Nte oyomde okụbọde

Mek usem

Be ka udiana n̄kpọ

Be ka se isịnede

Be ka se isịnede

Mme Ntiense Jehovah

Efịk

N̄wedisua Mme Ntiense Jehovah 2015

 DOMINICAN REPUBLIC

“Obio Ubọn̄ Abasi Itiehe Mi Nte Ndap”

Efraín De La Cruz

“Obio Ubọn̄ Abasi Itiehe Mi Nte Ndap”
  • AKAMANA KE 1918

  • ANA BAPTISM KE 1949

  • SE IBAN̄ADE ENYE Kpa ye oro ẹkesịnde enye ke ufọk-n̄kpọkọbi itiaba ẹnyụn̄ ẹtịmde enye idiọk idiọk, akananam enye itreke ndikwọrọ etop Obio Ubọn̄.

KE 1948, ami, Paula an̄wan mi, ye adiaha mi ima itọn̄ọ ndidụk mbono esop Mme Ntiense Jehovah ke Blanco Arriba. Ikesisan̄a kilomita 40 uka ye unyọn̄, edi akananam nnyịn ifiakke mbono esop. Ami ye Paula ima ina baptism ke January 3, 1949.

Ke ọfiọn̄ itiokiet ẹbede, ẹma ẹmụm mi ye ndusụk owo ke esop nnyịn ẹnyụn̄ ẹbiere n̄kpọkọbi ọfiọn̄ ita ẹnọ nnyịn. Ikana ke isọn̄, ẹkesinyụn̄ ẹnọ nnyịn obubịt mboro ye tea ini kiet ke usen. Ke ẹma ẹkesio nnyịn ke ufọk-n̄kpọkọbi, ikpọ owo ukara ẹma ẹsịn nnyịn ndịk ke idem ẹnyụn̄ ẹkere ke nnyịn idikwọrọke ikọ aba. Edi ke ini isịmde ufọk, ima isidịbe idụk mbono esop inyụn̄ idịbe ikwọrọ ikọ. Sia ukara ẹkesụk ẹdọn̄de mme owo ẹyep nnyịn kpukpru ini, ikesinịm mbono esop ke ufọk owo, ke ikọt kọfi, m̀mê ke in̄wan̄. Nnyịn ikesinịmke mbono esop ke itie kiet ediwak ini, utu ke oro, ekesidi mbono esop ama oyom ndisuana, ẹsiak ebiet emi ẹdinịmde mbono esop en̄wen. Nditọete ẹkesisan̄a ikpọn̄ ẹka ukwọrọikọ, ẹsịne ọfọn̄ utom, inyụn̄  ikamake n̄wed m̀mê Bible. Kpa ye emi, ọtọn̄ọde ke 1949 tutu esịm 1959, ekesidi ndodụk, n̄wọwọrọ ke ufọk-n̄kpọkọbi. Mma nsịne ke ufọk-n̄kpọkọbi itiaba, ndusụk ini nsịne ọfiọn̄ ita, ndusụk ini ọfiọn̄ itiokiet.

Akana nnen̄ede n̄kpeme idem sia ndusụk mbon nnyịn ẹma ẹtiene ẹkọbọ mi. Ekesidi nna ke obot, nna ke in̄wan̄ mbak owo idimụm mi, edi ẹma ẹsimụm mi ndusụk ini. Ini kiet emi ẹkemụmde mi, ẹkemen mi ẹkesịn ke ufọk-n̄kpọkọbi emi ẹkotde La Victoria ke Ciudad Trujillo. Ẹkedọn̄ n̄kpọ nte owo 50 m̀mê 60 ke ubet kiet. Ke n̄kan̄ oro, ẹkesinọ nnyịn udia ikaba ke usen; ẹnọ udia emi ẹdade ibokpot ẹnam ke usenubọk ẹnyụn̄ ẹnọ ekpri edesi ye ọkọti uwemeyo. Kpukpru Mme Ntiense ke ufọk-n̄kpọkọbi oro ẹma ẹsikwọrọ ikọ ẹnọ mbon n̄kpọkọbi eken. Ima isinịm mbono esop kpukpru ini. Se ikesinamde ekedi nditịn̄ itie N̄wed Abasi emi itide ke ibuot inyụn̄ ibụk mme ifiọkutom emi ikenyenede ke ini ikwọrọde ikọ.

Ke akpatre ufọk-n̄kpọkọbi emi ẹkesịnde mi, owoekọn̄ kiet ama emen etak ikan̄ amia mi ibuot ye ọkpọn̄kan̄. Kpa ye oro umia emi ye mme ufen eken ẹkebiomode mi ndo, mme utọ idomo ntem ẹma ẹn̄wam mi nsọn̄ọ nda nnyụn̄ nyọ, ẹnyụn̄ ẹnam mi mbiere ke nditreke ndinam n̄kpọ Jehovah.

Ndi isua 96 idahaemi, nnyụn̄ ndi asan̄autom unamutom ke esop nnyịn. Okposụkedi emi mmen̄kemeke ndisan̄a isan̄ ọkpọsọn̄, mmesitie ke iso ufọk mi n̄kwọrọ ikọ nnọ owo ekededi emi ebede. Obio Ubọn̄ Abasi itiehe mi nte ndap. Mmenịm ke enye eyedi, se nnyụn̄ n̄kwọrọde nnọ mme owo edi emi ke se ibede isua 60. Uwem ke obufa ererimbot osụk ọdọdọn̄ mi kpa nte ọkọdọn̄de mi akpa usen emi n̄kopde etop Obio Ubọn̄. *

^ ikp. 11 Efraín De La Cruz ama akpa ke ini ẹkesụk ẹwetde ibuotikọ emi.