Abasi oyom fi edi ufan imọ. Nte akanam afo emekere ke emekeme ndidi ufan ye n̄kponn̄kan owo ke ekondo? Ẹkekot Abraham emi okodude uwem anyan ini ko, ufan Abasi. (James 2:23) Mbon efen oro ẹtịn̄de ẹban̄a ke Bible ẹma ẹnyene itie ufan n̄ko ye Abasi ndien ẹma ẹnen̄ede ẹdiọn̄ mmọ. Mfịn, mme owo ẹtode ofụri ikpehe isọn̄ ẹmekabade ẹdi mme ufan Abasi. Afo n̄ko emekeme ndidi ufan Abasi.

Ndidi ufan Abasi ọfọn akan ndidi ufan owo ekededi. Akananam Abasi ikpụhu mme anam-akpanikọ ufan esie. (Psalm 18:25) Ndidi ufan Abasi ọfọn akan ndinyene inyene. Ke ini imọ owo akpade, okụk esie esitiene mbon efen. Nte ededi, mbon oro ẹnyenede itie ufan ye Abasi ẹnyene n̄kpọuto oro baba owo kiet mîkemeke ndibọ mmọ.—Matthew 6:19.

Ndusụk owo ẹkeme ndidomo ndibiọn̄ọ fi ndikpep n̄kpọ mban̄a Abasi. Idem ndusụk ufan fo ye ubon fo ẹkeme ndinam emi. (Matthew 10:36, 37) Edieke mbon efen ẹsakde fi m̀mê ẹsịnde fi ndịk ke idem, bụp idemfo ete, ‘Anie ke ami nyom ndinem esịt—mme owo m̀mê Abasi?’ Kere ban̄a emi: Edieke owo ọkpọdọhọde fi etre ndidia udia, nte afo okpokop uyo esie? Ke akpanikọ ukpokopke! Afo omoyom udia man odu uwem. Edi Abasi ekeme ndinam fi odu uwem ke nsinsi! Ntre kûdede uyak owo ekededi ọbiọn̄ọ fi ndikpep nte afo ekemede ndidi ufan Abasi.—John 17:3.