Be ka se isịnede

Be ka udiana n̄kpọ

Be ka se isịnede

Mme Ntiense Jehovah

Efịk

Mmanie Ẹnam Uduak Jehovah Mfịn?

 UKPEPN̄KPỌ 25

Mme Ufọkmbono Obio Ubọn̄—Ntak Ẹsibọpde Mmọ ye Nte Ẹsibọpde Mmọ

Mme Ufọkmbono Obio Ubọn̄—Ntak Ẹsibọpde Mmọ ye Nte Ẹsibọpde Mmọ

Bolivia

Nigeria, mbemiso ye idahaemi

Tahiti

Kpa nte ikọ oro Ufọkmbono Obio Ubọn̄ owụtde, akpan ukpepn̄kpọ Bible oro ẹsinemede do aban̄a Obio Ubọn̄ Abasi, emi okonyụn̄ edi ibuotikọ utom ukwọrọikọ Jesus.—Luke 8:1.

Mmọ ẹdi mme akpan ebiet utuakibuot akpanikọ ke obio. Do ke ẹsinam ndutịm ẹwọrọ ẹka ẹkekwọrọ eti mbụk Obio Ubọn̄. (Matthew 24:14) Ndusụk Ufọkmbono Obio Ubọn̄ ẹkponi ẹkan ndusụk ẹnyụn̄ ẹkpụhọde ke nte ẹbọpde, edi kpukpru mmọ ẹdi ukeuke; esop kiet m̀mê awakde akan oro ẹsidu ke Ufọkmbono Obio Ubọn̄ kiet. Ke mme isua ndondo emi, imọbọp ediwak tọsịn mbufa Ufọkmbono Obio Ubọn̄ (ition kpukpru usen ke ẹbaharede ukem ukem) ke ntak n̄kọri oro odude ke mme esop. Nso inam ẹkeme ndinam emi?—Matthew 19:26.

Ẹda okụk emi ẹtịpde kaban̄a emi ẹbọp. Ẹsinọ okụk emi ẹsọk n̄kọk itieutom man ẹda ẹbọp Ufọkmbono Obio Ubọn̄ ẹnọ mme esop oro ẹyomde Ufọkmbono Obio Ubọn̄ m̀mê esop oro ẹyomde ndifiak ndiọn̄ eke mmọ.

Mme anamutom unyịmesịt oro owo mîkpehe okụk, emi ẹtode nsio nsio itie ẹsibọp. Ke ediwak idụt, ẹmetịm Mme Otu Ubọp Ufọkmbono Obio Ubọn̄. Otu mme asan̄autom ubọpn̄kpọ ye mbon unyịmesịt ẹsika nsio nsio esop ke idụt kiet, idem ke ata nsannsan ebiet, man ẹken̄wam Mme Ntiense do ẹbọp Ufọkmbono Obio Ubọn̄ mmọ. Ke mme idụt efen, ẹsimek Mme Ntiense oro ẹdotde ẹnyụn̄ ẹnọ mmọ ikpehe kiet kiet ẹte ẹse ẹban̄a nte ẹbọpde ẹnyụn̄ ẹdiọn̄de mme Ufọkmbono Obio Ubọn̄. Okposụkedi emi ediwak mbon oro ẹnyenede ifiọk ubọpn̄kpọ ke n̄kann̄kụk oro ẹsidide ẹdin̄wam, mbon oro ẹdidụkde mbono esop do ẹsiwak ẹkan. Spirit Jehovah ye ukeme ofụri ukpọn̄ oro ikọt esie ẹsịnde anam ẹkeme ndinam kpukpru emi.—Psalm 127:1; Colossae 3:23.

  • Ntak emi ikotde mme itie utuakibuot nnyịn Ufọkmbono Obio Ubọn̄?

  • Nso inam ikeme ndibọp mme Ufọkmbono Obio Ubọn̄ ke ofụri ererimbot?