Be ka se isịnede

Be ka se isịnede

Mme Ntiense Jehovah

Mek usem Efịk

Nsọn̄ibuot ke Obio Mme Spirit

Nsọn̄ibuot ke Obio Mme Spirit

Ke ini Satan akadade urụkikọt etịn̄ ikọ ọnọ Eve, n̄wan emi ama adiana ye enye ke ndisọn̄ ibuot ye Abasi

Kpukpru owo eke spirit oro Jehovah okobotde ẹma ẹfọn. Ekem angel kiet ama akabade ọdiọk. Enye edi Satan kpa Devil. Satan okoyom mme owo ke isọn̄ ẹtuak ibuot ẹnọ imọ utu ke ndituak nnọ Jehovah. Emi edi se ikotịbede:

Ke in̄wan̄ Eden oro, ediwak eto ẹma ẹdu ẹmi ẹken̄wụmde inem inem mfri. Jehovah ama asian Adam ye n̄wan esie, Eve, ete ke mmọ ẹnyene ifụre ndidia mfri eto ẹmi. Edi mfri eto kiet ama odu emi Abasi ọkọdọhọde ke mmọ ikpenyeneke ndidia. Enye ọkọdọhọ ete ke edieke mmọ ẹdiade mfri eto oro, mmọ ẹyekpa n̄kpa.​—Genesis 2:​9, 16, 17.

Usen kiet Eve okodu ikpọn̄ ke ini urụkikọt eketịn̄de ikọ ọnọ enye. Ke akpanikọ, idịghe urụkikọt ekenen̄erede etịn̄ ikọ oro; ekedi Satan kpa Devil akanam etie nte n̄kpọ eke edide urụkikọt oro eketịn̄ ikọ oro. Satan ọkọdọhọ Eve ete ke edieke enye adiade mfri eto oro ẹkekpande, enye eyefiọk n̄kpọ nte Abasi. Satan n̄ko ọkọdọhọ ete ke enye idikpaha. Utịn̄ikọ mbiba ẹmi ẹkedi nsu. Nte ededi, Eve ama onịm Satan ke akpanikọ onyụn̄ adia mfri eto oro. Ke ukperedem, enye ama ayak ndusụk ọnọ Adam, ndien enye ama adia n̄ko.​—Genesis 3:​1-6.

Ebede ke mbụk akpanikọ emi, nnyịn imọfiọk ite ke Satan edi owo nsọn̄ibuot ye osu nsu. Enye ọkọdọhọ Eve ete ke edieke enye otụtde utọn̄ ye Abasi, enye idikpaha n̄kpa. Oro ekedi nsu. Eve ama akpa n̄kpa, Adam n̄ko ama onyụn̄ akpa. Satan ikakpaha ini oro, okposụkedi enye edikpade ke akpatre sia edide enye ama anam idiọkn̄kpọ. Kan̄a kemi, nte ededi, enye ke ododu uwem ke onyụn̄ akaiso ndibian̄a ubonowo. Enye osụk edi osu nsu, ndien enye ke odomo ndinam mme owo ẹbiat ibet Abasi.​—John 8:44.

 Mme Angel Eken Ẹsọn̄ Ibuot

Nte ini akade, mme angel eken ẹma ẹkabade ẹdiọk. Mme angel ẹmi ẹma ẹda ẹkụt ndiye nditọiban ke isọn̄ ẹnyụn̄ ẹyom ndinyene ebuana idan̄ ye mmọ. Ntre mmọ ẹma ẹdi isọn̄ ẹnyụn̄ ẹdimen idem irenowo ẹsịne. Ndien mmọ ẹma ẹda iban ẹmi ẹnọ idemmọ. Emi ama atuaha ye uduak Abasi.​—Genesis 6:​1, 2; Jude 6.

Ndiọi angel ẹma ẹdi isọn̄ ndinam oburobụt ido ye iban

Emi n̄ko ama ada ekese mfịna ọsọk ubonowo. Iban mme angel ẹmi ẹma ẹman nditọ, edi mmọ ikedịghe ata nditọ. Mmọ ẹma ẹkọri ẹkabarede ẹdi ata afai afai ye ibak ibak ikpọ owo. Ke akpatre isọn̄ ama ọyọhọ ata etieti ye afai tutu eyedi se Jehovah ebierede ndida akwa ukwọ nsobo ndiọi owo. N̄kukụre mbon oro ẹkebọhọde Ukwọ oro ẹkedi edinen Noah ye ubon esie.​—Genesis 6:​4, 11; 7:23.

Nte ededi, ndiọi angel oro ẹma ẹfiak ẹnyọn̄ọ obio mme spirit; mmọ ikakpan̄ake. Edi ẹma ẹnọ mmọ ufen. Owo ikayakke mmọ ẹfiak ẹbe ẹdụk ubon Abasi eke ndinen angel. Akande oro, Jehovah iyakke mmọ ẹmen idem owo ẹsịne aba. Ndien ke akpatre mmọ ẹyekpan̄a ke akwa ubiereikpe oro.​—2 Peter 2:4; Jude 6.

 Ẹsio Satan ke Heaven Ẹduọk

Ẹma ẹsion̄o Satan ye ndiọi angel esie ke heaven ẹduọn̄ọ

Ke ntọn̄ọ ntọn̄ọ ikpehe isua ikie nnyịn, ekọn̄ ama odu ke heaven. N̄wed Bible eke Ediyarade etịn̄ se ikotịbede ete: “Ekem ekọn̄ otịbe ke heaven; Michael [Jesus Christ oro ẹkenamde eset ke n̄kpa] ye mme [nti] angel esie ẹn̄wana ekọn̄ ye dragon [Satan]; dragon ye mme [ndiọi] angel esie ẹnyụn̄ en̄wana ekọn̄, edi mmọ ikanke. Ufan̄ inyụn̄ idụhe aba inọ mmọ ke heaven. Ndien ẹsio akwa dragon ẹduọk ke isọn̄, kpa akani urụkikọt oro ẹkotde enye ẹte, andidori ikọt Abasi ikọ ye Satan, andibian̄a ofụri ererimbot; ẹsio enye ẹduọk ke isọn̄, ẹnyụn̄ ẹsion̄o mme [ndiọi] angel esie ẹduọn̄ọ ye enye.”

Nso ikedi utịp? Mbụk oro akaiso ete: “Ntre ẹdara, O mme heaven, ye mbufo ẹmi ẹdụn̄ọde ke esịt.” Nti angel oro ẹkeme ndidara koro Satan ye ndiọi angel, m̀mê mme spirit, idụhe ke heaven aba. Edi nso kaban̄a mme owo ke isọn̄? Bible ọdọhọ ete: “Mbọm isọn̄ ye inyan̄, koro andidori ikọt Abasi ikọ ama osụhọde etiene mbufo; enye asan̄a ye akwa ifụtesịt, sia enye ọdiọn̄ọde ete ini imọ edi ibio.”​—Ediyarade 12:​7-9, 12.

Ih, Satan ye ndiọi nsan̄a esie ẹmetụn mme owo usụn̄ ẹnyụn̄ ẹnam akwa nnama osịm mme owo ke isọn̄. Ẹkot ndiọi angel ẹmi mme demon. Mmọ ẹdi mme asua Abasi. Kpukpru mmọ ẹdi mbon mfiomo.