Nte oyomde okụbọde

Mek usem

Be ka udiana n̄kpọ

Be ka se isịnede

Be ka se isịnede

Mme Ntiense Jehovah

Efịk

N̄wedisua Mme Ntiense Jehovah 2015

 DOMINICAN REPUBLIC

Se Ẹkenamde ke Ini Ẹtọn̄ọde Ndiwak ke Esop

Se Ẹkenamde ke Ini Ẹtọn̄ọde Ndiwak ke Esop

Ana “Kpukpru Orụk Owo Ẹnyene Edinyan̄a”

Uduak Jehovah edi yak “kpukpru orụk owo ẹnyene edinyan̄a ẹnyụn̄ ẹsịm nnennen ifiọk akpanikọ.” (1 Tim. 2:4) Emi anam Mme Ntiense Jehovah ke Dominican Republic ẹsịn idem ẹyom ndikwọrọ ikọ nnọ kpukpru owo ke idụt mmọ, idem ye mbon emi ẹdude ke ufọk-n̄kpọkọbi.

Ke 1997, ebe ye n̄wan emi ẹdide mme akpan asiakusụn̄, emi ẹkesikade ufọk-n̄kpọkọbi ke Najayo ke San Cristóbal ẹma ẹkekụt Gloria emi ekedide isua 23. Eyenan̄wan emi ekedi eyen Colombia, edi ẹkekọbi enye do ke ntak emi anyamde n̄kpọsọn̄ ibọk. Eyenete an̄wan kiet emi ẹkekọbide ke ufọk-n̄kpọkọbi oro, emi mîkenyeneke se eduede, ama esineme Ikọ Abasi ye enye. Mme akpan asiakusụn̄ emi ẹma ẹda Reasoning From the Scriptures ye mme n̄wed en̄wen ẹsọk enye man enye ada ọbọrọ ediwak mbụme emi Gloria ekesibụpde enye. Nte Gloria akamade ndikpep n̄kpọ ama anam ediwak mbon n̄kpọkọbi eken ẹma nditiene n̄kpep n̄kpọ ke ini nditọete oro ẹdide ufọk-n̄kpọkọbi oro.

 Gloria ama okpụhọde etieti, ndien ke 1999 enye ama odot ndidi asuanetop emi mînaha baptism. Enye ama esikwọrọ ikọ hour 70 ke ufọk-n̄kpọkọbi kpukpru ọfiọn̄, onyụn̄ ekpep mbon n̄kpọkọbi itiokiet Bible. Ke 2000, enye ama ewet n̄wed ọnọ adaibuot ukara onyụn̄ eben̄e enye ete efen ọnọ imọ onyụn̄ anam ẹsio imọ ke ufọk-n̄kpọkọbi. Eti uwem esie ama anam adaibuot ukara enyịme. Ẹma ẹsio enye ke ufọk-n̄kpọkọbi ẹnyụn̄ ẹnam enye afiak ọnyọn̄ Colombia. Ke enye ama ekesịm do ke 2001, ibịghike-bighi enye ama ana baptism, kpa ye emi mbonufọk mmọ mîkoyomke enye ana.

Gloria Cardona ọkọdiọn̄ọ akpanikọ ke ini enye okodude ke ufọk-n̄kpọkọbi. Idahaemi enye ye ebe esie ẹdi mme asiakusụn̄

Ke Gloria ama akana baptism, enye ama ọtọn̄ọ usiakusụn̄. Enye ama ọdọ ebiowo, ekem mmọ mbiba ẹdi mme asiakusụn̄ ofụri ini. Idahaemi mmọ ẹdu ke ebiet emi ẹyomde un̄wam ke Colombia. Gloria an̄wam ediwak owo oro enye ekpepde Bible ẹyak idem ẹnọ Abasi ẹnyụn̄ ẹna baptism. Enye ọdọhọ ke akakan usụn̄ emi imọ ikemede ndikọm Jehovah ke kpukpru se enye anamde ọnọ imọ edi imọ ndinam mbon en̄wen ẹdiọn̄ọ akpanikọ kpa ye nte enye akanamde imọ idiọn̄ọ.

Se iketịbede inọ Gloria owụt ke ọkpọkọm owo odu ke ufọk-n̄kpọkọbi, enye ekeme ndisụk n̄kpep akpanikọ. Nditọete ẹma ẹto n̄kọk itieutom ẹkekụt ikpọ owo emi ẹsede ẹban̄a ufọk-n̄kpọkọbi ẹnyụn̄ ẹben̄e mmọ ẹsiyak Mme Ntiense ẹka ediwak ufọk-n̄kpọkọbi ẹkekpep mme owo Bible. Ẹma ẹnyịme irenowo 43 ye iban 6 ẹsika ufọk-n̄kpọkọbi 13 ẹkekpep mme owo Bible.

“Nam Mme Urụk Tent Fo Ẹniọn̄”

Ke N̄wedisua 1999, Dominican Republic ẹkenyene mme asuanetop 21,684, esop 342, ẹkenyụn̄ ẹnịm ukpepn̄kpọ Bible 34,380. Owo 72,679 ẹkedụk Editi. Kpukpru emi anam ikọt Jehovah ẹsọsọp ẹnam se Isaiah  eketịn̄de ke Isaiah 54:2, ete: “Nam ebiet tent fo etetịm an̄wan̄a. Nyụn̄ yak mmọ ẹtat mme ọfọn̄ tent akwa ebietidụn̄ fo. Kûfam ubọk. Nam mme urụk tent fo ẹniọn̄.”

Edi akpan mfịna kiet ekedi nte mmọ ẹdisan̄ade inyene Itie Mbono emi edikemde mme asuanetop emi ẹkewakde ke usen ke usen mi. Ke 1996, ẹma ẹbọp Itie Mbono emi akadade ekpere n̄kọk itieutom ke Santo Domingo ẹma. Nditọete do ye ke ofụri mbọhọ oro ẹkesinịm mbono mmọ do. Edi Itie Mbono emi okodude ke Villa González, emi nditọete eken ẹkesinịmde mbono, ama ọdiọk etieti tutu edi se akpanade ẹdiọn̄ mîdịghe ẹbọp obufa.

Ke 2001, Otu Emi Ẹsede Ẹban̄a Utom Mme Ntiense Jehovah ẹma ẹnyịme ẹbọp obufa Itie Mbono emi edikemde owo 2,500 ke itie emi akani oro okodude ke Villa  González. Esịt ama enem nditọete n̄ko ndikop ke ẹmọn̄ ẹbọp itie emi edinịmde Ufọkn̄wed Unọ Mme Asan̄autom Ukpep (idahaemi ẹdikot Ufọkn̄wed Mme Ọkwọrọ Obio Ubọn̄). Ẹkedọhọ ke ẹyebọp enye ekpere Itie Mbono oro, ẹdọn̄ mme ubet, itie ukpep n̄wed, itie ubonn̄wed, itie utemudia, ye itie udia. Ke 2004, Theodore Jaracz emi ekesịnede ke Otu Emi Ẹsede Ẹban̄a Utom Mme Ntiense Jehovah, ama edinọ utịn̄ikọ man ẹyak obufa ufọk oro ẹnọ Abasi. Tọn̄ọ ini oro, ẹnịm ufọkn̄wed emi utịm ikoduopenan̄.