Nte oyomde okụbọde

Mek usem

Be ka udiana n̄kpọ

Be ka se isịnede

Be ka se isịnede

Mme Ntiense Jehovah

Efịk

N̄wedisua Mme Ntiense Jehovah 2015

 DOMINICAN REPUBLIC

Ufọkabasi Catholic Adiana ye Ukara Trujillo

Ufọkabasi Catholic Adiana ye Ukara Trujillo

N̄KPỌ eketie didie ye Trujillo ye Ufọkabasi Catholic? Owo kiet emi esinamde ndụn̄ọde aban̄a ukara ọkọdọhọ ete: “Ofụri isua emi Trujillo akakarade, ọtọn̄ọde ke 1930 esịm 1961, Ufọkabasi Catholic ye ukara Dominican Republic ẹkedia ubọk udia kiet; ekedi owo ibak emi an̄wam Ufọkabasi, Ufọkabasi ẹn̄wam ukara esie.”

Ke 1954, Trujillo ama aka Rome ekesịn ubọk ke n̄wed ye Pope ndien n̄wed emi akanam Ufọkabasi Catholic ẹnyene odudu ke Dominican Republic. Germán Ornes emi Trujillo ekesitịn̄de ikọ ọnọ ọkọdọhọ ete: “Sia Ufọkabasi Dominican Republic ẹkemade ukara Trujillo, n̄wed emi mmọ ẹkesịnde ubọk do ama anam kpukpru owo ẹda ye ‘Ọbọn̄ Owo’ [Trujillo]. Mme oku eken ẹma ẹdiana ye Ricardo Pittini ye Octavio Beras emi ẹkedide ikpọ Bishop ẹtoro ukara Trujillo.”

Ornes ama adian do ete: “Pope ama esidọn̄ ekọm ọnọ  Trujillo ke ubọk ke ubọk. . . . Francis Cardinal Spellman emi Pope okosiode ọdọn̄ aka mboho mbon Catholic emi Trujillo okodiomide ke Ciudad Trujillo ke 1956 ama ada etop inemesịt ọsọk Trujillo. Cardinal Spellman ama oto New York edi ndien Trujillo ke idemesie ekedimen enye nte ọbọn̄. Ke ndan̄nsiere, ndise emi mmọ mbiba ẹfatde idemmọ ama odu ke akpa page kpukpru n̄wedmbụk n̄kpọntịbe Dominican Republic.”

Ke 1960, n̄wedmbụk n̄kpọntịbe emi ẹkotde Time ọkọdọhọ ete: “Tutu emi Trujillo ye ufọkabasi ke ẹdadia ubọk udia kiet. Ricardo Pittini emi edide akwa Bishop emi esede aban̄a America edi isua 83 idahaemi inyụn̄ ikwe usụn̄ aba. Edi isua inan̄ emi ẹkebede enye ama esịn ubọk ke leta emi ẹkewetde ẹnọ New York Times ẹtoro Trujillo ẹnyụn̄ ẹdọhọ ke ‘mbon Dominican Republic ẹma, ẹnyụn̄ ẹkpono “owo ibak” emi.’”

Ke Ufọkabasi Catholic ẹma ẹkeda ye Trujillo ke isua 30, mmọ ẹma ẹtọn̄ọ ndidian̄ade nsan̄a ye enye ke ini mme owo mîkamaha ukara esie aba. Anam-ndụn̄ọde emi iketịn̄de iban̄a ke ntọn̄ọ afiak ọdọhọ ete: “Ke ini mme owo ẹkenen̄erede ẹsua ukara ọbọn̄ emi ẹnyụn̄ ẹyomde ukara mbio obio, Ufọkabasi Catholic emi ẹkedide ufan Trujillo ke anyan ini ẹma ẹtọn̄ọ ndidian̄ade n̄kpọn̄ enye.”

Ke 2011, Ufọkabasi Catholic ẹma ẹwet leta ẹkpe mbon Dominican Republic ubọk. Ẹma ẹsịn leta emi ke n̄wedmbụk n̄kpọntịbe emi ẹkotde Dominican Today. Mmọ ẹkedọhọ ẹte: ‘Imenyịme ke ima inam ndudue, ke ima inyụn̄ ikpọn̄ se isikpepde, ikpọn̄ utom Abasi emi ikpanamde, inyụn̄ in̄wamke mme owo. Emi anam ikpe kpukpru mbon Dominican Republic ubọk ite ẹfen ẹnọ nnyịn ẹkûnyụn̄ ẹyat esịt ye nnyịn aba.’