ọ ke ini oro osụhọde ọnọ Satan iniọn̄ke aba. Iyokụt n̄ko nte ke ibịghike Obio Ubọn̄ Abasi ayanam ẹnam uduak Abasi ke isọn̄.—Se Se Ẹwetde Ẹdian 22.

Kpep N̄kpọ En̄wen

Obio Ubọn̄ Abasi Akan Ukara Owo ke Kpukpru Usụn̄

Kot nte ekemede ndimen Obio Ubọn̄ Abasi ndomo ye ukara owo.