Be ka se isịnede

Be ka udiana n̄kpọ

Be ka se isịnede

Mme Ntiense Jehovah

Efịk

Mmanie Ẹnam Uduak Jehovah Mfịn?

 UKPEPN̄KPỌ 3

Didie ke Ẹkefiak Ẹdidiọn̄ọ Akpanikọ Bible?

Didie ke Ẹkefiak Ẹdidiọn̄ọ Akpanikọ Bible?

Nditọ Ukpepn̄kpọ Bible, ke iduọk isua 1870

Akpa nsiondi Enyọn̄-Ukpeme ke 1879

Enyọn̄-Ukpeme idahaemi

Bible ama ebem iso etịn̄ ete ke Christ ama akpa, nsunsu mme andikpep ẹyedaha ẹda ke otu akpa mme Christian ẹnyụn̄ ẹyụrọde akpanikọ Bible. (Utom 20:29, 30) Nnennen se iketịbede edi oro nte ini akakade. Mmọ ẹma ẹda ukpepn̄kpọ mme okpono ndem ẹdibuak ye se Jesus ekekpepde, ndien emi ama anam nsunsu Ido Ukpono Christ edidu. (2 Timothy 4:3, 4) Nnyịn isan̄a didie ifiọk ke imenyene nnennen ifiọk mfịn iban̄a se Bible enen̄erede ekpep?

Ini ama ekem Jehovah ndinam ẹfiọk akpanikọ. Enye ama ebem iso etịn̄ ete ke ‘ata ifiọk oyokpon ke utịt ini.’ (Daniel 12:4) Ke 1870, ekpri otu mme owo oro ẹkeyomde akpanikọ ẹma ẹkụt ke ediwak ukpepn̄kpọ ufọkabasi ikemke ye N̄wed Abasi. Ntre, mmọ ẹma ẹtọn̄ọ ndinam ndụn̄ọde man ẹfiọk se Bible ekpepde, ndien Jehovah ama anam N̄wed Abasi an̄wan̄a mmọ.

Mbon emi ẹnyenede esịt akpanikọ ẹma ẹtịm ẹdụn̄ọde Bible. Ifịk ifịk Nditọ Ukpepn̄kpọ Bible oro ẹkebemde nnyịn iso ẹkesikpep Bible ke ukem usụn̄ oro nnyịn ikpepde mfịn. Mmọ ẹkesida ibuotikọ kiet kiet ẹdụn̄ọde Bible. Ke ini mmọ ẹkụtde ufan̄ikọ Bible oro mîn̄wan̄ake, mmọ ẹyeyom mme ufan̄ikọ efen oro ẹnamde ufan̄ikọ oro an̄wan̄a. Ke ini mmọ ẹdide ẹdifiọk se ufan̄ikọ oro ọwọrọde, ẹnyụn̄ ẹkụtde ke ekem ye mme itie N̄wed Abasi eken, mmọ ẹyewet enye ẹnịm. Mmọ ndikodụn̄ọde Bible ntre ama anam mmọ ẹfiak ẹdidiọn̄ọ akpanikọ oro aban̄ade enyịn̄ Abasi ye Obio Ubọn̄ esie, se Abasi aduakde ọnọ ubonowo ye isọn̄, idaha mme akpan̄kpa, ye idotenyịn ediset ke n̄kpa. Ndụn̄ọde oro mmọ ẹkenamde ama anam mmọ ẹbọhọ ediwak nsunsu ukpepn̄kpọ ye nsunsu edinam.—John 8:31, 32.

Ke 1879, Nditọ Ukpepn̄kpọ Bible ẹma ẹfiọk ke ini ekem ndinam ediwak owo ẹfiọk akpanikọ emi. Ntre, ke isua oro, mmọ ẹma ẹtọn̄ọ ndimịn̄ magazine Enyọn̄-Ukpeme Ọnọ Ntọt Obio Ubọn̄ Jehovah oro nnyịn isụk imịn̄de tutu esịm mfịn. Idahaemi, nnyịn ke ikwọrọ akpanikọ Bible inọ mme owo ke idụt 240 ye ke se ikande usem 750. Akananam idụhe ini emi ifiọk akpanikọ atarade ntem!

  • Ke Christ ama akakpa, nso iketịbe inọ akpanikọ Bible?

  • Nso in̄wam nnyịn ifiak idiọn̄ọ akpanikọ oro odude ke Ikọ Abasi?