Nte oyomde okụbọde

Mek usem

Be ka udiana n̄kpọ

Be ka se isịnede

Be ka se isịnede

Mme Ntiense Jehovah

Efịk

N̄wedisua Mme Ntiense Jehovah 2015

 DOMINICAN REPUBLIC

Ẹmụm Isọn̄

Ẹmụm Isọn̄

Mmọ Ẹdikụt Akpanikọ

Juana Ventura ọkọtọn̄ọ ndikpep Bible ke ini ukara ẹketrede utom nnyịn. Enye akana baptism ke 1960, ke Akpa Ozama. Pastọ ufọkabasi kiet ke Santo Domingo akaduak ndinam ẹkọbi enye sia enye ọkọdọhọ ke Juana “atan̄ mbon ufọkabasi imọ ama.” Pastọ oro ama odomo ndiwụt ke Mme Ntiense Jehovah ẹkpep nsu ye nte ke Juana idịghe eti owo, ntre enye ama okot Juana edi ufọkabasi editịn̄ mbufa n̄kpọ emi Mme Ntiense Jehovah ẹkpepde enye.

Juana ọdọhọ ete: “Enye ama obụp mi mbụme ita emi, ‘Ntak emi mbufo mîsisịnke n̄wed imek owo? Ntak emi mbufo mîsikaha ekọn̄-ọ? Ntak emi ẹkotde idem mbufo Mme Ntiense Jehovah?’ Nte n̄kadade Bible mbọrọ mbụme esie kiet kiet, kpukpru mbon ufọkabasi esie ẹma  ẹkụbọde Bible mmọ ẹse, idem ama onyụn̄ akpa mmọ ndikụt utọ n̄kpọ oro ke Bible. Ediwak mmọ ẹma ẹdikụt akpanikọ. Kpukpru owo ke ufọkabasi oro ẹma ẹtọn̄ọ ndikpep Bible, ndien nte ini akade, owo 25 ke otu oro ẹma ẹyak idemmọ ẹnọ Jehovah.” Se iketịbede emi ama anam mme owo ẹnen̄ede ẹsịn idem ẹkwọrọ ikọ ke Santo Domingo.

Mme Ntiense Jehovah Ẹnen̄ede Ẹmụm Isọn̄

Ndutịme ama odu etieti ke ẹma ẹkewot Trujillo. N̄wedisua 1963 ọkọdọhọ ete: ‘Mbonekọn̄ ẹkedada ke kpukpru efak, mme owo ẹma ẹsịn ntịme inyụn̄ imaha ndika utom.’ Kpa ye ndutịme emi, nditọete ẹkesụk ẹkọkwọrọ ikọ ẹnyụn̄ ẹkpep mme owo n̄kpọ. Ke utịt isua utom 1963, n̄wakn̄kan ibat mme asuanetop ekedi 1,155.

Ke ini Nathan Knorr okotode ibuot itieutom edika Dominican Republic ke 1962, enye ama ọdọhọ ẹdep isọn̄ ẹbọp n̄kọk itieutom emi amanade okpon, sia utom Mme Ntiense ọkọtọn̄ọde ndikpon ke idụt oro. Ẹma ẹbọp ufọkenyọn̄ ye Ufọkmbono Obio Ubọn̄ ke isọn̄ oro. Ke Saturday, October 12, 1963, Frederick Franz emi okotode ibuot itieutom edi, ama ọnọ utịn̄ikọ emi ẹkedade ẹyak obufa n̄kọk itieutom oro ẹnọ Abasi. Se iketịbede usen oro ama owụt ke Mme Ntiense Jehovah ẹmụm isọn̄ ke Dominican Republic. Ibịghike ke oro ebede, Harry Duffield ye Paquita an̄wan esie ẹma ẹdisịm idụt oro. Mmọ ẹkedi mme akpatre isụn̄utom emi ẹkebịnde ẹsio ke Cuba.

Ke Ẹwak Kpa ye Oro Ndutịme Odude

Ke April 24, 1965, mme owo ẹma ẹfiak ẹdomo ndibọ ukara. N̄kpọ ikememke ini oro, edi ikọt Jehovah ẹma ẹka iso ẹwak. Ke 1970, esop 63 ẹkedu, mme asuanetop 3,378 ẹnyụn̄ ẹdu n̄ko. Mbahade iba ke otu emi  ẹkedụk esop ọtọn̄ọde ke 1965 esịm 1970. N̄wedisua 1972 ọkọdọhọ ete: “Nsio nsio owo ẹkedụk esop: Mme ọdiọn̄ o-moto, mme ọtọin̄wan̄, mme awatusụn̄, nta mme abatokụk, mme ọkọkufọk, mme anamusọ eto, mme ekpeibet, mme abia edet, idem ye n̄kani ikpọ owo ukara; ima emi mmọ ẹmade Jehovah ye akpanikọ akada mmọ edi esop.”