Nte oyomde okụbọde

Mek usem

Be ka udiana n̄kpọ

Be ka se isịnede

Be ka se isịnede

Mme Ntiense Jehovah

Efịk

Nso ke Bible Ekpep Nnyịn?

 IBUOT EFỊTETA

Ndi Akpana Nyak Idem Nnọ Abasi Nnyụn̄ Nna Baptism?

Ndi Akpana Nyak Idem Nnọ Abasi Nnyụn̄ Nna Baptism?

1. Nso ke se afo ekpepde ke n̄wed emi ekeme ndinam fi ekere?

AFO emekpep ediwak n̄kpọ ke Bible toto ke ini emi ọkọtọn̄ọde ndikpep n̄wed emi. Ke uwụtn̄kpọ, emekpep ke Abasi ọn̄wọn̄ọ ndinam nnyịn idu uwem ke nsinsi, ekpep se isitịbede inọ owo emi akpade, onyụn̄ ekpep ke Abasi ayanam mme owo ẹset. (Ecclesiastes 9:5; Luke 23:43; John 5:28, 29; Ediyarade 21:3, 4) Ekeme ndidi ọmọtọn̄ọ ndidụk mbono esop Mme Ntiense Jehovah onyụn̄ enịm ke mmọ ẹkpep akpanikọ. (John 13:35) Anaedi ọmọtọn̄ọ ndima Jehovah  nnyụn̄ ndi ufan esie, onyụn̄ ekeme ndidi emebiere ndinam n̄kpọ esie. Ekeme ndidi emesikere, ‘Nso ke n̄kpanam man n̄keme ndinam n̄kpọ Abasi?’

2. Nso ikanam owo Ethiopia ọdọhọ ẹnịm imọ baptism?

2 Owo Ethiopia emi okodude uwem ke eyo Jesus ama ekere ukem n̄kpọ oro. Isua ifan̄ ke Jesus ama ekeset, mbet esie emi ekekerede Philip ama ọkwọrọ ikọ ọnọ owo Ethiopia oro. Philip ama owụt enye ke Jesus edi Messiah. Ete oro ama ama se enye okokopde tutu enye ọdọhọ Philip ete: “Sese! Akamba mmọn̄ mi; nso ibiọn̄ọ mi ndina baptism?”—Utom 8:26-36.

3. (a) Nso ewụhọ ke Jesus ọkọnọ mme mbet esie? (b) Didie ke ẹkpenịm owo baptism?

3 Bible ekpep nte ke edieke afo oyomde ndinam n̄kpọ Jehovah, ke ana afo ana baptism. Jesus ọkọdọhọ mme mbet esie ete: “Ẹka ẹkenam mme owo ke kpukpru idụt ẹdi mbet mi, ẹnịm mmọ baptism.” (Matthew 28:19) Jesus ke idemesie ama onyụn̄ ana baptism. Ẹkebobụk enye ofụri ofụri ke mmọn̄, owo ikesịmeke-sịme m̀mê nditọhọ enye mmọn̄ ke ibuot. (Matthew 3:16) Mfịn, ke ini Christian anade baptism, ana ẹbụk enye ofụri ofụri ke mmọn̄.

4. Afo ndina baptism ediwụt mbon en̄wen nso?

4 Ke ini anade baptism, emi ediwụt mbon en̄wen ke enen̄ede ọdọn̄ fi ndidi ufan Abasi ye nte ke afo oyom ndinam n̄kpọ esie. (Psalm 40:7, 8) Ntem emekeme ndikere, ‘Nso ke n̄kpanam man nna baptism?’

IFIỌK YE MBUỌTIDEM

5. (a) Nso ke ana anam man ekeme ndina baptism? (b) Ntak emi anade afo esidụk mbono esop Mme Ntiense Jehovah?

5 Mbemiso anade baptism, ana enen̄ede ọfiọk Jehovah  ye Jesus. Ama ọtọtọn̄ọ ndinam emi ke ini ọkọtọn̄ọde ndikpep Bible. (Kot John 17:3.) Edi ikụreke ke oro. Bible ọdọhọ ke ana afo enen̄ede ọfiọk uduak Jehovah. (Colossae 1:9) Edieke odụkde mbono esop Mme Ntiense Jehovah, emi ayanam fi enen̄ede ekpere Jehovah. Ata akpan ntak kiet emi anade esidụk mbono esop edi oro.—Mme Hebrew 10:24, 25.

Mbemiso anade baptism, ana afo ekpep Bible

6. Nso ye nso ke ana afo ọdiọn̄ọ ke Bible mbemiso anade baptism?

6 Jehovah idọhọke ke ana ọdiọn̄ọ kpukpru n̄kpọ ke Bible mbemiso anade baptism. Enye ikọdọhọke ke ana owo Ethiopia oro ọdiọn̄ọ kpukpru n̄kpọ mbemiso anade baptism. (Utom 8:30, 31) Nnyịn idisụk ikaka iso ikpep n̄kpọ iban̄a Jehovah Abasi ke nsinsi. (Ecclesiastes 3:11) Edi ana afo ọdiọn̄ọ onyụn̄ enyịme mme akpan n̄kpọ emi Bible ekpepde mbemiso anade baptism.—Mme Hebrew 5:12.

7. Didie ke ndikpep Bible an̄wam fi?

7 Bible ọdọhọ ete: “Mbuọtidem mîdụhe owo ikemeke nditịm nnem [Abasi] esịt.” (Mme Hebrew 11:6) Ntem ana afo enyene mbuọtidem man ekeme ndina baptism. Bible ọdọhọ ke ndusụk owo ke Corinth ẹma ẹkop se mme mbet Jesus ẹkekpepde, “ẹtọn̄ọ ndinịm ke akpanikọ ẹnyụn̄ ẹna baptism.” (Utom 18:8) Afo ndikpep Bible anam fi ọbuọt idem ke un̄wọn̄ọ Abasi onyụn̄ enịm ke n̄kpa Jesus ekeme ndinyan̄a nnyịn nsio ke idiọkn̄kpọ ye n̄kpa.—Joshua 23:14; Utom 4:12; 2 Timothy 3:16, 17.

TỊN̄ SE EKPEPDE KE BIBLE NỌ MBON EN̄WEN

8. Nso idinam ọdọn̄ fi nditịn̄ se ekpepde nnọ mbon en̄wen?

8 Nte ekpepde Bible onyụn̄ okụtde nte emi an̄wamde  fi, mbuọtidem fo eyetetịm ọsọn̄. Emi ayanam ọdọn̄ fi nditịn̄ se ekpepde nnọ mbon en̄wen. (Jeremiah 20:9; 2 Corinth 4:13) Edi afo editịn̄ inọ mmanie?

Edieke enyenede mbuọtidem eyetịn̄ se enịmde ọnọ mbon en̄wen

9, 10. (a) Mmanie ke afo ekpebem iso ọtọn̄ọ nditịn̄ se ekpepde ke Bible nnọ? (b) Nso ke akpanam edieke oyomde nditọn̄ọ nditiene esop n̄ka ukwọrọikọ?

9 Emekeme nditịn̄ se ekpepde ke Bible nnọ mme owo ke ufọk mbufo, mme ufan fo, mme mbọhọidụn̄ fo, m̀mê mbon itieutom mbufo. Ọfọn anam emi, edi ti ndinam ke usụn̄ emi owụtde ke amama onyụn̄ okpono mmọ. Ndien nte ini akade, afo oyodot nditiene esop mbufo n̄ka ukwọrọikọ. Edieke oyomde nditọn̄ọ nditiene esop n̄ka ukwọrọikọ, tịn̄ nọ owo emi esikpepde fi Bible ke imọn̄ itiene esop isan̄a ikwọrọ ikọ. Edieke enye ekerede ke omodot, ke omonyụn̄ odu uwem nte Bible ọdọhọde, mbiowo iba ẹyenyene nneme ye mbufo mbiba.

10 Nso ke mbiowo oro ẹdineme ye afo? Mmọ ẹyebụp fi n̄kpọ ifan̄ man ẹse m̀mê ọmọdiọn̄ọ onyụn̄ enịm mme akpan ukpepn̄kpọ Bible, m̀mê afo emesinam se Bible ọdọhọde, m̀mê omonyụn̄ enen̄ede oyom ndidi Ntiense Jehovah. Ti ke mbiowo ke ẹmek ẹte ẹse ẹban̄a kpukpru owo ke esop, esịnede fi, ntre kûfehe nditịn̄ se isịnede fi ke esịt nnọ mmọ. (Utom 20:28; 1 Peter 5:2, 3) Ke mmọ ẹma ẹkenyene nneme ye mbufo ẹma, mmọ ẹyetịn̄ ẹnọ fi m̀mê emekeme nditọn̄ọ nditiene esop n̄ka ukwọrọikọ.

11. Ntak emi anade ikpụhọde mbemiso itọn̄ọde nditiene esop n̄ka ukwọrọikọ?

11 Mbiowo ẹkeme ndidọhọ fi ke odu mme n̄kpọ emi anade anam m̀mê etre ndinam man odot nditiene esop n̄ka ukwọrọikọ. Ntak emi anade anam se  mmọ ẹdọhọde? Sia ke ini isan̄ade ikwọrọ ikọ, mme owo ẹsida nnyịn nte nditọ Abasi; ntem ana idu uwem emi edinamde mmọ ẹkpono enye.—1 Corinth 6:9, 10; Galatia 5:19-21.

KABADE ESỊT NYỤN̄ FIAK TIENE ABASI

12. Ntak emi anade kpukpru owo ẹkabade esịt?

12 Odu n̄kpọ en̄wen emi anade anam man ekeme ndina baptism. Apostle Peter ọkọdọhọ ete: “Ẹkabade esịt ẹnyụn̄ ẹfiak edem man ẹsọhi mme idiọkn̄kpọ mbufo ẹfep.” (Utom 3:19) Nso ke ndikabade esịt ọwọrọ? Ọwọrọ ke ana nnyịn inen̄ede itua n̄kpọfiọk ke idiọkn̄kpọ emi ikanamde. Ke uwụtn̄kpọ, edieke edide ama anam use, esịn efịbe, m̀mê anam mme oburobụt ido eken, ana akabade esịt. Idem ekpededi ama odomo ndidu eti uwem toto ke ekpri unyụn̄ unamke se ẹtịn̄de emi, ana osụk akabade esịt sia kpukpru nnyịn ikadada idiọkn̄kpọ imana, imonyụn̄ iyom Abasi efen ọnọ nnyịn.—Rome 3:23; 5:1.

13. Ikọ Bible emi ọdọhọde ete nnyịn ‘ifiak edem’ ọwọrọ nso?

13 Ndi ọwọrọ ke afo ama atatua n̄kpọfiọk ke se akanamde, ke okụre ke oro? Ihih. Peter ọkọdọhọ ke ana afo ‘afiak edem.’ Emi ọwọrọ ke ana etre kpukpru idiọkn̄kpọ emi ekesinamde onyụn̄ ọtọn̄ọ ndinam se ifọnde ke enyịn Abasi. Ke uwụtn̄kpọ, yak idọhọ ke aka isan̄ ke ebiet emi akanam mûkaha. Ke ama akawat aka anyan esisịt, afo edidiọn̄ọ ke ima idue usụn̄. Nso ke edinam? Eyesịn ukot ke brek, atuak ada, ọwọn̄ọde iso awat aka itie emi akpakakade. Ukem ntre, nte osụk ekpepde Bible, afo emekeme ndikụt mme n̄kpọ oro anade etre. Nyịme ‘ndifiak edem,’ m̀mê  nditre mme n̄kpọ oro, nyụn̄ tọn̄ọ ndinam se inende ke enyịn Abasi.

YAK IDEM NỌ ABASI

Ndi ama ọn̄wọn̄ọ ọnọ Jehovah ke iyom ndinam n̄kpọ esie?

14. Didie ke afo ediyak idem inọ Abasi?

14 Akpan n̄kpọ en̄wen emi anade anam mbemiso anade baptism edi ndiyak idemfo nnọ Jehovah. Ke ini ọbọn̄de akam ọnọ Jehovah onyụn̄ ọn̄wọn̄ọde ndida n̄kpọ esie nte ata akpan n̄kpọ ke uwem fo, nnyụn̄ ntuak ibuot nnọ enye ikpọn̄-ikpọn̄, emi ọwọrọ ke amayak idem ọnọ enye.—Deuteronomy 6:15.

15, 16. Nso isinam owo oyom ndiyak idem nnọ Abasi?

15 Ndin̄wọn̄ọ ndinam n̄kpọ Jehovah ikpọn̄-ikpọn̄ etie nte ndin̄wọn̄ọ nnọ owo emi afo amade ke iyọdọ enye. Ke uwụtn̄kpọ, erenowo ye n̄wan ẹkeme ndiyom ndidọ kiet eken. Nte erenowo oro emehede ye eyenan̄wan oro, ntre ke enye editetịm ima eyenan̄wan oro onyụn̄ oyom ndidọ enye. Kpa ye oro mîdịghe ekpri ubiere edi emi, enye osụk oyoyom ndinam se enye ọkọn̄wọn̄ọde oro sia enye amade n̄kaiferi oro.

16 Nte afo ekpepde n̄kpọ aban̄a Jehovah, ntre ke afo edinen̄ede ima enye onyụn̄ oyom ndinam n̄kpọ esie ke ofụri esịt. Emi ayanam fi ọbọn̄ akam onyụn̄ ọn̄wọn̄ọ ndinam n̄kpọ esie. Bible ọdọhọ ke ana owo ekededi oro oyomde nditiene Jesus “akan̄ idemesie.” (Mark 8:34) Nso ke emi ọwọrọ? Ọwọrọ ke ana ndikop uyo nnọ Jehovah edi ata akpan n̄kpọ ọnọ fi. Ana se Jehovah oyomde edi akpan n̄kpọ akan se idọn̄de fi ye se afo oyomde.—Kot 1 Peter 4:2.

 KÛKERE KE IMỌ IDIKEMEKE NDINAM N̄KPỌ ABASI

17. Ntak emi ndusụk owo mîyakke idem inọ Jehovah Abasi?

17 Ndusụk owo imaha ndiyak idem nnọ Jehovah sia mmọ ẹkere ke mmimọ idikemeke ndinam n̄kpọ esie. Mmọ iyomke ndinam Jehovah ayat esịt. Mîdịghe mmọ ẹkere ke edieke mmimọ mîyakke idem inọ Abasi, ke enye idikotke mmimọ idinam ibat.

18. Nso mîdiyakke fi ekere ke imọ idikemeke ndinam n̄kpọ Jehovah?

18 Edieke afo enen̄erede ama Jehovah, emi idiyakke fi ekere ke imọ idikemeke ndinam n̄kpọ esie. Sia amade enye, afo ayanam ofụri se ekemede man anam se ọkọn̄wọn̄ọde ọnọ enye. (Ecclesiastes 5:4; Colossae 1:10) Iditiehe fi nte ke ndinam n̄kpọ Jehovah ọsọn̄ akaha. Apostle John ọkọdọhọ ete: “Ndima Abasi ọwọrọ ete nnyịn inịm mme ewụhọ esie; ndien mme ewụhọ esie idobike owo mbiomo.”—1 John 5:3.

19. Ntak emi mûkpayakke ndịk anam fi etre ndiyak idem nnọ Jehovah?

19 Inaha ebebet tutu afo ọfọn ama mbemiso ayakde idem ọnọ Jehovah. Akananam enye idọhọke nnyịn inam se nnyịn mîdikemeke ndinam. (Psalm 103:14) Enye ayan̄wam fi anam se ifọnde. (Isaiah 41:10) Buọt idem ye Jehovah ke ofụri esịt fo, ndien “enye eyenen̄ede usụn̄ fo enịm.”—Mme N̄ke 3:5, 6.

TAN̄A MBUỌTIDEM FO AN̄WAN̄WA MAN ENYENE EDINYAN̄A

20. Ke ama akayak idem ọnọ Jehovah, nso en̄wen ke akpanam?

20 Ndi emekere ke emeben̄e idem ndiyak idem nnọ Jehovah? Ke ama akayak idem ọnọ Jehovah, odu n̄kpọ en̄wen emi anade anam. Ana afo ana baptism.

21, 22. Nso idiwụt ke amatan̄a mbuọtidem fo “an̄wan̄wa”?

 21 Nam anam-ndutịm otu mbiowo esop mbufo ọdiọn̄ọ ke ama ayak idem ọnọ Jehovah, ndien ke omoyom ndina baptism. Enye ayanam mbiowo ifan̄ ẹdi ẹdineme mme akpan ukpepn̄kpọ Bible ye afo. Edieke mmọ ẹkụtde ke omodot ndina baptism, mmọ ẹyedọhọ fi ke emekeme  ndina ke mbono circuit m̀mê ke akamba mbono. Ẹyenọ utịn̄ikọ emi anamde mme owo ẹdiọn̄ọ se baptism ọwọrọde ke mbono oro. Owo emi edinọde utịn̄ikọ oro oyobụp mbon emi ẹyomde ndina baptism mbụme iba. Afo ndibọrọ mbụme oro ediwụt ke amatan̄a mbuọtidem fo “an̄wan̄wa.”—Rome 10:10.

 22 Ini oro ndien ke ẹdinịm fi baptism. Ẹyebụk fi ofụri ofụri ke mmọn̄. Baptism oro ke kpukpru owo ẹdida idiọn̄ọ ke ama ayak idem fo ọnọ Jehovah ye nte ke afo edi Ntiense Jehovah idahaemi.

SE BAPTISM FO ỌWỌRỌDE

23. Nso ke ndina baptism “ke enyịn̄ Ete ye Eyen ye edisana spirit” ọwọrọ?

23 Jesus ọkọdọhọ ke ẹdinịm mme mbet imọ baptism “ke enyịn̄ Ete ye Eyen ye edisana spirit.” (Kot Matthew 28:19.) Nso ke ikọ Jesus emi ọwọrọ? Ọwọrọ ke afo ọmọdiọn̄ọ ke Jehovah edi ata Abasi, ọmọdiọn̄ọ utom oro Abasi ọnọde Jesus man ẹnam uduak Abasi, omonyụn̄ ọdiọn̄ọ nte Abasi adade edisana spirit esie anam n̄kpọ man ẹnam uduak esie.—Psalm 83:18; Matthew 28:18; Galatia 5:22, 23; 2 Peter 1:21.

Ke ini anade baptism, afo owụt ke imọ iyom ndinam uduak Abasi

24, 25. (a) Nso ke baptism ada aban̄a? (b) Nso ke idineme ke Ibuot 19?

24 Baptism ada aban̄a ata akpan n̄kpọ. Ke ini ẹbụkde fi ke mmọn̄, emi ọwọrọ ke ọmọkpọn̄ kpukpru orụk idiọk uwem, ke ududụhe aba utọ uwem oro ekesidude. Ke ini ẹsiode fi ke mmọn̄, oro ọwọrọ ke ọmọtọn̄ọ obufa uwem, ke ọtọn̄ọde ke emi ke edinam n̄kpọ Jehovah. Ti ke uyakke idem unọ owo, utom, m̀mê n̄ka ndomokiet, ayak ọnọ Jehovah.

25 Afo ndiyak idem nnọ Abasi ayan̄wam fi enen̄ede edi ufan esie. (Psalm 25:14) Emi iwọrọke ke owo ama anana baptism ke ẹyenyan̄a enye. Apostle Paul ekewet ete: “Ẹka iso ẹsan̄a ke ndịk ye nnyekidem ẹnam edinyan̄a mbufo ọwọrọ usụn̄.” (Philippi 2:12) Baptism edi ntọn̄ọ. Edi nso ke akpanam man aka iso asan̄a ekpere Jehovah? Ibuot 19 ọmọn̄ ọbọrọ mbụme oro.