Nte oyomde okụbọde

Mek usem

Be ka udiana n̄kpọ

Be ka se isịnede

Be ka se isịnede

Mme Ntiense Jehovah

Efịk

Nso ke Bible Ekpep Nnyịn?

 IBUOT ITIOKIET

M̀mọ̀n̄ ke Mme Owo Ẹsika Mmọ Ẹma Ẹkpa?

M̀mọ̀n̄ ke Mme Owo Ẹsika Mmọ Ẹma Ẹkpa?

1-3. Nso ke mme owo ẹsibụp ẹban̄a n̄kpa, ndien ndusụk ufọkabasi ẹsibọrọ mbụme emi didie?

BIBLE ọdọhọ ke ini ke edi emi ‘n̄kpa mîdidụhe aba.’ (Ediyarade 21:4) Ke Ibuot 5, ima ikpep nte ufak edinamde inyene nsinsi uwem. Edi mme owo ke ẹkpan̄a idahaemi. (Ecclesiastes 9:5) Ntre, akpan mbụme kiet emi isibụpde edi, Nso isitịbe inọ owo emi akpade?

2 Imesinen̄ede iyom ibọrọ mbụme emi ke ini owo nnyịn akpade. Ndusụk ini imesibụp ite: ‘Enye aka m̀mọ̀n̄? Ndi enye ke ese nnyịn? Ndi enye ekeme ndin̄wam nnyịn? Ndi iyafiak ikụt enye tutu amama?’

3 Ediwak ufọkabasi ẹbọrọ mbụme emi ke nsio nsio usụn̄. Ndusụk mmọ ẹkpep ke nti owo ẹsika heaven, ndiọi owo ẹka ẹkebọ ufen ke hell. Mbon en̄wen ẹsikpep ke edieke owo akpade, ke enye ayakabade spirit onyụn̄ okodu ye mbon ubon esie emi ẹma ẹkekpakpa. Ndien mbon eken ẹsidọhọ ke owo ama akpa, ke enye ayafiak edimana.

4. Se mme ufọkabasi ẹtịn̄de ẹban̄a n̄kpa owụt ke kpukpru mmọ ẹkpep nso?

4 Ekeme nditie nte ke mme ufọkabasi ẹkpep nsio nsio n̄kpọ. Edi edieke etịmde ese, oyokụt ke enyene n̄kpọ kiet emi kpukpru mmọ ẹkpepde. Mmọ ẹkpep nte ke ini owo akpade, ke enyene n̄kpọ ke idem esie emi esikade iso odu uwem. Ndi akpanikọ ke mmọ ẹkpep emi?

 M̀MỌ̀N̄ KE MME OWO ẸSIKA MMỌ ẸMA ẸKPA?

5, 6. Nso isitịbe inọ owo emi akpade?

5 Jehovah ọdiọn̄ọ se isitịbede inọ owo emi akpade, ndien enye ọdọhọ nnyịn ete ke owo ama akpa, akpa. Enye idụhe uwem aba. N̄kpọ ndomokiet ke idem esie isikaha ikodu ke ebiet en̄wen. * Ke ini owo akpade, enye isikemeke ndikụt n̄kpọ, ndikop n̄kpọ, m̀mê ndikere n̄kpọ aba.

6 Edidem Solomon ekewet ete: “Amaedi mme akpan̄kpa, mmọ ifiọkke baba n̄kpọ kiet.” Mme akpan̄kpa ikemeke ndima owo m̀mê ndisua owo, ndien “baba utom, baba uduak, baba ifiọk, baba ọniọn̄ [idụhe] ke Udi.” (Kot Ecclesiastes 9:5, 6, 10.) Bible etịn̄ n̄ko ke Psalm 146:4 ete ke owo ama akpa, ke “mme ekikere esie ẹtak.”

SE JESUS EKETỊN̄DE ABAN̄A N̄KPA

Jehovah okobot owo man mmọ ẹdu uwem ke nsinsi ke isọn̄

7. Nso ke Jesus eketịn̄ aban̄a n̄kpa?

7 Ke ini Lazarus, edima ufan Jesus, akakpade Jesus ama ọdọhọ mbet esie ete: “Lazarus ufan nnyịn aka ndiduọk odudu, edi ami mmọn̄ n̄ka do man n̄kedemede enye ke idap.” Edi ikọ Jesus ikọwọrọke ke Lazarus ede idap ọduọk odudu. Jesus ama adian do ete: “Lazarus akpa.” (John 11:11-14) Jesus ekemen n̄kpa odomo ye idap. Enye ikọdọhọke ke Lazarus aka heaven, m̀mê odu ye mme iman esie emi ẹma ẹkekpan̄a. Enye ikonyụn̄ idọhọke ke Lazarus ọbọ ufen ke ikan̄ m̀mê ke enye ayafiak amana. Eketie nte n̄kpọ eke Lazarus edede ọkpọsọn̄ idap. Odu mme itie en̄wen ke Bible emi ẹmende n̄kpa ẹdomo ye idap. Ke ini ẹkewotde Stephen, Bible ọdọhọ ke enye ama  “ede ke n̄kpa.” (Utom 7:60) Apostle Paul ama ewet n̄ko ete ke ndusụk Christian “ẹma ẹde ke n̄kpa.”—1 Corinth 15:6.

8. Isan̄a didie idiọn̄ọ ke Abasi ikoyomke owo akpa?

8 Ke ini Abasi okobotde Adam ye Eve, ndi enye ama oyom mmọ ẹkpa nte ini akade? Ihih! Jehovah okobot mmọ man mmọ ẹnen̄ede ẹkop nsọn̄idem ẹnyụn̄ ẹdu uwem ke nsinsi. Ke ini Jehovah okobotde owo, enye ama anam ọdọn̄ mmọ ndidu uwem ke nsinsi. (Ecclesiastes 3:11) Idụhe ete m̀mê eka emi okpoyomde nditọ esie ẹdọn̄ọ ẹnyụn̄ ẹkpa; Jehovah inyụn̄ iyomke utọ n̄kpọ emi ọwọrọ  nnyịn. Edi edieke Abasi okobotde nnyịn man idu uwem ke nsinsi, ntak emi mme owo ẹsikpade?

NTAK EMI MME OWO ẸSIKPADE?

9. Ntak emi mîkọdiọkke Jehovah ndinọ Adam ye Eve ewụhọ?

9 Jehovah ama ọdọhọ Adam ke In̄wan̄ Eden ete: “Dia kpukpru mfri eto in̄wan̄ yụhọ. Edi amaedi mfri eto ifiọk eti ye idiọk, kûdia, koro ke usen eke afo adiade afo ayakpa n̄kpa.” (Genesis 2:9, 16, 17) Ewụhọ emi Jehovah ọkọnọde mi ama enen̄ede an̄wan̄a Adam ye Eve, ikonyụn̄ isọn̄ke ndinịm, ndien Jehovah ama enyene unen nditeme mmọ se mmọ ẹkpenamde ye se mmọ mîkpanamke. Mmọ ndinịm ewụhọ Jehovah okpokowụt ke mmọ ẹkpono Jehovah ẹnyụn̄ ẹnen̄ede ẹkop inemesịt ke kpukpru se enye anamde ọnọ mmọ.

10, 11. (a) Didie ke Satan akanam Adam ye Eve ẹsọn̄ ibuot? (b) Ntak emi idọhọde ke Adam ye Eve ẹkekokoi ẹbiat ibet Abasi?

10 Edi Adam ye Eve ẹma ẹmek ndisọn̄ ibuot ye Jehovah. Satan ama edibụp Eve ete: “Nte enen̄ede edi akpanikọ ke Abasi ọkọdọhọ mbufo ẹkûdia kpukpru eto ke in̄wan̄ emi?” Eve ama ọbọrọ enye ete: “Nnyịn imekeme ndidia mme mfri eto in̄wan̄ emi. Edi amaedi mfri eto emi odude ke ufọt in̄wan̄, Abasi ọkọdọhọ ete, ‘Mbufo ẹkûdia enye, ẹkûnyụn̄ ẹtụk enye, mbak ẹdikpan̄a.’”—Genesis 3:1-3.

11 Satan ama ọdọhọ ete: “Mbufo idikpaha n̄kpa. Koro Abasi ọmọfiọk ete ke usen eke mbufo ẹdidiade, enyịn mbufo ẹyetara, mbufo ẹyenyụn̄ ẹtie nte Abasi, ẹfiọk eti ye idiọk.” (Genesis 3:4-6) Satan okoyom Eve ekere ke Eve ekeme ndibiere se ifọnde ye se idiọkde ke idemesie. Enye ama abian̄a Eve ete ke edieke enye adiade mfri eto oro ke enye idikpaha, ndien Eve ama adia mfri eto oro onyụn̄ ọnọ ebe esie etiene adia. Adam ye Eve ẹma ẹdiọn̄ọ ke  Jehovah ọkọdọhọ mmimọ ikûdia mfri eto oro. Ibet oro Abasi ọkọnọde mmọ ama enen̄ede an̄wan̄a mmọ onyụn̄ ọfọn ye mmọ, ntre mmọ ndikadia mfri eto oro okowụt ke mmọ ẹkekokoi ẹsọn̄ ibuot ye Abasi. Emi n̄ko okowụt ke mmọ ikponoke Ete mmọ eke heaven. Mmọ ẹkekokoi ẹbiat ibet Abasi!

12. Ntak emi Adam ye Eve ndikọsọn̄ ibuot ye Jehovah ọkọdiọkde etieti?

12 Ama ọdiọk etieti nte akpa ete ye eka nnyịn mîkokponoke Andibot mmọ! Ekpetie fi didie ke idem edieke ọkpọbọde ufen ọbọk nditọ ndien mmọ ẹdisọn̄ ibuot ye afo ẹnyụn̄ ẹnam se afo ọkọdọhọde mmọ ẹkûnam? Ndi utọ n̄kpọ oro ikpabiakke fi?

Adam okoto ntan, enye okonyụn̄ afiak ke ntan

13. Jehovah ndidọhọ ke Adam ‘ayafiak ke ntan’ ọkọwọrọ nso?

13 Ke ini Adam ye Eve ẹkesọn̄de ibuot ye Abasi, mmọ ikekemeke aba ndidu uwem ke nsinsi. Jehovah ama ọdọhọ Adam ete: “Koro afo edide ntan, oyonyụn̄ afiak ke ntan.” (Kot Genesis 3:19.) Emi ọkọwọrọ ke Adam ayafiak akabade ntan, enye ididụhe aba. (Genesis 2:7) Ke Adam ama akanam idiọkn̄kpọ, enye ama akpa, ikonyụn̄ idụhe uwem aba.

14. Ntak emi nnyịn isikpade?

14 Ekpedi Adam ye Eve ẹma ẹkop uyo Abasi, mmọ ẹkpesụk ẹdodu uwem tutu mfịn emi. Ke ini mmọ ẹkesọn̄de ibuot ye enye, mmọ ẹma ẹnam idiọkn̄kpọ ẹnyụn̄ ẹkpa ke akpatre. Idiọkn̄kpọ  etie nte ata idiọk udọn̄ọ emi owo adade-da amana. Sia idide nditọ Adam ye Eve, kpukpru nnyịn ima ida idiọkn̄kpọ mmọ imana, ndien ntak edi oro nnyịn isikpade. (Rome 5:12) Edi idịghe nte Abasi okoyomde n̄kpọ etie edi emi. Akananam Abasi iyomke owo akpa. Bible ọdọhọ ke n̄kpa edi “asua” nnyịn.—1 Corinth 15:26.

AKPANIKỌ ANAM NNYỊN IWỌRỌ UFỤN

15. Didie ke se Bible ekpepde an̄wam nnyịn?

15 Se Bible ekpepde nnyịn aban̄a n̄kpa iyakke ikere ediwak ntịme ntịme n̄kpọ emi mme owo ẹsikerede. Bible ekpep nnyịn nte ke mme akpan̄kpa ikopke ubiak inyụn̄ ifụhọke. Nnyịn ikemeke ndinyene nneme ye mmọ, mmọ inyụn̄ ikemeke ndinyene nneme ye nnyịn. Nnyịn ikemeke ndin̄wam mme akpan̄kpa, mmọ inyụn̄ ikemeke ndin̄wam nnyịn. Mmọ ikemeke ndinam nnyịn n̄kpọ, ntem ufọn idụhe ndifehe mmọ. Edi ediwak ufọkabasi ẹdọhọ ke enyene ebiet emi mme akpan̄kpa ẹsikade ẹkedu, ye nte ke imekeme ndinọ mme etubom m̀mê ikpọ owo ufọkabasi okụk man ẹnam mmọ ẹka heaven. Edi edieke idiọn̄ọde se Bible etịn̄de aban̄a mme akpan̄kpa, idụhe owo ndomokiet emi edibian̄ade nnyịn.

16. Nso ke ediwak ufọkabasi ẹsikpep ẹban̄a mme akpan̄kpa, emi edide nsu?

16 Satan anam nsunsu ufọkabasi ẹkpep mme owo se mîdịghe akpanikọ ẹnyụn̄ ẹnam mmọ ẹkere ke mme akpan̄kpa ke ẹdu uwem. Ke uwụtn̄kpọ, ediwak ufọkabasi ẹkpep nte ke ini owo akpade, ke enyene n̄kpọ emi esiwọrọde enye ke idem okodu ke ebiet en̄wen. Ndi ẹsikpep utọ n̄kpọ emi ke ufọkabasi mbufo, mîdịghe ndi ẹsikpep nnennen n̄kpọ emi Bible etịn̄de aban̄a mme akpan̄kpa? Satan esida nsu anam mme owo ẹkpọn̄ Jehovah.

17. Ntak emi mme owo ndidọhọ ke Abasi ọyọfọp ndiọi owo ke ikan̄ edide ata idiọk ikọ?

 17 Idem ekeme ndikpa fi ke ini okopde se ediwak ufọkabasi ẹkpepde. Ke uwụtn̄kpọ, ndusụk mmọ ẹkpep ke Abasi ọyọfọp ndiọi owo ke ikan̄. Ata idiọk ikọ ke mmọ ẹtịn̄ emi ẹdian Jehovah sia tutu amama enye idinọhọ mme owo utọ ufen oro! (Kot 1 John 4:8.) Afo akpada didie owo emi omụmde ekpri eyen esie ubọk ọfọp ke ikan̄? Akpada enye nte idiọkowo, n̄kọ ntre? Ukpunyụn̄ uyomke ndidian idem ye enye. Nte Satan oyomde fi ada Jehovah edi oro!

18. Ntak emi nnyịn mîkpefeheke mme akpan̄kpa?

18 Ndusụk ufọkabasi ẹdọhọ ke mme owo ẹma ẹkpa, ke mmọ ẹsikabade spirit. Utọ ufọkabasi oro ẹsikpep ke ana ikpono mme akpan̄kpa inyụn̄ ibak mmọ sia mmọ ẹkeme ndima nnyịn mîdịghe ẹsua nnyịn. Ediwak owo ẹnịm nsu emi. Ndịk esinam mmọ ẹkpono m̀mê ẹnam n̄kpọ man ẹnem mme akpan̄kpa esịt utu ke Jehovah. Edi n̄kọ emeti ke mme akpan̄kpa ifiọkke n̄kpọ ndomokiet, ntem inaha ndịk mmọ anam nnyịn. Jehovah edi Andibot nnyịn. Enye edi ata Abasi, ntem enye ikpọn̄ ke ana ikpono inyụn̄ inam n̄kpọ inem enye esịt.—Ediyarade 4:11.

19. Nso ufọn ke ndidiọn̄ọ se Bible etịn̄de aban̄a mme akpan̄kpa anam ọnọ nnyịn?

19 Ke ini idiọn̄ọde se Bible etịn̄de aban̄a mme akpan̄kpa, emi ayanam nnyịn iwọrọ ke ufụn nsu emi ndusụk ufọkabasi ẹsisude, oyonyụn̄ anam idiọn̄ọ mme utịbe n̄kpọ emi Jehovah ọn̄wọn̄ọde ndinam nnọ nnyịn ke ini iso.

20. Nso ke idikpep ke Ibuot 7?

20 Ediwak tọsịn isua ko ke edem, asan̄autom Abasi emi ekekerede Job ama obụp ete: “Edieke owo akpade nte enye ekeme ndifiak ndu uwem?” (Job 14:14) Ndi owo emi ama akakpa ekeme ndifiak ndu uwem? Se Abasi etịn̄de ke Bible aban̄a n̄kpọ emi enem etieti. Iyokụt emi ke Ibuot 7.

^ ikp. 5 Ndusụk owo ẹkere ke ukpọn̄ m̀mê spirit esika iso odu uwem ke owo ama akakpa. Edieke oyomde ndifiọk n̄kpọ efen mban̄a emi, se Se Ẹwetde Ẹdian 17 ye 18.

Kpep N̄kpọ En̄wen

Ke Ini Eyen Fo Obụpde Mbụme Aban̄a N̄kpa

Kot man ọfiọk usụn̄ inan̄ emi ọkpọbọrọde mbụme mmọ ye nte akpan̄wamde mmọ ẹdiọn̄ọ nte mmọ ẹkpenamde n̄kpọ ke ini owo mbufo akpade.