Nte oyomde okụbọde

Mek usem

Be ka udiana n̄kpọ

Be ka se isịnede

Be ka se isịnede

Mme Ntiense Jehovah

Efịk

Mmanie Ẹnam Uduak Jehovah Mfịn?

 Ukpepn̄kpọ 15

Didie ke Mbiowo Ẹn̄wam Esop?

Didie ke Mbiowo Ẹn̄wam Esop?

Finland

Ukpepn̄kpọ

Utom Ubọkerọn̄

Ukwọrọikọ

Nnyịn inyeneke ọkwọrọ ederi oro ẹsikpede-kpe okụk ke ọfiọn̄ ke esop nnyịn. Utu ke oro, nte ẹkesinamde ke ini ẹketọn̄ọde esop Christian, ẹsimemek mme esenyịn oro ẹdotde ẹte “ẹkpeme esop Abasi.” (Utom 20:28) Mbiowo emi edi irenowo oro ẹma ẹkekọri ẹsịm ọyọhọ idaha ke n̄kan̄ eke spirit oro ẹdade usụn̄ ke esop ẹnyụn̄ ẹkpemede otuerọn̄, ‘inamke nte n̄kpọ eke ẹnyịkde-nyịk mmọ, edi ẹnam ke edinyịme esịt; inyụn̄ inamke ke ntak emi ẹmade idiọk udori, edi ẹnam koro emi enen̄erede ọdọn̄ mmọ ndinam.’ (1 Peter 5:1-3) Nso ye nso ke mmọ ẹsinam ke ufọn nnyịn?

Mmọ ẹsise nnyịn enyịn ẹnyụn̄ ẹkpeme nnyịn. Mbiowo ẹsida nnyịn usụn̄ ẹnyụn̄ ẹkpeme esop ke n̄kan̄ eke spirit. Sia mbiowo ẹfiọkde ke Abasi ayak akpan utom emi esịn mmimọ ke ubọk, mmọ isikarake-kara ikọt esie, edi utu ke oro, mmọ ẹsinam uwem enem mmọ, ẹnyụn̄ ẹnam mmọ ẹkop idatesịt. (2 Corinth 1:24) Ukem nte ekpemerọn̄ esitịn̄de enyịn ese aban̄a erọn̄ esie kiet kiet, mbiowo ẹsidomo ndifiọk mme owo kiet kiet emi ẹdude ke esop.—Mme N̄ke 27:23.

Mmọ ẹsikpep nnyịn nte ikpanamde uduak Abasi. Kpukpru urua, mbiowo ẹsida usụn̄ ke mme mbono esop man ẹsọn̄ọ mbuọtidem nnyịn. (Utom 15:32) N̄ko, irenowo oro ẹsịnde idem ẹnam utom mi ẹsida usụn̄ ke utom ukwọrọikọ, ẹsisan̄a ye nnyịn, ẹnyụn̄ ẹkpep nnyịn nsio nsio ikpehe utom ukwọrọikọ.

Mmọ ẹsisịn udọn̄ ẹnọ nnyịn owo kiet kiet. Man isọn̄ọ itie ufan nnyịn ye Jehovah, mbiowo ẹkeme ndidi ndise nnyịn ke ufọk nnyịn mîdịghe ẹsobo ye nnyịn ke Ufọkmbono Obio Ubọn̄ man ẹda N̄wed Abasi ẹnọ nnyịn un̄wam ye ndọn̄esịt.—James 5:14, 15.

Ke adianade ye utom oro mbiowo ẹsinamde ke esop, ata ediwak mmọ ẹnyene utom idịbi udia ye mbiomo ubon oro ẹsiyomde ini ye ntịn̄enyịn mmọ. Ntre, odot nnyịn ikpono nditọete emi ẹsinamde utom ọkpọsọn̄ mi.—1 Thessalonica 5:12, 13.

  • Nso idi utom mbiowo esop?

  • Didie ke mbiowo ẹsiwụt ke imenyene ọkpọkpọ udọn̄ ke idem nnyịn?

Kpep N̄kpọ En̄wen

Ẹtịm Esop Mme Ntiense Jehovah Didie?

Se nte isibọde item ye ndausụn̄.