Be ka se isịnede

Be ka udiana n̄kpọ

Be ka se isịnede

Mme Ntiense Jehovah

Efịk

N̄wedisua Mme Ntiense Jehovah 2015

 DOMINICAN REPUBLIC

‘N̄kanam N̄kpọ Nte Ekpe’

Luis Eduardo Montás

‘N̄kanam N̄kpọ Nte Ekpe’
  • AKAMANA KE 1906

  • ANA BAPTISM KE 1947

  • SE IBAN̄ADE ENYE Enye ekedi akwaowo ke n̄ka mbre ukara Rafael Trujillo. Enye ama ekpep akpanikọ onyụn̄ anam n̄kpọ Jehovah tutu enye akpa ke 2000.

LUIS ekedi iman Trujillo onyụn̄ edi akama-okụk n̄ka mbre ukara emi ẹkotde Dominican Party. N̄ka mbre ukara Trujillo ekedi emi. Edi Luis ama enen̄ede asua se ẹkenamde ke n̄ka mbre ukara Trujillo ntre enye ama odomo ndiwọrọ ediwak ini, edi Trujillo ikenyịmeke.

Ke ini Trujillo okowotde nditọeka Luis iba, Luis ama odomo ndiwot enye utịm ikaba. Edi akananam owo idiọn̄ọke ke enye etiene esịn ubọk ke n̄kpọ emi. Enye Luis ama esikam aka ndikọk ibọk n̄wot Trujillo sia enye ọkọdọhọ ke Trujillo “anam n̄kpọ nte unam ikọt onyụn̄ okụt idem esie ikpọn̄.” Ke ufọk abiaibọk kiet ke enye okokụt n̄wed “The Truth Shall Make You Free” ke okpokoro onyụn̄ emen ọtọn̄ọ ndikot. N̄wed emi ama enem enye tutu enye emen ọnyọn̄ okokot ama. Nte ini akade, enye ama edikụt ke akpanikọ emi imọ ikoyomde ekedi oro.

Ke ini Luis akakade Ciudad Trujillo, enye ama odụk mbono  esop Mme Ntiense Jehovah onyụn̄ ọbọ ediwak n̄wed ye magazine. Enye ama okot kpukpru se enye ọkọbọde ofụri okoneyo oro ekem ọdọhọ ẹdikpep imọ Bible. Nte enye osụk ekpepde n̄kpọ, enye ama ebiere ndikpọn̄ ukara Trujillo. Ke ini Trujillo okokopde, enye ama ọdọhọ Luis ke imọn̄ inam enye edi isụn̄utom Dominican Republic ke Puerto Rico. Luis ama esịn, okposụkedi emi enye ọkọdiọn̄ọde ke ẹmọn̄ ẹkọbọ imọ edieke imọ mînyịmeke.

Luis ọkọdọhọ ete: “Idụhe se owo mîkanamke mi. Ukara ete emi ẹma ẹkọk afia ẹnọ mi ke kpukpru usụn̄. Edi mma mbiere ke ndifiakke mbịne se mma n̄kosion̄o ubọk n̄kpọn̄ ke ererimbot.” Luis ama esịn idem ọkwọrọ ikọ tutu mme oku Catholic ke edem mmọ ẹkot enye “ọkwọrọikọ.” Enye ama ana baptism ke October 5, 1947, oro edi, ọfiọn̄ itiokiet toto ke akpa usen emi enye okodụkde mbono esop.

Ke Luis ama akana baptism ama, ẹma ẹyom enye ẹmụm ẹkekọbi ke ebiet emi enye edisịnede ikpọn̄. Ẹma ẹdomo ndiwot enye ediwak ini. Edi ini ekededi emi ẹmụmde enye ẹka esop, enye ama esida ifet oro ọkwọrọ ikọ. Luis ọkọdọhọ ete: “N̄kanam n̄kpọ uko uko nte ekpe ke ini n̄kwọrọde ikọ nnọ mmọ. Esịt esinem ini mi ini ekededi oro ntide n̄kpọ emi.”

Mbon obio mme Luis ẹma ẹdiọn̄ọ ke enye edi ata owo Abasi. Ke 1994, n̄wedmbụk n̄kpọntịbe Dominican Republic emi ẹkotde El Siglo ama etịn̄ n̄kpọ aban̄a Luis. Enye ọkọdọhọ ete: “Mbon San Cristobal ẹdiọn̄ọ ke Luis Eduardo Montás edi owo emi esisịnde idem anam n̄kpọ. Enye edi ata eti owo, esitua owo mbọm, onyụn̄ etie emem emem. Utom ukwọrọikọ emi enye anamde tọn̄ọ enye ekedi Christian anam mbon San Cristobal ẹdiọn̄ọ enye ntem ẹnyụn̄ ẹtịn̄ kpukpru nti ikọ emi ẹban̄a enye.”