Be ka se isịnede

Be ka udiana n̄kpọ

Be ka se isịnede

Mme Ntiense Jehovah

Efịk

N̄wedisua Mme Ntiense Jehovah 2015

 NTE ẸKWỌRỌDE IKỌ ẸNYỤN̄ ẸNỌDE UKPEP KE OFỤRI ISỌN̄

Africa

Africa
  • IDỤT 58

  • IBATOWO 994,839,242

  • MME ASUANETOP 1,421,375

  • UKPEPN̄KPỌ BIBLE 3,516,524

Mmọ Ẹma Ẹtiene Andikpep Mmọ

José edi akparawa onyụn̄ edi asiakusụn̄ ofụri ini. Enye odụn̄ ekpere obio emi ẹkotde Luanda ke Angola. Enye esikpep n̄wed ke ufọkn̄wed kiet emi ekperede Ufọkmbono Obio Ubọn̄. Nditọ ufọkn̄wed 86 emi enye esikpepde n̄wed ẹma enye etieti ẹnyụn̄ ẹkpono enye sia enye ọdiọn̄ọ ndikpep n̄kpọ onyụn̄ odu uwem nte Christian. Sia mbono esop emi enye esikade ke ufọturua esitọn̄ọde  ke n̄kanika inan̄ mbubreyo, enye ama eben̄e ete ẹsiyak imọ ibak ikpọn̄ ufọkn̄wed usen oro. Enye esito ufọkn̄wed ebe aka Ufọkmbono Obio Ubọn̄.

Ndusụk nditọ ufọkn̄wed José ẹma ẹsikere m̀mê nso isinam enye abak ọnyọn̄ ntre, ẹnyụn̄ ẹkere m̀mê enye esika m̀mọ̀n̄. Usen kiet, nditọ ufọkn̄wed iba ẹma ẹtiene enye man ẹkese se enye esikade, ẹnyụn̄ ẹkedụk mbono esop. Nte ini akakade, owo ita en̄wen ẹma ẹtiene ẹdụk mbono esop ke usen emi José akanamde n̄kpọ ke Esoputom. Ẹma ẹmen n̄kpọ emi ẹketịn̄ ẹnọ nditọwọn̄ eken emi enye esikpepde n̄kpọ. Ke urua oro eketienede, nditọ ufọkn̄wed 21 ẹkedi ẹdidụk mbono esop. Nditọete ẹma ẹbụp mmọ ke Ufọkmbono Obio Ubọn̄ m̀mê mmọ ẹkpema ẹkpep Bible ye mmọ, ediwak ke otu mmọ ẹma ẹnyịme. Ke ini mbon emi ẹkekade mbono esop ẹkemende ndusụk n̄wed nnyịn ẹka ufọkn̄wed, nditọ ufọkn̄wed eken ẹma ẹma se ikpepde ẹnyụn̄ ẹtọn̄ọ ndidụk mbono esop. Etisịm ini emi n̄wed etrede, owo 54 ke otu 86 emi José esikpepde n̄wed ẹma ẹduk mbono esop. José ọdọhọ ke owo 23 ke otu oro ke ẹsịn idem ẹkpep n̄kpọ, ke ẹnyụn̄ ẹdụk mbono esop.

Ndi Efakutom Ikponke Ikem?

Nigeria: Joseph ye Evezi ke ẹda n̄kpọ ubre DVD ẹwụt mme owo vidio

Joseph ye Evezi ẹdi mme akpan asiakusụn̄ ke Nigeria. Ke ini ẹkenọde mmọ ẹka obufa efakutom, ediwak mme asuanetop ke efakutom oro, emi mîkamaha nte efakutom oro etiede ẹma ẹdọhọ mmọ ẹte: “Efakutom nnyịn ikponke ikem. Imọkwọrọ ikọ ke ofụri efakutom emi ata ediwak ini.” Ke isua kiet ama ekebe, Joseph ama ewet ọnọ n̄kọk itieutom ete: “Idụhe usen emi nnyịn  mîkwọrọke ikọ ke efakutom emi. Mme owo ẹsua nnyịn, ndusụk inyụn̄ imaha ndikpan̄ utọn̄, edi ke ika iso ikwọrọ ikọ. Ke ini ikade ukwọrọikọ, imesikama ekpri n̄kpọ emi ekemede ndibre DVD man ibre vidio inọ nditọwọn̄, n̄kparawa, ye ikpọ owo. Ke ntak emi, kpukpru ọfiọn̄, ami ye n̄wan mi imesinịm ukpepn̄kpọ Bible 18, ndusụk ini nnyịn isikemeke ndika n̄kese kpukpru nditọ ukpepn̄kpọ Bible nnyịn. Nditọwọn̄ ẹsidọhọ ibre ‘vidio Kokoete’ inọ mmimọ.”

 Mme Owo ke Isuo Kiet Ẹdọhọ Ẹdin̄wam Mmimọ

Congo (Kinshasa): Ke ẹkwọrọ ikọ ẹnọ ọkọiyak

Ke April 2014, mme ọkọiyak emi ẹdụn̄de ke isuo kiet emi ekerede Ibinja ke Lake Kivu ẹma ẹwet leta ẹnọ ẹsọk n̄kọk itieutom ke Congo (Kinshasa). Mme ọkọiyak emi ẹma ẹsito isuo oro ẹka mme obio en̄wen ke n̄kann̄kụk ẹkenyam iyak mmọ. Isan̄ kiet emi mmọ ẹkekade Bukavu ndinam mbubehe mmọ, mmọ ẹma ẹkụt Mme Ntiense Jehovah. Ẹma ẹkwọrọ ikọ ẹnọ mmọ ẹnyụn̄ ẹnọ mmọ Bible ye ndusụk n̄wed nnyịn.

Se mme ọkọiyak emi ẹkekotde ama enem mmọ, mmọ ẹnyụn̄ ẹmen ẹketịn̄ ẹnọ mbon en̄wen ke edem mmọ. Ediwak owo do ẹma ẹma se mmọ ẹkekopde, ntre mme ọkọiyak oro ẹma ẹdọhọ owo mmọ kiet afiak aka Bukavu ọkọdọhọ Mme Ntiense ẹdi Ibinja. Ke ini enye emi ẹkedọn̄de mîkekwe Mme Ntiense, enye ama ewet leta ọnọ n̄kọk itieutom ete: “Mbọk ẹdọhọ Mme Ntiense ẹdin̄wam nnyịn idiọn̄ọ Bible nte mmọ ẹdiọn̄ọde, man itiene idu uwem ke nsinsi. Imọn̄ inọ mmọ udia ye ufọk. Mmeben̄e idem ndinọ isọn̄ mi ẹda ẹbọp ufọkabasi. Mme itie N̄wed Abasi emi ikotde ke mme n̄wed mbufo ẹnam idiọn̄ọ ke mme oku ye mme pastọ isikpepke nnyịn akpanikọ. Imenịm ke imokụt ido ukpono emi edide ata ido ukpono. Ediwak owo mi ke Ibinja emi ẹkpemade ndikpep Bible nnyụn̄ n̄kabade ndi Mme Ntiense Jehovah.”

Se ẹkewetde ke leta emi okowụt ke owo 40 ke isuo oro ẹkpema ndikpep Bible. Mbon emi ẹdụn̄de ke Ibinja ẹwak ẹbe 18,000, edi Ntiense ndomokiet idụhe do. Inikiet inikiet, n̄kọk itieutom ẹma ẹnọ mme akpan asiakusụn̄ iba emi ẹsemde usem Ibinja ẹte ẹka do ẹkekwọrọ ikọ.

Pastọ Okop Ukwọrọikọ Ndien

“Ndifiakke Editi aba tutu amama.” Se pastọ ọwọrọetop ufọkabasi Protestant kiet ke South Africa eketịn̄de edi  oro. Nso ikanam pastọ ufọkabasi oro odụk Editi ke April 2014? Nditọete iba, kiet afia kiet obubịt, ẹkesan̄a ntre ẹka ukwọrọikọ ẹnyụn̄ ẹkekọn̄ usụn̄ ufọk pastọ emi. Mmọ ẹma ẹdọdiọn̄ọ ke ete emi idimaha ndineme nneme ye mmimọ. Kiet ke otu nditọete oro, emi ekerede Adaine ọdọhọ ete: “Idem ama akpa nnyịn nte ọbọn̄ emi ekeberede usụn̄ ọdọhọ idụk idi. Ima ineme nneme ibịghi. Idem ama akpa enye ndikụt nte afia owo asan̄ade ye obubịt owo ọkwọrọ ikọ ọnọ enye ke usem mmọ. Pastọ emi ama ọtọn̄ọ ndikpep Bible.”

Adaine aka iso ete: “Ete emi edi isụn̄utom afiak edi pastọ ke se ibede isua 40, edi ke ini enye esịmde isua 80 ke enye okokụt ibọrọ kpukpru mbụme emi enye ekesibụpde. Enye ama n̄wed Kpebe Mbuọtidem Mmọ. Ima ikpep n̄kpọ ye enye, enye esimụm ndusụk n̄kpọ emi ikpepde ọdọn̄ ke ibuot onyụn̄ emen ọkọkwọrọ ọnọ mbon ufọkabasi esie. Enye ama emen n̄wed Nso ke Bible Enen̄ede Ekpep? okowụt mbon ufọkabasi esie onyụn̄ ọdọhọ mmọ ete, ‘Edieke Mme Ntiense Jehovah ẹdade n̄wed emi ẹdi ufọk mbufo ndikwọrọ ikọ nnọ mbufo, ẹkûbịn mmọ, ẹkpan̄ utọn̄ ẹkop se mmọ ẹtịn̄de sia nti n̄kpọ ọdọn̄ọ ke n̄wed emi.’”

Pastọ oro ama ọdọhọ Adaine ete ke ikpọ owo ufọkabasi mmimọ ẹma ẹtịn̄ ikọ ye imọ etieti ẹnyụn̄ ẹdọhọ yak imọ ikûdedei itịn̄ ikọ iban̄a Mme Ntiense Jehovah aba ke ini imọ inịmde ederi. Ete emi ikọfiọkke se akpanamde aba. Edi Adaine ama eti mbụk ọkwọrọikọ kiet ke Myanmar, emi odude ke N̄wedisua Mme Ntiense Jehovah Eke 2013. Ke ini Adaine okokotde mbụk emi ọnọ pastọ oro, enye ama ọdọhọ ete: “Ami ke etịn̄ emi! Idịghe ekpri  ubiere ke ndinam emi, edi ndibiatke ini ndibiere n̄kpọ emi.”

Akpa ini emi pastọ oro okodụkde Editi ekedi ke April 14, 2014, onyụn̄ ọdọhọ ke tutu amama ke imọ idifiakke aba Editi. Enye ọdọhọ ke imọn̄ ikpọn̄ ufọkabasi oro, ke imọ idinyụn̄ inyeneke mbubehe ndomokiet ye mmọ aba.

Ke Ẹyom Mme Owo ke Ikọt Cocoa

Ghana: Baffour ye Aaron ke ẹkwọrọ ikọ ke ikọt cocoa

Baffour ye Aaron ẹdi mme akpan asiakusụn̄ ke Bokabo ke Ghana. Ẹsitọ cocoa ke obio emi. Ẹbọp ufọk ntomo ntomo ke efakutom emi, ndien ẹsisan̄a usụn̄ikọt ẹka nsio nsio ufọk do. Owo ekeme ndisop usụn̄ edieke enye mîkpemeke! Usen kiet, Baffour ye Aaron ẹma ẹdụk usụn̄ emi akanam mmọ mîsan̄ake ẹkesịm ebiet emi mmọ mîsịmke akanam. Mmọ ẹma ẹkụt Michael ye Patience emi ẹkemade ukwọrọikọ mmọ ẹnyụn̄ ẹnyịmede ẹkpep mmimọ Bible. Nte ini akakade, Michael ama ọdọhọ mme akpan asiakusụn̄ emi ete: “Isua iba idahaemi nnyịn ikaha ufọkabasi aba sia ima ikụt ke se mmọ ẹkpepde isịneke ke Bible. Tọn̄ọ oro, ami ye Patience imesitie kpukpru mbubreyo ikpep Bible m̀mê iyokụt ibọrọ mbụme nnyịn. Ima isibọn̄ akam ite Abasi an̄wam nnyịn idiọn̄ọ akpanikọ.” Ebiet emi ẹdụkde mbono esop oyom usụn̄, edi mmọ ẹma ẹtọn̄ọ ndidụk inikiet inikiet. Ke isua emi ebede, mmọ mbiba ẹma ẹna baptism ẹnyụn̄ ẹdi mme asiakusụn̄ ofụri ini. Idahaemi mmọ mbiba n̄ko ẹsisan̄a ke usụn̄ikọt ẹka nsio nsio ufọk mme owo ke ikọt cocoa oro ẹkeyom mbon en̄wen emi ‘ẹbọn̄de akam ẹte Abasi an̄wam mmimọ idiọn̄ọ akpanikọ.’

Michael ye Patience ẹsan̄a emi ke ikọt cocoa