Nte oyomde okụbọde

Mek usem

Be ka udiana n̄kpọ

Be ka se isịnede

Be ka se isịnede

Mme Ntiense Jehovah

Efịk

Obio Ubọn̄ Abasi Akara!

 IBUOT 22

Obio Ubọn̄ Anam Uduak Abasi ke Isọn̄

Obio Ubọn̄ Anam Uduak Abasi ke Isọn̄

SE ẸNEMEDE KE IBUOT EMI

Obio Ubọn̄ anam kpukpru se Abasi akaduakde aban̄a owo ye isọn̄

1, 2. (a) Ntak emi ekemede ndisọn̄ ndusụk ini ndinịm ke Paradise eyedi? (b) Nso ikeme ndinam mbuọtidem nnyịn etetịm ọsọn̄?

ANAM-AKPANIKỌ eyenete kiet edi mbono esop, edi akpa mba ke ntak nsịn̄ede utom usen oro. Eteutom esie emi mîsikwe se owo anamde ama anam uwem ọsọn̄ ye enye, ke adianade ye editịmede esịt mban̄a nte idisede iban̄a ubon imọ ye n̄wan imọ oro idem mîsọn̄ke. Ke ini ẹtọn̄ọde ndibre ikwọ ediberede, enye en̄wek ọduọk onyụn̄ okop idatesịt ndidu ye nditọete esie ke Ufọkmbono Obio Ubọn̄. Ikwọ oro ẹkwọde aban̄a idotenyịn edidu uwem ke Paradise, ndien mme ikọ ikwọ oro ẹnam enye okụt nte idude ke Paradise. Enye esinen̄ede ama ikwọ emi, ndien nte enye ye ubon esie ẹtienede ẹkwọ ikwọ emi, idotenyịn emi ọdọn̄ enye esịt.

2 Ndi akanam etie fi ntre ke idem? Esitie ediwak nnyịn ntre ke idem. Edi akpanikọ, nte uwem etiede ke akani ererimbot emi anam ọsọn̄ nnyịn ndinen̄ede nnịm ke Paradise eyedi. Nnyịn idu uwem ke “ndiọkeyo emi ọsọn̄de ndiyọ,” ndien ererimbot emi idịghe Paradise. (2 Tim. 3:1) Nso idin̄wam nnyịn inịm ke se idoride enyịn eyetịbe? Nso inam inen̄ede ifiọk ke ibịghike Obio Ubọn̄ Abasi ọmọn̄ akara ofụri ubonowo? Ẹyak ineme ntịn̄nnịm ikọ Jehovah ifan̄ emi ikọt esie ẹkekụtde nte ẹsude ke eset. Ekem, iyeneme nte mme ntịn̄nnịm ikọ oro ye mbon oro ẹbietde mmọ ẹsude idahaemi. Ke akpatre, sia emi anamde mbuọtidem nnyịn etetịm ọsọn̄, iyeneme nte mme utọ ntịn̄nnịm ikọ oro ẹdisude ke ini iso.

Nte Jehovah Okosude Mme Un̄wọn̄ọ Esie ke Eset

3. Ewe un̄wọn̄ọ ọkọdọn̄ mme Jew emi ẹketan̄de ẹka Babylon esịt?

3 Kere nte n̄kpọ eketiede ye mme Jew oro ẹketan̄de ẹka Babylon ke n̄kpọ nte isua 2,600 emi ẹkebede. Ukem nte mme ete ye eka mmọ, ẹkebọk ediwak mmọ do, ndien uwem ama ọsọn̄ etieti. Mbon Babylon ẹma ẹsisak mmọ ke ntak emi mmọ ẹkebuọtde idem ye Jehovah. (Ps. 137:1-3) Ke ediwak isua, mme Jew oro ẹkenamde akpanikọ ẹma ẹka iso ẹdori enyịn ke eti un̄wọn̄ọ emi: Jehovah ama ọn̄wọn̄ọ ndinam ikọt esie ẹfiak ẹnyọn̄ isọn̄ emana mmọ. Jehovah ọkọdọhọ ke n̄kpọ  eyenen̄ede ọfọn do. Enye ama akam ọdọhọ ke isọn̄ Judah editie nte In̄wan̄ Eden—oro edi, Paradise! (Kot Isaiah 51:3.) Abasi akanam mme utọ un̄wọn̄ọ oro man ọsọn̄ọ ikọt esie idem onyụn̄ anam mmọ ẹkûnyene eyịghe ekededi ke esịt mmọ. Didie? Kere ban̄a mme akpan ntịn̄nnịm ikọ emi.

4. Didie ke Jehovah akanam mme Jew oro ẹdiọn̄ọ ke mmọ ẹyenyene ifụre ke isọn̄ emana mmọ?

4 Ifụre. Mbon oro ẹkekade ntan̄mfep do ikafiakke inyọn̄ ika Paradise, edi ẹkenyọn̄ ẹka obio oro akanade ndon ke isua 70, emi ata ediwak mmọ akanam mîkwe. Ekpe, wolf, anawụri ekpe, ye mme idiọk unam eken ẹma ẹsiwak ke mme obio emi ẹkedude ke eyo Bible. Ekeme ndidi mme ete ẹma ẹsikere ẹte, ‘Ndisan̄a didie n̄kpeme n̄wan ye nditọ mi? Nso kaban̄a erọn̄ ye enan̄ mi, ndinam didie n̄kpeme mmọ?’ Owo ekededi ekeme ndikere mme n̄kpọ emi. Kere ndien ban̄a un̄wọn̄ọ Abasi oro ẹwetde ke Isaiah 11:6-9 ye nte un̄wọn̄ọ emi ọkọdọn̄de owo esịt. (Kot.) Jehovah ama ada ndinem ikọ emi ọn̄wọn̄ọ ọnọ mbon oro ẹkekade ntan̄mfep do ke n̄kpọ idinamke mmọ ye ufene mmọ. Ekpe edita nyanyan̄a, iditaha enan̄ mme Jew oro. Utọ ndiọi unam oro idinamke mbon oro ẹnamde akpanikọ ndịk. Jehovah ama ọn̄wọn̄ọ ke n̄kpọ idinamke ikọt imọ oro ẹdifiakde inyọn̄ Judah, idem ke ini mmọ ẹdisan̄ade ibe ke wilderness ye ke akai.—Ezek. 34:25.

5. Mme ntịn̄nnịm ikọ ewe ẹkenam mbon oro ẹkekade ntan̄mfep do ẹnịm ke Jehovah ọyọnọ mmimọ n̄kpọ barasuene?

5 N̄kpọ oyodu barasuene. Owo ekeme ndikere mban̄a mme n̄kpọ en̄wen n̄ko. ‘Ndi nyekeme ndinọ ubon mi udia ke obio emana nnyịn? Ididụn̄ ke m̀mọ̀n̄? Ndi nyenyene utom do, ndien ndi utom oro ọyọfọn akan ufen oro n̄kọbọde ke obio owo?’ Jehovah ama ada mme ntịn̄nnịm ikọ emi enye ọkọnọde odudu spirit ẹda ẹtịn̄ ọbọrọ mme mbụme oro n̄ko. Jehovah ama ọn̄wọn̄ọ ete ke edịm eyesidep ọnọ ikọt imọ oro ẹnamde akpanikọ, ndien emi ayanam mmọ ẹnyene udia m̀mê “uyo nte mbun̄wụm isọn̄, emi edinyenede isek ye aran.” (Isa. 30:23) Jehovah ama ọn̄wọn̄ọ n̄ko ke ikọt imọ ẹyenyene itie udakibuot ye eti utom, ete: “Mmọ ẹyebọp ufọk ẹnyụn̄ ẹdụn̄ ke esịt; mmọ ẹyenyụn̄ ẹtọ in̄wan̄ vine ẹnyụn̄ ẹdia mbun̄wụm mmọ. Mmọ idibọpke ndien owo en̄wen odụn̄; mmọ iditọhọ ndien owo en̄wen adia.” (Isa. 65:21, 22) Ke akpanikọ, uwem eyenem mmọ akan ini oro mmọ ẹkedude ke ntan̄mfep ke Babylon emi ẹkesikponode ndem. Edi nso kaban̄a ata akpan mfịna emi akakam anamde ẹtan̄ mmọ ẹka ntan̄mfep?

6. Nso udọn̄ọ ke ikọt Abasi ẹkedọn̄ọ ke anyan ini, ndien nso ke Jehovah ọkọn̄wọn̄ọ ọnọ mbon oro ẹkenyọn̄de ntan̄mfep ẹdi?

6 Ndituak ibuot nnọ Abasi. Anyan ini mbemiso ẹketan̄de ikọt Abasi ẹka ntan̄mfep, mmọ ikenen̄ekede ituak ibuot aba inọ Abasi. Jehovah ama ọdọn̄ prọfet Isaiah utom ọnọ ikọt esie, ete: “Ofụri ibuot ọdọdọn̄ọ, ofụri esịt onyụn̄ akpa.” (Isa. 1:5) Mmọ ẹkedi nnan ye inan ke n̄kpọ Abasi, sia mmọ ikesimaha ndikop item Jehovah, ikonyụn̄ iyakke ikọ Jehovah an̄wan̄a mmọ. (Isa. 6:10; Jer. 5:21; Ezek. 12:2) Edieke mbon  ntan̄mfep oro ẹkefiakde ẹnyọn̄ ẹdi ẹkpekenamde n̄kpọ nte mmọ, Abasi akpakanam didie ekpeme mmọ? Ndi mmọ n̄ko ikpakatabake mfọn Jehovah? Un̄wọn̄ọ Jehovah emi ama enen̄ede ọdọn̄ mmọ esit: “Ke usen oro mme inan ẹyekop ikọ n̄wed oro, enyịn mme nnan oro ẹwọrọde ke n̄kụteyo ye ekịm ẹyekụt usụn̄.” (Isa. 29:18) Jehovah ayanam ikọt esie oro ẹkebọde ntụnọ ẹnyụn̄ ẹkabarede esịt ẹfiak ẹkop nsọn̄idem. Adan̄a nte mmọ ẹbọde ntụnọ ẹnyụn̄ ẹnamde item, enye ọyọnọ mmọ ndausụn̄ onyụn̄ ekpep mmọ usụn̄ uwem.

7. Didie ke se Abasi ọkọn̄wọn̄ọde ọnọ ikọt esie oro ẹkekade ntan̄mfep okosu, ndien didie ke mme un̄wọn̄ọ oro ndisu anam mbuọtidem nnyịn etetịm ọsọn̄?

7 Ndi Jehovah ama anam se enye ọkọn̄wọn̄ọde? Se iketịbede ọnọ ibọrọ mbụme oro. Mme Jew oro ẹkefiakde ẹnyọn̄ obio emana mmọ ẹma ẹdu ke ifụre, ẹnyene n̄kpọ barasuene, ẹnyụn̄ ẹtuak ibuot ẹnọ Abasi. Ke uwụtn̄kpọ, Jehovah ama ekpeme mmọ ikonyụn̄ iyakke mbọhọidụn̄ mmọ oro ẹkekopde odudu ẹnyụn̄ ẹwakde, ẹkan mmọ ubọk. Ndiọi unam ikosoboke ufene mme Jew. Edi akpanikọ ke mme Jew oro ikodụhe ke Paradise emi Isaiah, Jeremiah, ye Ezekiel ẹkewetde ẹban̄a, edi esịt ama enem ikọt Abasi ndikụt nte mme ntịn̄nnịm ikọ oro ẹkesude ke eyo mmọ. Iyetetịm ibuọt idem ye Jehovah ke ini ikerede iban̄a se enye akanamde ọnọ ikọt esie ke eset. Edieke mme owo ẹkekopde nduaidem ke akpa ini oro ntịn̄nnịm ikọ emi okosude ke ekpri udomo, editie mme owo didie ke idem ke ini enye edisude ke akamba udomo? Kere ban̄a se Jehovah anamde ọnọ nnyịn mfịn.

Nte Jehovah Ọtọn̄ọde Ndisu Mme Un̄wọn̄ọ Esie ke Eyo Nnyịn

8. Nso “idụt” ke ikọt Abasi ẹnyene mfịn?

8 Mfịn, inyeneke idụt ndomokiet emi ẹkotde ẹdian ikọt Jehovah, inyụn̄ inyeneke akpan obio oro kpukpru mmọ ẹdụn̄de. Utu ke oro, mme Christian oro ẹyetde aran ẹdi ndamban̄a idụt emi Bible okotde “Israel Abasi.” (Gal. 6:16) “Mme erọn̄ en̄wen” emi ẹdide nsan̄a mmọ ẹtiene mmọ ẹdu ke ndamban̄a idụt oro ẹnyụn̄ ẹdiana kiet ẹtuak ibuot ẹnọ Jehovah Abasi. Utuakibuot oro edi usụn̄ uwem mmọ. (John 10:16; Isa. 66:8) Nso utọ “idụt” ke Jehovah ọnọ mmọ? Enye edi ndamban̄a paradise. Mme n̄kpọ oro Abasi ọkọn̄wọn̄ọde ndinam ke Eden ẹsu ke ndamban̄a usụn̄ ke paradise emi. Kere ban̄a ndusụk mmọ.

9, 10. (a) Didie ke ntịn̄nnịm ikọ Isaiah 11:6-9 osu mfịn? (b) Nso iwụt ke ikọt Abasi ẹnyene emem?

9 Ifụre. Ke ntịn̄nnịm ikọ oro ke Isaiah 11:6-9, imokụt inem inem ikọ oro aban̄ade emem ye edidianakiet emi ẹkedọhọde ke oyodu ke otu mme unamikọt ye ke ufọt owo ye mme ufene esie. Ndi ntịn̄nnịm ikọ emi osu ke ndamban̄a usụn̄ mfịn? Ih, osu! Ke ufan̄ikọ 9, ẹsian nnyịn ntak oro mme unam emi mîdinamke ibak, mîdinyụn̄ ibiatke n̄kpọ, ẹte: “Koro ifiọk Jehovah ọyọyọhọ isọn̄ kpa nte mmọn̄ ofụkde inyan̄.” Ndi “ifiọk Jehovah” ekeme ndinam mme unam ẹkpụhọde?  Baba, mme owo ẹsikpụhọde ke ini mmọ ẹdide ẹdifiọk Ata Edikon̄ Abasi ẹnyụn̄ ẹdomode nditie emem emem nte enye. Oro anam ke ndamban̄a paradise nnyịn mfịn, imesikụt nte inem inem ntịn̄nnịm ikọ emi osude. Mme anditiene Christ, emi ẹdude ke idak ukara Obio Ubọn̄, ke ẹkpep ndikpọn̄ afai afai edu unam oro mmọ ẹkesinyenede, ẹdomo nditie ke emem nnyụn̄ ndiana kiet ye nditọete mmọ.

10 Ke uwụtn̄kpọ, imeneme iban̄a edida san̄asan̄a ke n̄wed emi. Imeneme mme itie N̄wed Abasi oro ẹwụtde ke akpana Christian ada san̄asan̄a. Imonyụn̄ ineme ukọbọ oro esịmde ikọt Abasi ke ntak emi ẹdade san̄asan̄a. Ke ererimbot afai emi, nte idịghe utịben̄kpọ ndikụt akwa “idụt” emi ẹsịnde nditiene mbuana ke afai ekededi, idem ke ini ẹdọhọde ke ẹmọn̄ ẹwot mmọ? Emi enen̄ede owụt ke mbon emi Messiah akarade ẹnyene orụk emem oro Isaiah eketịn̄de aban̄a. Jesus ọkọdọhọ ke ẹdida ima emi mbet imọ ẹmade kiet eken ifiọk mmọ. (John 13:34, 35) Ke esop Christian, Christ ke enyene ime ada “ofụn emi anamde akpanikọ onyụn̄ enyenede ọniọn̄” ekpep kpukpru ata mme Christian nditie ke emem, nnyene ima, nnyụn̄ nnyene ifụre ifụre ido.—Matt. 24:45-47.

11, 12. Nso utọ akan̄ imụm ererimbot mfịn, edi didie ke Jehovah ọnọ ikọt esie n̄kpọ barasuene?

11 N̄kpọ oyodu barasuene. Akan̄ Ikọ Abasi omụm ererimbot.  Bible ọtọt ete: “‘Sese! Mme usen ke ẹdi,’ uyo Jehovah Akakan Ọbọn̄ Andikara edi emi, ‘nyọdọn̄ akan̄ utom ke isọn̄, idịghe akan̄ uyo, inyụn̄ idịghe eke nsatitọn̄ mmọn̄, edi edi eke edikop ikọ Jehovah.’” (Amos 8:11) Ndi akan̄ emi etiene omụm nditọ Obio Ubọn̄ Abasi? Jehovah ama ebem iso etịn̄ ukpụhọde emi odude ke ufọt ikọt esie ye mme asua esie ete: “Mme asan̄autom mi ẹyedia n̄kpọ, edi biọn̄ ọyọdọn̄ mbufo. Sese! Mme asan̄autom mi ẹyen̄wọn̄ n̄kpọ, edi itọn̄ ayasat mbufo. Sese! Mme asan̄autom mi ẹyedara, edi bụt ayanam mbufo.” (Isa. 65:13) Ndi omokụt nte ikọ emi osude?

12 Abasi ọnọ nnyịn ata ediwak n̄kpọ nte akpammọn̄ emi akade-ka iso atara onyụn̄ otụn̄ọ man an̄wam nnyịn idi ufan esie. Mme n̄wed Ikọ Abasi—ye mme n̄kpọ oro ẹkotde ẹdọn̄ ke CD ye mme vidio, mme mbono esop ye ikpọ mbono, ye mme n̄kpọ oro ẹdọn̄de ke ikpehe Intanet nnyịn—kpukpru ẹdi se Abasi adade ẹkpep nnyịn n̄kpọ ke ererimbot emi mînyeneke eti ndausụn̄ mi. (Ezek. 47:1-12; Joel 3:18) Ndi inemke fi ndikụt nte Jehovah ọnọde ikọt esie n̄kpọ barasuene kpukpru usen nte enye ọkọn̄wọn̄ọde? Ndi emesịn ofụri ukeme adia udia ke okpokoro Jehovah kpukpru ini?

Ke esop ke ẹsinọ nnyịn ekese item, inyene ifụre, inyụn̄ ikop nsọn̄idem

13. Ndi afo omokụt nte un̄wọn̄ọ Jehovah oro aban̄ade enyịn ndin̄wan̄a mme nnan ye utọn̄ ndisịrede mme inan osude? Didie?

13 Ndituak ibuot nnọ Abasi. Ata ediwak owo mfịn ẹdi nnan ye inan ke n̄kpọ Abasi. (2 Cor. 4:4) Edi Christ ke ọkọk mme owo udọn̄ọ ke ofụri ererimbot. Ndi omokụt nte enyịn an̄wan̄ade mme nnan, utọn̄ onyụn̄ esịrerede mme inan? Edieke afo okụtde nte mme owo ẹdide ẹdinyene nnennen ifiọk Abasi, ẹkpọn̄de nsunsu ukpepn̄kpọ ido ukpono oro mîkayakke mmọ ẹfiọk akpanikọ ke ntak emi mmọ ẹkebietde nnan ye inan, ọwọrọ omokụt nte un̄wọn̄ọ emi osude: “Ke usen oro mme inan ẹyekop ikọ n̄wed oro, enyịn mme nnan oro ẹwọrọde ke n̄kụteyo ye ekịm ẹyekụt usụn̄.” (Isa. 29:18) Kpukpru isua, ke ẹkọk ata ediwak owo ntem ke ofụri ererimbot ke ndamban̄a usụn̄. Ke ini owo ọkpọn̄de Akwa Babylon onyụn̄ etiene nnyịn okpono Abasi ke ndamban̄a paradise nnyịn, emi owụt ke mme un̄wọn̄ọ Jehovah ẹsu.

14. Nditie n̄kere ewe uyarade edinam nnyịn idọdiọn̄ inyene mbuọtidem?

14 Ibuot kiet kiet ke n̄wed emi enen̄ede owụt ke Christ ke atan̄ mme anditiene enye ọdọn̄ ke ndamban̄a paradise ke utịt ini emi. Ẹyak ika iso itie ikere ediwak edidiọn̄ oro inyenede nnyịn ke paradise oro mfịn. Nte inamde oro, iyọdọdiọn̄ inyene mbuọtidem ke mme n̄kpọ oro Jehovah ọn̄wọn̄ọde ndinam nnọ nnyịn.

“Yak Obio Ubọn̄ Fo Edi”

15. Ntak emi ikemede ndinen̄ede nnịm ke isọn̄ ayakabade Paradise?

15 Toto ke eset, uduak Jehovah edi ndinam ofụri isọn̄ akabade edi Paradise. Enye ekesịn Adam ye Eve ke in̄wan̄ emi ekedide Paradise onyụn̄ ọnọ mmọ ewụhọ ete ẹman nditọ ẹyọhọ  isọn̄, enyụn̄ ẹse ẹban̄a kpukpru edibotn̄kpọ. (Gen. 1:28) Utu ke ndinam ewụhọ Abasi emi, Adam ye Eve ẹma ẹtiene Satan ẹsọn̄ ibuot ẹnyụn̄ ẹnam nditọ mmọ ẹkabade ẹdi mme anana-mfọnmma owo, mme anamidiọk, ẹnyụn̄ ẹkpan̄a. Kpa ye oro, uduak Abasi ikpụhọkede. Enye ama etetịn̄ ikọ, se enye etịn̄de enyene ndisu. (Kot Isaiah 55:10, 11.) Nnyịn imenen̄ede inịm ke nditọ Adam ye Eve ẹyeyọhọ isọn̄ ẹnyụn̄ ẹkan enye, ẹnyụn̄ ẹse ẹban̄a mme edibotn̄kpọ Abasi nte odotde ke ofụri isọn̄ emi edide Paradise. Ini oro, mme ntịn̄nnịm ikọ oro ẹban̄ade Paradise, emi ẹketịn̄de ẹnọ mme Jew oro ẹkekade ntan̄mfep, ẹyesu ọyọhọ ọyọhọ! Kere ban̄a mme uwụtn̄kpọ oro ẹtienede mi.

16. Bible ọdọhọ ke ifụre oro idinyenede ke Paradise editie didie?

16 Ifụre. Ke akpatre, inem inem un̄wọn̄ọ oro ke Isaiah 11:6-9 oyosu ọyọhọ ọyọhọ. Irenowo, iban, ye nditọwọn̄ ẹyedu ke emem ye ifụre ke kpukpru ebiet ke isọn̄. N̄kpọ ndomokiet, edide unam m̀mê owo, idinamke mmọ ndịk. Kere ban̄a ini emi ofụri ererimbot edidide ebietidụn̄ fo, emi afo edikemede ndiwọk ewọk ke akpa ye inyan̄, ọdọk nsio nsio obot, onyụn̄ asan̄a ke ebiet ekededi ifụre ifụre. Ke ini eyo okụtde, idem idinyekke fi. Ezekiel 34:25 oyosu, ikọt Abasi “ẹyedụn̄ ke wilderness ke ifụre ẹnyụn̄ ẹde idap ke akai.”

17. Ntak emi ikemede ndinịm ke Jehovah ọyọnọ se inanade nnyịn barasuene ke ini Obio Ubọn̄ edikarade ofụri isọn̄?

17 N̄kpọ oyodu barasuene. Kere ban̄a ini oro ubuene m̀mê akan̄ mîdidụhe aba. Mme owo ẹyedia nti udia, owo ndomokiet iditiehe-tie ibet mbon en̄wen ẹdin̄wam imọ aba. Akpakịp n̄kpọ oro Abasi ọnọde ikọt esie man mmọ ẹkpesan̄a ẹkpere imọ ẹwụt ke Edidem emi edide Messiah ọyọnọ mbon oro enye edikarade kpukpru n̄kpọ. Ke ini Jesus okodude ke isọn̄, enye ama ananam owụt ke imekeme ndisu mme utọ un̄wọn̄ọ oro, sia enye ama ada uyo ye iyak ifan̄ ọnọ ediwak tọsin owo oro ẹkekopde biọn̄, udia. (Matt. 14:17, 18; 15:34-36; Mark 8:19, 20) Ke ini Obio Ubọn̄ Abasi edikarade ofụri isọn̄, mme utọ ntịn̄nnịm ikọ emi ẹyesu: “Enye ayanam edịm edep ọduọhọ n̄kpasịp mbufo emi ẹtọde ke isọn̄, onyụn̄ ọnọ mbufo uyo nte mbun̄wụm isọn̄, emi edinyenede isek ye aran. Ufene mbufo ẹyeta mbiet ke usen oro ke in̄wan̄ mbiet ufene oro okponde.”—Isa. 30:23.

18, 19. (a) Nso ke ntịn̄nnịm ikọ Isaiah 65:20-22 ndisu ediwọrọ inọ fi? (b) Didie ke mme usen nnyịn ‘ẹdibiet mme usen eto’?

18 Mfịn, ediwak owo ikam ikereke-kere ke imekeme ndinyene eti ufọk m̀mê eti utom. Ke idiọk editịm n̄kpọ emi, ediwak owo ẹsisịn idem ẹnam utom edi inen̄ekede inyene ufọn inọ mmọ m̀mê ubon mmọ, ke adan̄aemi mme imọ owo ye mbon idiọkitọn̄ ẹdiade ofụri utịp utom oro. Kere nte editiede ke ini oro ntịn̄nnịm ikọ emi edisude ke ofụri ererimbot: “Mmọ ẹyebọp ufọk ẹnyụn̄ ẹdụn̄ ke esịt; mmọ ẹyenyụn̄ ẹtọ in̄wan̄ vine ẹnyụn̄ ẹdia mbun̄wụm mmọ. Mmọ idibọpke ndien owo en̄wen odụn̄; mmọ iditọhọ ndien owo en̄wen adia.  Koro mme usen ikọt mi ẹdibiet mme usen eto; ndien ndimek ikọt mi ẹyedia ufọn utom ubọk mmọ ọyọhọ ọyọhọ.”—Isa. 65:20-22.

19 Nso ke usen nnyịn ‘ndibiet mme usen eto’ ọwọrọ? Ama ada ke etak ata akamba eto, ndi esinyene fi uten̄e ke ini adade ekere ke anaedi eto oro enen̄ede ebịghi—ke anaedi enye ama ododu mbemiso ete ete ete fo? Emekeme ndikere ke emi imọ isụk idide anana-mfọnmma owo mi, ke utọ eto oro ekeme ndidu mbịghi n̄kan imọ, aka iso odu ke ata ediwak isua, inyeneke mfịna, idem ke afo ama akakpa ẹnyụn̄ ẹfre enyịn ẹban̄a fi. Jehovah ọfọn etieti ndin̄wọn̄ọ nnọ nnyịn ke Paradise oro edide, ke mme usen uwem nnyịn ẹyebịghi ẹnyụn̄ ẹtie emem emem. (Ps. 37:11, 29) Ini ke edi emi mme eto emi ẹdude uwem ẹbịghi ẹditiede nte mbiet emi ẹtịbede ekem ẹyemede, ke adan̄aemi nnyịn ikade iso idu uwem ke nsinsi!

20. Didie ke mbon oro ẹsọn̄ọde ẹda ye Obio Ubọn̄ ẹdinyene mfọnmma nsọn̄idem?

20 Ata nsọn̄idem. Mfịn, idụhe ke mîsidọn̄ọke, emi owo esie mîkpaha. Ke nditịm ntịn̄, kpukpru nnyịn idọdọn̄ọ—idọn̄ọ udọn̄ọ n̄kpa emi ẹkotde idiọkn̄kpọ. N̄kukụre se ikemede ndinyan̄a nnyịn edi uwa ufak Christ. (Rome 3:23; 6:23) Ke ini Jesus edikarade ke tọsịn isua, enye ye mbon oro ẹdikarade ye enye ẹyenam mme owo ẹbọ ufọn ufak oro ọyọhọ ọyọhọ, ẹnam mbon oro ẹnamde akpanikọ ẹbọhọ kpukpru idiọkn̄kpọ sụn̄sụn̄. Ntịn̄nnịm ikọ Isaiah emi oyosu ọyọhọ ọyọhọ: “Ndien baba andidụn̄ kiet ididọhọke ite: ‘Ndọdọn̄ọ.’ Ẹyedahado ẹnọ mme andidụn̄ isọn̄ ke ndudue mmọ.” (Isa. 33:24) Kere ban̄a ini oro owo ndomokiet mîdidịghe nnan, inan, m̀mê mbụn̄ọ. (Kot Isaiah 35:5, 6.) Idụhe udọn̄ọ ndomokiet emi edikakde Jesus ndikọk. Mbon oro ẹsọn̄ọde ẹda ẹnọ Obio Ubọn̄ ẹyenyene ata nsọn̄idem!

21. Nso iditịbe inọ n̄kpa, ndien ntak emi un̄wọn̄ọ oro ọnọde fi ndọn̄esịt?

21 Edi nso kaban̄a n̄kpọ oro udọn̄ọ esidade edi, kpa utịp idiọkn̄kpọ oro owo mîkemeke ndifep—oro edi, n̄kpa? “Akpatre asua” nnyịn edi oro, kpa asua emi esikande kpukpru anana-mfọnmma owo ubọk. (1 Cor. 15:26) Ndi ayakak Jehovah ndisio n̄kpa mfep? Kop se Isaiah eketịn̄de mi: “Enye eyemen n̄kpa emen ke nsinsi, Jehovah Akakan Ọbọn̄ Andikara oyonyụn̄ ọkwọhọde mmọn̄eyet efep ke iso kpukpru owo.” (Isa. 25:8) Kere nte ini oro editiede? N̄kpa ididụhe aba, udi ididụhe aba, ntuan̄a ididụhe aba! Utu ke oro, mmọn̄eyet idatesịt ayasiaha nnyịn ke enyịn ke ini ikụtde nte Jehovah osude inem inem un̄wọn̄ọ esie ndinam mme akpan̄kpa ẹset! (Kot Isaiah 26:19.) Ke akpatre, ẹyetre kpukpru ubiak n̄kpa.

22. Nso iditịbe ke Obio Ubọn̄ Messiah ama akanam uduak Abasi ama ke isọn̄?

22 Ke utịt Tọsịn Isua oro, Obio Ubọn̄ Abasi ayanam uduak Abasi ama ke isọn̄, Christ oyonyụn̄ ayak ukara ọnọ Ete esie. (1 Cor. 15:25-28) Mme owo oro ẹnamde ẹfọn ẹma ke akpatre ẹyeben̄e idem ẹnọ akpatre idomo oro Satan  edidomode mme owo ke ini ẹdisiode enye ke editụn̄ọ ukpe. Ke oro ebede, Christ oyosobo idiọk urụkikọt oro ye kpukpru mme andida ye enye. (Gen. 3:15; Edi. 20:3, 7-10) Edi ini iso mbon oro ẹsọn̄ọde ẹda ẹma Jehovah eyenen̄ede ọfọn. Abasi ọn̄wọn̄ọ ke iyanam mbon oro ẹnamde akpanikọ ẹnyene “ubọn̄ ubọn̄ ifụre nditọ Abasi.” Nnyịn ikereke ke odu ikọ en̄wen emi ekemede ndinam nnyịn inen̄ede ifiọk nte ini iso ikọt Abasi editiede nte ikọ itie N̄wed Abasi emi.—Rome 8:21.

Obio Ubọn̄ oyosu kpukpru se Jehovah ọkọn̄wọn̄ọde ọnọ ubonowo ye isọn̄

23, 24. (a) Ntak emi mme un̄wọn̄ọ Jehovah mîditreke ndisu-o? (b) Nso ke afo ebiere ndinam?

23 Mme un̄wọn̄ọ emi idịghe abian̄a m̀mê ndap. Mme un̄wọn̄ọ Jehovah iditreke ndisu! Ntak-a? Ti ikọ Jesus oro ikenemede ke akpa ibuot n̄wed emi. Enye ekekpep mme anditiene enye ẹbọn̄ akam ẹben̄e Jehovah ẹte: “Yak obio ubọn̄ fo edi. Yak uduak fo ada itie, nte edide ke heaven, yak edi ke isọn̄ kpasụk ntre.” (Matt. 6:9, 10) Obio Ubọn̄ Abasi idịghe n̄kpọ emi owo etiede-tie ekere. Enye edi ata ukara! Enye ke akara ke heaven idahaemi. Ke isua ikie idahaemi, enye osu mme un̄wọn̄ọ Jehovah ke mme usụn̄ emi ikụtde in̄wan̄-in̄wan̄ ke esop Christian. Do, imenịm ke kpukpru un̄wọn̄ọ Jehovah ẹyesu ke ini Obio Ubọn̄ Abasi edikarade isọn̄ ọyọhọ oyọhọ!

24 Imọfiọk ke Obio Ubọn̄ Abasi eyedi. Imọfiọk ke kpukpru un̄wọn̄ọ Jehovah ẹyesu. Ntak-a? Sia OBIO UBỌN̄ ABASI AKARA! Mbụme oro anade owo nnyịn kiet kiet obụp idemesie edi, ‘Ndi Obio Ubọn̄ akara mi?’ Ẹyak inam ofụri se ikekeme idahaemi man idu uwem nte mbon nsọn̄ọnda emi Obio Ubọn̄ akarade, man ibọ ufọn mfọnmma edinen ukara emi ke nsinsi!

Kpep N̄kpọ En̄wen

Nịm ke Obio Ubọn̄ Abasi Ayanam Uduak Abasi Osu

Jehovah akada ediomi itiokiet owụt ke Obio Ubọn̄ imọ ayanam se imọ ikaduakde osu. Didie ke mme ediomi emi ẹkeme ndinam nnyịn inen̄ede ibuọt idem ye Abasi?