Nte oyomde okụbọde

Mek usem

Be ka udiana n̄kpọ

Be ka se isịnede

Be ka se isịnede

Mme Ntiense Jehovah

Efịk

N̄wedisua Mme Ntiense Jehovah 2015

 DOMINICAN REPUBLIC

Ẹyom Uwak Mme Ọkwọrọikọ

Ẹyom Uwak Mme Ọkwọrọikọ

Ẹkwọrọ Ikọ Ẹsịm N̄kpri Obio

Nte ini akakade, mme isụn̄utom en̄wen ẹma ẹdisịm: Richard ye Belva Stoddard ẹketo Bolivia ẹdi; Jesse ye Lynn Cantwell ẹto Colombia ẹdi. Mme isụn̄utom en̄wen emi ẹkedide ẹkedi Pete Paschal, ye Amos ye Barbara Parker. Mme isụn̄utom emi ẹma ẹnen̄ede ẹn̄wam ke utom ukwọrọikọ. Etisịm 1973, ẹma ẹkwọrọ ikọ ẹnyụn̄ ẹkpep ata ediwak owo n̄kpọ ke ikpọ obio ke Dominican Republic, edi owo ikọkwọrọke kan̄a inọ mbon emi ẹdụn̄de ke n̄kpri obio. Ntre, ẹma ẹtọn̄ọ ndise nte ẹdinamde Ikọ Abasi ẹsịm mmọ do. Ke ini ẹkeyomde mme owo emi ẹdikade n̄kpri obio ikọkwọrọ ikọ ke ọfiọn̄ iba, asiakusụn̄ ofụri ini 19 ẹma ẹnyịme ndika. Ọtọn̄ọde ke December 1973 tutu esịm January 1977, ẹma ẹsinọ mme asiakusụn̄ ẹka ebiet emi owo mîkenen̄ekede ikwọrọ ikọ m̀mê emi owo mîkwọrọke-kwọrọ.

“Ke ini mmọ ẹbọde n̄wed, mmọ ẹyenọ nnyịn unen, nsenunen, ye mfri”

Asiakusụn̄ kiet emi eketienede ọkọkwọrọ ikọ ke utọ itie emi ọkọdọhọ ete: “Ima isikwọrọ ikọ akpa usen inyụn̄ inọ mme owo n̄wed. Ọyọhọ usen iba, ima isifiak ikese mbon emi ẹkemade ukwọrọikọ nnyịn. Mme owo do ikenyeneke okụk. Ke ini mmọ ẹbọde n̄wed, mmọ ẹyenọ nnyịn unen, nsenunen, ye mfri. Jehovah ikayakke inana se idiade.” Akpa ini emi ẹkekotde Bible ẹnọ ata ediwak owo ekedi oro. Ndusụk ini, mme pastọ ufọkabasi ẹkesikpep mme owo ke Jehovah edi Devil. Idem ama  akpa mmọ ndikop utọ itien̄wed nte Psalm 83:18, emi ọdọhọde ete: “Afo, emi enyịn̄ fo edide Jehovah, afo ikpọn̄ edi Ata Edikon̄ ke ofụri isọn̄.” Ke ndusụk ebiet, mbon emi ẹkekopde ukwọrọikọ ẹma ẹwak tutu ẹtọn̄ọ ndinọ utịn̄ikọ ofụri owo.

Mbufa Isụn̄utom Ẹdi Ẹnyụn̄ Ẹbọp Obufa N̄kọk Itieutom

Ke September 1979, Abigail Pérez ye Georgina an̄wan esie emi ẹkedide mme isụn̄utom ẹma ẹdisịm. Ẹkenọ mmọ ẹkenam utom circuit. Ekem ke 1987, Tom ye Shirley Dean, emi ẹkekụrede n̄wed ke Gilead ẹma ẹdidian ubọk ẹnam utom ukwọrọikọ. Ediwak mbon emi ẹkenamde utom ofụri ini ke Puerto Rico ẹma ẹdi n̄ko. Ke August 1988, ẹma ẹnọ Reiner Thompson ye Jeanne an̄wan esie ẹdi Dominican Republic. Ọyọhọ itie ition emi ẹkenọde mmọ ẹkenam utom isụn̄utom ekedi oro.

Ke 1989, ibat mme asuanetop ama ọdọk esịm 11,081, ukpepn̄kpọ Bible emi ẹkenịmde onyụn̄ edi 20,494. Emi ama owụt ke nte ini akade, ediwak owo ẹyedụk esop. Edi idimemke utom inọ nditọete sia n̄kọk itieutom emi okodude do ikekemke se ẹdade ẹnam utọ akwa utom oro. Utom ama okpon akaha ini oro. Reiner Thompson ọdọhọ ete: “N̄kọk itieutom ikekemke owo aba. Akana ẹkeyom ufọk ẹdian do ẹnyụn̄ ẹyom nsio nsio itie emi ẹdibonde mme n̄kpọ.”

Reiner adian do ete: “Ikememke utom ndikụt eti itie mbọp obufa n̄kọk itieutom. Anam-mbubehe kiet ama okop ke nnyịn ke iyom isọn̄ onyụn̄ edi ebịne nnyịn edidọhọ ke imenyene isọn̄ ke eti itie emi iyomde ndinyam, edi ke idinyam inọ Mme Ntiense Jehovah kpọt. Enye  ama ọdọhọ ke ini imọ ikenyenede akamba itie ukịmọfọn̄, ke ewetn̄wed imọ ye ediwak mbonutom imọ ẹkedi Mme Ntiense Jehovah. Imọ ima ikụt nte ke ofụri ini emi mmọ ẹnamde utom ye imọ, mmọ ẹma ẹsinam akpanikọ ẹnyụn̄ ẹkpono owo ntre imọ ima ima mmọ etieti. Sia enye okokponode Mme Ntiense Jehovah, enye ama anyam isọn̄ oro enen̄ede emem urua ọnọ nnyịn.” Ima idep isọn̄ emi ke December 1988 inyụn̄ idep isọn̄ ita en̄wen ke mbọhọ oro idian nte ini akakade. Isọn̄ oro ye enye emi ẹkedade ẹbọp Itie Mbono do n̄ko ẹkedi acre 22.

Ediwak nditọete emi ẹtode Dominican Republic ye mbon emi ẹtode esenidụt ẹma ẹdian ubọk ẹbọp obufa n̄kọk itieutom ye Itie Mbono. Ẹma ẹyak itie mbiba emi ẹnọ Abasi ke November 1996. Carey Barber, Theodore Jaracz, ye Gerrit Lösch emi ẹkesịnede ke Otu Emi Ẹsede Ẹban̄a Utom Mme Ntiense Jehovah ẹkedi ẹdinọ utịn̄ikọ ke Saturday oro. Ke ndan̄nsiere, ẹma ẹnịm ikpọ mboho iba ke n̄kponn̄kan an̄wambre iba ke idụt oro. Isenowo emi ẹwakde ẹbe 10,000 ẹma ẹdi ẹdise obufa n̄kọk itieutom oro.

‘Ẹwọrọ Ẹken̄wam ke Macedonia’

Idụhe nte ẹdibụkde mbụk ikọt Jehovah ke Dominican Republic ndien owo itịn̄ke ke ediwak owo ẹma ẹka ẹken̄wam ke ebiet emi ẹyomde un̄wam ke idụt oro. Nditọete ẹma ẹkop ke mme owo do ẹma Ikọ Abasi etieti, ke owo onyụn̄ ekeme ndinyene ediwak ukpepn̄kpọ Bible, ntre ediwak mmọ ẹma ẹwọrọ ẹka do ke utịt utịt iduọk isua 1980 man ẹken̄wam, nte Paul akanamde ke Macedonia. (Utom 16:9) Mmọ ẹma ẹsitịn̄ ẹnọ mbon en̄wen nte utom ukwọrọikọ ekenemde ke Dominican Republic. Se mmọ ẹketịn̄de ama anam ata ediwak owo ẹtiene ẹwọrọ ẹka ke iduọk isua 1990.

 Stevan Norager ye Miriam an̄wan esie emi ẹtode Denmark ẹnam utom ke Dominican Republic tọn̄ọ ke 2001. Mbemiso emi, Miriam ye adiahaeka esie ẹma ẹkaka do ẹkekwọrọ ikọ ke isua kiet ye ubak. Nso ikanam ebe ye n̄wan emi ẹwọrọ ẹka idụt emi ẹsemde usem en̄wen, emi uwem mîtiehe nte etiede ke edem mmọ? Miriam ọdọhọ ete: “Ami ye ebe mi ito ufọk emi ẹmade n̄kpọ Abasi etieti. Mme ete ye eka nnyịn ẹkedi mme akpan asiakusụn̄ ke ini mmọ ẹkedide uyen, ẹnyụn̄ ẹdi mme asiakusụn̄ ofụri ini ke ẹma ẹkenyene nditọ. Mmọ ẹsidọhọ nnyịn isịn idem inam utom ofụri ini emi inọ Jehovah.”

Stevan ye Miriam ẹdi mme akpan asiakusụn̄ toto ke 2006, ẹnyụn̄ ẹn̄wam ediwak owo ẹdụk esop. Stevan ọdọhọ ete: “Nnyịn idikemeke ndibụk nte Abasi ọdiọn̄de nnyịn. Kpa ye oro isidọn̄ọde, n̄kpọ esinyụn̄ ọsọn̄de ndusụk ini, nte Jehovah anamde n̄kpọ ye nnyịn ye nte esịt  adatde nnyịn ke ndin̄wam mme owo ẹdiọn̄ọ enye ẹnyụn̄ ẹma enye iyakke ikere utọ n̄kpọ oro. Imenyene ediwak nti ufan n̄ko. Nnyịn ndidi Dominican Republic ekpep nnyịn ndisụhọde idem nnyụn̄ nnyene ime. Imenen̄ede ibuọt idem ye Jehovah sia nnyịn mîyomke ikpọ n̄kpọ.”

Jennifer Joy anam utom mi ebe isua 20, onyụn̄ an̄wam ekpep mme owo usem idiọn̄ọ

Ediwak nditọete iban emi mîdọhọ ebe ẹwọrọ ẹkekwọrọ ikọ ke Dominican Republic. Jennifer Joy esịne ke otu emi. Ke 1992, ke ini Jennifer akakade ekese Edith White, adiahaeka eka esie emi ekedide isụn̄utom do, enye ama okụt ufọn emi utom ukwọrọikọ anamde ọnọ mme owo. Enye ama okụt ediwak nditọete iban emi ẹtode esenidụt ẹdikwọrọ ikọ do. Jennifer ọdọhọ ete: “Bụt  ama esinam mi etieti, n̄konyụn̄ n̄kereke ke mmekeme ndinam utọ utom emi. Edi mma n̄kere, ‘N̄kọ mme owo ẹnam emi, ọwọrọ ami n̄ko mmekeme ndinam.’”

Ke nsonso oro, Jennifer akaduak nditie isua kiet. Edi enye odu ke Dominican Republic ebe isua 20 idahaemi. Enye an̄wam ata ediwak nditọ ukpepn̄kpọ Bible esie ẹdinam n̄kpọ Jehovah. Jennifer n̄ko ama an̄wam ẹtọn̄ọ ndikpep usem idiọn̄ọ, esinyụn̄ ewet se ẹdidade ikpep mme owo usem idiọn̄ọ.

‘Jehovah ke ese aban̄a mi tutu esịm emi, nso ikpanam mi n̄kere m̀mê enye oyosụk anam ntre isua en̄wen?’

Nso ke Jennifer anam ese aban̄a idem? Enye ọdọhọ ete: “Kpukpru isua, mmesika n̄kodu ke Canada ọfiọn̄ ifan̄ nnam utom. Mmanam nsio nsio utom. Mmesisio ndise, nyet ndise, nyet ndom mbakara ke ufọk, n̄kpọri itie utom, nnam ikan̄ moto, nnyụn̄ nnam carpet. Mmesimen mme owo nsan̄a n̄wụt ndiye itie, n̄n̄wam mme owo emi ẹyomde ndika isan̄, n̄kpep mme owo Ikọmbakara, nnyụn̄ n̄kabade ikọ.” Jennifer ọdọhọ ke imọ itie nte nditọ Israel, ke ini mmọ ẹkedude ke wilderness. Enye onyụn̄ adian do ete: “Mmọ ẹma ẹnịm kpukpru ikọ Jehovah. Enye ọkọdọhọ ke imọ iyese iban̄a mmọ, ama onyụn̄ anam ntre. Mmọ ẹma ẹnyene se ẹdiade kpukpru usen, ọfọn̄ mmọ ye ikpaukot mmọ ikatahake. (Deut. 8:3-4) Jehovah ọn̄wọn̄ọ ke iyese iban̄a nnyịn n̄ko. (Matt. 6:33) Enye ke ese aban̄a mi tutu esịm emi, nso ikpanam mi n̄kere m̀mê enye oyosụk anam ntre isua en̄wen?”

N̄kpọ nte mme ọkwọrọikọ 1,000 ẹto nsio nsio itie nte Austria, Japan, Poland, Puerto Rico, Russia, Spain, Sweden, Taiwan, ye United States ẹdika do ẹkekwọrọ ikọ.  Mme owo emi ẹtode nsio nsio idụt 30 ẹka do ẹken̄wam ẹdu ke mme esop emi ẹsemde Usem Idiọn̄ọ Mbon America, Chinese, Haitian Creole, Ikọmbakara, Italian, Russian, ye Spanish. Mmọ ẹtịn̄ ukem ikọ emi apostle Peter eketịn̄de ke Mark 10:28 ete: “Sese! Nnyịn ima ikpọn̄ kpukpru n̄kpọ itiene fi.”