Nte oyomde okụbọde

Mek usem

Be ka udiana n̄kpọ

Be ka se isịnede

Be ka se isịnede

Mme Ntiense Jehovah

Efịk

N̄wedisua Mme Ntiense Jehovah 2015

 DOMINICAN REPUBLIC

Ibak Ibak Ukọbọ

Ibak Ibak Ukọbọ

“Ẹyetre Ufọkabasi Mmọ”

Borbonio Aybar akana baptism ke January 19, 1955. Ini oro, ẹma ẹtre utom Mme Ntiense Jehovah ke idụt oro. Ke enye ama akana baptism ama, enye ama ekpep ediwak owo Bible ke Monte Adentro ye Santiago. Ke ini ẹkenyịmede ẹfiak ẹnam utom ke 1956, n̄wan esie ye ndusụk mbon emi enye ekesikpepde Bible ẹma ẹna baptism.

Ke ufọt ufọt July 1957, ikpọ owo ukara ye mbio obio ẹma ẹsop idem ke Salcedo man ẹbiat Mme Ntiense Jehovah enyịn̄. Brọda Aybar ọdọhọ ete: “Francisco Prats-Ramírez eketịn̄ ikọ akan ke mboho oro. Prats-Ramírez ọkọdọhọ ete, ‘Usen ifan̄ kpọt ayak, ẹyetre ufọkabasi mmọ.’” Ke usen ifan̄ kpọt ẹbede, ke July 19, 1957, mme bodisi ẹma ẹmụm kpukpru Mme Ntiense Jehovah ke Blanco Arriba, El Jobo, Los Cacaos, ye Monte Adentro.

Brọda Aybar ọdọhọ ete: “Ẹma ẹtiene ẹmụm mi n̄ko. Ẹma ẹtan̄ nnyịn ẹka n̄kponn̄kan itie mbonekọn̄ emi odude ke Salcedo. Ndondo emi isịmde do, etubom ekọn̄ kiet emi ekekerede Saladín ama etịm mi etieti. Nte enye okosụk an̄wanade ndisịn nnyịn ndịk ke idem, enye ama ayat esịt, etịn̄ ikọ, osion̄o enyịn. Ekem ẹma ẹnam nnyịn ida ke udịm iba; irenowo ke n̄kan̄ kiet, iban ke n̄kan̄ kiet. Mbon ukpeme do ẹma ẹtọn̄ọ nditịm irenowo nnyụn̄ ntịgha mmọ ke ikpat, ẹnyụn̄ ẹkama eto ẹtịm iban. Nte mmọ ẹnamde emi ke ẹfiori, ‘Ndi owo Catholic, mmesiwot owo-o.’”

“Mmokot Bible nnyụn̄ mfiọk ke Jehovah edi Abasi”

Ẹma ẹdia Brọda Aybar isop ẹnyụn̄ ẹbiere n̄kpọkọbi ọfiọn̄ ita ẹnọ enye. Enye ọdọhọ ete: “Ini emi ikodude ke ufọk-n̄kpọkọbi, akwa owoekọn̄ emi ekekerede Santos  Mélido Marte ama edise nnyịn. Enye ama ọdọhọ nnyịn ete: ‘Mmokot Bible nnyụn̄ mfiọk ke Jehovah edi Abasi. Inyeneke se mbufo ẹduede emi akpanamde ẹsịn mbufo mi, edi n̄kemeke ndin̄wam mbufo sia mme bishop Catholic ẹnam ẹkọbi mbufo. Mmọ ikpọn̄ ye ‘ọbọn̄ owo’ (Trujillo) ẹkeme ndinam ẹsana mbufo ẹyak.’”

“Ọwọrọ Afo Edi Etubom Mmọ?”

Ẹma ẹtiene ẹmụm eyen Fidelia Jiménez ye nditọ eyeneka esie. Fidelia ekesikpep n̄kpọ ye kpukpru mmọ. Owo ikomụmke Fidelia ke nsonso oro, edi enye ama emen idem aka ọkọdọhọ ẹkọbi imọ. Enye okoyom emi ọsọn̄ọ mbon emi ẹma ẹkemomụm idem. Ini oro, akwa owoekọn̄ kiet emi ekekerede Ludovino Fernández ama edi ndise ufọk-n̄kpọkọbi oro. N̄kụtidem ye ibak ọbọn̄ emi ama ọwọrọ etop. Enye ama ọdọhọ ẹda Fidelia ẹsọk imọ onyụn̄ obụp enye ete, “Ọwọrọ afo edi etubom mmọ?”

Fidelia ama ọbọrọ ete: “Ihih-o, mbufo ẹkam ẹdi.”

Fernández ama ọdọhọ ete: “Ọfọn, ọwọrọ edi pastọ.”

Fidelia ete: “Ihih-o, Jesus edi pastọ.”

Fernández ama obụp enye ete: “Idịghe afo anam ẹkọbi kpukpru mme owo emi? N̄kọ afo ekesikpep mmọ Bible?”

Fidelia ama ọbọrọ ete: “Ihih-o, Bible anam ẹkọbi mmọ sia mmọ ẹkenam se ẹkekpepde ke Bible.”

Kpa idahaoro, Pedro Germán ye Negro Jiménez ẹma ẹdisan̄a ẹbe ke kọridọ oro. Negro Jiménez ekedi eyen eyeneka ete Fidelia. Ẹkesio mmọ ke ufọk-n̄kpọkọbi emi mmọ ẹkesịnede ikpọn̄ ẹka ndidọn̄ ye mbon n̄kpọkọbi en̄wen. Iyịp ama ọyọhọ ọfọn̄idem Negro, enyịn Pedro onyụn̄ efịt etieti. Fidelia ama ọdiọn̄ọ ke ẹma ẹtịm mmọ etieti, ntre enye ama obụp akwa owoekọn̄ oro ete, “Ndi  esinam n̄kpọ ntem ye nti owo emi ẹbakde Abasi?” Fernández ama okụt ke idụhe se ikpanamde man ndịk anam Fidelia, ntre enye ama ọdọhọ ẹfiak ẹmen enye ẹkesịn ke ufọk-n̄kpọkọbi.

Akana ikọt Jehovah ẹnyene uko ke ini ukọbọ oro. Mmọ ẹma ẹnyụn̄ ẹnyene! Mbon ukara ẹma ẹdiọn̄ọ ke mmọ ẹnyene uko. Ke uwụtn̄kpọ, ke July 31, 1957, Luis Arzeno Colón, emi adaibuot ukara ekesidọn̄de ekese n̄kpọ ama ewet leta ọnọ akwaowo emi esede aban̄a mbubehe Dominican Republic ete: “Kpa ye emi mbon ufọkmbet ẹkedọhọde Mme Ntiense Jehovah ẹtre utom mmọ sia ukara mînyịmeke mmọ ẹnam utom mmọ aba, ata ediwak mmọ ke ẹkaka iso ẹnam.”