Be ka se isịnede

Be ka udiana n̄kpọ

Be ka se isịnede

Mme Ntiense Jehovah

Efịk

Nso ke Bible Ekpep Nnyịn?

 IBUOT EFỊTENAN̄

Ka Iso Kpere Jehovah

Ka Iso Kpere Jehovah

1, 2. Anie ekeme ndin̄wam nnyịn ibọhọ mfịna nnyịn mfịn?

YAK idọhọ ke afo asan̄a ke an̄wa ke usen emi oyobio ọwọrọde. Enyọn̄ ọtọn̄ọ ndifụhọ, emịnen̄mịnen̄ ọtọn̄ọ, obuma onyụn̄ ọtọn̄ọ nditop. Ke mîbịghike edịm ọtọn̄ọ ndidep. Ndien afo oyom itie emi ekpedịbede. Esịt eyenem fi edieke okụtde eti itie ada.

2 Nte n̄kpọ etiede ke ererimbot edi oro mfịn. N̄kpọ akaka iso ọdiọk ke ererimbot emi. Afo emekeme ndibụp ete, ‘Ndinam didie mbọhọ kpukpru emi?’ Owo kiet emi eketienede ewet Psalm ekewet ete: “Ami nyọdọhọ Jehovah nte: ‘Afo edi ebiet ubọhọ mi ye ọkpọsọn̄ ebiet mi, Abasi mi, emi ndibuọtde idem.’” (Psalm 91:2) Emi owụt ke Jehovah ekeme ndin̄wam nnyịn ibọhọ mfịna nnyịn idahaemi, enye onyụn̄ anam nnyịn idori enyịn ke n̄kpọ ọyọfọn ke ini iso.

3. Nso ke ikpanam man Jehovah edi ebiet ubọhọ nnyịn?

3 Didie ke Jehovah esikpeme nnyịn? Enye ekeme ndin̄wam nnyịn iyọ mfịna ekededi oro isobode, onyụn̄ enyene odudu akan owo ekededi oro okpoyomde ndinam nnyịn n̄kpọ. Idem ọkpọkọm n̄kpọ anam nnyịn idahaemi, imọdiọn̄ọ ke Jehovah eyemen mfịna oro efep ke ini iso. Bible ọdọhọ nnyịn ete: “Ẹnịm idem mbufo ke ima Abasi.” (Jude 21) Ana ika iso ikpere Jehovah man enye an̄wam nnyịn ke ini afanikọn̄. Edi idinam didie ika iso ikpere enye?

 KỌM ABASI NYỤN̄ MA ENYE

4, 5. Didie ke Jehovah owụt adan̄a nte imọ imade nnyịn?

4 Ana idiọn̄ọ adan̄a nte Jehovah amade nnyịn man ikeme ndika iso n̄kpere enye. Kere ban̄a kpukpru se Jehovah anamde ọnọ nnyịn. Enye ọnọ nnyịn ediye isọn̄ emi, ọnọ nnyịn nsio nsio ndiye eto ye unam, onyụn̄ ọnọ nnyịn ndinem udia ye eti mmọn̄. Jehovah ada Bible ekpep nnyịn enyịn̄ esie ye nti edu esie. Akakan n̄kpọ emi enye anamde, emi owụtde adan̄a nte enye amade nnyịn ekedi enye ndisio Jesus, edima Eyen esie, ndọn̄ edi isọn̄ man edikpa ọnọ nnyịn. (John 3:16) N̄kpa Jesus emi anam nnyịn inyene idotenyịn ke n̄kpọ ọyọfọn ke ini iso.

5 Jehovah ọtọn̄ọ Obio Ubọn̄ Messiah ke heaven, ndien ke mîbịghike ukara emi eyetre kpukpru ufen emi mme owo ẹbọde. Obio Ubọn̄ oro ayanam isọn̄ akabade edi Paradise, ndien kpukpru owo ẹyedụn̄ ke emem ẹnyụn̄ ẹkop inemesịt ke nsinsi. (Psalm 37:29) Usụn̄ en̄wen emi Jehovah owụtde adan̄a nte imọ imade nnyịn edi enye ndikpep nnyịn nte ikpodude ata eti uwem idahaemi. Enye onyụn̄ ọdọhọ nnyịn ibọn̄ akam inọ imọ sia enye eben̄e idem kpukpru ini ndikop akam nnyịn. Kpukpru emi owụt adan̄a nte Jehovah amade nnyịn owo kiet kiet.

6. Nso ke afo akpanam aban̄a ima oro Jehovah amade fi?

6 Nso ke afo akpanam aban̄a ima oro Jehovah amade fi? Kọm enye ke kpukpru se enye anamde ọnọ fi. Edi n̄kpọ mbọm ndikụt ke ediwak owo mfịn isikọmke Jehovah. Nte mme owo ẹketiede edi oro ke ini Jesus okodude ke isọn̄. Enyene usen kiet emi Jesus akanamde mbon akpamfia duop ẹsana, edi owo mmọ kiet kpọt akafiak edi edikọm Jesus. (Luke 17:12-17) Ana itie nte ete oro akafiakde edikọm Jesus do inyụn̄ isikọm Jehovah kpukpru ini.

7. Didie ke ikpama Jehovah?

 7 Ana itiene iwụt ke imama Jehovah n̄ko. Jesus ọkọdọhọ mme mbet esie ete ke mmọ ẹnyene ndima Jehovah ke ofụri esịt mmọ, ke ofụri ukpọn̄ mmọ, ye ke ofụri ekikere mmọ. (Kot Matthew 22:37.) Nso ke ikọ esie ọkọwọrọ?

8, 9. Didie ke ikeme ndiwụt Jehovah ke imama enye?

8 Ndi nditetịn̄ ke inua ke imama Jehovah ekem? Ihih, ikemke. Se nnyịn inamde ediwụt m̀mê imama Jehovah ke ofụri esịt ye ke ofụri ukpọn̄ ye ke ofụri ekikere nnyịn. (Matthew 7:16-20) Bible ọdọhọ ke edieke imade Abasi, ke iyenịm mme ewụhọ esie. Ndi emi ọsọn̄ akaha? Ihih, sia “mme ewụhọ esie idobike owo mbiomo.”—Kot 1 John 5:3.

9 Esịt esinem nnyịn ke ini ikopde uyo Jehovah, uwem esinyụn̄ enem nnyịn n̄ko. (Isaiah 48:17, 18) Edi nso idin̄wam nnyịn ika iso ikpere Jehovah? Yak ise.

KA ISO SAN̄A KPERE JEHOVAH

10. Ntak emi anade aka iso ekpep n̄kpọ aban̄a Jehovah?

10 Afo akasan̄a didie edi ufan Jehovah? Bible emi esikpepde akan̄wam fi etetịm ọdiọn̄ọ Jehovah onyụn̄ akabade edi ufan esie. Ndidi ufan Abasi etie nte ndibara ikan̄. Edieke anade ikan̄ oro aka iso asak, ana aka iso ọdọn̄ ifia; ukem ntre, ana aka iso ekpep n̄kpọ aban̄a Jehovah man edi ata ufan esie.—Mme N̄ke 2:1-5.

Ukem nte anade ọdọn̄ ifia man ikan̄ aka iso asak, ana aka iso ekpep Bible man ama Jehovah

11. Nso ke ndikpep Bible edinam inọ fi?

11 Nte osụk akade iso ekpep Bible, oyokụt mme n̄kpọ emi afo edinen̄erede ima. Se nte eketiede mbet Jesus iba ke idem ke ini Jesus akanamde se Bible etịn̄de enen̄ede an̄wan̄a mmọ. Mmọ ẹma ẹdọhọ ẹte: “Nte esịt ikofiopke nnyịn ke ini enye ekenemede nneme ye nnyịn ke usụn̄, nte enye akatatde N̄wed Abasi ọnọ nnyịn ọyọhọ ọyọhọ?”—Luke 24:32.

12, 13. (a) Nso ikeme nditịbe nnọ ima oro imade Abasi? (b) Nso idinam nnyịn ika iso ima Jehovah?

 12 Kpa nte esịt ekenemde mbet iba oro ke ini Ikọ Abasi akan̄wan̄ade mmọ, anaedi esịt ama enem fi n̄ko ke ini Bible ọkọtọn̄ọde ndin̄wan̄a fi. Emi ama anam fi ọfiọk onyụn̄ enen̄ede ama Jehovah. Inaha ayak ima oro ebịt.—Matthew 24:12.

13 Ke ama ekedi ufan Abasi, ana esịn idem anam n̄kpọ man mbufo ẹka iso ẹdi ufan. Ana aka iso ekpep n̄kpọ aban̄a Abasi ye Jesus onyụn̄ etie ekere se ekpepde ye nte ekemede ndida se ekpepde oro ndu uwem. (John 17:3) Ke ini okotde m̀mê ekpepde Bible, bụp idemfo ete: ‘Nso ke itie emi ekpep mi aban̄a Jehovah Abasi? Ntak emi anade mma enye ke ofụri esịt mi ye ofụri ukpọn̄ mi?’—1 Timothy 4:15.

14. Didie ke akam edin̄wam nnyịn ika iso ima Jehovah?

 14 Edieke afo enyenede eti ufan, esinyụn̄ amade ndineme nneme ye enye kpukpru ini, emi ayanam mbufo ẹnen̄ede ẹkpere kiet eken. Kpasụk ntre, ke ini ibọn̄de akam inọ Jehovah kpukpru ini, emi ayanam ika iso ima enye. (Kot 1 Thessalonica 5:17.) Jehovah ndinyịme nnyịn isibọn̄ akam inọ enye owụt ke enye enen̄ede ama nnyịn. Ana isitịn̄ se isịnede nnyịn ke esịt inọ enye. (Psalm 62:8) Inaha imomụm akam idọn̄ ke ibuot, edi ana ida ofụri esịt iben̄e se iyomde. Edieke ikade iso ikpep Bible inyụn̄ ibọn̄de akam ke ofụri esịt, emi ayan̄wam nnyịn ika iso ima Jehovah.

TỊN̄ BAN̄A JEHOVAH NỌ MBON EN̄WEN

15, 16. Afo ada utom ukwọrọikọ didie?

15 Edieke iyomde ndika iso n̄kpere Jehovah, ana itịn̄ se nnyịn ikpepde inọ mme owo. Edi ata n̄kpọ ukpono nditịn̄ nnọ mme owo mban̄a Jehovah. (Luke 1:74) Se Jesus ọkọdọhọde kpukpru mme Christian ẹnam edi oro. Ana kpukpru nnyịn ikwọrọ eti mbụk Obio Ubọn̄ Abasi. Ndi emesinam emi?—Matthew 24:14; 28:19, 20.

16 Apostle Paul akada utom ukwọrọikọ nte ata akpan utom; enye ọkọdọhọ ke ukwọrọikọ edi “n̄kpọuto.” (2 Corinth 4:7) Nditịn̄ nnọ mbon en̄wen mban̄a Jehovah ye se enye aduakde ndinam edi akakan utom emi afo ekemede ndinam. Emi edi usụn̄ kiet emi afo anamde n̄kpọ Jehovah, ndien enye enen̄ede ama se anamde ọnọ enye. (Mme Hebrew 6:10) Ukwọrọikọ ekeme ndin̄wam fi ye mbon emi ẹkpan̄de utọn̄ ẹnọ fi ẹnen̄ede ẹkpere Jehovah ẹnyụn̄ ẹnyene nsinsi uwem. (Kot 1 Corinth 15:58.) Idụhe utom en̄wen emi edinamde esịt enem fi nte utom ukwọrọikọ.

17. Ntak anade ẹsọsọp ẹkwọrọ ikọ?

 17 Ana ẹsọsọp ẹkwọrọ ikọ. Bible ọdọhọ ke ana nnyịn ‘ikwọrọ ikọ’ onyụn̄ ọdọhọ ke ana ‘inam emi usọp usọp.’ (2 Timothy 4:2) Ana mme owo ẹdiọn̄ọ ke Obio Ubọn̄ Abasi ke edi. Bible ọdọhọ ete: “Akwa usen Jehovah emekpere. Enye emekpere, oyonyụn̄ ọsọp etieti.” Ke akpanikọ, utịt ererimbot emi “idibehe ini.” (Zephaniah 1:14; Habakkuk 2:3) Ke mîbịghike, Jehovah oyosobo idiọk ererimbot Satan. Mbemiso enye osobode ererimbot emi, ana ẹnam mme owo ẹdiọn̄ọ man mmọ ẹmek ndinam n̄kpọ esie.

18. Ntak emi ikpadianade kiet ye mme ata Christian inam n̄kpọ Jehovah?

18 Jehovah oyom nnyịn idiana kiet ye mme ata Christian inam n̄kpọ imọ. Bible ọdọhọ ete: “Ẹyak nnyịn inyụn̄ ikere nte ikpedemerede kiet eken inọ ima ye nti utom, ikûsịn ndisop idem ọtọkiet, nte ido ndusụk owo edide, edi isịn udọn̄ inọ kiet eken, ndien mbufo ẹdọdiọn̄ ẹnam ntem adan̄a nte ẹkụtde ẹte usen oro ke asan̄a ekpere.” (Mme Hebrew 10:24, 25) Ana inam kpukpru se ikemede man isidụk kpukpru mbono esop. Imesinyene ifet ndisịn udọn̄ nnọ kiet eken nnyụn̄ nsọn̄ọ nditọete nnyịn idem ke mbono esop.

19. Nso idinam nnyịn ima kpukpru nditọete nnyịn?

19 Edieke odụkde mbono esop, oyokụt nti ufan emi ẹdin̄wamde fi anam n̄kpọ Jehovah. Oyokụt nsio nsio irenowo ye iban emi ẹnyụn̄ ẹyomde ndisịn idem nnam n̄kpọ Jehovah nte afo. Mmọ ifọnke ima kpa nte afo mûfọnke uma. Mmọ ẹsinam ndudue. Ke ini mmọ ẹnamde emi, fen nọ mmọ. (Kot Colossae 3:13.) Domo ndikụt nti n̄kpọ oro nditọete fo emi ẹnamde kpukpru ini, sia emi ayanam fi ama mmọ onyụn̄ enen̄ede ekpere Jehovah.

 ATA UWEM

20, 21. Nso idi “ata uwem”?

20 Jehovah oyom kpukpru mme ufan esie ẹnen̄ede ẹkop inem uwem. Bible ọdọhọ nnyịn ke n̄kpọ iditiehe nte osụk etiede emi ke ini iso.

Jehovah oyom fi odu “ata uwem.” Ndi oyodu?

21 Ke ini iso, nnyịn ididụhe uwem isua 70 m̀mê 80 kpọt, edi ididu ke nsinsi nsinsi. Uwem eyenem etieti. Nnyịn ididọn̄ọke aba, iyenen̄ede ikop inemesịt inyụn̄ idu ke emem ke ediye Paradise. Utọ uwem emi ke Bible okot “ata uwem.” Jehovah ọn̄wọn̄ọ ndinam nnyịn idu ata uwem emi. Edi ana inam kpukpru se ikemede idahaemi man ‘isọn̄ọ imụm’ ata uwem ikama.—1 Timothy 6:12, 19.

22. (a) Nso ke ikeme ndinam man ‘isọn̄ọ imụm ata uwem ikama’? (b) Ntak emi idọhọde ke ata uwem edi enọ Abasi?

22 Nso ke ikeme ndinam man ‘isọn̄ọ imụm ata uwem ikama’? Ana inen̄ede ‘ifọn ido inyụn̄ iyọhọ ye nti utom.’ (1 Timothy 6:18) Emi ọwọrọ ke ana inam se ikpepde ke Bible. Edi idịghe eti n̄kpọ emi nnyịn inamde kpọt edinam nnyịn idot ndinyene nsinsi uwem. Tutu amama nnyịn ikpekemeke ndinam eti n̄kpọ emi ekemde ye uwem emi Abasi edinọde nnyịn. Ata uwem edi enọ emi Jehovah ọnọde mme anam-akpanikọ asan̄autom esie ke ntak “mfọnido Abasi oro owo mîdotke.” (Rome 5:15) Enen̄ede ọdọn̄ Ete nnyịn eke heaven ndinọ mme anam-akpanikọ ikọt esie enọ emi.

23. Ntak emi anade emek ndinam se inende idahaemi?

23 Bụp idemfo ete: ‘Ndi mmanam n̄kpọ Abasi nte Abasi oyomde?’ Edieke okụtde ke ana anam ndusụk ukpụhọde, mbọk sọsọp nam oro. Ke ini iberide edem ke Jehovah inyụn̄ inamde kpukpru se ikemede man ikop uyo inọ enye, enye eyedi ebiet ubọhọ nnyịn. Enye eyekpeme  mme anam-akpanikọ ikọt esie ke mme akpatre usen emi ẹsụhọde ẹnọ ererimbot Satan mi. Ekem Jehovah ayanam nnyịn idu ke Paradise ke nsinsi kpa nte enye ọkọn̄wọn̄ọde. Afo emekeme ndidu ata uwem edieke emekde ndinam se inende idahaemi!

Kpep N̄kpọ En̄wen

MME N̄WED YE NDIYE N̄KPRI N̄WED

San̄a Kpere Jehovah