Nte oyomde okụbọde

Mek usem

Be ka udiana n̄kpọ

Be ka se isịnede

Be ka se isịnede

Mme Ntiense Jehovah

Efịk

N̄wedisua Mme Ntiense Jehovah 2015

 NTE ẸKWỌRỌDE IKỌ ẸNYỤN̄ ẸNỌDE UKPEP KE OFỤRI ISỌN̄

Asia ye Ufọt Ufọt Edem Usiahautịn

Asia ye Ufọt Ufọt Edem Usiahautịn
  • IDỤT 48

  • IBATOWO 4,315,759,010

  • MME ASUANETOP 703,271

  • UKPEPN̄KPỌ BIBLE 732,106

Enye Ama Obụp M̀mê Mbon En̄wen Ẹkeme Nditiene Ndi

Ke Indonesia, eyenete kiet ama ọnọ owo emi anamde utom ke itie ubon n̄kpọisan̄ n̄wedikot Editi, usen iba mbemiso usen Editi oro. Ete oro ekedi Muslim. Enye ama obụp m̀mê mbon en̄wen ẹkeme nditiene ndi, sia ẹkenọde enye n̄wedikot kiet kpọt. Eyenete oro ama ọdọhọ ke mmọ ẹkeme nditiene ndi. Ete  oro ama ọdọhọ ke mbonubon imọ ẹwak etieti, onyụn̄ ọdọhọ ẹnọ imọ ediwak n̄wedikot. Eyenete oro ama ọnọ enye n̄wedikot 20 onyụn̄ ọdọhọ ke iyom nditi n̄kpa Jesus, ntre ke ikot kpukpru owo, mme Christian ye mbon Muslim. Ete oro ama ọdọhọ ke iyasan̄a ye owo 60 m̀mê 70 idi.

Esisịt ini ke Editi ama ọkọtọn̄ọ, owo 248 do ẹketie ẹkpan̄ utọn̄ ẹkop utịn̄ikọ Editi oro, edi ibịghike, ete oro asan̄a ye n̄kpọ nte owo 100 edi, esịnede irenowo, iban, nditọwọn̄, n̄kani iren, n̄kani iban, ye n̄wan idịbi emi ekekperede ndiman eyen. Mmọ ẹma ẹbọ ediwak moto man ẹtan̄ mme owo ẹka ufọkisen emi ẹkenịmde Editi oro. Ke ini mme ekpeme ufọkisen oro ẹkekụtde utọ uwak owo oro, mmọ ikenyịmeke mmọ ẹdụk ke nsonso oro. Ẹma ẹkere m̀mê nso inam utọ uwak mbon Muslim emi ẹdi ndidụk edinam mme Christian. Ke mmọ ẹma ẹkewụt n̄wedikot Editi oro ẹkenọde mmọ, mme ekpeme ufọkisen oro ẹma ẹda mmọ ẹkewụt ebiet emi ẹkenịmde Editi oro. N̄kpọ nte owo 60 ẹkekeme ndidụk esịtufọk oro sia itie mîkekemke kpukpru owo.

Usen ifan̄ ke oro ebede, eyenete oro ama afiak aka itie ubon n̄kpọisan̄ oro okobụp m̀mê mme owo oro ẹma ẹma edinam oro. Ete oro ọkọdọhọ ke bụt ama anam mmimọ ndidi, edi ke ini mmimọ ikedide, ama edinem mmimọ sia kpukpru owo ẹma ẹfọn ido etieti ẹnyụn̄ ẹsan̄a ẹkọm mmimọ ubọk ke ini edinam oro asuanade. Eyenete oro ama ada ini oro okot enye edidụk akpan utịn̄ikọ oro ẹdinịmde ke Sunday. Enye ama asan̄a ye mbonufọk esie ye mme mbọhọidụn̄ esie edi,  emi kpukpru ẹkedide owo 40. Sia mmọ ẹkedide ke ini mbono esop ekperede ndisuana, mbiowo ẹma ẹdọhọ ẹfiak ẹnọ utịn̄ikọ oro ọyọhọ ikaba. Etieibuot okpokoro ama afiak ọtọn̄ọ mbono esop onyụn̄ etịn̄ ibio ibio aban̄a ikwọ ye akam. Sia mmọ ẹkedide mbon Muslim, etịn̄ikọ okokot Bible “Edisana N̄wed” onyụn̄ okot Jesus “Prọfet Isa” ke ini enye ọkọnọde utịn̄ikọ oro.

Ekem ebiowo kiet ama aka ufọk ete oro akada n̄wed Kpan̄ Utọn̄ Nọ Abasi ọtọn̄ọ ndikpep enye Bible. Owo duopeba en̄wen ẹma ẹtiene ẹkpep Bible, ndien emi esịne iban Muslim ye nditọwọn̄ ifan̄.

Se Mme Owo Ẹdikotde ke Bọs

Mongolia: Ẹma ẹnyịme nditọete ẹnọ mme akaisan̄ mme n̄wed

Mme bọs emi mme owo ẹsidụkde ke Ulaanbaatar ke Mongolia, ẹsika nsio nsio obio ke idụt oro. Utọ bọs oro ẹkeme ndiwat n̄kpọ nte usen iba mbemiso ẹsịmde ebiet ẹkade. Mme owo ke esịt bọs oro ẹsitie ẹde idap mîdịghe ẹse usụn̄ ye ikọt. Kpa ye oro mbon Mongolia ẹsimade ndikot n̄wed, owo isinọhọ mmọ n̄wed ndikot. Emi akanam ndusụk nditọete ke Esop Songinokhairkhan ẹkedọhọ mme andiwat bọs oro ẹte: “Ikpama ndinọ mbufo ndiye n̄wed man ẹkpekot. Ẹsidọn̄ mme n̄wed ẹnọ mme owo ndikot ke esịt ubomofụm. Edieke ẹkerede ke mme owo ke moto mbufo ẹyema ndikot n̄wed, iyesịn n̄wed inọ mmọ ẹkot.” Mme awat bọs itiaita ẹma ẹnyịme. Ndien nditọete oro ẹma ẹnịm magazine 299 ye ndiye n̄kpri n̄wed 144. Mmọ ẹma ẹnyụn̄ ẹdọhọ ke iyesida mbufa magazine ididọn̄ kpukpru ini.

 Itieurua Ebiet Itieurua

Ke idụt kiet ke Asia, ẹma ẹdọhọ mbiowo iba ẹka ẹkese eyenete an̄wan emi mîkọwọrọke an̄wautom aba ke isua itiaita. Sia mmọ mîkekwe eyenete mi akpa, mmọ ẹma ẹkot enye man ẹfiọk nte ididade ikụt enye. Eyenete oro ama ọdọhọ mmọ ẹdikụt imọ ke itieurua imọ emi odude ke akamba urua kiet. Ke mmọ ẹma ẹkesan̄a ofụri urua oro ẹyom itieurua eyenete oro, mmọ ẹma ẹdisịm itieurua kiet emi mmọ ẹkekerede ke enye enyene. Mmọ ẹma ẹdụk ẹkọm mma kiet emi ekenịmde ekpri Bible ke enyọn̄ okpokoro esie. Ke ẹma ẹkebụp enye enyịn̄, ebiet emi enye otode, ẹnyụn̄ ẹbụp isua emana nditọ esie mbiba, nditọete emi ẹkekere ke eyenete oro mmimọ ikoyomde do edi oro. Mmọ ẹma ẹdọhọ enye ẹte: “Nnyịn idi nditọete fo, idi Mme Ntiense Jehovah.”

Idem ama akpa mma oro, enye onyụn̄ ọbọrọ mmọ ete: “Ami ndi Christian.” Nte mma emi akanamde n̄kpọ ama akpa nditọete emi idem. Edi mmọ ẹma ẹnọ enye n̄wed ukpep Bible ifan̄, enye onyụn̄ ọkọm mmọ. Ini mmọ ẹwọrọde do ke mmọ ẹkedi ẹdifiọk ke idịghe itieurua eyenete oro ke mmọ ẹkedụk oro! Mmọ ẹkeyom ndika ọyọhọ itieurua 2202, edi ẹkabade ẹka 2200. Ebiowo kiet ama ọdọhọ ete: “Eketie nte angel akada nnyịn odụk itieurua mma oro. Mma emi okonyụn̄ ekere enyịn̄ eyenete oro, mmọ ẹketo obio kiet, ndien nditọ mmọ mbiba ẹkedi ubọkn̄ka! Ekpedi mma oro ekekere  enyịn̄ efen mîdịghe oto obio efen, ikpọkọsọp ifiọk ke idịghe eyenete oro edi oro.” Ke mmọ ẹma ẹkebe itieurua iba en̄wen, mmọ ẹma ẹdisịm ndien itieurua eyenete emi. Enye do eketie ebet mmọ.

“Idem ama enen̄ede akpa mi ndifiọk ke Jehovah ifreke mi kpa ye oro mmen̄kọkwọrọke ikọ ke anyan ini”

Mbiowo oro ndikedue ndụk itieurua mma emi ama anam enye ọtọn̄ọ ndikpep Bible nnyụn̄ ndụk mme mbono esop. Eyenete oro mîkọwọrọke an̄wautom aba do ama ọtọn̄ọ ndidụk kpukpru mbono esop onyụn̄ ọwọrọ an̄wautom kpukpru ini. Enye ọkọdọhọ ete: “Idem ama enen̄ede akpa mi ndifiọk ke Jehovah ifreke mi kpa ye oro mmen̄kọkwọrọke ikọ ke anyan ini.”

Ẹnọ Etop Ẹsọk Owo ke Ukwọedịm

Philippines: Greg ke ọnọ owo etop

Greg ye Alma ẹma ẹwọrọ ẹka isuo Catanduanes ke Philippines man ẹkekwọrọ ikọ ke ebiet emi ẹnen̄erede ẹyom mme ọkwọrọ ikọ. Ndusụk itie ke obio oro ẹtie obot obot, ntre mmọ ẹsisan̄a n̄kpọ nte kilomita 19 mbemiso ẹsịmde ebiet emi mmọ ẹyomde ndikwọrọ ikọ. Ndusụk ini, mmọ ẹsidụk ubom ẹwat n̄kpọ nte hour iba man ẹkekwọrọ ikọ ke mme isuo eken. Isimemke utom ndinam utọ isan̄ emi ke ukwọedịm. Utu ke nditie ntre ke ufọk ikwọrọke ikọ, mmọ ẹsida ini oro ẹnọ etop ẹsọk mme owo edieke ememde urua.

Greg ọdọhọ ke isibem iso isiak enyịn̄ imọ ke etop oro. Ekem enye adian do ete: “Enyene se nyomde ndiwụt fi ke Bible.” Enye ọdọhọ ke itien̄wed emi imọ isimade nditịn̄ mban̄a edi John 17:3. Enye ete ke imọ ima iwet ikọ itien̄wed emi, imesibụp mbụme iba emi: Anie edi ata Abasi? Anie onyụn̄ edi Jesus Christ? Ekem idọhọ owo oro ọbọrọ. Edieke owo oro ọbọrọde, enye ẹsifiak ewet ikọ itien̄wed efen, utọ nte Psalm 83:18. Edieke owo oro akade iso ndibọrọ, enye esibụp m̀mê enye akpama  ikokot enye ke fon man ika iso ke nneme oro. Greg ye Alma ẹdọhọ ke ediwak owo ẹsinyịme.

Mma kiet emi Greg ye Alma ẹkenọde text ama enyene ediwak mbụme Bible, ntre mmọ ẹma ẹnọ enye ediwak text, enye onyụn̄ ọbọrọ. Mma oro ama enyịme mmọ ẹkpep Bible ye imọ. Ekem enye ama etịn̄ se enye ekekpepde ke Bible ọnọ eyen eyeneka esie ye owo itieutom mmọ. Mmọ mbita ẹma ẹna baptism.