Nte oyomde okụbọde

Mek usem

Be ka udiana n̄kpọ

Be ka se isịnede

Be ka se isịnede

Mme Ntiense Jehovah

Efịk

N̄wedisua Mme Ntiense Jehovah 2015

 SE ẸKENAMDE ISUA OKO

Mbụk Ikpe

Mbụk Ikpe

ARMENIA Enyene Utom En̄wen Ọnọ Mme Christian Emi Mîmaha Ndidụk Ekọn̄

Armenia: Ukara ọnọ ndusụk nditọete nnyịn ẹka obio-in̄wan̄ ke idụt oro ẹkenam utom emi ẹnọde mbon emi mîmaha ndidụk ekọn̄. Nte mmọ ẹsụk ẹnamde utom do, mmọ ke ẹsịn idem ẹkwọrọ ikọ

Ke isua 2013, ukara Armenia ama ọtọn̄ọ utom emi mbon emi mîmaha ndidụk ekọn̄ ẹkemede ndinam, emi Mme Ntiense Jehovah n̄ko ẹdikemede ndinam utu ke ndika n̄kpọkọbi ke ntak emi ubieresịt mmọ mîyakke mmọ ẹdụk ekọn̄. Ke January 2014, n̄kọk itieutom Armenia ọkọdọhọ ete ke nditọete 71 ẹma ẹtọn̄ọ ndinam utọ utom emi. Ke uwụtn̄kpọ, ẹdọhọ ndusụk nditọete ẹnam utom ke itie utem udia mîdịghe ẹn̄wam mme  nurse ke ufọkibọk. Mbon emi ẹsede ẹban̄a utom emi ẹtịn̄ nte nditọete ẹsịnde idem ẹnam n̄kpọsọn̄ utom emi ẹsinọde mmọ, ẹnyụn̄ ẹnam ye inemesịt. Esịt enem nditọete oro nte ẹnamde mmọ ẹkeme ndinam utom en̄wen utu ke ndidụk ekọn̄ man mmọ ẹkeme ndika iso nnyene eti ubieresịt nte mme Christian. * Eyenete kiet ọkọdọhọ ete, “Imọkọm Jehovah sia ikemede ndinam utom en̄wen idahaemi utu ke ndidụk ekọn̄, ndien emi an̄wam nnyịn ida san̄asan̄a inyụn̄ inyene ifụre ndinam n̄kpọ Jehovah.”

DOMINICAN REPUBLIC Enyịme Akpa Ndọ Oro Mme Ntiense Jehovah Ẹdiande, Emi Mîdịghe Mbon Catholic Ẹdian

Ke 1954, adaibuot ukara Dominican Republic ama esịn ubọk ke n̄wed emi pope ekewetde ete yak ẹnam Catholic edi n̄kukụre ufọkabasi emi ekemede ndidian mme owo ndọ. Edieke owo mîkaha Ufọkabasi Catholic ikanam ndọ, owo ke Itieutom Usịn Ndọ ke N̄wed kpọt ekeme ndidian ndọ oro. Edi ke 2010, ukara ama ọbọp ibet en̄wen emi akayakde mme owo ke mme ufọkabasi en̄wen ẹkeme ndidian mme owo ndọ. Ukara ama odiomi man mbon emi ẹkpemade ndinyene unen ndidian owo ndọ ẹbọ ukpep. N̄kọk itieutom Dominican Republic ama emek mbiowo 30 ẹtiene ẹka. Kpukpru mbon emi ẹkekade ẹma ẹwak ẹbe owo 2,000, edi owo 32 kpọt ẹkedot ndisidian mme owo ndọ. Nditọete nnyịn 30 oro ẹma ẹdot ndisidian ndọ, ndien ukara ama ọnọ mmọ n̄wed man ẹkpesidian Mme Ntiense ndọ.

 INDIA Nditọete Ẹbiere Ndikwọrọ Ikọ ye Uko

Sundeep ye Deepalakshmi Muniswamy

Ke January 27, 2014, itieutom emi esede n̄kpọ aban̄a unen mme owo ke Karnataka ama ọdọhọ ke udiana akwa owo bodisi ke itieutom mme bodisi emi odude ke Old Hubli ke Karnataka ama edue ibet sia enye mîkan̄wamke Brọda Sundeep Muniswamy ke ini mbon ntịme ẹkekade ẹketịm enye ke June 28, 2011. Itieutom emi ọdọhọ ke udiana akwa owo  bodisi akanam mbon ntịme oro ẹnam se mmọ ẹkenamde oro ye nte ke ana ukara Karnataka amia enye ufen onyụn̄ ọdọhọ enye ekpe Broda Muniswamy rupee 20,000 (₦54,605). Itieutom emi ama etịn̄ n̄ko ete yak ukara osio okụk emi ke okụkọfiọn̄ ete oro.

Brọda Muniswamy ama ọdọhọ ke imọ ye ubon imọ imọkọm Jehovah ke n̄wọrọnda ubiereikpe emi, ke imonyụn̄ ibere ndika iso n̄kwọrọ eti mbụk ye uko. Se ẹkebierede emi ama ọsọn̄ọ mbuọtidem nditọete ke Jehovah ekeme ndikpeme ikọt esie. Emi ama onyụn̄ anam ukara okụt ke ana ikpeme Mme Ntiense Jehovah ke Karnataka. Ẹma ẹkot Brọda Muniswamy ye eyenete en̄wen ikpe kpa ke ukem n̄kpọ emi, edi owo ikpehe ikpe enye oro kan̄a.

KYRGYZSTAN N̄kponn̄kan Esopikpe Enyịme ke Owo Enyene Unen Ndisịn Ndidụk Ekọn̄

November 19, 2013, ekedi ata akpan usen ọnọ mbon emi mîmaha ndidụk ekọn̄ ke ntak ubieresịt. N̄kponn̄kan Esopikpe Kyrgyzstan ama ebiere ikpe Mme Ntiense Jehovah 11 onyụn̄ ọdọhọ ke se ukara Kyrgyzstan etịn̄de aban̄a utom emi owo akpanamde edieke enye mîmaha ndidụk ekọn̄ ikemke ye ibet. Ẹkedọhọ ke ana mbon emi ẹnamde utom en̄wen ke ntak emi mmọ mîmaha ndidụk ekọn̄ ẹkpe okụk ẹnọ ekọn̄ man ẹda ẹnam utom ekọn̄. Ẹma ẹdọhọ n̄ko ke ana mbon emi ẹnamde utọ utom oro ẹsịn enyịn̄ ke n̄wed ekọn̄ ẹma ẹkụre utom mmọ. Esop oro ama ebiere nte ke ndidọhọ owo anam utọ utom emi edi ndibiat unen emi enye enyenede ndidụk ido ukpono ekededi emi enye amade. Ntem, ke ntọn̄ọ ntọn̄ọ 2014, N̄kponn̄kan Esopikpe Kyrgyzstan ama ọdọhọ ke ikpe etebe Mme Ntiense Jehovah 14 emi ẹkebiomde ikpe ke akpa. Se ẹkebierede emi anam ikpe emi ẹkekpede ke isua itiaba man ẹwụt ke owo enyene unen ndidụk ido ukpono ekededi emi enye amade esịm utịt ndien. Nte nditọete nnyịn oro ẹkesọn̄ọde ẹda anam  ẹkpono enyịn̄ Jehovah onyụn̄ anam inyene ifụre ndikpono Abasi ke Kyrgyzstan.

Kyrgyzstan: Nditọete duopekiet emi ẹsiode ke ufọk-n̄kpọkọbi

NIGERIA “Jehovah Ọdiọn̄ Mi”

Ẹsisịn ntịme ye Mme Ntiense Jehovah ẹnyụn̄ ẹbịn ndusụk mmọ ẹsion̄o ke obio sia mmọ mîsimaha ndidụk n̄ka emi ubọkn̄ka mmọ ẹdụkde ke obio mmọ ke Abia Stet mi ke Nigeria. * Mbon n̄ka emi ẹsitiene ẹsịn ntịme ke obio ẹnyụn̄ ẹkọk ibọk. Usenubọk kiet ke November 2005, mbon n̄ka emi ke obio emi ẹkotde Asaga Ohafia ẹma ẹdụk ufọk Brọda Emmanuel Ogwo ẹnyụn̄ ẹtan̄ kpukpru n̄kpọ ufọk esie sia enye mîsimaha ndikpe okụk emi mbon n̄ka emi ẹsidoride. N̄kukụre se ikosụhọde inọ Brọda emi ye n̄wan esie ekedi ọfọn̄ emi mmọ ẹkesịnede ke idem. Ke 2006, mbon obio oro ẹma ẹbịn Brọda Ogwo ẹsio ke  obio. Brọda Ogwo ye n̄wan esie ẹma ẹka ẹkedụn̄ ye eyenete kiet ke obio en̄wen, eyenete emi ama onyụn̄ akama mmọ. Kpa ye oro ẹkeyakde Brọda Ogwo afiak ọnyọn̄ ufọk esie ke 2007, ẹma ẹsikpak enye etiene edidụk n̄ka emi, owo ikonyụn̄ inyịmeke ndiyak n̄kpọ ufọk esie nnọ enye.

Ke April 15, 2014, Akwa Esopikpe ke Abia ama ọdọhọ ke Brọda Ogwo enyene unen ndimek n̄ka emi enye edidụkde ye ido ukpono emi enye edikade. Ẹma ẹyak n̄kpọ ufọk esie ẹnọ enye. Idahaemi owo ibịnke Mme Ntiense aba ision̄o ke obio oro nte ẹkesinamde, nditọete ẹnyụn̄ ẹnyene ifụre ndikwọrọ ikọ ke Asaga Ohafia.

Ke ini ẹketịn̄de se esop ebierede, Brọda Ogwo ọkọdọhọ ete: “Mma mfrọ ke ntak idatesịt. Esịt ama enem mi etieti. N̄kada nte ke Jehovah akan ke ikpe oro. Mme angel ẹma ẹda ye ami. Jehovah ọdiọn̄ mi.”

RUSSIA Owo Iyakke Ẹtre jw.org

Nsio nsio ikpe emi ẹkpede ẹnọ nditọete nnyịn ke Russia “akabade anam eti mbụk asuana” ke idụt oro. (Phil. 1:12) Okposụkedi emi ndusụk ikpọ owo ukara ye ikpọ owo ufọkabasi ẹsịnde editịm man nnyịn idikpono Abasi ke Russia, nditọete nnyịn do ke ẹka iso ẹnam n̄kpọ Abasi, Jehovah ke onyụn̄ ọdiọn̄ mmọ.

N̄kpọ kiet emi anamde idọhọ ntem edi ikpe emi ikakande ke obio emi ekerede Tver’. Ke 2013, mme ekpeibet ukara ke Tver’ ẹma ẹka esop ẹkedọhọ yak ẹtre jw.org ke Russia. Esop oro ikokotde owo Ntiense Jehovah ndomokiet ẹdi ikpe emi, edi ama enyịme ete ẹtre jw.org. Nditọete nnyịn ẹma ẹkop se esop emi ekebierede ẹnyụn̄ ẹsion̄o ikpe oro. Ke January 22, 2014, esopikpe en̄wen ke Tver’ emi okponde akan ama abiat se akpa esop oro ekebierede. Jehovah ama an̄wam ke ikpe emi, akam nditọete nnyịn ke ofụri ererimbot onyụn̄ an̄wam n̄ko. Idahaemi ata ediwak nditọete nnyịn ke Russia ke ẹbọ ufọn ẹto se idude ke jw.org.

 TURKEY Isụk Inyịmeke Ndiyak Mbon Oro Mîmaha Ndidụk Ekọn̄ Ẹnam Utom En̄wen

Bariş Görmez emi edide Ntiense Jehovah ke Turkey ama esịne ke ufọk-n̄kpọkọbi ebe isua inan̄ ke ntak emi enye mîkamaha ndidụk ekọn̄. Ini emi enye okodude ke ufọk-n̄kpọkọbi, mme bodisi ekọn̄ ẹma ẹsitịgha enye ẹnyụn̄ ẹkama okpoyon̄ ẹtịm enye. Idịghe n̄kukụre se ikọwọrọde enye ekedi oro. Sia Brọda Görmez edide ata anyan owo, bed kiet emi okodude ke ubet ufọk-n̄kpọkọbi emi enye ekesịnede ikekemke enye. Ẹkebon bed iba ẹnọ enye ana ibiọn̄ ibiọn̄. Nte ini akakade, ikpọ owo ufọk-n̄kpọkọbi oro ẹma ẹyak nditọete ke esop mmọ ẹnọ enye ata akamba matras.

Ke 2008, Brọda Görmez ye nditọete ita ẹma ẹkesịn ikpe ke Esopikpe Europe Oro Ẹsede Ẹban̄a Unen Owo, ẹdọhọ ke Turkey ikenyịmeke ndiyak mmimọ inam utom en̄wen sia mmimọ mîmaha ndidụk ekọn̄, ke emi ọwọrọ ke mmọ n̄ko inyịmeke ke mmimọ imenyene unen ndidụk ido ukpono ekededi emi mmimọ imade. Ke June 3, 2014, esop emi ama ebiere ke se ẹkenamde Ntiense inan̄ emi ifọnke onyụn̄ ọdọhọ ukara Turkey ekpe nditọete oro okụk emi mmọ ẹkebiatde ke ikpe oro. * Ọyọhọ ikata edi emi Esopikpe Europe ọdọhọde ke se ukara Turkey anamde ye Mme Ntiense Jehovah ifọnke. Ntiense Jehovah ndomokiet idụhe ke ufọk-n̄kpọkọbi ke Turkey, edi mfịna emi iditreke ibọhọke ukara Turkey enyịme ke owo enyene unen ndisịn ndidụk ekọn̄.

Se Ima Ikokokop

Azerbaijan: Mme bodisi ke ẹsụk ẹtetịmede mbono esop nditọete ke idụt emi, ke ẹsụk ẹdodụn̄ọde mme n̄wed nnyịn, ke  ẹsụk ẹmomụm nditọete ke ini mmọ ẹkwọrọde ikọ, owo inyụn̄ iyakke mmọ ẹnam mme n̄kpọ eken emi ibet ẹnyịmede mmọ ẹnam. Tutu emi, ukara isụk inyịmeke ndifiak nsịn enyịn̄ ido ukpono Mme Ntiense Jehovah ke n̄wed. Ẹwet n̄wed 19 ẹnọ Esopikpe Europe Oro Ẹsede Ẹban̄a Unen Owo ẹban̄a se ukara Azerbaijan anamde emi. Kpa ye kpukpru emi, Jehovah ke osụk ọdọdiọn̄ ikọt esie do. Mme asuanetop ke ẹwak ẹkan se ekedide, ẹma ẹnyụn̄ ẹsio ofụri Edisana N̄wed Abasi—Edikabade Eke Obufa Ererimbot ke usem Azerbaijani, ndien emi ekedi n̄kpọ en̄wen emi akanamde nditọete do ẹkop inemesịt.

Eritrea: Ẹkọbọ nditọete nnyịn ke idụt oro etieti edi mmọ ke ẹsụk ẹka iso ẹnam n̄kpọ Jehovah. Nditọete ita emi ẹkerede Paulos Eyassu, Isaac Mogos, ye Negede Teklemariam, ẹsịne isua 20 ke ufọk-n̄kpọkọbi. Ẹkekọbi mmọ tọn̄ọ ke September 24, 1994. Ke ini Editi n̄kpa Christ ke April 14, 2014, mme bodisi ẹma ẹmụm n̄kpọ nte Ntiense 150 ye mbon en̄wen emi ẹkekotde ẹdidụk Editi emi. Mbon emi ẹkemụmde ẹkedi tọn̄ọ ke eyen isua kiet ye ọfiọn̄ inan̄ esịm owo emi ebede isua 85. Ke ini ẹkenọde akpan utịn̄ikọ ofụri owo ke April 27, 2014, mme bodisi ẹma ẹmụm n̄kpọ nte Ntiense 30 ye mbon en̄wen emi ẹketienede mmọ ẹdi ndikop utịn̄ikọ oro. Ẹma ẹsana ediwak mbon emi ẹkemụmde ẹyak.

Kazakhstan: Itieutom Emi Esede Aban̄a Ido Ukpono iyakke ẹmen n̄wed nnyịn 14 ẹdụk m̀mê ẹdeme ẹnọ mme owo ke Kazakhstan. Owo inyụn̄ iyakke nditọete nnyịn ẹkwọrọ ikọ ẹnọ mme owo akpan akpan ke ini mmọ mîdụhe ke Ufọkmbono Obio Ubọn̄ m̀mê ke Itie Mbono. Ẹkpe ikpe ẹnọ n̄kpọ nte nditọete 50 sia ẹdọhọde ke mmọ ẹnam utom isụn̄utom emi ibet mînyịmeke mmọ ẹnam. Ẹwet n̄wed 26 ẹnọ Kọmiti Esop Edidiana Mme Idụt Oro Esede Aban̄a Unen Owo man ẹkụt ẹte ke ukara Kazakhstan ayak mme owo ẹnyene ifụre ndikwọrọ ikọ.

^ ikp. 4 Owo edibiere ke idemesie m̀mê iyanam utom en̄wen emi ẹnọde utu ke ndidụk ekọn̄.

^ ikp. 13 Mbon emi ẹsidụkde n̄ka emi ẹsiwak ndidi irenowo emi ẹdide ubọkn̄ka ke obio oro.

^ ikp. 21 Buldu ye Mbon Eken ye Turkey, No. 14017/08, June 3, 2014.