Nte oyomde okụbọde

Mek usem

Be ka udiana n̄kpọ

Be ka se isịnede

Be ka se isịnede

Mme Ntiense Jehovah

Efịk

Nso ke Bible Ekpep Nnyịn?

 IBUOT KIET

Anie Edi Abasi?

Anie Edi Abasi?

1, 2. Nso ke mme owo ẹsiwak ndibụp?

NDITỌWỌN̄ ẹsibụp ediwak mbụme. Ke ini ọbọrọde kiet, mmọ ẹsiwak ndifiak mbụp, ‘Ntak-a?’ Ke ini osụk an̄wanade nditịn̄ nnọ mmọ, mmọ ẹkeme ndifiak mbụp m̀mê nso inam edi ntre?

2 Kpukpru nnyịn imesibụp mbụme, edide idi nditọwọn̄ m̀mê ikpọ owo. Nnyịn imesibụp owo usụn̄ m̀mê ini n̄kanika. Imesibụp iban̄a uwem nnyịn, inyụn̄ ibụp m̀mê n̄kpọ editie didie ke ini iso. Ndien ke ini owo mînọhọ nnyịn nnennen ibọrọ, imesision̄o idem ikpọn̄.

3. Ntak emi ediwak owo ẹkerede ke ibọrọ akpan mbụme emi mmimọ isibụpde idụhe?

3 Ndi Bible ekeme ndibọrọ mme akpan mbụme emi nnyịn isibụpde? Ndusụk owo ẹkere ke Bible ekeme ndibọrọ, edi mmọ ẹkere n̄ko ke Bible ọsọn̄ akaha, ke isinyụn̄ isọpke in̄wan̄a owo. Mmọ ẹsinyụn̄ ẹkere ke mme andikpep ke ufọkn̄wed, mme pastọ, m̀mê mme oku ufọkabasi kpọt ẹkeme ndibọrọ mme mbụme oro. Bụt isiyakke ndusụk owo ẹnyịme ke mmimọ idiọn̄ọke ibọrọ utọ mbụme emi. Edi afo ekere didie?

4, 5. Mme akpan mbụme ewe ke afo akpama ndibụp? Ntak emi akpakade iso oyom ibọrọ mbụmefo?

4 Ekeme ndidi ọdọn̄ fi ndidiọn̄ọ ibọrọ utọ mbụme nte: Ntak emi Abasi okobotde mi-e? Mma n̄kpa, ndika m̀mọ̀n̄? Abasi esinam n̄kpọ didie? Jesus emi ọkọwọrọde etop nti n̄kpọ emi enye ekesikpepde ọkọdọhọ ete: “Ẹka  iso ẹben̄e, ndien ẹyenọ mbufo; ẹka iso ẹyom, ndien mbufo ẹyekụt; ẹka iso ẹkọn̄, ndien ẹyeberede ẹnọ mbufo.” (Matthew 7:7) Kûkpa mba ndiyom nnennen ibọrọ mbụme emi.

5 Edieke ‘akade iso oyom’ mme ibọrọ mbụme fo, oyokụt mmọ ke Bible. (Mme N̄ke 2:1-5) Ibọrọ mbụme emi isọn̄ke ndin̄wan̄a owo. Se afo edikpepde ayanam esịt enem fi idahaemi onyụn̄ anam okụt ke n̄kpọ ọyọfọn ke ini iso. Ẹyak ineme mbụme kiet oro esifịnade ediwak owo.

NDI ABASI AMA NNYỊN?

6. Ntak emi ndusụk owo ẹkerede ke Abasi idọn̄ke enyịn ke ufen emi mmimọ ibọde?

6 Ediwak owo ẹkere ke Abasi imaha nnyịn, ke edieke Abasi akpamade nnyịn, ke ererimbot ikposụk itiehe ntem. Ekọn̄, usua, ye nnanenyịn ọyọyọhọ kpukpru ebiet. Mme owo ke ẹdọn̄ọ, ke ẹbọ ufen, ke ẹnyụn̄ ẹkpan̄a. Emi esinam ndusụk owo ẹkere ẹte, ‘Edieke Abasi amade nnyịn, ntak emi enye mîtreke kpukpru ufen emi-e?’

7. (a) Didie ke ndusụk mme pastọ ye ikpọ owo ufọkabasi ẹsinam mme owo ẹkere ke Abasi ọsọsọn̄ esịt? (b)Nnyịn isan̄a didie idiọn̄ọ ke inenke ndidọhọ ke Abasi esinam ndiọi n̄kpọ ẹtịbe?

7 Ndusụk ini mme pastọ ye ikpọ owo ufọkabasi ẹsitịn̄ n̄kpọ emi anamde etie nte ke Abasi ọsọsọn̄ esịt. Ke ini idiọk n̄kpọ etịbede ọnọ owo, mmọ ẹsidọhọ ke se Abasi akaduakde edi oro, ke se enye okoyomde etịbe edi oro. Ikọ mmọ ẹsiwọrọ ke Abasi anam n̄kpọ oro etịbe. Edi Bible ọdọhọ ke akananam Abasi inamke idiọkn̄kpọ. James 1:13 anam idiọn̄ọ ke Abasi isidaha idiọkn̄kpọ idomo owo ndomokiet idomo. Enye ọdọhọ ete: “Ke ini idomo esịmde owo, yak enye okûdọhọ ete: ‘Abasi  odomo mi.’ Koro owo ikemeke ndida idiọkn̄kpọ ndomo Abasi, enye ke idemesie inyụn̄ idomoke owo ekededi.” Emi ọwọrọ ke kpa ye oro Abasi esiyakde ndiọi n̄kpọ ẹtịbe, ke idịghe enye esinam mmọ ẹtịbe. (Kot Job 34:10-12.) Yak inọ uwụtn̄kpọ kiet.

8, 9. Ntak emi mîfọnke idọhọ ke Abasi edi ntak mfịna nnyịn? Nọ uwụtn̄kpọ.

8 Yak idọhọ ke odu akparawa kiet emi odụn̄de ye ete ye eka esie. Ete esie ama enye etieti onyụn̄ esikpep enye nte enye okpodude eti uwem. Edi usen kiet enye ọsọn̄ ibuot ye ete esie onyụn̄ atan̄ n̄kpọ ọwọrọ ke ufọk. Enye aka akanam ndiọi n̄kpọ onyụn̄ odụk mfịna. Ndi afo ọkpọdọhọ ke ete esie anam enye odụk mfịna sia mîkomụmke enye ite okûkpọn̄ ufọk? Imọdiọn̄ọ ke ukpudọhọke! (Luke 15:11-13) Kpa nte ete oro mîkomụmke eyen esie ite okûkpọn̄ ufọk, Abasi n̄ko ikomụmke Adam ye Eve ubọk ite ẹkûsọn̄ ibuot ye imọ. Ntre ke ini idiọk n̄kpọ etịbede, ifọnke idọhọ ke Abasi anam etịbe.

9 Enyene ntak emi Abasi ayakde ndiọi n̄kpọ ẹtịbe tutu emi. Ama esịm Ibuot 11, oyokụt se Bible etịn̄de aban̄a emi. Kpa ye emi n̄kpọ etiede ntem, Abasi osụk amama nnyịn, inyụn̄ ifọnke idọhọ ke enye edi ntak mfịna ekededi emi inyenede. Enye akam edi n̄kukụre Owo emi ekemede ndin̄wam nnyịn ke ini inyenede mfịna.—Isaiah 33:2.

10. Nso inam inịm ke Abasi ọyọdiọn̄ kpukpru se ndiọi owo ẹbiatde?

10 Abasi edi edisana. (Isaiah 6:3) Kpukpru se enye anamde ọfọfọn, akananam enye inamke ndudue. Ntre imekeme ndibuọt idem ye enye. Edi mme owo itiehe nte Abasi. Mme owo ẹsinam ndiọi n̄kpọ ndusụk ini. Idem ata eti andikara isikemeke ndidiọn̄ kpukpru se ndiọi owo ẹkebiatde. Idụhe owo emi enyenede odudu  nte Abasi. Enye ekeme ndidiọn̄ kpukpru se ndiọi owo ẹbiatde, oyonyụn̄ anam emi. Enye ayanam kpukpru ndiọi n̄kpọ ẹtre ke nsinsi nsinsi.—Kot Psalm 37:9-11.

ESITIE ABASI DIDIE KE IDEM NDIKỤT NTE MME OWO ẸBỌDE UFEN?

11. Esitie Abasi didie ke idem ke ini n̄kpọ etịbede ọnọfi?

11 Afo ekere ke etie Abasi didie ke idem ndikụt se iwọrọde fi ye se ikade iso ke ererimbot? Bible ọdọhọ ke Abasi ‘ama unenikpe.’ (Psalm 37:28) Enye ama se inende onyụn̄ asua se idiọkde. Isinemke enye ndikụt nte mme owo ẹbọde ufen. Ke ini idiọkn̄kpọ ọkọyọhọde ererimbot ke eset, Bible ọdọhọ ke ‘esịt ama ayat Abasi.’ (Genesis 6:5, 6) Abasi ikpụhọkede. (Malachi 3:6) Bible ọdọhọ ke Abasi enen̄ede ekere aban̄a fi.—Kot 1 Peter 5:7.

Bible ọdọhọ ke Jehovah okobot enyọn̄ ye isọn̄

12, 13. (a) Nso isinam nnyịn ima inyụn̄ in̄wam mbon en̄wen, ndien esitie fi didie ke idem ndikụt nte mme owo ẹbọde ufen? (b)Nso inam inịm ke Abasi ayanam kpukpru ufen, ufịk, ye utụk ẹtre?

12 Bible ọdọhọ n̄ko ke Abasi okobot nnyịn ke mbiet esie. (Genesis 1:26) Emi ọwọrọ ke Abasi okobot nnyịn ye ukem nti edu emi enye enyenede. Edieke esibiakde fi ndikụt nti owo ẹbọde ufen, ọwọrọ esibiak Abasi akan oro! Isan̄a didie idiọn̄ọ emi?

13 Bible ọdọhọ ke “Abasi edi ima.” (1 John 4:8) Ima esinam Abasi anam se ededi emi enye anamde. Nnyịn ima mme owo sia Abasi ke idemesie ama nnyịn. Kere ise: Edieke afo ekpenyenede odudu, ndi ukpunamke kpukpru ufen, ufịk, ye utụk ererimbot emi ẹtre? Imọdiọn̄ọ ke akpanam sia amama mme owo. Abasi ndien-e? Enye enyene odudu onyụn̄ ama nnyịn, ntre enye ayanam kpukpru ufen, ufịk, ye utụk ẹtre. Emi ọwọrọ ke kpukpru se Abasi ọn̄wọn̄ọde ke ntọn̄ọ ntọn̄ọ n̄wed emi  ẹyesu! Edi ana enen̄ede ọdiọn̄ọ Abasi man ekeme ndinịm se enye ọn̄wọn̄ọde oro.

ABASI OYOM FI ỌDIỌN̄Ọ IMỌ

Edieke afo oyomde owo edi ufan fo, ayasiak enyịn̄ fo ọnọ enye. Abasi asiak enyịn̄ esie ọnọ nnyịn ke Bible

14. Abasi ekere didie, ndien inam didie idiọn̄ọ ke enye oyom nnyịn ikot enyịn̄ imọ?

14 Edieke oyomde owo edi ufan fo, nso idi akpa n̄kpọ emi edisiakde inọ enye? Edisiak enyịn̄ fo. Ndi Abasi enyene enyịn̄? Ediwak ufọkabasi ẹdọhọ ke Abasi ekere Abasi m̀mê Ọbọn̄, edi idịghe ata enyịn̄ esie edi oro. Abasi m̀mê Ọbọn̄ etie nte ndikot owo “edidem” m̀mê “adaibuot ukara.” Imọdiọn̄ọ ke “edidem” m̀mê “adaibuot ukara” idịghe ata enyịn̄. Abasi ọdọhọ nnyịn ke imọ ikere Jehovah. Psalm 83:18 ọdọhọ ete: “Man mme owo ẹkpefiọk ẹte ke afo, emi enyịn̄ fo edide Jehovah, afo ikpọn̄ edi Ata Edikon̄ ke ofụri isọn̄.” Mbon emi ẹkewetde Bible ẹma ẹwet enyịn̄ Abasi ke n̄kpọ nte itie7,000 ke Bible. Jehovah oyom fi ọdiọn̄ọ enyịn̄ imọ onyụn̄ okot enyịn̄ oro. Enye asiak enyịn̄ esie ọnọ fi sia enye oyom fi edi ufan esie.

15. Enyịn̄ oro Jehovah ọwọrọ nso?

15 Enyịn̄ oro Jehovah,enyene se ọwọrọde. Enye ọwọrọ ke Abasi ekeme ndinam se ededi emi enye ọn̄wọn̄ọde, ke enye  onyụn̄ ekeme ndinam se ededi emi enye aduakde ndinam. Owo m̀mê n̄kpọ ndomokiet ikemeke ndikpan enye ndinam se enye aduakde ndinam. Jehovah ikpọn̄ ekeme ndikere utọ enyịn̄ emi. *

16, 17. Nso ke ndikot Abasi (a) “Ata Ọkpọsọn̄,” (b)“nsinsi Edidem,” ye (c)“Andibot” ọwọrọ?

16 Ima ikokụt ke Psalm 83:18 ke Jehovah “ikpọn̄ edi  Ata Edikon̄.” N̄ko, Ediyarade 15:3 ọdọhọ ete: “Jehovah Abasi, kpa Ata Ọkpọsọn̄, mme utom fo ẹkponi ẹnyụn̄ ẹdi utịbe. Mme usụn̄ fo ẹnen ẹnyụn̄ ẹdi akpanikọ, nsinsi Edidem.” Nso ke owo ndikot Abasi “Ata Ọkpọsọn̄” ọwọrọ? Ọwọrọ ke idụhe owo ndomokiet ke enyọn̄ ye ke isọn̄ emi enyenede odudu nte Jehovah. Ndikot Abasi “nsinsi Edidem” ọwọrọ ke enye inyeneke ntọn̄ọ, idinyụn̄ inyeneke utịt. Psalm 90:2 ọdọhọ ke enye edi Abasike nsinsi nsinsi. Abasi enye emi inyeneke mbiet!

17 Jehovah ikpọn̄ edi Andibot. Ediyarade 4:11 ọdọhọ ete: “Jehovah, Abasi nnyịn, afo omodot ndibọ ubọn̄ ye ukpono ye odudu, koro afo okobotde kpukpru n̄kpọ, ndien ke ntak uduak fo ke mmọ ẹkedu, oro okonyụn̄ anam ẹbot mmọ.” Jehovah okobot kpukpru n̄kpọ, ọtọn̄ọde  ke mme angel emi ẹdude ke heaven, mme ntantaọfiọn̄ emi ẹdude ke ikpaenyọn̄, mfri emi odude ke eto, tutu esịm iyak ke mmọn̄!

NDI EMEKEME NDIDI UFAN JEHOVAH?

18. Nso inam ndusụk owo ẹkere ke mmimọ ikemeke-keme ndidi ufan Abasi? Nso ke Bible etịn̄ aban̄a emi?

18 Ke ini ndusụk owo ẹkotde n̄kpọ ẹban̄a Jehovah ke Bible, ndịk esinam mmọ, mmọ ẹsinyụn̄ ẹkere ẹte, ‘Didie ke Abasi emi odude ke heaven onyụn̄ enyenede odudu ntem ekeme ndima utọ owo nte ami?’ Edi ndi nte Abasi oyomde nnyịn ida imọ edi oro? Ihih-o. Jehovah oyom nnyịn ikpere imọ. Bible ọdọhọ ke Abasi “[iyomke] usụn̄ ikpọn̄ nnyịn owo kiet kiet.” (Utom 17:27) Abasi oyom fi asan̄a ekpere imọ. Enye ọdọhọ ke imọ ‘iyasan̄a ikperefi.’—James 4:8.

19. (a) Nso ke akpanam man edi ufan Abasi? (b)Ewe edu Jehovah ke afo ama akan?

19 Nso ke akpanam man edi ufan Abasi? Jesus ọkọdọhọ ete: “Nsinsi uwem ọwọrọ mmọ ndikọ ifiọk emi aban̄ade fi, ata Abasi kierakiet, ye enye emi afo okosiode ọdọn̄, kpa Jesus Christ.” (John 17:3) Ka iso kpep n̄kpọ ban̄a Jehovah ye Jesus sia emi ayanam ọdiọn̄ọ mmọ. Ke uwụtn̄kpọ, imekpekpep ke “Abasi edi ima.” (1John 4:16) Edi enye enyene ediwak nti edu en̄wen. Bible ọdọhọ ke Jehovah edi “Abasi mbọm ye mfọn, isọpke iyatesịt edi awak ima-mfọnido ye akpanikọ.” (Exodus 34:6) Jehovah ‘ọfọn onyụn̄ enyịme ndifen nnọ’ owo. (Psalm 86:5) Abasi enyene ime, enye isinyụn̄ ikpọn̄ke ikọt esie. (2Peter 3:9; Ediyarade 15:4) Nte osụk okotde Bible, oyokụt nti edu en̄wen emi Abasi enyenede.

20, 21. Afo edinam didie ikpere Abasi emi mûkwe ke enyịn?

20 Edi afo edinam didie ikpere Abasi emi mûkwe ke  enyịn? (John 1:18; 4:24; 1Timothy 1:17) Ama okot n̄kpọ aban̄a Jehovah ke Bible, eyenen̄ede ọdiọn̄ọ enye onyụn̄ okụt ke enye odu. (Psalm 27:4; Rome 1:20) Nte ekpepde n̄kpọ aban̄a Jehovah, ntre ke editetịm ama enye onyụn̄ asan̄a ekpere enye.

Ete esima eyen esie, edi Ete nnyịn eke heaven ama nnyịn akanoro

21 Afo eyedi edidiọn̄ọ ke Jehovah edi Ete nnyịn. (Matthew 6:9) Enye ọkọnọ nnyịn uwem, enye onyụn̄ oyom nnyịn ikop inem uwem. Eti ete esiyom n̄kpọ ọfọn ye nditọ esie. (Psalm 36:9) Bible ọdọhọ ke afo emekeme ndidi ufan Jehovah. (James 2:23) Idịghe ekpri n̄kpọ edi oro. Jehovah emi okobotde enyọn̄ ye isọn̄ oyom fi edi ufan imọ!

22. Nso ke akpanam edieke mbon en̄wen ẹdọhọde fi ẹtre ndikpep Bible?

22 Ndusụk owo idiyomke fi aka iso ekpep Bible. Mmọ ẹkeme ndikere ke ama ekpekpep Bible udukaha aba ufọkabasi mbufo. Edi kûyak owo ndomokiet anam fi etre ndidi ufan Jehovah. Udunyeneke ufan ndomokiet ke ererimbot emi, oro editiede nte Jehovah.

23,24. (a)Ntak anade aka iso obụp mbụme? (b)Nso ke idineme ke ibuot iba??

23 Nte osụk ekpepde Bible, oyokụt ndusụk n̄kpọ emi mîdin̄wan̄akefi. Kûyak bụt anam fi etre ndibụp mbụme man ẹnam n̄kpọ oro an̄wan̄afi. Jesus ọkọdọhọ yak isụhọde idem nte nditọwọn̄. (Matthew 18:2-4) Nditọwọn̄ ẹsibụp mbụme etieti. Abasi oyom fi okụt ibọrọ mbụme fo. Ntre da ini kpep Bible man ọdiọn̄ọ m̀mê se ẹkpepde fi edi akpanikọ.—Kot Utom 17:11.

24 Mfọnn̄kan n̄kpọ emi afo ekemede ndinam man ọdiọn̄ọ n̄kpọ aban̄a Jehovah edi ndisikpep Bible. Ke ibuot iba, iyokụt se inamde Bible okpụhọde ye mme n̄wed eken.

^ ikp. 15 Edieke oyomde ndidiọn̄ọ ntak emi Jehovah mîdụhe ke ndusụk Bible, mîdịghe afo oyom ndidiọn̄ọ se enyịn̄ oro ọwọrọde m̀mê nte ẹkpekotde enyịn̄ oro, mbọk se Se Ẹwetde Ẹdian1.

Kpep N̄kpọ En̄wen

Abasi Ekere Didie?

Bible ọdọhọ ke Abasi edi Ata Ọkpọsọn̄ m̀mê Abasi Ibom, Andibot, ye Ọbọn̄. Edi ata enyịn̄ esie odu ke Bible ebe utịm ike-7,000.