Be ka se isịnede

Be ka udiana n̄kpọ

Be ka se isịnede

Mme Ntiense Jehovah

Efịk

Obio Ubọn̄ Abasi Akara!

Ndi enen̄ede ọdọn̄ fi ndikụt nte mme un̄wọn̄ọ Obio Ubọn̄ ẹsude?

 IKPEHE 7

Mme Un̄wọn̄ọ Obio Ubọn̄​—⁠Ndinam Kpukpru N̄kpọ Ẹdi Mbufa

Mme Un̄wọn̄ọ Obio Ubọn̄​—⁠Ndinam Kpukpru N̄kpọ Ẹdi Mbufa

 EMETET ata akamba ndatndat apple, en̄wịne edinem ufuọn̄ esie mbemiso ayakde esịn ke otu emi ẹdọn̄ọde ke akpasa. Amanam utom ebịghi, edi ukpaha mba, onyụn̄ ọdọn̄ fi ndika iso nnam utom. Eka fo ke etak en̄wen emi mîyomke usụn̄, ke etet ye inemesịt onyụn̄ eneme nneme ye mbonubon mbufo eken ye mme ufan emi ẹn̄wamde mbufo ẹtet. Enye ebiet n̄kaiferi—ukem ukem nte enye eketiede ke ini afo ekedide eyenọwọn̄ ke ata ediwak isua emi ẹkebede. Akpa fi idem nditi nte enye ọkọsọn̄de ke akani ererimbot emi ẹma ẹkesobo ẹfep anyan ini ko. Ama okụt nte udọn̄ọ akadiade enye idem, omụm enye ubọk ke ini enye okoyomde ndikpa, onyụn̄ atua eyet ke ini ẹkebụkde enye. Edi eka fo mbon edi emi, ye ata ediwak owo en̄wen emi ẹdude uwem ẹnyụn̄ ẹkopde nsọn̄idem!

Ini emi mme n̄kpọ emi ẹditịbede ke edi; imọfiọk oro. Se inamde ifiọk edi sia kpukpru un̄wọn̄ọ Abasi ẹsisu. Ke ikpehe emi, idineme nte ndusụk un̄wọn̄ọ Obio Ubọn̄ ẹdisude ke mîbịghike, onyụn̄ ada ekesịm Armageddon. Iyonyụn̄ ineme ndusụk ndinem un̄wọn̄ọ Obio Ubọn̄ emi ẹdisude ke oro ebede. Edinem nnyịn didie ntem ndikụt ini emi Obio Ubọn̄ Abasi edikarade ofụri isọn̄, onyụn̄ anam kpukpru n̄kpọ ẹdi mbufa!