Be ka se isịnede

Be ka udiana n̄kpọ

Be ka se isịnede

Mme Ntiense Jehovah

Efịk

Mmanie Ẹnam Uduak Jehovah Mfịn?

 UKPEPN̄KPỌ 14

Ewe Ufọkn̄wed ke Mme Asiakusụn̄ Ẹsika?

Ewe Ufọkn̄wed ke Mme Asiakusụn̄ Ẹsika?

United States

Ufọkn̄wed Gilead, ke Patterson, ke New York

Panama

Enen̄ede ebịghi Mme Ntiense Jehovah ẹketọn̄ọ ufọkn̄wed emi ekpepde owo Ikọ Abasi. Mmọ ẹnyene ufọkn̄wed emi ẹsikpepde mbon oro ẹsikwọrọde etop Obio Ubọn̄ Abasi ẹnọ mme owo ofụri ini. Ufọkn̄wed emi anam mmọ ẹkeme ‘ndinam utom mmọ ọyọhọ ọyọhọ.’—1 Timothy 4:5.

Ufọkn̄wed Mme Asiakusụn̄. Ke asiakusụn̄ ofụri ini ama akasiak usụn̄ isua kiet, ẹsinọ enye aka ufọkn̄wed mme asiakusụn̄. Ẹsinịm ufọkn̄wed emi ke Ufọkmbono Obio Ubọn̄ emi ekperede ediwak owo, ndien esidi usen itiokiet. Ẹsiak ufọkn̄wed emi man an̄wam mme asiakusụn̄ ẹnen̄ede ẹkpere Jehovah, ẹtịm ẹdiọn̄ọ ndikwọrọ ikọ ke nsio nsio usụn̄, ndikpep owo n̄kpọ, nnyụn̄ n̄ka iso nnam n̄kpọ Abasi.

Ufọkn̄wed Mme Ọkwọrọ Obio Ubọn̄. Ẹsinịm ufọkn̄wed emi ọfiọn̄ iba. Mme asiakusụn̄ oro ẹnen̄erede ẹdiọn̄ọ utom, emi ẹnyịmede ndikpọn̄ edem mmọ n̄kọkwọrọ ikọ ke ebiet ekededi oro ẹyomde mme ọkwọrọikọ ẹsika ufọkn̄wed emi. Se mme asiakusụn̄ emi ẹnamde onyụn̄ etie nte se Jesus Christ emi ekedide akakan Ọkwọrọ Ikọ ke isọn̄ akanamde. Mmọ ẹdọhọ n̄ko ẹte: “Se mi mi! Dọn̄ mi utom.” (Isaiah 6:8; John 7:29) Ndiwọrọ n̄ka ebiet en̄wen isiyakke ndusụk mmọ ẹdu uwem aba nte ẹkedude ke obio mmọ. Udia, nte eyo etiede, ye nte mme owo ẹdude uwem ẹkeme ndinen̄ede n̄kpụhọde ye eke edem mmọ. Ndusụk mmọ ẹsikam ẹkpep obufa usem man ẹkeme ndikwọrọ ikọ. Mme asiakusụn̄ oro mîdọhọ ndọ ye mbon oro ẹdọde ndọ—irenowo ye iban—emi ẹdide isua 23 esịm 65 ẹsika ufọkn̄wed emi. Ufọkn̄wed emi esikpep mmọ ndidu uwem nte Ikọ Abasi etemede. Emi esin̄wam mmọ ke ebiet oro ẹnọde mmọ ẹka, onyụn̄ anam mmọ ẹnen̄ede ẹnyene ufọn ẹnọ Jehovah ye esop esie.

Ufọkn̄wed Gilead. Gilead ọwọrọ “Otu Ntiense” ke usem Hebrew. Tọn̄ọ ẹketọn̄ọ Ufọkn̄wed Gilead ke 1943, mbon oro ẹkụrede ufọkn̄wed emi ebe 8,000. Ẹnọ mmọ ẹkenam utom nte Mme Ntiense ke nsio nsio ebiet “tutu esịm utịt isọn̄.” Abasi ọdiọn̄ utom mmọ etieti. (Utom 13:47) Akpa ini emi ẹkenọde ndusụk mmọ ẹka Peru, esop Mme Ntiense Jehovah ikodụhe do. Edi idahaemi, esop Mme Ntiense ebe 1,000 do. N̄ko, akpa ini ẹkenọde isụn̄utom Gilead ẹka Japan, Mme Ntiense do ikọyọhọke duop. Edi idahaemi, Mme Ntiense ebe 200,000. Ẹsinịm Ufọkn̄wed Gilead ọfiọn̄ ition, ndien ẹsikpep Bible etieti. Mbon oro ẹsinọde ẹka ufọkn̄wed emi ẹdi mme akpan asiakusụn̄, m̀mê mme isụn̄utom emi mîkaha kan̄a ufọkn̄wed emi, mbon Bethel m̀mê mme esenyịn circuit. Ẹsinen̄ede ẹkpep mmọ n̄kpọ man mmọ ẹkpedi ẹdin̄wam ke utom Abasi oro inamde ke ofụri ererimbot.

  • Ntak emi ẹkesiakde Ufọkn̄wed Mme Usiakusụn̄?

  • Ẹsiak Ufọkn̄wed Mme Ọkwọrọ Obio Ubọn̄ Ẹnọ Mmanie?