Nte oyomde okụbọde

Mek usem

Be ka udiana n̄kpọ

Be ka se isịnede

Be ka se isịnede

Mme Ntiense Jehovah

Efịk

Obio Ubọn̄ Abasi Akara!

Leta Otu Emi Ẹsede Ẹban̄a Utom Mme Ntiense Jehovah

Leta Otu Emi Ẹsede Ẹban̄a Utom Mme Ntiense Jehovah

Edima Asuanetop Obio Ubọn̄:

DA NTE ke edi owo ubon Bethel Brooklyn, ke ama odu ke Bethel usenubọk Friday, October 2, 1914. Afo do ke itie emi esitiede kpukpru usen ke ini udia usenubọk, ke ebet Brọda C. T. Russell edi edisịm. Etise, Brọda Russell odụk edi. Enye atuak ada kan̄a, nte ido esie edide, ọkọm ubon Bethel edinem edinem ete “Ẹmesiere-o.” Utu ke ndibe n̄ka itie esie ke ibuot okpokoro, enye amia ubọk onyụn̄ ọnọ ntọt emi aduaide owo idem mi, ete: “Ini Mme Gentile okụre, ndidem mmọ ẹkara ẹma!” Esịt enen̄ede adat fi—ebịghi eketie ebet utọ ntọt emi! Ntọt emi anam fi ye mbon eken ke Bethel ẹnen̄ede ẹkwak ubọk ẹbịghi.

Ediwak isua ebe tọn̄ọ Brọda Russell ọkọnọ ntọt oro aduaide owo idem mi. Nso ke Obio Ubọn̄ Abasi anam tọn̄ọ oro? Anam ata ediwak  n̄kpọ! Jehovah ada Obio Ubọn̄ esie aka iso anam ikọt esie ẹsana onyụn̄ ada ọnọ mmọ ukpep—toto ke ini emi mmọ ẹkedide tọsịn ifan̄ kpọt ke 1914 tutu esịm mfịn emi mmọ ẹdide n̄kpọ nte miliọn itiaita. Ifan̄ ke otu ukpepn̄kpọ emi ke afo ọbọ?

Mfịn, imesiwak ndikop nditọete nnyịn ẹdọhọde ke chariot Jehovah eke enyọn̄ ke awat; emi edi akpanikọ. Edi, se idude edi ke toto ke 1914, chariot eke enyọn̄ emi, emi adade aban̄a ikpehe esop Jehovah ke enyọn̄, ke awat ata usọp usọp, nte edikụtde ke ini etịn̄de enyịn okot n̄wed emi. Mme asuanetop Obio Ubọn̄ ẹma ẹsion̄o mbufa usụn̄ ẹdi ndida n̄kwọrọ ikọ man ẹkeme ndikwọrọ etop Obio Ubọn̄ Abasi ke ofụri ererimbot. Mmọ ẹma ẹsikwọrọ ikọ ke mme n̄wedmbụk n̄kpọntịbe, ẹsan̄a ke udịm ẹkwọrọ, ẹsosio ke fim, ẹkama kad, ẹbre ke usanikwọ, ke ekebe ukopikọ, ẹnyụn̄ ẹkwọrọ ke Intanet.

Jehovah ọdiọn̄ utom nnyịn etieti, ntre imemịn̄ ndiye n̄wed ukpep Bible ibe usem 670 inyụn̄ inọ kpukpru owo ke mfọn. Nditọete nnyịn ẹnen̄ede ẹwa idem ẹbọp mme Ufọkmbono Obio Ubọn̄, mme Ufọk Mbono, ye mme ọfis n̄kọk itieutom ke mme idụt oro ẹnyenede n̄kpọ ye mme idụt oro mînyeneke. Ndien ke ini afanikọn̄, ndima nditọete irenowo ye iban ẹsisọsọp ẹka ẹken̄wam mbon oro ẹdude ke mfịna, ẹnyụn̄ ẹwụt ke mmimọ inen̄ede idi nditọeka idem ke ini nnanenyịn.—N̄ke 17:17.

Ndusụk ini, mme etubom ufọkabasi ye mme asua eken ẹsida mfịna ẹdi, edi ke ini ikụtde ediwak ini nte emi ‘akabarede anam eti mbụk asuana,’ emi esisọn̄ọ nnyịn idem.—Ps. 94:20; Phil. 1:12.

Edi akwa ukpono ndinam utom Abasi ye afo. Mbọk fiọk ete ke imama fi etieti. Nnyịn ibọn̄ akam ite n̄wed emi an̄wam fi enen̄ede ama n̄kpọ Abasi akan nte ekesimade.—Matt. 24:45.

Ọbọn̄ akpakam odu ye afo.

Nditọete fo,

Otu Emi Ẹsede Ẹban̄a Utom Mme Ntiense Jehovah