Nte oyomde okụbọde

Mek usem

Be ka udiana n̄kpọ

Be ka se isịnede

Be ka se isịnede

Mme Ntiense Jehovah

Efịk

N̄wedisua Mme Ntiense Jehovah 2015

 DOMINICAN REPUBLIC

Unyekisọn̄ Etịbe ke Haiti

Unyekisọn̄ Etịbe ke Haiti

Mbon Emi Ẹsemde Chinese Ẹdụk Esop

Ke 2005, n̄kọk itieutom Dominican Republic ẹma ẹmek eyen China kiet ke Bethel emi ekekerede Tin Wa Ng akpan asiakusụn̄ ẹnyụn̄ ẹdọhọ enye ọkọkwọrọ ikọ ọnọ mbon emi ẹsemde Chinese ke idụt oro. Enye akamana onyụn̄ okpon ke Dominican Republic. Ete ye eka esie ẹketo China ẹdidụn̄ ke Santo Domingo.

Ke January 1, 2008, ẹma ẹsiak esop Mandarin Chinese ke Santo Domingo, ndien ke 2011 ẹma ẹtọn̄ọ otu emi ẹsemde usem emi ke Santiago. Mme asuanetop 70, mme asiakusụn̄ ofụri ini 36, ye ediwak mme asiakusụn̄ unọ un̄wam ẹsisịn idem ẹnịm ukpepn̄kpọ Bible 76 kpukpru ọfiọn̄.

 Ẹtọn̄ọ Ndiyom Mbon Emi Ẹsemde Ikọmbakara

Ke 2007, esop 376 ẹkedu, mme asuanetop 27,466 ẹdu, ẹsinyụn̄ ẹkpep owo 49,795 Bible. Mbon emi ẹsemde Ikọmbakara ẹma ẹwak esịt, edi esop Ikọmbakara ikodụhe. Ntre ke April 2008, n̄kọk itieutom ẹma ẹdọhọ Donald Elwell ye Jayne an̄wan esie emi ẹkedide mme isụn̄utom ẹka Santo Domingo ẹketọn̄ọ otu emi ẹsemde Ikọmbakara. Mme asuanetop ifan̄ emi ẹkenen̄erede ẹma ukwọrọikọ ẹma ẹsan̄a ẹse mme itie emi mbon Ikọmbakara ẹkedụn̄de, ekem mmọ ẹbahade efakutom emi man ẹkeme ndikwọrọ ikọ nnọ kpukpru owo.

Nte mmọ ẹkesịnde idem ẹkwọrọ ikọ ama anam mme owo ẹtọn̄ọ ndiwak ke otu Ikọmbakara emi okodude ke Santo Domingo. Ke July 2009, ẹma ẹtọn̄ọ esop Ikọmbakara do, mme asuanetop 39 ke ẹkenyụn̄ ẹda ẹtọn̄ọ. Ẹma ẹtọn̄ọ ke mme itie en̄wen n̄ko ke Dominican Republic. Etisịm November 2011, esop Ikọmbakara itiaba ye otu kiet ẹkedu ke idụt emi.

N̄wan Emi Edide Inan ye Nnan Anam N̄kpọ Jehovah

Akpan asiakusụn̄ ke omụm Lorys ubọk anam idiọn̄ọ

Lorys emi ekedide eyenakpa toto ke ekpri, ọdọn̄ọ Usher Syndrome. Enye ikopke n̄kpọ toto ke emana, inyụn̄ ikwe n̄kpọ ọfọn ọtọn̄ọde ke ini enye edide isua 16. Enye ekeme ndikụt n̄kpọ ekpri ekpri uwemeyo edi ikwe n̄kpọ ndomokiet okoneyo. Eyo ama ofụk owo idem, enye esimomụm mme owo ubọk anam idiọn̄ọ man ẹdiọn̄ọ se enye oyomde.

Akpan asiakusụn̄ kiet ye n̄wan esie ẹkekụt Lorys ke ini enye ekedide isua 23. Ini oro, Lorys okodụn̄ ye ete kiet emi enye akamande eyen ọnọ, emi mîkopke ikọ n̄ko. Adiaha mmọ emi ekedi isua kiet ini oro onyụn̄ okop ikọ. Mmọ ẹma ẹkot Lorys mbono esop, enye onyụn̄ aka. Se enye ekekpepde do ama enem enye etieti.

 Lorys ama ọsọsọp anam se enye ekekpepde. Ke uwụtn̄kpọ, ke ini enye ọkọdiọn̄ọde ke ifọnke nte imọ idụn̄de ye ete oro mîdọhọ imọ kan̄a, enye ama eneme n̄kpọ emi ye ete oro onyụn̄ ọdọhọ enye ke ọfọn mmimọ inam ndọ ndien, sia imọ iyomke ndibiat Ibet Abasi aba. Se enye eketịn̄de ama akpa ete oro idem tutu enye enyịme ndidọ enye.

Ke ẹma ẹkenam ndọ mmọ ẹma, Lorys ama edi  asuanetop, ibịghike-bịghi enye ana baptism. Nte enye okosụk ekpepde Bible ye Mme Ntiense Jehovah, ẹma ẹkpep enye Usem Idiọn̄ọ Mbon America. Enye ke ekpep eyen esie usem emi, ke onyụn̄ ekpep enye Ikọ Abasi.

Akamba Unyekisọn̄ Etịbe ke Haiti

Unyekisọn̄ emi eketịbede ke Tuesday, January 12, 2010, ama abiat n̄kpọ etieti ke Haiti. Eyebịghi mbemiso mbon Dominican Republic ye mbon Haiti ẹfre utọ nnama oro. Otu Emi Ẹsede Ẹban̄a Utom Mme Ntiense Jehovah ama ọdọhọ n̄kọk itieutom Dominican Republic ẹnọ n̄kọk itieutom Haiti okụk ẹda ẹn̄wam mme owo. Okụk emi ẹkeyomde ndinọ ikedịghe ekpri okụk, ẹkenyụn̄ ẹdọn̄ abiausọbọ Bethel emi okokponde, okon̄, ofiom ete emen okụk oro ọsọk mmọ.

Abasi akanam ẹdọn̄ Brọda Batista utom emi sia ke ini enye okoyomde ndibe ndụk idụt oro, ẹma ẹdọhọ  enye ke ẹyoyom mbon emi ẹkemede ndisọbọ mme owo idem. Ẹma ẹtan̄ ediwak mbon emi ẹkedade unan idiọk idiọk ke ini unyekisọn̄ oro ẹka Itie Mbono emi ekekperede n̄kọk itieutom Haiti man ẹkesọbọ mmọ idem do. Ke ini nditọete ke Haiti ẹkediọn̄ọde ke owo emi ẹkenọde okụk ẹsọk mmimọ edi dọkta, mmọ ẹma ẹkot n̄kọk itieutom Dominican Republic ẹbụp m̀mê mmọ ẹkeme ndiyak Brọda Batista odu ke Haiti an̄wam mmimọ. Mmọ ẹma ẹnyịme. Nte Abasi akanamde ẹsọsọp ẹn̄wam nditọete nnyịn edi oro ke unyekisọn̄ oro ama eketịbe.

Nditọete ẹma ẹn̄wam etieti ke ini unyekisọn̄ emi eketịbede ke Haiti ke 2010

Nditọete emi ẹsidepde n̄kpọ ẹnọ n̄kọk itieutom Dominican Republic ẹma ẹsọsọp ẹbịne mbon emi mmọ ẹsibọde n̄kpọ ẹdep ẹkedep ata ediwak edesi, ọkọti, ye mme udia eken ẹnọ ẹka Haiti ke n̄kanika ebe iba n̄kpọusen ke Thursday, January 14. Akpa n̄kpọ emi ẹkemende ke idụt en̄wen ẹken̄wam mme owo ke Haiti ekedi emi. Kpa ke Thursday oro, dọkta ita en̄wen ẹma ẹto Dominican Republic ẹwat hour itiaba ẹkesịm n̄kọk itieutom Haiti man ẹken̄wam. Eyo ama ekpere ndikụt ke ini mmọ ẹdide ẹdisịm, edi utu ke mmọ ndika ebiet emi mmọ ẹdidụn̄de, mmọ ẹkebe nnennen ẹbịne mbon oro ẹkedade unan. Ẹma ẹken̄wam mmọ tutu ke ufọt okoneyo. Ke ndan̄nsiere, dọkta inan̄ en̄wen ye nurse inan̄ ẹma ẹto Dominican Republic ẹkesịm do. Ẹma ẹdiọn̄ ekpri ubet ke Itie Mbono oro ẹsida ẹsiak mme owo idem. Mbemiso urua oro eketienede okụre, nditọete 12 emi ẹma ẹsọbọ owo 300 idem.

Edieke idem owo emi ẹsọbọde enen̄erede ọdiọk, ẹma ẹsimen enye ẹka Dominican Republic. Se ẹkesinamde edi oro kpukpru usen. Ndusụk ini, moto emi ẹkesimende n̄kpọ emi ẹnọde ẹken̄wam mme owo ke Haiti ẹkesimen utọ mbon emi aka nsio nsio ufọkibọk  ke Dominican Republic. N̄kọk itieutom ẹma ẹdọhọ Mme Otu Uka N̄kese Mbon Udọn̄ọ ẹka ẹkese nditọete emi man ẹdọn̄ mmọ esịt, ẹnyụn̄ ẹkụt ẹte ke ẹnọ mmọ se mmọ ẹyomde ẹnyụn̄ ẹsọbọ mmọ idem. Nditọete ke Dominican Republic ẹma ẹsinọ mbon emi ẹsan̄ade ye mbon mmọ ẹka usọbọ do ufọk ye udia.

Mme Ntiense Jehovah ẹma ẹnọ ata ediwak n̄kpọ ẹda ẹken̄wam nditọete mmọ, esịnede udia emi ekemde owo 400,000

Nte ikọt Jehovah ẹkeyakde n̄kpọ atak mmọ, ẹnyụn̄ ẹsịnde idem ẹn̄wam nditọete mmọ ke ini unyekisọn̄ emi owụt ke se Bible etịn̄de ke Mme N̄ke 17:17 edi akpanikọ. Itie Bible oro ọdọhọ ete: “Ata ufan amama ufan kpukpru ini, onyụn̄ edi eyeneka emi amanade ọnọ ini nnanenyịn.” Se isiwakde nditịbe ke ini emi afanikọn̄ esịmde ikọt Jehovah esiwụt ke Jehovah esida edisana spirit ye nditọete ke esop an̄wam ikọt esie, idem ke ini mfịna emi ekemede ndida owo ibuot. Ẹma ẹn̄wam mme owo ke ediwak ọfiọn̄. Mme Ntiense Jehovah ẹma ẹnọ ata ediwak n̄kpọ ẹda ẹken̄wam nditọete mmọ, esịnede udia emi ekemde owo 400,000. Nditọete 78 emi ẹdide mme dọkta ye mme nurse ke nsio nsio itie ke ererimbot ẹma ẹkpọn̄ utom mmọ ẹdi ẹdisọbọ mme owo idem. Ediwak mbon en̄wen ẹma ẹtiene ẹdi ẹdin̄wam. *

^ ikp. 19 Kot mbụk emi ke Ẹdemede! (Ikọmbakara) eke December 2010, page 14-19.