Nte oyomde okụbọde

Mek usem

Be ka udiana n̄kpọ

Be ka se isịnede

Be ka se isịnede

Mme Ntiense Jehovah

Efịk

N̄wedisua Mme Ntiense Jehovah 2015

 DOMINICAN REPUBLIC

Ẹyọ Tutu Ẹdibọ Emem

Ẹyọ Tutu Ẹdibọ Emem

Ẹda Mbufiọk Ẹkwọrọ Ikọ

Rafael Pared, emi odude ke Bethel idahaemi ye Francia an̄wan esie, ekedi asuanetop ke 1957 ke ini edide isua 18. Enye eti nte mme ndedịbe bodisi ẹkesitienede enye ke ini enye ọkwọrọde ikọ, ke ẹyom usụn̄ nte ẹkpemụmde enye ye mbon emi ẹsan̄ade ye enye. Rafael ọdọhọ  ete: “Ndusụk ini ima isidụk efak emi ekperede, isan̄a esa esa ifrọ ọkọ mbak owo idimụm nnyịn.” Andrea Almánzar etịn̄ n̄ko se enye ye mbon en̄wen ẹkesinamde man owo idimụm mmọ. Enye ọdọhọ ete: “Ikesinam n̄kpọ ke ifiọk. Ke ini ikade ukwọrọikọ, ekesidi ima ikwọrọ ufọk kiet, nnyịn ibe ufọk duop mbemiso ifiakde ikwọrọ ufọk en̄wen.”

Ẹbọ Emem Ndien!

Ukara Trujillo ama ekpere ndisịm isua 30 ke 1959, edi n̄kpọ iketiehe aba nte eketiede ke ntọn̄ọ. Ke June 14, 1959, nditọ Dominican Republic emi ẹkebịnde ẹsio ke obio ẹma ẹfiak ẹdi ndibọ Trujillo ukara edi mmọ ikekemeke. Kpa ye oro ẹkewotde ndusụk mmọ ẹnyụn̄ ẹkọbide mbon eken, mme asua Trujillo ẹma ẹdiọn̄ọ ke usen kiet usen kiet ẹyebọ enye ukara, ntre mmọ ẹma ẹdọdiọn̄ ẹsịn ntịme ye enye.

Ufọkabasi Catholic ẹma ẹda ye Trujillo ke n̄kpọ nte isua 30 emi, edi ke January 25, 1960, ikpọ owo mmọ ẹma ẹwet leta ẹdọhọ ke mmimọ imaha nte ukara Trujillo efịkde mme owo. Bernardo Vega, eyen Dominican Republic emi edide ewetmbụk ọdọhọ ete: “Ufọkabasi Catholic ẹketọn̄ọ ndisua ukara Trujillo ke ini nsio nsio owo ẹkedomode ndibọ ukara ke June 1959. Idiọk usụn̄ emi ẹkenamde n̄kpọ ye mbon emi ẹkedomode ndibọ ukara mi ye nte ẹkedomode ndikụbi nditọ obio emi ẹsuade ukara inua ama onyụn̄ anam Ufọkabasi ẹsua enye.”

Ke May 1960, ukara ẹma ẹnyịme Mme Ntiense Jehovah ẹfiak ẹtọn̄ọ utom mmọ. Ke ẹma ẹkefịk mmọ ke ediwak isua, mmọ ẹma ẹbọ emem ndien. Se ikakpade owo idem ikan edi ke enye Trujillo ke idemesie akanam emi ke Ufọkabasi Catholic ẹma ẹketọn̄ọ ndisua enye.