Be ka se isịnede

Be ka udiana n̄kpọ

Be ka se isịnede

Mme Ntiense Jehovah

Efịk

N̄wedisua Mme Ntiense Jehovah 2015

 DOMINICAN REPUBLIC

Ẹyak Ẹtọn̄ọ Utom, Ekem Ẹfiak Ẹtre

Ẹyak Ẹtọn̄ọ Utom, Ekem Ẹfiak Ẹtre

Ẹnyịme Ẹfiak Ẹtọn̄ọ Utom

Mbon ukara ẹma ẹwot Manuel Hierrezuelo ke ini ẹsụk ẹbụpde enye mbụme

Lennart ye Virginia Johnson, ye Roy ye Juanita Brandt emi ẹkedide isụn̄utom ẹkesụk ẹdodu ke Dominican Republic ofụri ini emi ẹketrede utom ke idụt oro. Lennart ọdọhọ ete: “Ukara ẹma ẹdọhọ mi ye Roy Brandt ẹte idi ke iyom ndibụp nnyịn n̄kpọ. Ikpọ owo ukara Trujillo ẹma ẹdọdọhọ Brọda Manuel Hierrezuelo edi edikụt mmimọ.” Mmọ ẹma ẹwot Manuel ke ini ẹkesụk ẹbụpde enye mbụme, edi enye ama ọsọn̄ọ ada ye Abasi tutu akpa. Edi eke Lennart and Roy eketie didie? Lennart aka iso obụk ete: “Ini isịmde do, iketie isio isio ibọrọ mbụme, ndien etie mi nte ẹma ẹmụm se iketịn̄de ẹdọn̄ ke n̄kpọ umụmikọ. Owo ikanamke n̄kpọ en̄wen ikan oro. Edi ke ọfiọn̄ iba ẹbede, mme n̄wedmbụk n̄kpọntịbe ẹma ẹdọhọ ke Trujillo enyịme Mme Ntiense Jehovah ẹnam utom mmọ, ke imekeme ndifiak ntọn̄ọ ukwọrọikọ.”

Mbemiso ẹtrede utom ke 1950, mme asuanetop 261 ẹkedu ke Dominican Republic. Ke ini ẹkenyịmede ẹfiak ẹtọn̄ọ utom ke August 1956, mme asuanetop 522 ẹkedu. Ofụri isua itiokiet emi ẹkebede, ẹma ẹkọbi nditọete nnyịn, ẹsiyep mmọ, owo ikonyụn̄ iyakke mmọ ẹkwọrọ ikọ m̀mê ẹnịm mbono esop. Esịt ama enem mmọ ndidiọn̄ọ ke mmimọ imekeme ndifiak nsan̄a n̄kwọrọ ikọ nnyụn̄ nnịm mbono esop.

Ikọt Jehovah ẹkenam n̄kpọ didie ke ini ẹnyịmede mmọ ẹfiak ẹtọn̄ọ utom? Inikiet inikiet, mmọ ẹma ẹtọn̄ọ utom! Mmọ ẹma ẹyom mme itie emi ẹkpenịmde mbono esop ẹnyụn̄ ẹnam mbufa map efakutom ye n̄kpọ udọn̄ leta esop. Nditọete ẹma ẹtọn̄ọ nditobo nnyụn̄ mbọ  n̄wed, ndien emi ama enem mmọ etieti. Mmọ ẹma ẹsịn idem ẹkwọrọ ikọ, ntre ke November 1956, mme asuanetop 612 ẹkekwọrọ ikọ.

Mme Oku Catholic Ẹnam Ẹsua Ikọt Abasi

Leta Toledano ama owụt se ẹdinamde mbak n̄wed nnyịn ididụk Dominican Republic

Edi inikiet inikiet, mme oku Catholic ẹma ẹtọn̄ọ ndinam n̄kpọ man ẹbiat Mme Ntiense Jehovah enyịn̄. Mmọ ẹkeda odudu n̄wed oro Trujillo ẹkesịnde ubọk ye Pope ẹdọhọ ukara okûyak Mme Ntiense Jehovah ẹdu aba ke Dominican Republic. Oku emi ekekerede Oscar Robles Toledano ama ewet leta ọnọ akwaowo ukara emi ekekerede Virgilio Álvarez Pina, ọdọhọ yak ukara ẹn̄wam imọ ke imọ iyom “ndinam mbon Dominican Republic ẹdiọn̄ọ idiọk ibak emi ‘Mme Ntiense Jehovah’ ẹsinamde.”

Toledano ọkọdọhọ ke akpan n̄kpọ emi imọ iyomde ndinam edi “nditre mme owo ndikop ukwọrọikọ Mme Ntiense Jehovah.” Enye ama ewet n̄ko ete owo okûyak n̄wed Mme Ntiense Jehovah ndomokiet odụk  Dominican Republic “akpan akpan n̄wed ‘The Truth Shall Make You Free’ ye Enyọn̄-Ukpeme.”

Ẹfiak Ẹtre Utom

Nditọufọk mme oku emi ẹkedide ikpọ owo ke ukara Trujillo ẹma ẹtiene ẹbiat Mme Ntiense enyịn̄. Francisco Prats-Ramírez, emi ekedide adaibuot n̄ka mbre ukara emi ẹkekotde Dominican Party, ama ewet leta ọnọ Trujillo ke June 1957 ete: “Ke ndiomi nsio nsio mboho ndinam ẹtre ukpepn̄kpọ Mme Ntiense Jehovah emi abiatde mme owo mînyụn̄ iyakke mmọ ẹma obio emana mmọ.”

N̄wed emi ẹkotde Trujillo—Little Caesar of the Caribbean owụt ke ẹma ẹbiat Mme Ntiense enyịn̄. Enye ọdọhọ ete: “Ke ini ndaeyo 1957, n̄wedmbụk n̄kpọntịbe Dominican Republic ama etịn̄ nsio nsio ikọ emi ikpọ owo ukara ẹkedoride Mme Ntiense Jehovah ẹte ke mmọ ‘ẹsọn̄ ibuot ye ukara ẹnyụn̄ ẹsan̄a ẹbiat mme owo.’ Ẹketọn̄ọ ndikọbọ mmọ usen emi oku n̄ka Jesuit emi ekekerede Mariano Vásquez Sanz akadade ke ufọkutom radio Trujillo emi ẹkotde La Voz Dominicana [uyo mbon Dominican Republic], ọdọhọ ke mmọ ẹdi nditọufọk mbon Communist onyụn̄ ọdọhọ ke mmọ ‘idiọn̄ọke idem, ẹdi mbon n̄kari, mme abiatibet, mme asua, ye mbon mbia.’ Ke oro ebede, ikpọ bishop iba, Ricardo Pittini ye Octavio Antonio Beras, ẹma ẹwet leta ẹnyụn̄ ẹsịn ubọk, ẹdọhọ mme oku ẹkpeme mbon ufọkabasi mmọ mbak ẹdikpep mmọ ‘enyene-ndịk isio ukpepn̄kpọ.’”

Mbon Catholic ye ukara ẹma ẹdian ubọk ẹbiat Mme Ntiense enyịn̄. Ke July, mbon ufọkmbet Dominican Republic ẹma ẹwụk Mme Ntiense Jehovah ẹte ẹtre utom mmọ. Ibịghike, ẹma ẹtọn̄ọ nditịm nditọete nnyịn, mme bodisi ẹnyụn̄ ẹtụhọde mmọ. Ẹma ẹmụm nditọete 150.