Nte oyomde okụbọde

Mek usem

Be ka udiana n̄kpọ

Be ka se isịnede

Be ka se isịnede

Mme Ntiense Jehovah

Efịk

N̄wedisua Mme Ntiense Jehovah 2015

 SE ẸKENAMDE ISUA OKO

Ẹnam Bible Emi Man Ebịghi

Ẹnam Bible Emi Man Ebịghi

MME NTIENSE JEHOVAH ẹma Bible ẹkan n̄wed ekededi. Isikpep enye kpukpru ini inyụn̄ ida enye ikpep mbon en̄wen n̄kpọ iban̄a eti mbụk Obio Ubọn̄ Abasi. (Matt. 24:14) Emi akanam nditọete nnyịn ẹnen̄ede ẹsịn ifịk ẹnam utom man ẹkụt ẹte ke obufa Edisana N̄wed Abasi—Edikabade Eke Obufa Ererimbot eke 2013 ke Ikọmbakara, eye onyụn̄ ebịghi.

Ke ini nditọete emi ẹdude ke itie umịn̄n̄wed nnyịn ke Wallkill, New York, U.S.A., ẹkekade ẹbịne etubom itieutom udian n̄wed ẹkeneme ẹban̄a nte Bible emi editiede, enye ọkọdọhọ mmọ ete: “Utọ Bible emi mbufo ẹyomde mi idụhe.” Enye ama ọdọhọ n̄ko ete: “Inemke ndisio ntịn̄, edi imọdiọn̄ọ ke ẹnam ediwak Bible idahaemi man ama okụt nte odorode ke okpokoro m̀mê nte anade ke itie  unịm n̄wed enye eye fi. Owo inamke mmọ man ẹnen̄ede ẹbịghi.”

Edikabade Eke Obufa Ererimbot emi ẹkesiode mbemiso akpatre emi ikenen̄ekede ibịghi. Ntem, nditọete ke itie umịn̄n̄wed ke Wallkill ẹma ẹnen̄ede ẹse se ẹdidade ẹnam ikpaedem obufa Bible emi, se ẹdidade ẹdian, ẹnyụn̄ ẹse nsio nsio usụn̄ emi ẹkpedade ẹnam, man ẹkpekeme ndinam Bible emi ẹdikemede ndikama mbịghi ke nsio nsio itie ke ererimbot. Se mmọ ẹkekụtde ke mmọ ẹkeda ẹnam idem ifan̄ emi ẹtiede nte enye emi ẹyomde ndisio, ẹnọ ẹsọk Mme Ntiense ke nsio nsio itie emi ẹsifiopde m̀mê ẹbịtde etieti man ẹkama ẹse nte Bible oro edibịghide.

Ke ọfiọn̄ itiokiet ẹbede, ẹma ẹtan̄ mme Bible emi ẹdiyak ndien nditọete ẹma ẹkpụhọde ndusụk n̄kpọ ẹnyụn̄ ẹfiak ẹnọ mbufa ẹka mme itie oro. Ẹkeda se ibede Bible 1,690 ẹnam ndomonse emi. Se owo mîkodorike enyịn ama etịbe ye ndusụk Bible emi. Ke uwụtn̄kpọ, moto ama efịk Bible kiet, ẹma ẹyak kiet ẹnịm ke edịm tutu eyo esiere, kiet onyụn̄ enyịne ke mmọn̄ edịm ke ini oyobio.

Ima idep obufa masịn̄ udian n̄wed emi ọsọpde etieti ke 2011 ke ini ẹkesụk ẹnamde ndomonse emi. Ẹketan̄ mmọ ẹka itie umịn̄n̄wed ke Wallkill ye ke Ebina ke Japan. Akana imịn̄ ibat Bible emi ẹdikemde owo ke ini ẹdisiode Bible oro, edi akpan n̄kpọ en̄wen ekedi ke ana Bible emi ẹmịn̄de ke Ebina ẹdi ukem ye se ẹmịn̄de ke Wallkill.

Ikpaedem N̄wed Emi Mîmaha Ndidiana

Akpa ikpaedem emi ẹkenamde ikadianake

Ke ntọn̄ọ ntọn̄ọ 2012, itie umịn̄n̄wed mbiba emi ẹma ẹtọn̄ọ ndimịn̄ Edikabade Eke Obufa Ererimbot emi ẹkesiode ke 1984 ye obufa ikpaedem. Mbufa masịn̄ udian n̄wed emi ẹkeda glue ye n̄kpọ emi ẹsisịnde ke esịt ikpaedem n̄wed man ọsọn̄ ẹnam utọ ikpaedem Bible emi owo mîkọnọhọ ẹsọk mme owo ẹkama ẹse. Ikpaedem Bible emi ikamaha ndidiana. Ntem ẹma ẹtre ndimịn̄ enye.

 Mme andinam kiet ke otu n̄kpọ emi ẹkedade ẹnam ikpaedem Bible oro ẹkedọhọ ke se isiwakde nditịbe edi oro ke ini ẹmịn̄de n̄wed, ke inyeneke se ẹkemede ndinam man edem oro adiana. Utu ke nditọete nnyịn ndikpọn̄ utọ ikpaedem emi n̄kanam nsọsọn̄ ikpaedem, mmọ ẹma ẹbiere ndiyom usụn̄ nnam mmemmem ikpaedem Bible emi ediyede, edinyụn̄ ebịghide. Ẹma ẹda n̄kpọ nte ọfiọn̄ inan̄ ẹdomo nsio nsio glue ye n̄kpọ emi ẹsisịnde ke esịt ikpaedem n̄wed man ọsọn̄, ẹse. Ke akpatre, ẹma ẹdikụt enye emi ekemede ndida nnam mmemmem ikpaedem Bible emi edidianade, ẹnyụn̄ ẹtọn̄ọ ndimịn̄ Bible oro.

Itie udian n̄wed ke itie umịn̄n̄wed Wallkill

Ẹkeyom ndisio obufa Edikabade Eke Obufa Ererimbot eke Ikọmbakara emi ke October 5, 2013, ke mbono ofụri isua Watch Tower Bible and Tract Society of Pennsylvania. Ẹkeda Intanet ẹnọ se ẹkeyomde ẹmịn̄ ẹsọk itie umịn̄n̄wed iba emi ke Friday, August 9, 2013, mmọ ẹma ẹnyụn̄ ẹtọn̄ọ ndimịn̄ Bible emi ke ndan̄nsiere. Akpa Bible emi  ẹkemịn̄de ofụri ofụri ekedi ke August 15. Ke urua itiaba oro ẹketienede, ẹkenam utom okoneyo ye uwemeyo ke itie umịn̄n̄wed ke Wallkill ye ke Ebina man ẹmịn̄ se ibede Bible 1,600,000 emi edikemde se ẹnọde kpukpru owo ke mbono ofụri isua oro.

Kpa ye emi Bible emi eyede ntem, edinyụn̄ ebịghide, etop emi esịnede ke Bible emi akam enem mme owo akan. Ke eyenete an̄wan kiet ke United States ama ọkọbọ obufa Bible emi, enye ama ewet leta ọnọ ẹdi ke ndan̄nsiere ete, “Obufa edikabade emi anam Bible etetịm an̄wan̄a mi.”