Be ka se isịnede

Be ka udiana n̄kpọ

Be ka se isịnede

Mme Ntiense Jehovah

Efịk

Spirit Mme Akpan̄kpa—Nte Mmọ Ẹkeme Ndin̄wam Fi m̀mê Ndinọ Fi Unan? Nte Mmọ Ẹnen̄ede Ẹdu?

Nam N̄kpọ Jehovah, Kûnam eke Satan

Nam N̄kpọ Jehovah, Kûnam eke Satan

Kpukpru nnyịn inyene ndinam edimek. Nnyịn mînamke n̄kpọ Jehovah inam n̄kpọ Satan ye mme demon esie. Nnyịn ikemeke ndinam mbiba. Owụt eti ibuot didie ntem ndinam n̄kpọ Jehovah!

Jehovah Ọfọn

Nte nnyịn ima ikokụt, mme demon ẹsima ndinọmọ nnyụn̄ mbian̄a mme owo. Jehovah itiehe ntre. Enye amama ubonowo nte emi ete amade nditọ esie. Enye edi Andinọ “kpukpru eti edinọ ye kpukpru enọ eke ẹfọnde ẹma.” (James 1:17) Enye itreke ndinọ ubonowo eti n̄kpọ ekededi, idem ọkpọkọm oro atak enye n̄kpọ akamba akamba.​—Ephesus 2:​4-7.

Jesus, Eyen Abasi, ama owụt mme owo ima ke ndikọk mmọ udọn̄ọ

Kere ban̄a mme n̄kpọ oro Jesus, Eyen Abasi akanamde ke isọn̄. Enye ama anam imụm ẹtịn̄ ikọ onyụn̄ anam nnan ẹkụt usụn̄. Enye ama anam mme ọdọn̄ọ akpamfia ẹsana onyụn̄ anam mme mbụn̄ọ ẹsan̄a isan̄. Enye ama ebịn mme demon ọduọk onyụn̄ ọkọk kpukpru orụk udọn̄ọ. Jesus, ebede ke odudu Abasi, ama akam anam mme akpan̄kpa ẹset.​—Matthew 9:​32-35; 15:​30, 31; Luke 7:​11-15.

Utu ke ndisu nsu man abian̄a nnyịn, kpukpru ini Abasi esitịn̄ akpanikọ. Akananam enye ibian̄ake owo ndomokiet.​—Numbers 23:19.

 Fep Idem ke Ndiọi Edinam

Kpasụk nte n̄kpan̄utue esisọn̄ọde omụm nsụn̄ akama, ntre ke idiọk ekikere ye nsu omụm ediwak miliọn owo akama. Mmọ ẹfefehe mme akpan̄kpa. Mmọ ẹfefehe mme demon. Mmọ ẹsifịna idem ẹban̄a isụn̄i, ndomo, n̄kpọ-n̄kpemeidem, ye ibọk un̄wam. Se ẹnịmde ke akpanikọ ye mme ido edinam ẹmi ẹkọn̄ọde ke nsu Satan kpa Devil ẹmụm mmọ ẹkama. Ndomokiet ke otu n̄kpọ ẹmi imụmke ikọt Abasi.

Jehovah enen̄ede enyene odudu akan Satan. Edieke afo anamde n̄kpọ Jehovah, enye eyekpeme fi osio ke ubọk mme demon. (James 4:7) Ibọk ndomokiet idinyeneke odudu ke idemfo. Ke uwụtn̄kpọ, ke Nigeria, mbia ifọt ita ẹmi ẹnyenede odudu ata etieti ẹma ẹbon ibọk ndiwot owo Ntiense Jehovah kiet emi ekesịnde ndiwọrọ n̄kpọn̄ obio mmọ. Ke ini ibọk oro mîkokomke owo emi, kiet ke otu mbia ifọt ẹmi ama okop ndịk etieti, adahade ebịne owo Ntiense oro, onyụn̄ ekekpe ubọk.

Mbon Ephesus ẹma ẹfọp mme n̄wed ubreidiọn̄ mmọ

Edieke mme demon ẹfịnade fi, afo emekeme ndikot Jehovah ke enyịn̄ ndien enye eyekpeme fi. (Mme N̄ke 18:10) Edi man afo enyene ukpeme Abasi, ana afo ọwọrọ ofụri ofụri ọkpọn̄ kpukpru ebuana oro ekenyenede ye ubụpekpo ye edituak ibuot nnọ demon. Mme andituak ibuot nnọ Abasi ke Ephesus eset ẹma ẹnam oro. Mmọ ẹma ẹtan̄ kpukpru n̄wed ubreidiọn̄ mmọ ẹdifọp. (Utom 19:​19, 20) Ana mme asan̄autom Abasi ẹnam ukem oro mfịn. Kọmọde ibọk nyan̄aidem, n̄kwa “n̄kpemeidem,” ibọk un̄wam, mme n̄wed ubreidiọn̄, ye n̄kpọ efen ekededi oro ẹnyenede ebuana ye mme ubụpekpo fep ke idemfo.

 Tiene Utuakibuot Akpanikọ

Edieke afo oyomde ndinem Abasi esịt, ndisana nsunsu utuakibuot nyak nnyụn̄ ntre ndinam ndiọi n̄kpọ ikam ikemke. Ana afo esịn ifịk etiene utuakibuot akpanikọ. Bible omowụt se ẹyomde:

Dụk mme mbonoesop Christian.​—Mme Hebrew 10:​24, 25

Kpep Bible.​—John 17:3

Kwọrọ ikọ nọ mbon en̄wen.​—Matthew 24:14

Bọn̄ akam nọ Jehovah.​—Philippi 4:​6, 7

Na baptism.​—Utom 2:41

 Buana Ye Mme Ntiense Jehovah

Satan ye mme demon ẹnyene mme owo ke isọn̄ ẹmi ẹkpepde ẹnyụn̄ ẹnamde-nam se ikwan̄ade. Edi Jehovah enyene mme owo n̄ko. Mmọ ẹdi Mme Ntiense Jehovah. (Isaiah 43:10) Ke ofụri isọn̄, Mme Ntiense ẹwakde ẹbe miliọn inan̄ ẹdu. Kpukpru mmọ ẹdomo ọkpọsọn̄ ọkpọsọn̄ ndinam se ifọnde nnyụn̄ n̄kpep mme owo akpanikọ. Ke ediwak idụt, afo emekeme ndisobo ye mmọ ke Ufọkmbono Obio Ubọn̄, emi mmọ ẹdidarade fi ufiop ufiop.

Utom mmọ edi ndin̄wam mbon en̄wen ẹnam n̄kpọ Abasi. Mmọ ẹyekpep Bible ye afo ke ufọk fo, ẹn̄wamde fi ndidiọn̄ọ nte akpatuakde ibuot ọnọ Jehovah ke eti usụn̄. Afo unyeneke ndikpe okụk kaban̄a emi. Mme Ntiense ẹmi ẹsikop inemesịt ndikpep mme owo akpanikọ sia mmọ ẹmade mme owo ẹnyụn̄ ẹmade Jehovah Abasi.

Mme Ntiense Jehovah ẹyen̄wam fi ndinam n̄kpọ Abasi