Nte oyomde okụbọde

Mek usem

Be ka udiana n̄kpọ

Be ka se isịnede

Be ka se isịnede

Mme Ntiense Jehovah

Efịk

N̄wedisua Mme Ntiense Jehovah 2015

 NTE ẸKWỌRỌDE IKỌ ẸNYỤN̄ ẸNỌDE UKPEP KE OFỤRI ISỌN̄

Europe

Europe
  • IDỤT 47

  • IBATOWO 741,311,996

  • MME ASUANETOP 1,611,036

  • UKPEPN̄KPỌ BIBLE 847,343

Nditọ Ufọkn̄wed Ẹkese Ufọkmbono Obio Ubọn̄

Finland: Nditọ ufọkn̄wed oro ẹkedide Ufọkmbono Obio Ubọn̄

Ines, eyen praimari 4 kiet ke Finland, ama okop ke ẹyom ndineme n̄kpọ mban̄a Mme Ntiense Jehovah ke ini ukpepn̄kpọ ikọ Abasi ke ufọkn̄wed mmọ. Ntre, enye ama ọdọhọ kpukpru nditọ ubet ukpepn̄kpọ mmọ ẹdi ẹdise nte Ufọkmbono Obio Ubọn̄ etiede. Andikpep mmọ ye nditọ ubet ukpepn̄kpọ oro ẹma ẹnyịme.

Urua oro eketienede, nditọ ufọkn̄wed 38 ẹma ẹwat n̄kpọ nte  kilomita 5 ke enan̄ukwak ẹka Ufọkmbono Obio Ubọn̄ oro. Andikpep iba ye etubom ufọkn̄wed mmọ ẹma ẹtiene ẹka. Nditọete iren iba ye nditọete iban ita do ẹkebet mmọ ke Ufọkmbono Obio Ubọn̄ oro. Ke ini nditọ oro ẹkesụk ẹdiade mfefere udia oro mmọ ẹkekamade ẹdi, mmọ ẹma ẹbụp n̄kpọ ẹban̄a Ufọkmbono Obio Ubọn̄ ye Mme Ntiense, utọ nte: “Nso ke ẹsinam ke mme mbono esop mbufo?” “Nso ke ẹsinam ke ekpri ubet oko?” Itie ubonn̄wed ke mmọ ẹkebụp ẹban̄a oro. “Ntak emi ẹwetde ibat oko, itiokiet bahade ke itie duop?” Ibuotikọ isua ke mmọ ẹkebụp ẹban̄a oro, sia ẹkedade ẹto Matthew 6:10. *

Sia ufọkn̄wed oro oyomde nditre ndusụk nditọ ufọkn̄wed ndisifiomo nditọ eken, nditọete nnyịn oro ẹma ẹnam kpukpru nditọ oro ẹse cartoon emi “Nte Ekemede Ndikan Owo Mfiomo edi Un̄wanake-N̄wana,” ke jw.org. Ẹma ẹnyụn̄ ẹwụt mmọ mme n̄kpọ en̄wen ke ikpehe Intanet nnyịn ẹnyụn̄ ẹbre ikwọ Obio Ubọn̄ ẹnọ mmọ. Kpukpru emi akada n̄kpọ nte hour kiet.

Esịt ama enen̄ede enem etubom ufọkn̄wed oro, mme andikpep oro, ye kpukpru nditọ ufọkn̄wed oro ndidi Ufọkmbono Obio Ubọn̄ oro. Etubom oro ama enen̄ede ama mme n̄kpọ oro ẹdude ke ikpehe Intanet nnyịn onyụn̄ ekere ke mmọ ẹdi se ẹdade ẹkpep nditọwọn̄ n̄kpọ ke ini ukpepn̄kpọ ikọ Abasi. Esịt ama enem enye ke ini ẹkedọhọde ke nditọ ufọkn̄wed eken ẹkeme nditiene ndise Ufọkmbono Obio Ubọn̄. Emi ama anam andikpep ubet ukpepn̄kpọ en̄wen okokụt Mme Ntiense ke ndan̄nsiere onyụn̄ obụp m̀mê imekeme ndida nditọ ubet ukpepn̄kpọ imọ ndi n̄ko.

Enye Ama Okụt N̄kpọuto ke Itie Uduọn̄ọ Mbio

Cristina emi odụn̄de ke Romania ikakaha n̄wed, ntre enye ifiọkke ndikot n̄wed m̀mê ndiwet n̄kpọ. Enye edi  ubuene, esinyụn̄ asan̄a atan̄ n̄kpọ nte iko ye ekpeme ke itie uduọn̄ọ mbio ke obio mmọ. Usen kiet, nte enye osụk atan̄de n̄kpọ emi, enye ama okụt n̄kpọ emi akakpade enye idem. Enye okokụt mme n̄wed emi ẹsidade ẹkpep Bible, ndiye ndise mbon emi esịt enemde ẹnyụn̄ ẹdu ke n̄wed oro. Enye ama ekere ke anaedi enyene ebiet emi utọ mme owo oro ẹdude ke ererimbot. Cristina ama enen̄ede oyom  ndifiọk se idude ke mme n̄wed oro, ntre enye ama ọdọhọ owo okot ọnọ imọ. Ke ini enye ekedide edifiọk ke mme n̄wed ikọ Abasi ẹkedi oro, ama abiak enye nte mme owo ẹmende n̄wed ikọ Abasi ẹditop ẹduọk ke itie uduọn̄ọ mbio. Cristina ama esika itie uduọn̄ọ mbio oro akatan̄ ndiye n̄kpri n̄wed, tract, ye magazine. Ndusụk ẹma ẹwaha ndusụk iwahake. Enye ama ekpep ndikot n̄wed man okot ediwak n̄kpọ ke mme n̄wed oro.

Nte ini akakade, Mme Ntiense ẹma ẹkekụt Cristina ẹnyụn̄ ẹtọn̄ọ ndikpep Bible ye enye. Esịt ama enem enye ndidiọn̄ọ ke Jehovah ada mme n̄wed emi mbon en̄wen mîkọdiọn̄ọke ufọn anam enye edifiọk imọ. Enye esidụk mbono esop onyụn̄ enen̄ede ama se ẹkpepde enye. Se inemde enye ikan edi ke idahaemi enye esibọ mbufa magazine, mme n̄wed, ye ndiye n̄kpri n̄wed. Enye ikaha aba ikoyom mme n̄wed emi ke itie uduọn̄ọ mbio. Ke akpanikọ, Cristina ama okụt n̄kpọuto ke itie uduọn̄ọ mbio.

Ukpepn̄kpọ Bible ke Ikọt

Germany: Margret ada ke ikọt ekpep owo Bible

Kpukpru usenubọk, Margret esida ebua esie asan̄a ke ikọt kiet ke Germany. Enye ọdọhọ ete: “Mmesin̄wana ndineme nneme ye mbon oro n̄kụtde. Edieke mmọ ẹmade nneme oro, mmesitọn̄ọ nditịn̄ n̄kpọ mban̄a Bible.”

Usen kiet enye ama okụt mma kiet emi ekebede isua 70, emi okonyụn̄ asan̄ade ye ebua esie. Margret ama ọtọn̄ọ nneme ye mma oro. Mma oro ama ama nneme oro onyụn̄ ọdọhọ Margret ke imọ imesibọn̄ akam inọ Abasi inyụn̄ ikot Bible kpukpru usen. Ọtọn̄ọde ke usen oro, mmọ mbiba ẹma ẹsisobo do kpukpru usen ẹneme ikọ Abasi. Usen kiet, mma oro ama obụp Margret m̀mê enye anam didie ọdiọn̄ọ Bible ntre. Margret ama ọdọhọ ke imọ idi Ntiense Jehovah.

 Margret ama ọdọhọ mma oro ediwak ini ke imọ ikpama ndisidi ufọk esie ndikpep enye Bible, edi enye ikenyịmeke. Edi mmọ ẹma ẹsika iso ẹneme ikọ Abasi. Ke ọfiọn̄ ifan̄ ama ekebe, Margret ama afiak ọdọhọ mma oro ke ikpama ndidi ufọk esie ndikpep enye Bible. Isan̄ enye emi, mma oro ama ọdọhọ enye ke se inamde imọ ikûnyịme enye edi ufọk edikpep imọ Bible edi ke ete oro imọ idụn̄de kiet imaha Mme Ntiense Jehovah.

Ini en̄wen emi Margret akasan̄ade ye ebua esie aka ikọt oro, enye ama akama Bible ye n̄wed Bible Ekpep. Ke ini Margret okokụtde mma oro, enye ama etịn̄ uko uko ete: “Sia mîdịghe se ndide ndikpep fi Bible ke ufọk, yak ikpep mi ke ikọt emi nan̄a.” Mmọn̄eyet ama asiaha mma oro ke enyịn, enye onyụn̄ enyịme. Enye esidi ikọt emi usen itiokiet ke urua edikpep Bible. Edieke edịm edepde, Margret esikama ufụkeyo ekpep mma emi Bible, ndusụk ini akama ikan̄ ekpep edieke enyọn̄ mîn̄wan̄ake.

Ufụn̄ Ibuot Akada Mfịna Edi

Eyenete an̄wan emi ekerede Delphine ama esikpep Bible ye eyenan̄wan emi ekerede Irina ke Bulgaria. Irina ama ama se enye ekesikpepde onyụn̄ ọtọn̄ọ nditiene ndụk mme mbono esop. Edi ebe Irina ikoyomke enye odụk ndụk ye Mme Ntiense Jehovah. Enye ama anam mmọ ẹwọrọ ẹkedụn̄ ke ekpri obio kiet ke Sweden. Irina ikekemeke ndinyene nneme aba ye Delphine. Alexandra ye Rebecca emi ẹdide mme asiakusụn̄ ẹma ẹkokụt Irina, edi enye ikekemeke ndisem usem Sweden. Nditọete emi ẹma ẹkụbọde ekpri n̄wed Good News for People of All Nations ẹka ebiet emi ẹwetde n̄kpọ ke usem Bulgaria, ẹnyụn̄ ẹkpọn̄ ẹnọ Irina okot. Ekem, mmọ ẹma ẹwụt enye ebiet emi ẹbụpde ke n̄wed oro m̀mê enye akpama ẹda mme n̄wed en̄wen ke usem mmọ ẹsọk enye. Irina ama enen̄ede ofụn̄ ibuot. Nditọete oro ẹma ẹdaha ẹnyọn̄ sia ẹkekerede ke enye imaha.

 Ekem Alexandra ama eti ke Linda emi otode Sweden, onyụn̄ anamde utom ke Bulgaria, ke edi Sweden ke mîbịghike. Enye ama ekere ke Irina ekeme ndima ikọ Abasi edieke okopde ke usem mmọ. Ke ini Linda ekedide edisịm, Alexandra ama ada enye aka n̄kan̄ Irina. Irina ama ọdọhọ Linda ke isibọn̄ akam inọ Jehovah kpukpru usen ite enye an̄wam imọ ika iso ikpep Bible. Enye ekesikakama n̄wed Bible Ekpep ke usem Bulgaria asan̄a. Enye ekesikama n̄wed emi man owụt Ntiense ekededi emi enye edikụtde, edi enye ikekwe Ntiense ndomokiet. Esịt ama enen̄ede enem enye ndibọ ediwak n̄wed ke usem Bulgaria.

Linda ama obụp Alexandra ntak emi enye ekekerede ke Irina imaha ikọ Abasi. Alexandra ọdọhọ ke ini imọ ikobụpde m̀mê enye akpama ida n̄wed ke usem mmọ isọk enye, ke enye okofofụn̄ ibuot. Linda ama asak onyụn̄ ọdọhọ ke ini mbon Bulgaria ẹfụn̄de ibuot, ọwọrọ ke ẹnyịme n̄kpọ, ke ini ẹtopde ibuot, ọwọrọ ke inyịmeke. Irina ama aka iso ekpep Bible ke usem Bulgaria tutu ekem ini emi enye ekpepde usem Sweden. Akanam didie ekpep? Delphine emi ekesikpepde enye n̄kpọ ama afiak ekeme nditọn̄ọ nneme ye enye onyụn̄ etie ke Bulgaria ada kọmputa ekpep enye n̄kpọ ke Sweden.

Ete Enịm Eti Uwụtn̄kpọ

Jemima emi odụn̄de ke Spain akamamana edidụk esop. Edi ke ini enye ekedide isua itiaba, uwem esie ama ọtọ etịmede. Eka esie ọkọdọhọ ke imọ iyomke ndidi aba Ntiense Jehovah, onyụn̄ ọwọrọ ndọ. Ke ini enye ekedide isua 13, enye ama etre ndisidụk mbono esop Mme Ntiense Jehovah, inyụn̄ iyomke ete esie eneme ikọ Abasi ye enye aba.

Nte Jemima okosụk okponde, enye ama odụk mme n̄ka mbio obio ye n̄ka mbre ukara sia okoyomde ndinam n̄kpọ ọfọn ye mme owo. Nte ini akade, ẹma ẹsio enye ke utom,  ndien Domingo ete esie ama ọdọhọ enye editiene imọ anam utom uyet ndom mbakara ke ufọk.

Usen kiet ke ini mmọ ẹkesụk ẹnamde utom ntre, Domingo ama ọdọhọ Jemima ke imọ ikpama ndikpep enye Bible. Jemima ama ọdọhọ ke imọ iyomke, ke iyọdọhọ enye ima iyom. Domingo ama esikpan̄ utọn̄ okop Bible ye mme magazine oro ẹkotde ẹdọn̄ ke n̄kpọ umụmikọ nte enye osụk anamde utom, edi Jemima ekesifak n̄kpọ ke utọn̄ okop ikwọ.

Domingo ama afiak ọdọ n̄wan, ndien ẹma ẹkot enye Ufọkn̄wed Ukpep Bible Eke Mme Christian Oro Ẹdọde Ndọ ke November 2012. Jemima ndidiọn̄ọ ke ete esie ọmọn̄ adaha ufọkn̄wed emi ke ọfiọn̄ iba, ndien ekem ọkpọn̄ kpukpru n̄kpọ aka ebiet ekededi emi ẹdọhọde enye aka, ama anam enye afiak ekere n̄kpọ. Enye ama edikụt ndien ke ete esie enen̄ede ama akpanikọ Bible, ndien enye ama oyom ndidiọn̄ọ ntak.

Jemima ama etre ndisifak n̄kpọ ke utọn̄ n̄kop ikwọ, onyụn̄ ọtọn̄ọ nditiene n̄kop Bible ye mme magazine oro ete esie ekesikpan̄de utọn̄ okop. Enye ama onyụn̄ ọtọn̄ọ ndibụp mbụme mban̄a Bible. Usen kiet ke ini ete esie okodorode ke enyọn̄ eberi eyet ndom mbakara, Jemima ama ọdọhọ ete: “Papa ndi emeti ini oro n̄kọdọhọde fi nte ke mma nyom ndikpep n̄kpọ ke nyọdọhọ fi? Mmeben̄e idem ndien.”

Esịt ama enem Domingo. Ke January 2013, ete esie ama ọtọn̄ọ ndikpep enye n̄kpọ ikaba ke urua. Ufọkn̄wed oro ọkọtọn̄ọ ke April, ndien Domingo ama aka iso ndida kọmputa n̄kpep Jemima n̄kpọ. Jemima ama aka edinam ukụre ukpep mme ete esie onyụn̄ ama se enye okokopde. Enye ama ana baptism ke December 14, 2013.

Jemima ọdọhọ ete: “Jehovah ama enen̄ede enyene ime ye ami, mmonyụn̄ ndiọn̄ọ ke enye ikotopke mi iduọk. Enye  anam mi nnyene nti ufan emi mmen̄kenyeneke ke ererimbot. Nte ikọt Jehovah ẹdianade ntem ke ofụri ererimbot anam nnen̄ede mfiọk ke Jehovah ama mi.”

Ufọn Ndisikpono Owo

Vasilii anam utom ke Bethel Russia ebịghi. Ke March 30, 2014, ke ini enye okosụk adade ekpere ukpatn̄kpọ udọn̄n̄wed emi enye esidade ọkwọrọ ikọ ekpere n̄kọk itieutom Russia, mme bodisi ẹma ẹwat moto mmọ ẹdi. Owo bodisi kiet ama ọwọrọ ke moto oro edidọhọ Vasilii etre ndida do n̄kwọrọ ikọ, ke ndusụk mbon emi ẹdụn̄de do imaha se enye anamde oro. Bodisi en̄wen ada n̄kpọ umụmikọ omụm se mmọ ẹkenemede. Vasilii ama adaha nte bodisi oro ọkọdọhọde, inyụn̄ itịn̄ke ke imenyene unen ndida do n̄kwọrọ ikọ. Mme owo emi ẹkesan̄ade ẹbe do ẹma ẹtuak ẹda ẹte ise se iyomde nditịbe. Vasilii ama adaha, edi ke usen iba ẹbede, enye ama ọdọhọ ke ikpama ndikụt akwaowo bodisi. Ẹma ẹnyịme enye edi. Ke ini Vasilii ekenyenede nneme ye akwaowo bodisi oro, enye ama ọkọm enye ke nti utom oro mme bodisi ẹnamde ẹnọ obio ye nte mmọ ẹketịn̄de ikọ ye imọ ukpono ukpono usen iba ke edem. Akwaowo bodisi oro ama ọwọn̄ọde ese udiana esie onyụn̄ ọdọhọ ete: “Isua 32 ẹdi emi n̄kanam utom emi, edi akananam owo ndomokiet itoroke nnyịn ke nti utom emi inamde!” Vasilii ama anam akwaowo bodisi oro okụt ke ibet enyịme nnyịn ikwọrọ ikọ inọ mme owo. Akwaowo bodisi oro ama obụp Vasilii ntak emi enye mîkọdọhọke mme bodisi oro ke ibet enyịme mmimọ ikwọrọ ikọ, edi adaha ke ini ẹdọhọde enye adaha. Vasilii ama ọbọrọ ete: “Nsikpokpono mme bodisi. Kere nte ekpeketiede edieke mbon oro ẹkedade ẹse nnyịn do ẹkpekekopde mi ndọhọde ke mme bodisi oro idiọn̄ọke ibet.” N̄kpọ emi ama enen̄ede enem akwaowo bodisi oro ye udiana esie, ndien mmọ ẹma ẹdọhọ Vasilii ẹte ke enye ekeme ndika iso nda ukpatn̄kpọ esie n̄kwọrọ ikọ.

[Ikọ Idakisọn̄]

^ ikp. 9 Ke Finland, ẹsiwet “: (kolọn)” ndida mbahade n̄kpọ ke ibat.